नेवताळा ना काम

लुका की लीखी प्रेरितो की कीताप

लुका नी लीखली नेवताळा नी कीताप

जानकारी

नेवताळा नी कीताप मंडळी नी सुरुवात नी काहणी से, अने यरुसलेम सी युहद्‌या, सामर्‌या, अने तीनी सी अगी लग खोळवायली से, जीसम ईसु आह़फा ना चेला ने ह़रग मे जवा सी पेले देखाड़लो हतो।

आहयी कीताप ईसु मसी ना पयदा हयवान 60-64 साल नी वच मे लीखायली हती काहाके आहयी कीताप पोलुस ना जेल मे गेथो छुटवा सी पेले लीखाय जेली हती। नेवताळा नी कीताप लुका नी खुस-खबर नी कीताप ह़रकी से अने ईसु ना ह़रग मे जवान अळतेण सुरु हये। लीखवा मे लुका नो वीच्‌यार आह़फा नी खुस-खबर नी कीताप ह़रको से। तीहयो थीयुफीलुस हेर करतो हतो, अने ह़ाते-ह़ाते भरहो करन्‌या ना कारण सी वीच्‌यार करतो हतो के तीमने ह़ु ह़ीकाड़्‌यु हहे एतरे तीहयो ईसु नी जीवाय अने भरहो करन्‌या नी खराय ना बारा मे कीताप लीख्‌यो।

नेवताळा नी कीताप आपणी लेदे सुरुवात नी मंडळी ना दाखला देखाड़े अने ईसु मे भरहो करीन कीसम जीव्‌वा तीहयु देखाड़े। नेवताळा ना आहया दाखला आमने आहयु देखाड़े के बीजा ने खुस-खबर नी खबर ह़मळाव्‌वा ना लेदे चोखली आत्‌मा पोर भरहो केम करवा जोवे।

रुपरेख

1. पेले चोखली आत्‌मा चेला पोर आवे अने मंडळी फेलवा लागे।

2. अळतेण मंडळी ने वेला पाड़े अने खबर यरुसलेम नी बाहर फेलवा लागे।

3. अळतेण पोलुस आह़फा नी पेली परच्‌यार यात्‌रा पोर जाय।

4. यरुसलेम मे बठक पक्‌की करे के नवला भरहो करन्‌या ने ह़ु जोवे।

5. पोलुस आह़फा नी बीजी परच्‌यार यात्‌रा पोर जाय।

6. पोलुस आह़फा नी तीसरी परच्‌यार यात्‌रा पोर जाय।

7. पोलुस यरुसलेम मे धराय ज्‌यो।

8. आखरी मे पोलुस ने रोम ह़ेर मे ली जाय।