Paliya Bible
नेवताळा ना काम 26
अगरीपा नी अगळ पोलुस नी बचाव नी वात
अगरीपा राजा पोलुस ने केदो, “तने तारा बारा मे केवा नो हुकम से।” तत्यार पोलुस आह़फा ने बचाड़वा करीन हात उचो करीन केवा बाज ज्यो।
“ए राजा अगरीपा, जे वात मे युहदी माणहु मार पोर घणो जादा गुनो लगाड़ला से। तीहयी वात मे आज तार अगळ जपाप आपवा मे खुद ने जुगाळो ह़मजु।” खास करीन आनीन करते के तु युहदी माणहु नी आखी रीती-भाती ने अने वात नी जखड़ी ने जाणे। एतरे मे तारी सी वीन्ती करु के तु गम खाय्न मारी ह़मळ।
“जेम मारी चाल-चलण सुरु गेथी मारा भाय-बेटा अने यरुसलेम मे जेम हती, आहयु आखु युहदी जाणे। 1कदीम तीहया गवाय देवा हींडे ता दी सके, तीहया सुरु गेथा मने ओळखे, के मे फरीसी पंथवाळो हय्न मारा धरम ना आखा खरला पंथ नी अनसारे जीवाय जीवलो से। अने हाव तीहया वायदा नी आह ना कारण सी जे भगवान अमारा आड़ा-बुड़ा ह़ाते करलो से, अने तीहयात वायदा ना लेदे मारो नीयाव हयवा बाज र्यो। तीहयोत वायदो पुरो हयवा नी आह करीन, अमारी बारे कुळी रात-दाड़ो भगवान नी सेवा कर री। एतरे ए राजा! आहयी आह ना बारा मे युहदी मार पोर गुनो लगाड़ र्या। भगवान मर्या-ह़र्या माणहु ने पासा जीवता करे। आसम वात मे केम ता तमारीन्तां आहयी वात काहा भरहा ना लायक नी ह़मजे?” 2
“मे बी ह़मजतो हतो के ईसु नासरी नाम ना वीरोद मे मने ढेरेत कंय करवा जोवे।” मे यरुसलेम मे बी वीरोद कर्यो; अने मंदीर ना डायला पुंजारान्तां जाय्न हक मांग लेदो अने ढेरेत चोखला माणहु ने जेल मे कुंड देदो। अने जत्यार बीजा तीमनो वीरोद करीन तीमने मार देत्ला ता मे बी तीमनी वात ने हुकारत्लो। अने मे तीहया आखा ने तीमना भक्ती ना घोर मे वेला पाड़त्लो अने तीमने जोर करीनेत केत्लो के तमु ईसु नो वाक काडो, अने मे तीमनी पोर एतरी जबर रीहवाय ज्यो के बीजा ह़ेर मे रेण्या ने बी वेला पाड़वा बाज ज्यो।
पोलुस आह़फा ना मन बदलाव ना बारा मे देखाड़े
आहयीत धुंद मे, मे मंदीर ना डायला पुंजारा पांह हक अने हुकम नी चीट्ठी लीन दमीस्क जवा बाज र्यो हतो। ता ए राजा! तीहयी वाट्येत मे माथेक दाड़े वादळा मे दाहड़ु ना ह़ेक करते बी जादा एक वीजाळु, मारी अने मारी ह़ाते चालवा वाळा नी च्यारो-मेर भबळत्लु देख्यो। आमु आखा धरती पोर पड़ ज्या अने मने ईब्रानी बोली मे एक बोल ह़मळायो, ए साउल, ए साउल! तु मने काहा वेला पाड़े? तारी जुगु पेराणा पोर पाटु देवा घणु काठु से। अने मे केदो, “मालीक! तु कोय से?” मालीक केदो, “मे ईसु से” जीने तु वेला पाड़े। तु उबो हय जा, काहाके मे तने तु जे देखलो तीहयु आखु माणहु ने केवा करीन मारो पावर्यो अने गवा बणावीन ठेरावलो से अने अळी आव्वा वाळी वात देखाड़वा करीन तने देखाड़ही। अने मे तने तारा माणहु सी अने आड़जात्या माणहु सी बचाड़तो रेही, जीमनी पांह मे हाव तने आनीन करते मोकलु तु हीमना डोळा उगाड़जे के तीहया अंदारला भणी गेथा वीजाळा भणी चाले। अने भुतड़ा ना हक मे गेथा सोड़ावीन भगवान भणी फीरे; के पापु नी माफी हात करीन, अने तीहया माणहु नी ह़ाते जे मारी पोर भरहो करवा सी चोखा करला से, तीमनी ह़ाते पंगात मे भेसकाय।
