Paliya Bible
नेवताळा ना काम 20
मकीदुनीया, युनान, अने त्रोआस मे पोलुस
झगड़ो बंद हय ज्योन अळतेण पोलुस चेला ने बोलावीन ह़मजाड़्यो, के तमु ईसु ना भरहा मे वातड़ा रेजो। अने तीमने आवजो कीन मकीदुनीया भणी चाल पड़्यो। अने तीहयो ते आखा देस मे हय्न अने चेला ने हीम्मत आपीन तीहयो युनान मे आयो। अने पोलुस तां तीन मयना लग र्यो, काहाके युहदी तीने मारवा नी धुन मे हता, अने तीहयो वीच्यार कर्यो के मे ढुंड्या मे बहीन सीरीया जत रेही, पण मकीदुनीया पासो जत र्यो। बीर्या ना पुरुर्स नो बेटो सोपत्रुस, अने थीसलुनीकीयो मे वाळा अरीस्तरखुस अने सीकुन्दुस, अने आसीया वाळा तुखीकुस अने तरोफीमुस, अने दीरबे वाळा गयुस, अने तीमुथीयुस बी तीनी ह़ाते हता। पण तीहया अमारी गेथा पेले त्रोवास मे जाय्न वाट जोय र्या हता। खमीर वगर ना रोट्ला नो तीवार हय ज्यो अने अळतेण आमु ढुंड्या मे बहीन फीलीपी ह़ेर गेथा त्रोवास भणी चाल पड़्या। अने पांच दाड़ा मे आमु त्रोवास मे आवीन तीमने भेट्या। अने तां आमु ह़ात दाड़ा र्या।
पोलुस नी त्रोआस मे आखरी भेट
हप्ता ना पेल्ना दाड़े, आमु खाणु खावा ना लेदे भेळा हया, अने पोलुस बीजा दाड़े जवा वाळो हतो, एतरे तीहयो ईसु पोर भरहो करन्या ह़ाते वात करतो र्यो, अने तीहयो अरदी रात लग वात करतो र्यो। आमु उपरी पोर वाळा कोपरे भेळा हता, अने तां घणा ढेरका दीवा धपवा बाज र्या हता। तां एक जुवान सोरो खीड़की ना खुणा पोर बह र्यो हतो, तीनु नाम युतुखुस हतु, जत्यार पोलुस घणी वार लग वात देखाड़तो र्यो, एतरे तीने नींदर आय जी। अने तीहयो नींदर मे उंगाय्न तीसरी मंजली गेथो हेटो पड़ ज्यो, अने तीने मरलो उचलीन लाया। पोलुस उपरी पोर गेथो उतरीन आयो, अने तीने बथलाटीन गळे लगाड़्यो अने केदो घबरायो ना काहाके हीय्यो जीवत्लो से। पोलुस अने आखा पासा उपर जाय्न खाणु खादा अने एतरी वार लग वात करतो र्यो के परगण फाट ज्यी, अळतेण तीहयो जत र्यो। अने तीहया ते जुवान सोरा ने जीवत्लो घोर ली आया। अने तीमने घणी सांती जड़ी।
त्रोआस मे गेथा मीलेतुस मे जाणु
आमु पेलेत ढुंड्या मे बहीन अस्सुस भणी चाल पड़्या। अने तां पोलुस ने बी ढुंड्या मे बहाड़वा नु हतु। काहाके तीहयो आह़फोत चालीन आव्वा वाळो हतो। जत्यार पोलुस अस्सुस मे भेट्यो, ता आमु तीने ढुंड्या मे बहाड़ लेदा अने मीतुलेन ह़ेर मे ज्या। बीजा दाड़े आमु तां गेथा ढुंड्या मे बहीन खीयुस ह़ेर अगळ पुग्या अने बीजा दाड़े सामुस ह़ेर मे आय लाग्या। अळतेण बीजा दाड़े मीलेतुस ह़ेर मे पुग ज्या। काहाके पोलुस ईफीसुस अगळ माय्न जवा ठान लेदलो हतो। जीनी सी तीने आसीया मे वार नी लागे, करीन पोलुस उतवाळ कर र्यो हतो, हय सके ता तीहयो पीन्तेकुस्त ना दाड़े यरुसलेम मे रेय।
ईफीसुस ना डायला ने ह़ीकाड़नु
