Munda Bible
ହରାସେନ୍ପୁଥି 30
ଧୁପ୍ରାଃ ବେଦି
(ହରାସେନ୍ପୁଥି ୩୭:୨୫-୨୮)
“ଓଡ଼ୋଃ ଧୁପ୍ ଜୁଲ୍ ନାଗେନ୍ତେ ବାବୁଲ୍ ଦାରୁରାଃ ମିଆଁଦ୍ ଉରୁବ୍ ବେଦି ବାଇୟେମେ। ଏନାରେୟାଃ ଜିଲିଙ୍ଗ୍ ଓଡ଼ୋଃ ଚାକାର୍ ମିଦ୍ ମୁକା ଲେକା ଓଡ଼ୋଃ ସାଲାଙ୍ଗି ବାର୍ ମୁକା ତାଇନ୍କା ଓଡ଼ୋଃ ଏନା ଉପୁନ୍ କଚା ବାଇୟେମେ ଓଡ଼ୋଃ ଏନାରେ ଦିରିଙ୍ଗ୍ ଲେକା ବାଇୟେମେ। ଓଡ଼ୋଃ ବେଦିରେୟାଃ ଚାରିଓ କଚାରାଃ ଚେତାନ୍ରେ ତାଇକାନ୍ ଦିରିଙ୍ଗ୍କେ ଫାର୍ଚି ସୋନାତେ ଦାପାଲେମେ ଓଡ଼ୋଃ ବେଦିରାଃ ଚେତାନ୍ ହିସାରାଃ ଚାରିଓ ଗେନା ଗେନାରେ ଫାର୍ଚି ସୋନାରାଃ ଝାଲେର୍ ବାଇୟେମେ। ବେଦି ଲାତାର୍ରାଃ ବାରାନ୍ସାଃରେ ଫାର୍ଚି ସୋନାତେ ବାଇୟାକାନ୍ ବାବାରିୟା ଫୁନ୍ଦ୍ରି ବାଇୟେମେ ଓଡ଼ୋଃ ବେଦିକେ ଗଅଃ ନାଙ୍ଗ୍ ଏନ୍ ବଲିକ ଫୁନ୍ଦ୍ରିରେ ତାଇନାଃ। ଏନ୍ ଗଅଃତେୟାଃ ବାବୁଲ୍ ଦାରୁରାଃ ବାଇୟେମେ, ନେ ଗଅଃ ତେୟାଃକକେ ଫାର୍ଚି ସୋନାତେ ଦାପାଲେମେ। ବେଦିକେ ପାର୍ଦା ଲିଜାଃରାଃ ଆୟାର୍ରେ ଦହେମେ। ରାଜିନାମାରେୟାଃ ବାକ୍ସା ଏନ୍ ଦାନାଙ୍ଗ୍ ଲିଜାରାଃ ତାୟମ୍ରେ ମେନାଃ। ଏନ୍ ରାଜିନାମାରେୟାଃ ବାକ୍ସାକେ ହାରୁବେ ରିକାତାନ୍ ଆୟାର୍ରେ ବେଦି ତାଇନାଃ। ଆଇଙ୍ଗ୍ ଏନ୍ ଠାୟାଦ୍ରେ ଆମାଃଲଃ ନେପେଲ୍ ରିକାୟା। ଓଡ଼ୋଃ ହାରୁନ୍ ଜାନାଅ ସେତାଃ ଇମ୍ତାଙ୍ଗ୍ ଏନାରେ ବୁଗିନ୍ ସହାନ୍ତେୟାଃ ଜୁଲେକା ଓଡ଼ୋଃ ଦିଆକେ ସାଫା ରିକା ଇମ୍ତାଙ୍ଗ୍ ଏନ୍ ଧୁପ୍କେ ଜୁଲେକା। ଓଡ଼ୋଃ ହାରୁନ୍ ସିଙ୍ଗି ହାସୁର୍ ଦିଆକେ ସାଲ୍ଗାଅ ଇମ୍ତାଙ୍ଗ୍ ଧୁପ୍ ଜୁଲେକା, ନେଆ ପ୍ରାଭୁଆଃ ଆୟାର୍ରେ ଆପେୟା ଥାଲାରେ ସବେର୍ ହୁଲାଙ୍ଗ୍ ଧୁପ୍ ଜୁଲଃଆ। ଆପେ ଏନାରେ ଏଟାଃ ଜେତ୍ନାଃ ଧୁପ୍ ଆଲପେ ଜୁଲେଆ ଓଡ଼ୋଃ ଉରୁବ୍ଦାଣେଁ ଓଡ଼ୋଃ ହିତାଜାଙ୍ଗ୍ରାଃ ଦାନ୍ ଆଲପେ ରାକାବେୟା ଓଡ଼ୋଃ ଏନାରେ ନୁଏଁ ଦାନ୍ ଆଲପେ ରାକାବେୟା। ହାରୁନ୍ ବାରାଷ୍ରେ ମିସାଗି ନେ ବେଦି ନାଙ୍ଗ୍ ହେୟାତିଙ୍ଗ୍ ରିକାଏୟାଏ, ଇନିଃ ବେଦିରାଃ ଦିରିଙ୍ଗ୍କରେ ପାପ୍ରେୟାଃ ଦାଣେଁ ରାକାବ୍କାନ୍ ମାୟୋମ୍ ଗସଃକେଦ୍ତେ ହେୟାତିଙ୍ଗ୍ ଚାଏ ପାବିତାର୍ ରିକାଏୟାଏ। ନେଆଁ ପିଢ଼ିକେ ପିଢ଼ି ବାରାଷ୍ରେ ମିସା ରିକାଏପେ।” ନେ ବେଦି ପ୍ରାଭୁଆଃ ଉଦ୍ଦେଶ୍ରେ ପୁରାଃ ପାବିତାର୍ ମେନ୍ତେ କାଜିଅଃଆ।
ପ୍ରାଭୁଆଃ କୁମ୍ବା ଆୟାର୍ରେ ଦାନ୍ ରାକାମ୍
ଏନ୍ତେ ପ୍ରାଭୁ ମୁଶାକେ କାଜିକିୟା, ଚିମ୍ତାଙ୍ଗ୍ ଆମ୍ ଇସ୍ରାଏଲ୍କକେ ଲେକା କଆ ଇମ୍ତାଙ୍ଗ୍ ଲେକା କାନ୍କ ଆପ୍ନାଃ ଆପ୍ନାଃ ଜୀଉ ନାଗେନ୍ତେ ପ୍ରାଭୁକେ ଦାଣେଁ ଏମାଇକା, ତାବ୍ଦ ଆମ୍ ଇନ୍କୁ ଲେକାକ ଇମ୍ତାଙ୍ଗ୍ ଇନ୍କୁରେ ଦୁକୁ କା ହିଜୁଃଆ। ଅକନ୍କ ଗାନ୍ତିରେ ମେସାୟାନାକ, ଇନ୍କୁ ପାବିତାର୍ ଠାୟାଦ୍ରାଃ ଶେକେଲ୍ ଲେକାତେ ଆକଆଃ ଆଧା ଶେକେଲ୍ ଏମ୍ ଲାଗାତିୟାଃଁ, ମିଦ୍ ହିସି ଗେରା ମେନ୍ଲେରେ ମିଦ୍ ଶେକେଲ୍ ତାନାଃ, ଏନ୍ ଆଧା ଶେକେଲ୍ ପ୍ରାଭୁଆଃ ନାଗେନ୍ତେ ଦାନ୍ ଏମଃଆ। ମିଦ୍ ହିସି ବାରାଷ୍ ଚାଏ ଏନାଏତେ ଥିମ୍ବା ବାରାଷ୍ରେନ୍ ସବେନ୍ ହଡ଼କ ପ୍ରାଭୁକେ ଦାନ୍ ଏମ୍ ଲାଗାତିୟଁଃ। ଆପେ ଆପେୟାଃ ଜୀଉ ନାଗେନ୍ତେ ହେୟାତିଙ୍ଗ୍ରାଃ ଦାନ୍ ପ୍ରାଭୁକେ ଏମ୍ ଇମ୍ତା, କିସାଁଣ୍ ହଡ଼ ଆଧା ଶେକେଲ୍ ହେତେ ଆଦ୍କା ଆଲକାଏ ଏମେକା ଓଡ଼ୋଃ ରେଙ୍ଗେଃ ହଡ଼ ଆଧା ଶେକେଲ୍ ହେତେ କାମ୍ତି ଆଲକାଏ ଏମେକା। ଏନ୍ ରୁପା ଟାକାକେ ଇସ୍ରାଏଲ୍ କଆଃଏତେ ହୁଣ୍ଡିମେ ଓଡ଼ୋଃ ନେ ରୁପା ଟାକାକେ ନେପେଲ୍ କୁମ୍ବାରାଃ କାମି ନାଗେନ୍ତେ ବେଭାରେପେ, ଏନା ଆପେୟାଃ ଜୀଉରାଃ ହେୟାତିଙ୍ଗ୍ ନାଗେନ୍ତେ ଇସ୍ରାଏଲ୍ ହନ୍କଆଃ ପାପ୍ଛାମା ପାହାମ୍ ନାଗେନ୍ତେ ପ୍ରାଭୁଆଃ ଆୟାର୍ରେ ତାଇନାଃ।
ପିତ୍ତାଲ୍ରାଃ ତାୱା
ପ୍ରାଭୁ ମୁଶାକେ କାଜିକିୟା, ଆବୁଙ୍ଗ୍ ନାଗେନ୍ତେ ପିତ୍ତାଲ୍ରାଃ ତାୱା ଓଡ଼ୋଃ ଏନାକେ ମାଣ୍ଡାଅ ନାଗେନ୍ତେ ପିତ୍ତାଲ୍ରାଃ କାଟା ବାଇୟେମେ ଓଡ଼ୋଃ ଏନାକେ ନେପେଲ୍ କୁମ୍ବା ଓଡ଼ୋଃ ବେଦି ଥାଲାରେ ଦହଃକେଦ୍ତେ ଦାଆଃ ଦୁଲେମେ। ଓଡ଼ୋଃ ହାରୁନ୍ ଓଡ଼ୋଃ ଆୟାଃ ହନ୍, ଆକଆଃ କାଟା ତିଃଇ ଆବୁଙ୍ଗ୍ଅଃକାକ। ଇନ୍କୁ ନେପେଲ୍ କୁମ୍ବାରେ ବଲଃ ଇମ୍ତା ଜେ'ଲେକା କାକ ଗଜଃଆ, ଏନାମେନ୍ତେ ଦାଆଃରେ ଆପାନ୍କେ ଆବୁଙ୍ଗ୍ୟେଁନ୍କାକ, ଆଡଃଗି ପ୍ରାଭୁଆଃ ସୁନୁସାର୍ ନାଙ୍ଗ୍ ଉରୁବ୍ଦାଣେଁ ରାକାବ୍କେଦ୍ତେ ଦାଆଃରେ ତିଃଇ କାଟା ଆବୁଙ୍ଗ୍ୟେଁନ୍କାକ କା'ରେଦ ଗଜଃଆକ। ଏନାତେ ଇନ୍କୁ ଏନ୍ ଦାଆଃରେ ଆକଆଃ ତିଃଇ ଓଡ଼ୋଃ କାଟା ଆବୁଙ୍ଗ୍ୟେନ୍କାକ, ନେଆଁ ହାରୁନ୍ ଓଡ଼ୋଃ ଆୟାଃ ହନ୍କଆଃ ନାଗେନ୍ତେ ଜାନାଅ ଜାନାଅରାଃ ନିୟାମ୍ ତାନାଃ।
ଆଭିଷେକ୍ ଏମ୍ରାଃ ସୁନୁମ୍ ଓଡ଼ୋଃ ଧୁଆନ୍
ପ୍ରାଭୁ ମୁଶାକେ କାଜିକିୟା, ଆମ୍ ବୁଗିନ୍ ସହାନ୍ତେୟାଃ ଆଉୱେମେ, ୫୦୦ ଶେକେଲ୍ ଅଲିଭ୍ ସୁନୁମ୍ ଓଡ଼ୋଃ ଏନାରାଃ ଆଧା ୨୫୦ ଶେକେଲ୍ ଦାଲ୍ଚିନି ଓଡ଼ୋଃ ୨୫୦ ଶେକେଲ୍ ବଚ୍, ୫୦୦ ଶେକେଲ୍ ତେଜ୍ସାକାମ୍ ଓଡ଼ୋଃ ଉପୁନିୟା ଲିଟର୍ ଅଲିଭ୍ ସୁନୁମ୍ ଆଉୱେମେ, ନେ ସବେନାଃ ପାବିତାର୍ ଠାୟାଦ୍ରାଃ ଶେକେଲ୍ ଲେକାତେ ହବାଅଃ ଲାଗାତିୟାଁଃ। ନେଆଁତେ ଆଭିଷେକ୍ରାଃ ପାବିତାର୍ ସୁନୁମ୍ ବାଇୟେମେ, ବୁଗିନ୍ ସହାନ୍ତେୟାଃ ବାଇତାନ୍କଆଃ କାମି ଲେକା ଏନ୍ ବୁଗିନ୍ ସହାନ୍ ଗସଃତେୟାଃ ମେସାକେଦ୍ତେ ବାଇୟେମେ, ଏନା ପାବିତାର୍ ଆଭିଷେକ୍ ସୁନୁମ୍ ତାନାଃ। ଆମ୍ ଏନ୍ ଆଭିଷେକ୍ ସୁନୁମ୍ ଇଦିକେଦ୍ତେ ନେପେଲ୍ କୁମ୍ବା ଓଡ଼ୋଃ ରାଜିନାମା ବାକାସ୍ ଓଡ଼ୋଃ ମେଜ୍ ଓଡ଼ୋଃ ଏନାରେୟାଃ ସବେନ୍ ବାସାନ୍ ଓଡ଼ୋଃ ଦିର୍କା ଓଡ଼ୋଃ ଏନାରେୟାଃ ବାସାନ୍ ଓଡ଼ୋଃ ଉରୁବେ ବେଦିରାଃ ଓଡ଼ୋଃ ଉରୁବ୍ଦାଣେଁ ବେଦିରେ ଓଡ଼ୋଃ ଏନାରେୟାଃ ସବେନ୍ ବାସାନ୍ ଓଡ଼ୋଃ ତିଃଇ ଆବୁଙ୍ଗ୍ତେୟାଃ ଓଡ଼ୋଃ ଏନାରେୟାଃ କାଟାରେ ଗସଗେମେ। ଓଡ଼ୋଃ ଏନାକେ ପାବିତାରେମେ ଏନାତେ ପୁରାଃ ପାବିତାରଃକା ଓଡ଼ୋଃ ଅକ୍ନାଃ ଜୁଟିଦଃଆ ଏନା ପାବିତାର୍କଆଃ। ଆମ୍ ହାରୁନ୍ ଓଡ଼ୋଃ ଆୟାଃ ହନ୍କକେ ସୁନୁମ୍ ଦୁଲ୍କେଦ୍ତେ ଆଇଁୟାଃ ନାଙ୍ଗ୍ ଯାଜାକ୍ କାମି ନାଗେନ୍ତେ ଆଭିଷେକ୍କମେ ଓଡ଼ୋଃ ପାବିତାର୍କମେ। ଓଡ଼ୋଃ ଇସ୍ରାଏଲ୍ ହନ୍କକେ କାଜିୟାକମ୍, ନେ ସୁନୁମ୍ ଆପେୟାଃ ପିଢ଼ିକ ନାଙ୍ଗ୍ ଜାନାଅ ଜାନାଅ ପାବିତାର୍ ଆଭିଷେକ୍ରାଃ ସୁନୁମ୍ ହବାଅଃଆ। ନେଆ ଜେତା ହଡ଼ରେ ଆଲକା ଦୁଲଃ ଓଡ଼ୋଃ ଏନ୍ଲେକା ଏଟାଃ ସୁନୁମ୍ ଆଲମ୍ ବାଇୟେମେ, ଏନାଦ ପାବିତାର୍ ତାନାଃ ଓଡ଼ୋଃ ଆପେନାଙ୍ଗ୍ ପାବିତାର୍ ହବାଅଃଆ। ଜେତାଏ ଏନ୍ଲେକା ବାଇୟେତାନାଏ ଚାଏ ଜେତାଏ ନେଆଁକେ ଏଟାଃ ବାହାରି ହଡ଼ରେ ଦୁଲ୍ତାନାଏ, ଇନିଃ ଆୟାଃ ହଡ଼କଏତେ ଆତମଃଆ।
ପାବିତାର୍ ଧୁଆନ୍
ଓଡ଼ୋଃ ପ୍ରାଭୁ ମୁଶାକେ କାଜିକିୟା, ଆମ୍ ବୁଗିନ୍ସହାନ୍ ଜିନିଷ୍ ମେନ୍ଲେରେ ଗୁଗ୍ଗୁଲ୍, ନାଖି, କୁନ୍ଦ୍ରୁ ଓଡ଼ୋଃ ବୁଗିନ୍ ଲବାନ୍ ନେ ସବେନାଃକେ ମିଦ୍ସାମାନ୍ ଆଉୱେମେ। ଓଡ଼ୋଃ ବୁଗିନ୍ ଫାର୍ଚି ସହାନ୍ତେୟାଃ ବାବାଇନିଃ ଲେକା ଏନାରେ ବୁଲୁଙ୍ଗ୍ ମେସାକାନ୍ ଫାର୍ଚି ଓଡ଼ୋଃ ପାବିତାର୍ ଧୁପ୍ ବାଇୟେମେ। ଏନାହେତେ ହୁଡିଙ୍ଗ୍ଲେକା ରିଦ୍କେଦ୍ତେ ନେପେଲ୍ କୁମ୍ବାରାଃ ରାଜିନାମା ବାକାସ୍ ଆୟାର୍ରେ ଅକତାଃରେ ଆଇଙ୍ଗ୍ ଆମ୍ଲଃ ନେପେଲ୍ ହବାଅଃଆ, ଏନ୍ତାଃରେ ଦହେମେ ଓଡ଼ୋଃ ଏନା ଆମାଃ ନାଗେନ୍ତେ ପାବିତାର୍ ହବାଅଃଆ। ଓଡ଼ୋଃ ଆମ୍ ଅକନ୍ ବୁଗିନ୍ ସହାନ୍ତେୟାଃ ବାଇୟାମେ ଏନ୍ଲେକା ଆପେନାଙ୍ଗ୍ ମେସାକେଦ୍ତେ ଆଲମ୍ ବାଇୟାଃ, ଏନାଦ ଆପେ ନାଗେନ୍ତେ ପ୍ରାଭୁଆଃ ନାଙ୍ଗ୍। ପାବିତାର୍ ହବାଅଃଆ। ସହାନ୍ ନାଗେନ୍ତେ ଅକଏ ବାଇୟା ଇନିଃ ଆୟାଃ ହଡ଼କଏତେ ଆତମଃଆ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.