Paliya Bible
नेवताळा ना काम 23
पोलुस युहदी माणहु नी मोट्ली बठक भणी एकडीट्यो भाळीन केदो, “ए मारा भाय-बेटा! मे आज लग भगवान अगळ वारला मन सी जीवाय जीवलो से।” पोलुस नी वात ह़मळीन मंदीर नो डायलो पुंजारो हनन्या ह़ाते उबा हय रेला माणहु ने हुकम आपीन केदो, “पोलुस ना गाल्ये थापड़ दे।” 1तत्यार पोलुस तीमने केदो, “ए चुना वेर नीपलु भीतड़ु! तु मुसा ना कायदा ना अनसारे मारो नीयाव करवा बह र्यो, पण मुसा नो कायदो तोड़ीन मने थापड़ दे करीन बीजा ने की र्यो। तने ते भगवान देहे।”
ह़ाते उबा हय रेला माणहु पोलुस ने केदा, “तु भगवान ना मंदीर ना डायला पुंजारा ने हीसम वाक काडीन जपाप काहा आप्यो?”
पोलुस जपाप आप्यो, “ए भायु! मने नी मालम हतु, के आहयो डायलो पुंजारो से; काहाके चोखली सास्तर मे लीखलु से के ‘जे आपणा माणहु नो डायलो से तीने बुरु नी केवो।’” 2
ता पोलुस ने मालम पड़्यु के एक टोळो सदुकी पंथवाळा नो अने एक टोळो फरीसी पंथवाळा नो से। ता तीहयो मोट्ली बठक ने आड़ीन केदो, “ए भायु! मे फरीसी पंथवाळो से अने फरीसी माणहु नो सोरो से। मर्या-ह़र्या मे गेथा पासा जीवता हयवा नी आह ना बारा मे मारो नीयाव हयवा बाज र्यो।”
पोलुस नी आहयी वात ह़मळीन सदुकी पंथवाळा नो अने फरीसी पंथवाळा नो झगड़ो हयवा बाज ज्यो। अने मोट्ली बठक मे बेरजाव पड़ ज्यो। 3काहाके सदुकी पंथवाळा नो भरहो से के मर्या-ह़र्या मे गेथा पासा जीवता हयवा नु नी हय, अने ह़रगदुत बी नी हय। अने नी आत्मा हय। पण फरीसी पंथवाळा आहयु आखु ने माने। अने तां घणी कचाट हय री हती। फरीसी पंथ मे गेथा थोड़ाक पुडार्या उबा हय ज्या, अने आहयु कीन झगड़वा बाज ज्या, के “आमु आहया माणेह मे कंय बी बुराय नी जड़ी। पण कदी कोय आत्मा नीता ह़रगदुत आनी ह़ाते वात कर्यो बी हय!”
जत्यार झगड़ो जादा हयवा बाज ज्यो, ता सीपायड़ा नो मुखी सुबेदार बीही ज्यो काहाके तीहया पोलुस ने मारीन टुकड़ा-टुकड़ा नी कर नाखे। एतरे तीहयो सीपायड़ा ना टोळा ने हुकम आप्यो, के हेटा उतरीन जावो, अने हीने जबराण हीमनीन तां गेथो नीकाळ लावो, अने कीला मे ली जावो।
तीहयीत राते मालीक ईसु पोलुस ने देखाव पड़्यो अने केदो, “ए पोलुस, हीम्मत राख; काहाके जीसम तु यरुसलेम मे मारी गवाय देदलो से, तेमेत तने रोम ह़ेर मे बी जाय्न गवा देवा पड़हे।”
पोलुस ने मारवा नी योजना
बीजा दाड़े ह़वारे युहदी माणहु एक्को कर्या, अने ह़ाम खादा के जत्यार लग आमु पोलुस ने मारी नी नाखीया तां लग नी खाणु खाया अने नी पाणी पीया। जे आहयी ह़ाम खादला तीहया चाळीह़ जणा गेथा बी वदु हता। तीहया पुंजारान्तां अने पुडार्यान्तां जाय्न केदा, “आमु आहयी ह़ाम खादला से के जत्यार लग पोलुस ने नी मार नाखीया तांह लग नी खाणु खाया अने नी पाणी पीया। एतरे हाव मोट्ली बठक भेळ जाय्न सीपायड़ा ना मुखी सुबेदार ने ह़मजाड़ो के हीय्या पोलुस ने तमारीन्तां ली आवे, काहाके तमु हीने वारु पारखवा हय र्या, अने आमु तीने पुगवा सी पेलेत तीने मार नाखवा नी लेदे तीयारी मे रेहु।”
पण पोलुस ना भाणजे ने जाळसादी ना बारा मे मालम पड़ ज्यु एतरे तीहयो कीला मे जाय्न पोलुस ने आखी वात की देदो। पोलुस सुबेदार्या मे गेथो एक ने आह़फान तां बोलावीन केदो; “आहया सोरा ने डायला सुबेदार ने तां ली जावो; काहाके आहयो डायला सुबेदार ने कंय केवा हींड र्यो।” एतरे तीहयो सुबेदार ते सोरा ने डायला सुबेदार ने तां ली जाय्न तीहया डायला सुबेदार ने केदो, “हातकड़ी लगाड़ मेली तीहयो पोलुस मने बोलावीन वीन्ती कर्यो के आहयो सोरो डायला सुबेदार ने कंय केवा हींड र्यो; एतरे आहया सोरा ने डायला सुबेदार ने तां ली जा।”
डायलो सुबेदार तीहया सोरा नो हात धरीन तीने एक धेड़्यो ली जाय्न पुछ्यो, “मने ह़ु केवा हींड र्यो?”