पोलुस आह़फा ना काम ना बारा मे देखाड़े
“एतरे ए राजा अगरीपा! मे तीहयी ह़रग मे गेथी देखाड़ली वात कदी नी टाळ्यो। 3पण मे पेले दमीस्क वाळा ने, अळतेण यरुसलेम ह़ेर मे रेवा वाळा ने, अळतेण आखा युहद्या परगणा मे रेवा वाळा आड़जात्या माणहु ने आहयु ह़मजाड़तो र्यो, के तमु पाप करवा सोड़ीन भगवान भणी वळो अने भगवान ने गमे तेवु काम करो। आहयी वात नी करते युहदी माणहु मने मंदीर मे धर लेदा, अने मारीन नाख देवा नी कोसीत कर्या। पण मे भगवान नी मदत सी आज लग मर्यो नी अने नान्ला-मोट्ला अगळ ईसु नी गवाय देतो र्यो। अने तीहयीत वात केतो र्यो जे वात भगवान वगे गेथा केण्या माणहु अने मुसो बी केदो के हयवा वाळी से। 4के ईसु मसी ने दुख झेलवा पड़हे अने तीहयोत पेल्ना मरला मे गेथो जीवतो हय्न अमारा माणहु ने अने आड़जात्या माणहु ने जीवाय ना वीजाळा नी खुस-खबर ह़मळावहे।”
जत्यार पोलुस आहयी रीती सी जपाप आपतो हतो, ता फेस्तुस ज्योरेत आड़ीन केदो, पोलुस “तु सणकाय जेलो से! अने तु जादा भणीण गंडवाय जेलो से।”
पोलुस केदो, ए आबरु वाळा फेस्तुस, “मे सणकायलो नी हय, पण जे वात मे की र्यो तीहयी वात ह़ाचली से अने अक्कल नी बी से। अने जे वात मे बीह्या वगर राजा अगळ केवा बाज र्यो, तीहयी वात ने राजा जाणे अने मे भरहो करु के आहयी वातु मे नी कानी बी वात ह़तायली नी हय, काहाके तीहयी घटना खुणा मे नी हयी। ए राजा अगरीपा, भगवान वगे गेथी वात केण्या माणहु नी केदली वात पोर भरहो करे ह़ु? होव, मने मालम से के तु भरहो करे।”
आहयी वात ह़मळीन राजा अगरीपा पोलुस ने केदो, “ह़ु तु थोड़ुक ह़मजाड़वा सी मने ईसु मसी वाळो बणाव्वा हींड र्यो ह़ु?”
पोलुस जपाप आप्यो, “भगवान पांह मारी वीन्ती आहयी से के ह़ु थोड़ीक, अने ह़ु जादा, तु एतरोत नी पण जेतरा बी मारी वात ह़मळी र्या, तीहया आखा बंदण सी छुटीन मारीन तेवा बण जवा जोवे।”
आहयी वात ह़मळीन राजा अगरीपा अने बीरनीके अने तीनी ह़ाते बह रेला आखा उबा हय ज्या। अने बारा जता-जता आंबा-सांबा केवा बाज ज्या, “आहयो माणेह जेल मे कुंडे एवो अने मोत नो डंड जड़े एवो कंय बी गुनो नी कर्यो।” राजा अगरीपा फेस्तुस ने केदो, “कदीम आहयो आसम नी केतो के ‘केसर राजा अगळ मारो नीयाव हयवा जोवे’ ता आहया हीने जेल मे गेथा बरी कर देता।”
Source notes (4)
- Cross-reference नेवताळा ना काम 23:6; फीलीपीयो 3:5
- Cross-reference नेवताळा ना काम 8:3; 22:4,5
- Cross-reference नेवताळा ना काम 9:20,28,29
- Cross-reference 1 कुरन्थी 15:20
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.