Paliya Bible
नेवताळा ना काम 27
पोलुस नु रोम ह़ेर मोकलनु
जत्यार आहयु पक्कु हय ज्यु के आमु ढुंड्यु मे बहीन ईटली जीया, ता तीहया पोलुस ने अने थोड़ाक बीजा केदड़ा ने बी युलीयुस नाम ना अगस्तुस ना सीपायड़ा ना टोळा ना डायला मुखी ना हात मे ह़ोप देदा। अदरमुतीयुम नु एक ढुंड्यु पोर जे आसीया मुलक नी धेड़े ना जागे जवा वाळु हतु, ढुंड्यु पोर चड़ीन आमु ढुंड्यु ने सोड़ देदा, अने अरीस्तरखुस नाम नु मकीदुनीया मुलक ना थीसलुनीकीयो ह़ेर नु माणेह अमारी ह़ाते हतु। बीजा दाड़े आमु सेदा ह़ेर मे पुग्या, अने तां मोट्लु ढुंड्यु उबु राख देदा, युलीयुस पोलुस पोर दया कर्यो अने तीने दोस्तीदार्यान्तां जवा देदो। के तीनी सेवा-चाकरी करे। तां गेथा आमु ढुंड्या मे बहीन चाल पड़्या, तीहयी टेमे वाहळु अमारी ह़ाम्बु आवत्लु करीन कुपरुस आडे-आडे हय्न ज्या। एतरे आमु कीलीकीया अने पमफुल्या ना धेड़े वाळा दर्या माय्न लस्या मुलक ना मुरा ह़ेर मे उतर्या। तां सुबेदार ने एक बीजु ढुंड्यु देखाव पड़्यु। जे सीकंदर्या ह़ेर गेथु आवीन ईटली मुलक जवा वाळु हतु। एतरे तीहयो आमने ते ढुंड्या मे बहाड़ देदो।
जत्यार आमु घणा दाड़ा तक धीरा-धीरा चालीन वेला करता जाय्न कनीदुस नी अगळ पुग्या, ता आनीन करते के वाहळु आमने अगा जवा नी देतु हतु, आमु सलमोने नी अगळ माय्न क्रेते ह़ेर नी आडे-आडे चाल्या; अने तां माय्न घणा वेला करता जाय्न एक ह़ेर मे पुग्या, ते ह़ेर नु नाम हतु ढुंड्या उबा राखवा नी वारली ठेसण। तां गेथु लस्या ह़ेर ह़ाते हतु।
जत्यार घणा दाड़ा वीत ज्या, अने ढुंड्यु ने चालवा मे खतरो आनीन करते हयतो हतो के तीमना उपाह़ ना दाड़ा बी वीत जेला हता, ता पोलुस तीमने आहयु कीन चेतावणी आप्यो। “ए मनख्या! मने आसम लागे के आञे गेथा आपणु जहु, ता आपणी पोर आफत आय पड़हे अने घणु नुकसान झेलवा पड़हे। अने मोट्लु ढुंड्यु बी टुट जहे अने कंखर माय्न आपणु ने बी मरवा पड़हे।” पण ते बी सुबेदार पोलुस नी वात ने सोड़ीन ढुंड्यु चलाड़न्या पोर अने ढुंड्यान मालीक पोर वदु भरहो कर्यो। ते ठेसण टाड ना दाड़ा काटवा जुगु वारु नी हती करीन वदु माणहु वीच्यार करीन केदा, कंय बी करीन हय सके ता फीनीक्स मे पुगीन टाड ना दाड़ा काडहु। क्रेते ह़ेर नी ठेसण दखणाव-बुडवणी अने धुराव-बुडवणी उगड़तली से।
दर्या मे तोफान
