Munda Bible
ଏଜ୍ରା 8
ଦାସିୟଃ ନାଙ୍ଗ୍ ତଲ୍ ଇଦିକାନ୍ ହଡ଼କଆଃ ଗାନ୍ତି
ଅର୍ତ୍ତକ୍ଷସ୍ତ ରାଜାରାଃ ରାଇଜ୍ତାନ୍ ଦିପିଲିରେ ଇସ୍ରାଏଲ୍ରେନ୍ ଆପୁକଆଃ କିଲିରେନ୍ ଆଗୁଆଇ କିଲିକ ଆଇଙ୍ଗ୍ଲଃ ବାବିଲୋନ୍ଏତେ ହିଜୁଃରୁହାଡ଼ାକାନ୍ କିଲିକ ହବାଅଃତାନା, ଫିନ୍ହସ୍ କିଲିଏତେ ଗେର୍ଶୋମ୍, ଇଥାମର୍ କିଲିଏତେ ଦାନିୟେଲ୍, ଦାଉଦ୍ଆଃ କିଲିଏତେ ଶିଖନିୟରାଃ ହନ୍ତେକଡ଼ା ହଟୁଶ୍। ଶିଖନିୟ ବାଂଶ୍ ରେନ୍ ପାରୋଶ୍ କିଲିଏତେ ଜିଖରିୟ ଓଡ଼ୋଃ ଆୟାଃଲଃ ୧୫୦ ଝାନ୍ ହଡ଼କଆଃ ଗାନ୍ତି ହବାୟାନା। ପହତ୍ ମୋୟାବ୍ କିଲିଏତେ ଯେରାହିୟରାଃ ହନ୍ତେକଡ଼ା ଇଲିହୁଏନିୟ ଓଡ଼ୋଃ ଆୟାଃଲଃ ୨୦୦ ଝାନ୍ ହଡ଼କ। ଯାଟୁ କିଲିଏତେ ଯହଜିୟେଲ୍ରାଃ ହନ୍ତେକଡ଼ା ଶିଖନିୟ ଓଡ଼ୋଃ ଆୟାଃଲଃ ୩୦୦ ଝାନ୍ ହଡ଼କ। ଆଦିନ୍ କିଲିଏତେ ଯୋନାଥନ୍ରାଃ ହନ୍ତେକଡ଼ା ଏବଦ୍ ଓଡ଼ୋଃ ଆୟାଲଃ ବାର୍ହିସି ଗେଲେୟା ଝାନ୍ ହଡ଼କ। ଏଲମ୍ କିଲିଏତେ ଅଥଲିୟରାଃ ହନ୍ତେକଡ଼ା ଯିଶାୟାହ ଓଡ଼ୋଃ ଆୟାଃଲଃ ଆପିହିସି ଗେଲେୟା ଝାନ୍ ହଡ଼କ। ଶେଫାତିୟ କିଲିଏତେ ମିଖେଲ୍ରାଃ ହନ୍ତେକଡ଼ା ଜେବଦିୟ ଓଡ଼ୋଃ ଆୟାଃଲଃ ଉପୁନ୍ହିସି ଝାନ୍ ହଡ଼କ। ଯୋୟାବ୍ କିଲିଏତେ ଯିହିୟେଲ୍ରାଃ ହନ୍ତେକଡ଼ା ଓବଦିୟ ଓଡ଼ୋଃ ଆୟାଃଲଃ ୨୧୮ ଝାନ୍ ହଡ଼କ। ବାନି କିଲିଏତେ ଯୋଶିଫିୟରାଃ ହନ୍ତେକଡ଼ା ଶିଲୋମତ୍ ଓଡ଼ୋଃ ଆୟାଃଲଃ ୧୬୦ ଝାନ୍ ହଡ଼କ। ବେବୟ କିଲିଏତେ ବେବୟରାଃ ହନ୍ତେକଡ଼ା ଜିଖରିୟ ଓଡ଼ୋଃ ଆୟାଃଲଃ ବାର୍ହିସି