Paliya Bible
नेवताळा ना काम 22
“ए बाह ह़रका माणहु, अने भायु! मने बचाड़वा करीन मे जे कंय की र्यो तीहयु ह़मळो।” जत्यार माणहु पोलुस ने ईब्रानी बोली बोलत्लो ह़मळीन होगा री ज्या। ता पोलुस तीमने केदो: 1
मे एक युहदी माणेह से, अने मे कीलीकीया ना तरसुस ह़ेर मे पयदा हयलो से, अने मे आहयात यरुसलेम मे मोटो हयो अने गमलीएल मास्तर ना पोगु मे बहीन आपणा आड़ा-बुड़ा ना कायदा पुरान-पुरा मान्यो; अने मे भगवान ना कायदा पाळवा मे जादा ह़ोह मे हतो जीसम आज तमु होह मे से। 2मे आहयी वाट पोर चालवा वाळा अदमड़ा ने अने बयरा ने धरी-धरीन ह़ाकळ्ये करीन बांदीन जेल मे बंद कर देत्लो, अने एतरी जबर वेला पाड़्यो के तीहया मरी बी ज्या। आहयी वात ना लेदे पुंजारा अने आखा डायला गवा से; के तीमनी सी मे युहदी भायु ना नाम पोर चीट्ठ्या लीन दमीस्क ह़ेर मे जवा बाज र्यो हतो, के जे माणहु आहयी वाट पोर चाले तीमने बांदीन यरुसलेम ह़ेर मे लीन आव्वा जेलो के तीमने डंड अपाड़ सकु।
पोलुस आह़फा नु मन बदलवा ना बारा मे केय
(9:1-19; 26:12-18)
“जत्यार मे जतो-जतो दमीस्क पुग्यो, ता माथेक दाड़े ह़रगे गेथु घण जादा वीजाळु उचकाहलुत मारा च्यारो-मेर भबळ्यु।” मे भोयमे पड़ ज्यो अने मने एक बोल ह़मळायो, साउल! साउल! तु मने काहा वेला पाड़ र्यो? तत्यार मे जपाप आप्यो, “मालीक! तु कोय से?” तीहयो मने केदो, “मे ईसु नासरी से। जीने तु वेला पाड़े।” मारा ह़ाती वीजाळु ते देख्या बाखीन मारी ह़ाते वात करन्या नो बोल नी ह़मळ्या। ता मे तीने केदो, ए मालीक, मने ह़ु करवा जोवे? मालीक मने जपाप आप्यो, उठीन दमीस्क जत रे, अने तने ह़ु करवा जोवे, अने तारी जुगु ह़ु करवा नु ठेरावलु से, तीहयु मे तां की देही। तीहयु वीजाळु ना भबळा ना कारण सी मे आंदळो हय जेलो, एतरे मारा ह़ाती मारो हात धरीन मने दमीस्क मे ली ज्या।
अने तां भगवान ना कायदा ना अनसारे चालवा वाळो भगत माणेह हतो। तीनु नाम हनन्या हतु। तीहयो तां रेण्या युहदी माणहु मे नामह़ाद्यो हतो। आहयोत हनन्यो मारीन्तां आयो। अने मारी ह़ाते उबो हय्न केदो, “भाय साउल! अळी पासो देखवा बाज जा।” अने मे तत्यारुत तीनी भणी देख्यो। अळतेण तीहयो हनान्या मने केदो, अमारा डाह-डाहा नो भगवान तने एतरोत टाळलो से के तु तीनी मरजी जाण लेय, अने ते नीयाव करन्या चाकर्या ने देखीन तीनी मोडा सी वात ह़मळे। काहाके तु जे देखलो से अने ह़मळ्ळो से तीहयी वात नी गवा आखी दुर हये तेम। एतरे हाव तु वार ना लगाड़े, अने छोटो उठीन बपतीस्मा ली ले अने तीना नामे भगवान ह़ाते वीन्ती करीन आपणा पाप सी छुटकारो हात कर ले।
पोलुस आड़जात्या माणहु ने ह़ीकाड़े
“जत्यार मे पासो यरुसलेम मे आयो अने मंदीर मे भगवान ह़ाते वीन्ती करवा बाज रेलो, ता मे बेह़ुद हय ज्यो। अने मे मालीक ने देख्यो अने मने तीहयो आहयु केवा बाज र्यो हतो, ‘उतवाळ करीन यरुसलेम गेथो छोटो बारथो नीकळ जा, काहाके तीहया मारा बारा मे तारी गवाय नी हुकारे।’ एतरे मे मालीक ने केदो, ‘मालीक! हीय्या ते जाणे के मे तारी पोर भरहो करन्या ने धरीन जेल मे कुंडतो हतो, अने जागे-जाग भक्ती ना घोरु डीट तीमने ठोकाड़तो हतो। 3जत्यार तारी गवाय देण्या स्तीफनुस ने माणहु दगड़ाटीन मारवा बाज रेला, तत्यार मे बी तीहयी वात मे राजी हतो अने तां उबो हय रेलो। अने जे माणहु स्तीफनुस ने मारवा बाज रेला तीमना लुगड़ा नी रखवाळी करवा बाज रेलो।’ एतरा मे मालीक मने केदो, ‘तु जत रे। मे तने आखी जाती ना माणहुन तां मारी गवा देवा करीन नाम्बे-नाम्बे मोकलही।’”
माणहु पोलुस नी आहयी वात आञे लग ह़मळता र्या; बाखीन हाव तीहया आड़ीन केदा, “आने मार नाखो। आने धरती पोर जीवत्लो रेवा वारु नी हय।” जत्यार तीहया आड़ता अने लुगड़ा एथान-एथा नाख र्या हता, अने वाहळा मे धुळो उडाड़ता हता, ता सीपायड़ा ना मेळा नो सुबेदार हुकम आप्यो, “आने कीला मे ली जावो, अने ह़ड़का दीन पारखो, जीनी सी आहयु मालम पड़े के माणहु आना वीरोद मे काहा आड़ी र्या।” जत्यार तीहया तीने बांद र्या हता, ता पोलुस तीनी ह़ाते उबो हय रेला सुबेदार ने पुछ्यो, “कायदा ना अनसारे वण-गुनाळ्ळा रोमी माणेह ने चपकाटवा ताले से ह़ु?”
ता आहयु ह़मळीन सुबेदार सीपायड़ा ना डायला मुखी ने जाय्न केदो, “तु आसम काहा करवा बाज र्यो? तने मालम नी हय ह़ु के आहयो रोमी माणेह से।”
आहयु ह़मळीन सीपायड़ा नो डायलो मुखी पोलुस ना ह़ाते आवीन पुछ्यो, “मने देखाड़ तु रोमी से ह़ु?” पोलुस केदो, “होव!”
आहयु ह़मळीन सीपायड़ा नो डायलो मुखी केदो, “रोमी राज मे रेवा नो हक हात करवा करीन मने घण ढेरका पय्हा आपवा पड़्या।” पोलुस केदो, “मे ते पयदा हयो ता गेथोत रोमी से।”
आहयु ह़मळीन जे माणहु पोलुस ने पारखवा हींड्ता हता, तीहया पोलुस ने तां गेथा पासा ह़रकी ज्या; अने सीपायड़ा नो डायलो मुखी बी आहयु जाण्यो के पोलुस रोमी से, मे धरीन बंदाड़लो से करीन बीही ज्यो।
मोट्ली पंचु अगळ पोलुस
बीजा दाड़े तीहयो पोलुस नी हातकड़ी सोड़ देदो अने मंदीर ना डायला पुंजारा ने अने आखी मोट्ली बठक ने भेळी करो करीन सीपायड़ा ने हुकम आप्यो। अने पोलुस ने हेटो ली जाय्न तीमनी अगळ उबो कर देदो काहाके युहदी माणहु आनो वाक काहा काड र्या आहयी वात तीहयो जाणवा हींड्तो हतो।
Source notes (3)
- Cross-reference नेवताळा ना काम 5:34-39
- Cross-reference नेवताळा ना काम 8:3; 26:9-11
- Cross-reference नेवताळा ना काम 7:58
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.