ते सोरो केदो, “युहदी माणहु एक्को कर र्या के तारी पांह वीन्ती करहु, के वाहणे पोलुस ने मोट्ली बठक मे लावे, मानो तु अळी वारु तीनी पारख करवा हींड र्यो। पण तु हीमनी वात नी मानजे, काहाके हीमनी मे चाळीह़ गेथा बी वदु माणहु पोलुस ने मारवा तकाय र्या। अने तीहया ह़ाम खादला से के जत्यार लग आमु पोलुस ने मारीन नी नाखीया तांह लग नी खाणु खाया अने नी पाणी पीया। अने तीहया हमणे तीयार से, अने तारा हुकम नी वाट जोय र्या।”
ते सोरा नी वात ह़मळीन डायलो सुबेदार तीहया सोरा ने आहयो हुकम आपीन मोकल्यो के “तु आहयी वात कोयने नी केजे के तु आहयी वात मने देखाड़्यो।”
पोलुस ने फेलीक्स राजान तां मोकले
अने बे सुबेदार्या ने बोलावीन केदो, “केसर्या ह़ेर जवा करीन बे ह़ो सीपायड़ा अने सत्तर घोड़ा पोर बहीन जाण्या, अने बे ह़ो भाला वाळा सीपायड़ा तीयार हय जावो। अने आज राते नव बजे तक नीकळवा तीयार रेजो। अने पोलुस ने नीयाव करन्या फेलीक्स ने तां घोड़ा पोर बहाड़ीन आरगलो लीजवा करीन घोड़ो तीयार राखजो।” तीहयो आसम चीट्ठी बी लीखीन ली मोकल्यो:
“मुख्या नीयाव करन्या फेलीक्स! ने कलोदीयुस लुसीयास ने वारलो से के केम। आहया माणेह ने युहदी माणहु धर लेदला अने मारवा हींडत्ला; पण जत्यार मने मालम पड़्यु के आहयो रोमी से, ता मे सीपायड़ा ने लीन जाय्न ईने बचाड़ लेदो। अने मे जाणवा हींडतो हतो के हीय्या आनी पोर काहा गुनो लगाड़ र्या; एतरे मे हीने हीमनी मोट्ली बठक मे ली ज्यो। ता मने मालम पड़्यु के तीहया तीमना कायदा नी लीखली सास्तर नी वात ने लीन तीनी पोर गुनो लगाड़ र्या, पण आहयो एसवो गुनो नी कर्यो के आने जेल मे कुंडु पड़े अने मारवा पड़े। अने जत्यार मने आहयु मालम पड़्यु के माणहु हीने मारवा नी जाळसादी मे लाग र्या, ता मे हीने तत्यारुत तारीन्तां मोकली देदो। अने गुनो लगाड़न्या ने बी केदो के जे बी गुनो तमु आनी पोर लगाड़ र्या ते गुनो नीयाव करन्या फेलीक्स अगळ लगाड़जो।”
एतरे सीपायड़ा जीसम केदलु तेमेत कर्या अने तीहया रातम-रात पोलुस ने अंतपतरीस मे पुगाड़ देदा। बीजा दाड़े घोड़ा पोर बहीन जाण्या सीपायड़ा पोलुस ह़ाते ज्या अने बीजा यरुसलेम कीला मे पासा आवती र्या। अने तीहया केसर्या मे पुग्या ता ते चीट्ठी नीयाव करन्या ने आप देदा, अने पोलुस ने बी तीना हात मे ह़ोप देदा अने तीहयो चीट्ठी भणीन पोलुस ने पुछ्यो, “तु काना देस मे वाळो से?” जत्यार तीने मालम हयु के हीय्यो कीलीकीया गेथो से। अने तीहयो जाण लेदो के कीलीकीया परगणा नो से, ता पोलुस ने केदो, “जत्यार तार पोर गुनो लगाड़न्या आवहे ता तारो नीयाव करही।” अने तीहयो सीपायड़ा ने हुकम आपीन केदो, आने हेरोद ना कीला मे ली जाय्न पेहरो देवो।
Source notes (3)
- Cross-reference मत्ती 23:27,28
- Cross-reference नेवताळा ना काम 26:5; फीलीपीयो 3:5
- Cross-reference मत्ती 22:23; मरकुस 12:18; लुका 20:27
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.