ଅରେୟା ଝାନ୍ ହଡ଼କ। ଅସ୍ଗଦ୍ କିଲିଏତେ ହକାଟନ୍ରାଃ ହନ୍ତେକଡ଼ା ଯୋହାନନ୍ ଓଡ଼ୋଃ ଆୟାଃଲଃ ୧୧୦ ଝାନ୍ ହଡ଼କ। ଅଦୋନିକାମ୍ରାଃ କିଲିଏତେ ଏଲିଫେଲତ୍, ଯିୟେଲ୍ ଓଡ଼ୋଃ ଶମୟିୟ, ଇନ୍କୁଲଃ ଆପିହିସି ହଡ଼କ। ବିଗ୍ବୟରାଃ କିଲିଏତେ ଉଥୟ ଓଡ଼ୋଃ ସକ୍କୁର୍, ଇନ୍କୁଆଃଲଃ ଆପିହିସି ଗେଲେୟା ଝାନ୍ ହଡ଼କ।
ବିନ୍ତିଅଡ଼ାଃ କାମିନାଙ୍ଗ୍ ଏଜ୍ରା ଲେବୀ ହଡ଼କକେ ଦାଣାଁନାମ୍
ଆଇଙ୍ଗ୍ ନେ ହଡ଼କକେ ଅହବାଗାମିନି ନାହିଁ ଗେନାରେ ହୁଣ୍ଡିକେଦ୍କଆଇଙ୍ଗ୍, ଓଡ଼ୋଃ ଏନ୍ତାଃରେ ଆଲେ କୁମ୍ବା ବାଇକେଦ୍ତେ ଆପି ହୁଲାଙ୍ଗ୍ ଜାକେଦ୍ ତାଇକେନାଲେ। ଆଇଙ୍ଗ୍ ହଡ଼କକେ ଓଡ଼ୋଃ ଯାଜାକ୍କକେ ନେଲ୍କେଦ୍କ ଇମ୍ତା ଲେବୀ କିଲିରେନ୍ ଜେତାଏକେ କାଇଙ୍ଗ୍ ନେଲ୍ ନାମ୍କେଦ୍କଆ। ଏନାତେ ଆଇଙ୍ଗ୍ ଏଲିୟାଜାର୍, ଅରିୟେଲ୍, ଶମୟିୟ, ଇଲ୍ନାଥନ୍, ଯାରିବ୍, ଇଲ୍ନାଥନ୍, ନାଥନ୍, ଜିଖରିୟ ଓଡ଼ୋଃ ମଶୁଲ୍ଲମ୍, ନେ ପ୍ରାଚିନ୍କକେ ଏନ୍ତେ ଯୋୟାରିବ୍ ଓଡ଼ୋଃ ଇଲ୍ନାଥନ୍, ସେଣାଁନ୍ ହଡ଼କକେ କେଡ଼ାଆଉ ନାଙ୍ଗ୍ ହଡ଼ କୁଲ୍କେଦ୍କଆଇଙ୍ଗ୍। ଆଇଙ୍ଗ୍ ଇନ୍କୁକେ କାସିଫିଆ ନୁତୁମ୍ ଠାୟାଦ୍ରେନ୍ ଆଗୁଆଇ ହଡ଼ ଇଦ୍ଦୋତାଃତେ କୁଲ୍କେଦ୍କଆଇଙ୍ଗ୍ ଓଡ଼ୋଃ ଆଲେୟାଃ ପାର୍ମେଶ୍ୱାର୍ଆଃ ବିନ୍ତିଅଡ଼ାଃ ନାଙ୍ଗ୍ ଆଲେତାଃତେ ସୁସାର୍ତାନ୍ ହଡ଼କକେ ଆଉକ ନାଙ୍ଗ୍ କାସିଫିଆରେ ତାଇନ୍ତାନ୍ ଇଦ୍ଦୋକେ ଓଡ଼ୋଃ ଆୟାଃ ହାଗାକକେ, ବିନ୍ତିଅଡ଼ାଃ ସୁସାର୍ତାନ୍ ହଡ଼କକେ କାଜିକକାକ ମେନ୍ତେଇଙ୍ଗ୍ ଆଚୁକେଦ୍କଆ। ପାର୍ମେଶ୍ୱାର୍ଆଃ ସାୟାଦ୍ରେୟାଃ ତିଃଇ ଆଲେୟାଃ ଚେତାନ୍ରେ ମେନାଃ ହରାତେ, ଇନ୍କୁ ଆଲେତାଃତେ ଶେରେବିୟ ନୁତୁମ୍ ସେଣାଁନ୍ ହଡ଼କେ, ଆୟାଃ ହନ୍ତେକଡ଼ା ଓଡ଼ୋଃ ହାଗାକ ମେସାକେଦ୍ତେ ଗେଲ୍ଅରେୟା ଝାନ୍ ହଡ଼କକେ ମିସାତେ କୁଲ୍କେଦ୍କଆ। ଶେରେବିୟ ମହଲିରାଃ କିଲିକ, ମହଲି ଇସ୍ରାଏଲ୍ରାଃ ଜାଇହନ୍ ଓଡ଼ୋଃ ଲେବୀରାଃ ହନ୍ତେକଡ଼ା ତାଇକେନାଏ। ଇନ୍କୁ, ହଶ୍ବିୟ ଓଡ଼ୋଃ ମରାରି କିଲିଏତେ ଯିଶାୟାହ, ଆୟାଃ ହାଗାକ ଓଡ଼ୋଃ ଇନ୍କୁଆଃ ହନ୍କ ମେସାକେଦ୍ତେ ମିଦ୍ହିସି ହଡ଼କକେ କୁଲ୍କେଦ୍କଆକ। ଏନ୍ତେ ରାଜା ଦାଉଦ୍ ଓଡ଼ୋଃ ମାପ୍ରାଙ୍ଗ୍ ହାକିମ୍ ହଡ଼କ ଲେବୀ ହଡ଼କଆଃ ସୁସାର୍ କାମିରେ ଦେଙ୍ଗାକ ନାଙ୍ଗ୍ ସାଲାକାଦ୍ ୨୨୦ ଝାନ୍ ହଡ଼କକେ ବିନ୍ତିଅଡ଼ାଃ ସୁସାର୍ ନାଙ୍ଗ୍ ଆଉକେଦ୍କଆକ। ଏନ୍ ସବେନ୍କଆଃ ନୁତୁମ୍ ଅଲ୍ୟାନା।
କାଟାବ୍ ଓଡ଼ୋଃ ବିନ୍ତିରେ ଏଜ୍ରାରାଃ ଆଗୁଆଇ
ଆଇଙ୍ଗ୍ ଅହବା ନାହିଁ ଗେନାରେ କାଟାବ୍ରାଃ ବିନ୍ତି ରିକାନାଙ୍ଗ୍ ହୁକୁମ୍ ଏମ୍କେଦାଇଙ୍ଗ୍, ଜେ'ଲେକାଚି ଆବୁଆଃ ପାର୍ମେଶ୍ୱାର୍ଆଃ ନେପେଲ୍ରେ ଆବୁ ଆପାନ୍କେ ଲେବେଃକେଦ୍ତେ ନେ ବିନ୍ତି ବିନ୍ତିୟାବୁ ଯେ, ଇନିଃ ଆବୁକେ ଆବୁଆଃ ହନ୍ଗାଁଣାକକେ ଓଡ଼ୋଃ ଆବୁଆଃ ଖୁର୍ଜିକକେ ବୁଗିଲେକାତେ ଇଦି ସେଟେର୍ବୁଆ। ହରାକରେ ବାଇରିକଆଃ ବିରୁଧ୍ଏତେ ଆବୁକେ ବାଞ୍ଚାଅ ନାଙ୍ଗ୍ ରାଜାକେ ମିଆଁଦ୍ ସିପାଇ ଝୁଣ୍ଡ୍ ଓଡ଼ୋଃ ସାଦମ୍ରେ ଦୁବ୍କେଦ୍ତେ ଲାଡ଼ାଇ ସିପାଇ ଝୁଣ୍ଡ୍ ଆସି ନାଙ୍ଗ୍ ଗିହୁଃକେଦିଙ୍ଗ୍ୟାଁ, ଚିଆଃଚି ଆଲେ ରାଜା କାଜିକାଇ ତାଇକେନାଲେ, “ଆଲେୟାଃ ପାର୍ମେଶ୍ୱାର୍ଆଃ ସାୟାଦ୍ରାଃ ତିଃଇ ପାର୍ମେଶ୍ୱାର୍କେ ଅତଙ୍ଗ୍ତାନ୍ ହଡ଼କଆଃ ଚେତାନ୍ରେ ତାଇନାଃ, ମେନ୍ଦ ପାର୍ମେଶ୍ୱାର୍ଆଃ ପୁରାଃ ଖିସ୍ ପାର୍ମେଶ୍ୱାର୍କେ ବାଗି'ତାନ୍ ହଡ଼କଆଃ ଚେତାନ୍ରେ ତାଇନାଃ।” ଏନାମେନ୍ତେ ଆଲେ ନେ ବିଷାଏରେ କାଟାବ୍କେଦାଲେ ଓଡ଼ୋଃ ଆଲେୟାଃ ପାର୍ମେଶ୍ୱାର୍ତାଃରେ ବିନ୍ତିକେଦାଲେ ଏନ୍ତେ ଇନିଃ ଆଲେୟାଃ ବିନ୍ତି ଆୟୁମ୍କେଦାଏ।
ବିନ୍ତିଅଡ଼ାଃ ନାଗେନ୍ତେ ଦାନ୍
ଏନ୍ତେ ଆଇଙ୍ଗ୍ ଆଗୁଆଇ ରିକାତାନ୍ ଯାଜାକ୍କଏତେ ଗେଲ୍ବାର୍ ଝାନ୍କକେ, ଅର୍ଥାତ୍ ଶେରେବିୟ, ହଶ୍ବିୟ ଓଡ଼ୋଃ ଇନ୍କିନାଃ ଗେଲେୟା ଝାନ୍ ହାଗାକକେଇଙ୍ଗ୍ ସାଲାକେଦ୍କଆ, ରାଜା, ବୁଗିନ୍ ହରା ଉଦୁବ୍କ, ରାଜାରାଃ ମାପ୍ରାଙ୍ଗ୍ ହାକିମ୍କ ଓଡ଼ୋଃ ଏନ୍ତାଃରେ ତାଇନ୍ତାନ୍ ଇସ୍ରାଏଲ୍ ହଡ଼କ, ଆଲେୟାଃ ପାର୍ମେଶ୍ୱାର୍ଆଃ ବିନ୍ତିଅଡ଼ାଃ ନାଗେନ୍ତେ ଅକ ରୁପା, ସୋନା ଓଡ଼ୋଃ ଜିନିଷ୍କ ଦାନ୍ ଏମାକାଦ୍ ତାଇକେନାକ, ଏନାକେ ସଙ୍ଗ୍କେଦ୍ତେ ଏନ୍ ଗେଲ୍ବାର୍ ହଡ଼କକେଇଙ୍ଗ୍ ଏମାଦ୍କଆ। ଆଇଙ୍ଗ୍ ଇନ୍କୁଆଃ ତିଃଇରେ ମିଦ୍ହିସି ବାର୍ କ୍ୱିଣ୍ଟାଲ୍ ରୁପା, ୩,୪୦୦ କେଜି ରୁପାରାଃ ଜିନିଷ୍, ୩,୪୦୦ କେଜି ସୋନା, ଅରେୟା କେଜି ୫୦୦ ଗ୍ରାମ୍ ସୋନାରାଃ ଜିନିଷ୍ ଓଡ଼ୋଃ ସୋନା ଲେକା ପୁରାଃ ଗନଙ୍ଗ୍ଆଁନ୍ ତାମ୍ବାରେୟାଃ ଝାଲ୍ସାଅଃତାନ୍ ସୁଗାଡ଼ାନ୍ ବାରିୟା ଜିନିଷ୍ ଏମାଦ୍କଆଇଙ୍ଗ୍।
