Paliya Bible
नेवताळा ना काम 21
पोलुस नु यरुसलेम जाणु
तीमने आवजो कीदीन आमु दर्या मे ढुंड्या मे बहीन अने कोस मे आया अने बीजा दाड़े रुदुस मे, अने तां गेथा पतरा मे। अळतेण पतरा गेथा आमु एक ढुंड्या मे बहीन चाल पड़्या, जे फीनीके जवा बाज रेलु। जत्यार आमने कुपरुस देखाव पड़्यु, तत्यार आमु तीहया कुपरुस ने सोड़ीन डाखर्ये धेड़े सीरीया भणी वळ ज्या, काहाके ढुंड्या मे वाळु ह़मान सुर ह़ेर मे उतारवा नु हतु, एतरे आमु बी ह़मान उतार्या तांत उतरी ज्या। तां आमने चेला भेट्या, तीमनी ह़ाते आमु ह़ात दाड़ा लग र्या। तीहया आत्मा नी ताखत सी पोलुस ने केदा, “तु यरुसलेम मे नी जजे।” पण तां रेवा ना अमारा दाड़ा पुरा हय ज्या, अने अळतेण आमु तीमने आवजो करीन तां गेथा अमारी वाट्ये चाल पड़्या। तीहया आखा बयरा-सोरा ह़ेर गेथा बारथा दर्या धेड़्ये लग अमारी ह़ाते आया। अने अळतेण आमु दर्या धेड़्ये मांडा टेकीन वीन्ती कर्या। अने एक-बीजा ने आवजो कीन आमु ढुंड्या पोर चड़ीन जत र्या। अने तीहया बी आपणा-आपणा घोर जत र्या।
जत्यार आमु सुर गेथा ढुंड्या मे बहीन पतुलीमयीस मे पुग्या, अने भरहो करन्या भायु ने वारला से कीन तीमनी ह़ाते एक दाड़ो र्या। 1बीजा दाड़े आमु तां गेथा केसर्या मे आया, अने खुस-खबर ह़मळावण्या फीलीपुस ना घोर ज्या। आहयो फीलीपुस तीहया टाळला ह़ात जणा मे गेथो एक हतो। जाय्न तीनीन्तां र्या। तीहया फीलीपुस ना च्यार छड़्ला सोर्या हता; तीहया भगवान वगे गेथी वात केण्या हता। 2जत्यार आमु तां ढेरेत दाड़ा री लेदा, ता तां एक भगवान वगे गेथी वात केण्यो माणेह युहद्या गेथो आयो, तीनु नाम अगबुस हतु। तीहयो ह़ाते आवीन पोलुस ना केड़्या मे वाळो पट्टो मांग लेदो अने आह़फा ना हात ने पोग बांदीन केदो, “चोखली आत्मा आहयु केय, जे माणेह नो आहयो पट्टो से, तीने यरुसलेम मे युहदी माणहु आहयी रीते बांदहे, अने आड़जात्या ना हात मे आप देहे।”
जत्यार आमु आहयी वात ह़मळ्या, ता आमु अने तां ना माणहु पोलुस ने टीणे पड़ीन केदा, “तु यरुसलेम ह़ेर मे नी जजे।” पण पोलुस केदो, “तमु आसम रड़ी-रड़ीन मने आञे रेवा करीन काहा मन काचु कर र्या, मे ते मालीक ईसु नी करते यरुसलेम ह़ेर मे बंदायवा एतरोत नी पण मरवा बी तीयार से।”
पोलुस अमारी सी नी मान्यो; एतरे आमु कीदीन होगा री ज्या, “जीसम भगवान नी मरजी से, तेमेत हयवा दे।”
थोड़ाक दाड़ा रेवान अळतेण आमु तीयारी कर लेदा, अने यरुसलेम भणी चाल पड़्या। जत्यार केसर्या गेथा थोड़ाक चेला बी अमारी ह़ाते चाल पड़्या, अने तीहया आमने कुपरुस मे रेण्यो एक जुन्ला चेलान्तां ली ज्या, के आमु तीनीन्तां रीया, तीनु नाम मनासोन हतु।