ईफीसुस मे रेण्या मंडळी ना मुख्या ने बोलाय लावजो करीन पोलुस मीलेतुस गेथो खबर ली मोकल्यो। जत्यार तीहया तां आया, ता पोलुस तीमने केदो, “तमने मालम से के आसीया मे पुग्यो ते दाड़े गेथो मे तमारी ह़ाते कीसम री र्यो।” युहदी माणहु नी जाळसादीन करते मारी पोर घण-जबर आफत आयी, बाखीन मे रड़तो जाय्न बी घण भोळाय सी मालीक ईसु नी सेवा करतो र्यो। अने आहयी वात तमारी जुगु फायदा नी हती, तीहयी वात केवा मे, मे माणहु अगळ अने घोर-घोर जाय्न ह़ीकाड़वा कदी नी वचक्यो। युहदी माणहु ने अने आड़जात्या माणहु ने चेतावणी आपतो हतो के “तमु भगवान भणी वळो अने मालीक ईसु मसी पोर भरहो करो। हाव मे चोखली आत्मा ना हुकम सी यरुसलेम जवा बाज र्यो, पण मने आहयु नी मालम हय के मार पोर तां ह़ु वीतहे? मे ते आहयु एतरुत जाणु के आखा ह़ेर डीट चोखली आत्मा मने चेतावणी आपे के, जेल अने वेला मारी वाट जोय री। 1बाखीन मे जीवाय नी फीकर नी करतो, पण आहयी जीवाय मे मारु खास काम से के मे मालीक ईसु ना ह़ोपला काम ने पुरा करु। तीहयु काम आहयु से, के मे भगवान नी दया नी खुस-खबर माणहु ने ह़मळावु।
“अने हाव मे जाणु के भगवान ना राज नु परच्यार तमने ह़मळावलो से, अने तमु मने अळी नी देखो। एतरे आज मे तमने उजन्तो आहयी वात केम के, आखा ना मोत नो कारण मे नी हय। काहाके मे भगवान नी जे मरजी तमारी जुगु से, तीहयी पुरीन-पुरी केवा सी नी वचक्यो। तमु तमारी अने तमारी मंडळी नी रखवाळी करता रेवो, काहाके चोखली आत्मा तमने तीमनी फीकर करवा वाळा बणावली से; के तमु भगवान नी तीहयी मंडळी नी रखवाळी करो, जीने तीहयो आह़फा ना लोय नी बदले वेचातो लेदलो हतो। मने मालम से के मारा जवा नी अळतेण तमारी वच मे घणा जुदा लेंड्या आवहे, अने तीहया भोळी मंडळी ने नी सोड़े। अने एवी टेम आवहे तमारीत मंडळी मे गेथा एवा माणहु उबा हय जहे, जे चेला ने आह़फाम नी पसळ लाव्वा करीन झुटी वात केहे। एतरे चेतीन रेजो! अने फोम राखजो के मे तीन साल लग एक-एक जणा ने रात-दाड़ो रड़ी-रड़ीन ह़ीकाड़लो से।
“अने हाव मे तमने भगवान अने तीनी दया ना हात मे ह़ोपु, तीहयोत तमने बांदीन राख सकहे, अने तमने भगवान ना चोखा करला माणहु नी ह़ाते आखी बरकत अपाड़ सकहे। मे कोय नु ह़ोनु-चांदी अने लुगड़ा नी लालच नी कर्यो। तमने मालम से के मे मारा हात सी काम करीन मने अने मारा ह़ाती ने जोवे तीहयु भेळु करलो से। मे तमने आखु देखाड़लो से के कानी रीते मेहनत करीन लुल्ला नी मदत करवा जोवे, अने आपणु ने मालीक ईसु मसी नी केदली वात फोम राखवा जोवे, के ‘लेवा सी आपवा वारु से।’”
आहयु कीन पोलुस तीमनी ह़ाते मांडा टेकीन भगवान सी वीन्ती कर्यो। तत्यार तीहया आखा घणा रड़्या अने पोलुस ने गळे लगाड़्या अने तीने कुको दीन वळाय देदा। तीहयो तीमने केदलो हतो के तमु मने अळी नी देखो। एतरे तीमने वदु दुख हयो अने तीहया तीने ढुंड्यान तां लग मेकवा ज्या।
Source notes (1)
- Cross-reference 2 तीमुथीयुस 4:7
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.