ଆଇଙ୍ଗ୍ ଇନ୍କୁକେ କାଜିକେଦ୍କଆଇଙ୍ଗ୍, “ଆପେ ପ୍ରାଭୁଆଃ ଉଦ୍ଦେଶ୍ରେ ପାବିତାର୍ ତାନ୍ପେ ଓଡ଼ୋଃ ନେ ସବେନ୍ ଜିନିଷ୍କ ହଗି ପାବିତାର୍କାନା। ନେ ସବେନ୍ ସୋନା, ରୁପା ଆପେୟାଃ ପୁର୍ଖା ଆପୁକଆଃ ପ୍ରାଭୁ ପାର୍ମେଶ୍ୱାର୍ଆଃ ଆୟାର୍ରେ ଆପ୍ନାଃ ଇଛାସାନାଙ୍ଗ୍ତେ ଏମାକାନ୍ ଦାନ୍ ତାନାଃ। ଏନାତେ ନେ ସବେନାଃକେ ଯୀରୁଶାଲେମ୍ରେ ପ୍ରାଭୁ ପାର୍ମେଶ୍ୱାର୍ଆଃ ବିନ୍ତିଅଡ଼ାଃରାଃ ଖୁର୍ଜି ଭାଣ୍ଡାର୍ରେ ଆଗୁଆଇ ରିକାତାନ୍ ଯାଜାକ୍, ଲେବୀ ହଡ଼କଆଃ ଓଡ଼ୋଃ ଇସ୍ରାଏଲ୍ରେନ୍ କିଲିକଆଃ ଆଗୁଆଇକଆଃ ସାମ୍ନାଙ୍ଗ୍ରେ ସଙ୍ଗ୍କେଦ୍ତେ ଆଉରି ଏମାକ ଜାକେଦ୍ ଚିର୍ଗାଲ୍କେଦ୍ତେ ଦହ ଲାଗାତିଙ୍ଗ୍ୟାଁଃ।” ଏନ୍ତେ ଯାଜାକ୍କ, ଲେବୀ ହଡ଼କ ଯୀରୁଶାଲେମ୍ରେ ଆବୁଆଃ ପାର୍ମେଶ୍ୱାର୍ଆଃ ବିନ୍ତିଅଡ଼ାଃତେ ଇଦିନାଙ୍ଗ୍ ସଙ୍ଗ୍କାନ୍ ରୁପା, ସୋନା ଓଡ଼ୋଃ ଏଟାଃ ଜିନିଷ୍କ ତେଲାକେଦାକ।
ଯୀରୁଶାଲେମ୍ତେ ରୁହାଡ଼୍
ଆଲେ ପାହିଲା ମାହିଁନାରେୟାଃ ଗେଲ୍ବାର୍ ହୁଲାଙ୍ଗ୍ ଅହବା ନାହିଁ ଗେନାଏତେ ଯୀରୁଶାଲେମ୍ତେ ସେନଃ ନାଙ୍ଗ୍ ଅଡଙ୍ଗ୍ୟାନାଲେ। ଆଲେୟାଃ ପାର୍ମେଶ୍ୱାର୍ଆଃ ସାୟାଦ୍ରାଃ ତିଃଇ ଆଲେଲଃ ତାଇକେନା। ଏନାତେ ହରାକରେ ବାଇରି ଓଡ଼ୋଃ ଏତ୍କାନ୍ ହଡ଼କତାଃଏତେ ଇନିଃ ଆଲେକେ ବାଞ୍ଚାଅକେଦ୍ଲେୟା। ନେ'ଲେକାତେ ଆଲେ ଯୀରୁଶାଲେମ୍ତେ ସେଟେର୍ୟାନ୍ଲଃ ଏନ୍ତାଃରେ ଆପି ହୁଲାଙ୍ଗ୍ ଜାକେଦ୍ ରୁଡ଼ୁୟାନାଲେ। ଉପୁନିୟା ହୁଲାଙ୍ଗ୍ରେ ଆଲେୟାଃ ପାର୍ମେଶ୍ୱାର୍ଆଃ ମାନ୍ଦିର୍ ଅଡ଼ାଃରେ ଆଲେ ରୁପା, ସୋନା ଓଡ଼ୋଃ ପାବିତାର୍ ଜିନିଷ୍କ ସଙ୍ଗ୍କେଦ୍ତେ ଯାଜାକ୍ ଉରିୟରାଃ ହନ୍ତେକଡ଼ା ମରେମୋତ୍ରାଃ ତିଃଇରେ ଜିମାକେଦାଲେ। ଫିନ୍ହସ୍ରାଃ ହନ୍ତେକଡ଼ା ଯାଜାକ୍ ଏଲିୟାଜାର୍ ଇନିଃଲଃ ତାଇକେନାଏ ଓଡ଼ୋଃ ଯେଶୁୟରାଃ ହନ୍ତେକଡ଼ା ଯୋଷାବଦ୍ ଓଡ଼ୋଃ ବେନୁୟିରାଃ ହନ୍ତେକଡ଼ା ନୋୟଦିୟା, ନେ ଲେବୀ ହଡ଼କ ହଗି ଇନିଃଲଃ ତାଇକେନାକ। ସବେନ୍ ଜିନିଷ୍କ ଲେକାୟାନା ଓଡ଼ୋଃ ସଙ୍ଗ୍କେଦ୍ତେ ହିସାବ୍ ଏମ୍ୟାନା ଏନ୍ତେ ଇମ୍ତାଗି ଏନ୍ ସବେନାଃରାଃ ହିସାବ୍ ଅନଲ୍ରେ ଦହୟାନା।
ଦାସିୟଃ ତନଲ୍ଏତେ ରୁହାଡ଼୍କାନ୍ ହଡ଼କ ଇସ୍ରାଏଲ୍ରାଃ ପାର୍ମେଶ୍ୱାର୍ଆଃ ଉଦ୍ଦେଶ୍ରେ ଉରୁବ୍ଦାଣେଁ ରାକାବ୍କେଦାକ। ଗଟା ଇସ୍ରାଏଲ୍ ନାଗେନ୍ତେ ଗେଲ୍ବାର୍ ବାଛା, ଉପୁନ୍ହିସି ଗେଲ୍ତୁରିୟା ମିଣ୍ଡି, ଆପିହିସି ଗେଲେୟା ମିଣ୍ଡିହନ୍ ଓଡ଼ୋଃ ପାପ୍ରେୟାଃ ଦାଣେଁ ରାକାବ୍ ନାଙ୍ଗ୍ ଗେଲ୍ବାର୍ ମେରମ୍ ଦାଣେଁ ରାକାବ୍ୟାନା। ନେ ସବେନାଃ ପ୍ରାଭୁଆଃ ଉଦ୍ଦେଶ୍ରେ ଉରୁବ୍ରେୟାଃ ଦାଣେଁ ତାଇକେନା। ଏନ୍ତେ ଇନ୍କୁ ଫରାତ୍ ଗାଡ଼ାରାଃ ହାନ୍ ପାରମ୍ରେ ରାଇଜ୍ତାନ୍ ଓଡ଼ୋଃ ଲାଟ୍ସାହେବ୍କକେ, ରାଜା ହୁକୁମ୍ ଏମାକାଦ୍ ଚିଟାଉକେ ଜିମାକେଦ୍କଆକ। ଏନାତେ ଇନ୍କୁ ହଡ଼କକେ ଓଡ଼ୋଃ ପାର୍ମେଶ୍ୱାର୍ଆଃ ବିନ୍ତିଅଡ଼ାଃ ବାବାଇ କାମିରେ ଦେଙ୍ଗାକେଦ୍କଆକ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.