Skip to content
BibleKenya

Paliya Bible

नेवताळा ना काम 24

फेलीक्‌स नी अगळ पोलुस

पांच दाड़ान अळतेण डायलो पुंजारो हनन्‌यो थोड़ाक पुडार्‌या अने तीरतुल्‌लुस नाम ना वकील ने लीन केसर्‌या आयो। तीहया आखा नीयाव करन्‌या अगळ पोलुस पोर गुनो लगाड़्‌या। जत्‌यार पोलुस ने बोलाया ता तीरतुल्‌लुस पोलुस पोर आहयो गुनो लगाड़ीन केदो, “ए मोटा मे मोटा फेलीक्‌स! आमु तारा कारण वारु ह़ुकना जीवी र्‌या, तु नाम्‌बे गेथो देखीन चाले एतरे कंय बुराय ह़ुदरती जाय री। ए आखा गेथा वारु फेलीक्‌स! आमु तारी लारे ह़ुदारली वात ने वारु मानया, अने तने वारु कीया। पण मारी वीन्‌ती से के तु थोड़ीक वार अळी थांग, अने दया करीन अमारी बेक वात अळी ह़मळ ले। अमारु केवु से के आहयो अदमी भड़कावण्‌यो से। आहयो आखी कळी ना युहदी माणहु मे झगड़ो घालन्‌यो से, अने नासरी ना पंथवाळा नो डायलो से। आहयो यरुसलेम ना मंदीर ने बी वीटाळ्‌वा नी कोसीस करलो एतरे आमु आने धर पाड़्‌या। आमु मुसा ना कायदा ना अनसारे आनो नीयाव करवा हींडत्‌ला। पण डायलो सुबेदार हीने जबराण अमारा हात मे गेथो हापकी लेदो। अने आसम गुनो लगाड़न्‌या ने तीहयो केदो के तमु फेलीक्‌सन तां जाय्‌न गुनो लगाड़जो। आहयी आखी वात ना बारा मे जे गुनो आमु आनी पोर लगाड़ र्‌या। तीहयी वात ने तु आह़फोत पारखी लेही।” युहदी माणहु बी तीनो सात दीन केदा, “होव, आहयी वात ह़ाचली से।”

फेलीक्‌स राजा नी अगळ पोलुस नो बचावो

जत्‌यार नीयाव करन्‌यो पोलुस ने बोलाव्‌वा नो ईसारो कर्‌यो ता तीहयो आसम जपाप आप्‌यो, “मे जाणु के तु घणा साल गेथो आहयी जाती ना माणहु नो नीयाव कर र्‌यो, एतरे मे खुस हय्‌न तारी वात नो जपाप देही। तु जाण सकत्‌लो, के जत्‌यार मे यरुसलेम मे भगवान नी भक्‌ती करवा आवलो, मने बारे दाड़ा गेथा वदु नी हया। अने तीहया मने नी मंदीर मे अने नी भक्‌ती ना घोर मे अने नी ह़ेर मे वात मे झटा-पटी अने माणहु ने भेळा करीन भड़कावत्‌लो देख्‌या। अने आहया जे वात मे मारो वाक काडीन गुनो लगाड़ र्‌या, तीहयी वात ने हाव बी आहया ह़ाचली नी ठेराय सके। मे तारी अगळ आहयी वात मान लेम के जे पंथ आहया रद्‌दी-पंथ केय। तीनीत रीती पोर मे आपणा आड़ा-बुड़ा ना भगवान नी सेवा-चाकरी कर र्‌यो; अने जे वात मुसा ना लारे लीखली सास्‌तर मे अने भगवान वगे गेथा वात करन्‌या माणहु नी कीताप मे लीखली से, तीहयी आखी वात पोर मे भरहो करु। अने भगवान सी मे आह राखु जीसम तीहया राखता हता, के भगवान धरमी ने अने वण-धरमी ने मर्‌या-ह़र्‌या मे गेथो जीवतो करीन बठो करहे। एतरे मे बी भगवान अगळ अने माणहु अगळ मारा सच्‌चा मन सी जे ह़ाची से तीहयुत करवा नी कोसीत करु। 1

“ढेरेत साल बाद मे मारा भाय-बेटा ने भेट पुगाड़वा अने जानवर मारीन बादा चड़ाव्‌वा यरुसलेम आवलो हतो। अने तीहया मने मंदीर मे जानवर मारीन बादा चड़ावत्‌लो अने भेट आपत्‌लो देख लेदा। मे आहयु काम चोखली हालत सी अने बीजा माणहु ने बोलावीन गड़दी कर्‌या वगर कर र्‌यो हतो। तीहयी टेमे मारी ह़ाते आसीया वाळा ढेरेत युहदी बी हता; अने तीमने आहयु काम वारु लाग्‌यु। कदीम तीमने मारा वीरोद मे कंय केवा नु हतु, ता तीहया आञे तार अगळ आय्‌न मार पोर गुनो लगाड़ता। नीता जे माणहु आञे से ईमनेत केवा दे के जत्‌यार मे मोट्‌ली बठक मे हतो, ता तीहया मारी मे कंय गुनो देखला? 2होव, एक वात जरुड़ हयी के मे हीमना वच मे उबो रीन ज्‌योरेत आड़ीन केदलो हतो के ‘मर्‌या-ह़र्‌या मे गेथा पासा जीवता हयवा नी आह ना बारा मे आज तमारी अगळ मारो नीयाव हयवा बाज र्‌यो।’”

फेलीक्‌स आहया पंथ ना बारा मे वारु जाणतो हतो, पण तीहयो आहयु कीन तीमनी सुनवाय टाळ देदो, “जत्‌यार डायलो सुबेदार लुसीयास आवहे, ता तमारी वात नो फेसलो करही।” अळतेण तीहयो सुबेदार ने हुकम आप्‌यो के तु पोलुस नी जेल मे वारु रखवाळी करजे, अने तीना दोस्‌तीदार आवे ता तीनी सेवा-चाकरी करवा सी नी रोकजे।

फेलीक्‌स अने तीनी लाडी द्‌रुसील्‌ला नी अगळ पोलुस

थोड़ाक दाड़ान अळतेण फेलीक्‌स आह़फा नी घोरवाळी द्‌रुसील्‌ला ने, जे युहदी जाती नी हती, ह़ाते लीन आयो। तीहयो पोलुस ने बोलावीन आहयु पुछ्‌यो के ईसु मसी पोर भरहो काहा करवा जोवे? अने पोलुस तीने देखाड़्‌यो। जत्‌यार पोलुस धरम ना बारा मे, अने आपणा जीव ने मनाड़वा ना बारा मे, अने आव्‌वा वाळा नीयाव ना बारा मे वात कर र्‌यो हतो। ता फेलीक्‌स घण-जबर बीही ज्‌यो अने पोलुस ने केदो “हाव तु जत रे, टेम जड़हे ता मे तने अळी बोलावही।” फेलीक्‌स आहयी आह कर र्‌यो हतो के पोलुस मने रुप्‌या आपहे। करीन तीहयो पोलुस ने वळ-वळीन तीनी वात ह़मळवा करीन बोलाया करत्‌लो।

फेलीक्‌स युहदी माणहु ने खुस करवा हींडतो हतो। एतरे तीहयो पोलुस ने जेल मेत रेवा देदो। पण अळतेण बे साल वीत ज्‌या, ता फेलीक्‌स नी अवजी पोर पुरकीयुस फेस्‌तुस आयो।

Source notes (2)
  1. Cross-reference नेवताळा ना काम 21:17-28
  2. Cross-reference नेवताळा ना काम 23:6

Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.