पोलुस नी याकुब ह़ाते भेट
जत्यार आमु यरुसलेम मे पुग्या, ता ईसु पोर भरहो करन्या भायु खुस हय्न आमने भेट्या अने अमारो आव-भाव कर्या। बीजा दाड़े पोलुस अमारी ह़ाते याकुब ने भेटवा ज्यो, तां आखा मंडळी ना मुख्या भेळा हय रेला। पोलुस तीमनो आव-भाव कर्यो अने अळतेण तीहयो जे कंय भगवान तीना हाते आड़जात्या मे जुदा-काम करलो हतो तीहया एकीक करीन की देदो। तीहया पोलुस नी वात ह़मळीन भगवान ना गुण गाया अने पोलुस ने केदा, “भाय तु देखीत र्यो के हजारो युहदी ईसु पोर भरहो कर लेदला से, पण तीहया मुसा ना कायदा पाळवा नी धुन मे लाग ज्या। तारा बारा मे माणहु तीमने आहयु केदला से के आहयो माणेह आड़जात्या माणहु ना वच मे रेवा वाळा आखा युहदी माणहु ने मुसा ना कायदा सोड़वा ह़ीकाड़े। अने तीहयो तीमने केय के तमु आपणा सोरा ने खतनु ना करावो अने मुसा नी जुन्ली रीती ना पाळो।” एतरे हाव ह़ु करवा जोवे? तीहया ते हाव ह़ाचलीन ह़मळी लेहे के तु आञे आय र्यो। एतरे तु अमारु केणु मान ले, अमारी ह़ाते आञे च्यार जणा एसवा से जे बादा लेदला से। आहया माणहु ने तार ह़ाते ली जा, ईमनी ह़ाते चोखो हयवा करीन भेसकाय जा, अने ईमनु मुंडु बोड़ाव्वा करीन ईमनो जे खरचो लागे तीहयो आप दे। ता आखा माणहु ने मालम पड़ जहे, के मुसा नो कायदो तोड़वा नी ह़ीकाड़े, पण तु ते मुसा ना कायदा ने मानीन तीनी अनसारे चाले। 3पण भरहो करन्या आड़जात्या ना बारा मे आहयी वात से के आमु तीमनीन्तां आसम चीट्ठी लीखीन ली मोकल्ला से: तमु मुर्ती पोर चड़ावलु खाणु नी खाजो, अने गळु डाबीन मारला काना बी जानवर नु माह नी खाजो, अने काना बी जानवर नु लोय नी पीजो। अने छीनाळु नी करजो।
आहयी रीते पोलुस तीहया माणहु ने आह़फा नी ह़ाते लीन ज्यो, अने तीहया माणहु नी ह़ाते आह़फा ने बी चोखा हयवा नी रीती नी अनसारे अगला दाड़े चोखो कर लेदो, अळतेण तीहयो मंदीर मे ज्यो, जां तीहयो घोसणा कर्यो के चोखा हयवा ना दाड़ा कारु पुरा हयहे अने अमारी मे ना आखा जुगु भेट कारु चड़ावहे।
मंदीर मे पोलुस नु धरायणु
चोखा हयवा ना ह़ात दाड़ा पुरा हयवात वाळा हता, ता आसीया देस वाळा थोड़ाक युहदी माणहु तीने मंदीर मे देख लेदा, अने तीहया आखा माणहु ने भड़काया, अने पोलुस ने धर पाड़्या। “ए ईस्रायली माणहु मदत करो! आहयो तीहयो माणेह से, जे ईस्रायली माणहु ना वीरोद मे, अने मुसा ना कायदा ना वीरोद मे, अने आहया चोखला मंदीर ना वीरोद मे आखा जागे माणहु ने ह़ीकाड़े, अने हाव आहयो आड़जात्या माणहु ने बी मंदीर मे ली आयो, अने चोखला मंदीर ने वीटाळ देदो।” 4तीहया आहयु आनीन करते केदा, काहाके पोलुस ने मंदीर मे आव्वान पेले आहया युहदी माणहु आने तरोफीमुस ह़ाते ह़ेर मे देखला हता, आहयो तुरुफीमस ईफीसीयो ह़ेर वाळो हतो, तीहया तीने पोलुस ह़ाते देखीन आहयु ह़मज्या के पोलुस हीने मंदीर मे लाय र्यो हहे।
एतरे आखा ह़ेर ना माणहु हुहड़ीन, दवड़ी-दवड़ीन आया, अने पोलुस ने धरीन घीहड़ता-घीहड़ता मंदीर मे गेथा बारो लाया अने तत्यारुत मंदीर ना झापला बंद कर देदा। जत्यार भीड़ पोलुस ने मार नाखवा हींड्ती हती, तीहयीत टेमे सीपायड़ा ना मेळा ना मुखी सुबेदार ने कानो खबर पुगाड़्यो के “आखा यरुसलेम ह़ेर ना माणहु हुहड़ीन पोलुस भणी जाय र्या।” तीहयो सुबेदार तत्यारुत सीपायड़ा ने अने बीजा मुख्या-मुख्या ने आह़फा ह़ाते लीन पोलुस ने मारवा हींडत्ला तीहया युहदी माणहु भणी ज्यो, तीहया युहदी सीपायड़ान मुख्या ने अने सीपायड़ा ना बीजा मुख्या ने देख्या, ता तीहया पोलुस ने ठोकवा बंद कर देदा। तत्यार सीपायड़ान मुख्यो तां आयो अने पोलुस ने धर पाड़्यो अने बीजा सीपायड़ान मुख्या ने केदो के “आने हातकड़ी लगाड़ देवो।” अळतेण तीहयो सीपायड़ान मुख्यो माणहु ने पुछ्यो, “आहयो कोय से अने आहयो ह़ु गुनो करलो से?” गड़दी मे वाळा माणहु कानो कंयेत की र्यो हतो अने कानो कंय की र्यो हतो, एतरे तीहया सुबेदार ने आहयु मालम नी पड़्यु के ह़ाची वात ह़ु से, एतरे तीहयो हुकम आप्यो के “आने कीला मे ली लेवो।” जत्यार तीहयो पयड़ी पोर पुग्यो ता गड़दी घण जबर हती अने गड़दी मे वाळा माणहु धकलाय र्या हता एतरे कीला मे पोलुस ने उचलीन लीजवा पड़्यु। अने गड़दी मे वाळा माणहु “आने मार नाखो।” करीन आड़ता जाय्न पसळ-पसळ आव्वा बाज र्या हता।
पोलुस आह़फा ने बचाड़े
जत्यार सीपायड़ा पोलुस ने कीला मे लीजवात वाळा हता, ता पोलुस सुबेदार ने केदो, “मे तने कंय केवा हींडु, केम ह़ु?” सुबेदार पोलुस ने जपाप आप्यो, “तने युनानी बोली अवड़े ह़ु? ह़ु तु तीहयो मीसरी माणेह ते नी हय, जे थोड़ीक वार पेले झगड़ो करायो, अने जे आञे बड़ा मे च्यार हत्यार वाळा हजार माणहु नी अगवाय करतो हतो?”
पोलुस केदो, “मे ते तरसुस ह़ेर नो युहदी माणेह से, अने कीलीकीया नो खास रेण्यो से, तारी सी मारी आहयी वीन्ती से के मने माणहु ह़ाते वात करवा दे।”
गड़दी ह़ाते वात करवा नी छुट जड़ी ता पोलुस पयड़ी पोर उबो हय्न हात सी अनसारो कर्यो, अने आखा माणहु होगा री ज्या, ता तीहयो ईब्रानी बोली मे बोलवा बाज ज्यो:
Source notes (4)
- Cross-reference नेवताळा ना काम 6:5; 8:5
- Cross-reference नेवताळा ना काम 11:28
- Cross-reference नेवताळा ना काम 15:29
- Cross-reference नेवताळा ना काम 20:4
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.