जत्यार दखवरी गेथी वाहळी आव्वा बाज जी, तत्यार तीहया आहयु सोच्या, के तीमने जे जोय रेलु तीहयु जड़ ज्यु, ता तीहया ढुंड्या नी मांजरी पाणी मे गेथी हेड़ लेदा, अने क्रेते भणी चाल पड़्या। पण थोड़ीक वार मे तां गेथी घण-जबर आंजी आयी। जे “युरकुलीन” आंजी केवायती हती। आंजी ढुंड्ये अफठायी ता ढुंड्यु वाहळा मे ह़ाम्बु जाय नी सक्यु, अने आमु ढुंड्या ने जंखर जाय तंखोर जवा देदा। ता आमु कोदा नाम ना टापु ना आडे वयता-वयता काठी मेहनत करीन नान्ला ढुंड्या ने हक मे कर्या। अने मोट्ला ढुंड्या चलाड़न्या ढुंड्या ने नाड़्ये करीन बांद देदा। अने सुरतीस मे उतळा पाणी मे ढुंड्यु टेकवा नी बीक सी पाल सोड़ देदा, अने ढुंड्यु ने वयवा देदा। आंजी अने झलक मोट्ला ढुंड्ये घण-जबर अफठायी। ता बीजा दाड़े तीहया ढुंड्या मे गेथु ह़मान नाखवा बाज ज्या। अने तीसरा दाड़े लग तीहया आह़फाम ना हात सी ढुंड्या मे वाळु ह़मान बी नाख देदा। अने ढेरेत दाड़ा लग, नी दाहड़ु देखायु, अने नी तारा देखाया, अने घण-जबर आंजी चाल री हती, ता आखरी मे आमु बचवा नी आह सोड़ देदा।
अने ढेरेत दाड़ा लग तीहया कंय नी खादा, तत्यार पोलुस तीमना वच मे उबो हय्न केदो, “ए माणहु तमु मारी वात मानीन क्रेते गेथा नी आवता ता नी आहयी आफत आवती अने नी नुकसान हयतु। पण हाव मे तमने ह़मजाड़ु के हीम्मत राखो काहाके तमारी मे गेथा कोय नी मरे, पण मोट्ला ढुंड्या नु नुकसान हयहे। काहाके जे भगवान ह़ाते मे रेलो से, अने जीनी मे सेवा-चाकरी कर्यो, तीनो ह़रगदुत काले राते मारीन्तां आयो। अने केदो, ‘ए पोलुस बीहे ना! तने केसर अगळ उबो हयवात पड़हे अने देख, जे तारी ह़ाते ढुंड्या मे से तीमने आखा ने भगवान तारा हात मे ह़ोप देदलो से।’ एतरे ए माणहु, हीम्मत राखो; काहाके मे भगवान पोर आहयो भरहो करु, के जीसम तीहयो केदलो से तेम हयहे। पण आपणु ढुंड्यु टापु पोर जाय्न टेक जहे।”
जत्यार चोवदवी रात आयी ता आमु अद्रीया नाम ना दर्या मे एथान-एथा भटकता हता, अने अरदीक राते ढुंड्यु चलाड़न्या ने मालम पड़्यु के आमु काना देस धेड़े पुग र्या। अने तीहया दोड़ु नाखीन दर्या नी उंडाय देख्या ता मालम पड़्यु के वीह़ पुरसाव से, अने अळी थोड़ाक धेड़े ज्या ता मालम पड़्यु के उंडाय पन्दरे पुरसाव से। ता दगड़ा वाळी जागा मे अमारु मोट्लु ढुंड्यु अटकी जहे करीन बीही ज्या अने तीहया ढुंड्या ना पाछला हीस्सा भणी गेथा ढुंड्यु उबु राखवा करीन च्यारो-मेर मांजरी नाख्या, अने ह़वारे हयवा नी वाट जोवता र्या। एतरे ढुंड्यु चलाड़न्या ढुंड्या मे गेथा नाह जवा नो वीच्यार कर र्या हता, ता तीहया ढुंड्या ना अगला हीस्सा भणी मांजरी नाखवा नु बोनु पाड़ीन नान्लु ढुंड्यु दर्या मे उतार लेदा। ता पोलुस सुबेदार अने सीपायड़ा ने केदो; “कदीम आहया ढुंड्यु पोर नी रेय ता तमु बी नी बचो।” ता सीपायड़ा नाड़ा तोड़ीन नान्ला ढुंड्या हेटा दर्या मे उतार देदा।
जत्यार ह़वारे हयवा वाळु हतु ता पोलुस आखा ने आहयु कीन खावा करीन ह़मजाड़्यो के “बचवा नी आह करते-करते चोवदे दाड़ा हय ज्या अने तमु भुकलात र्या, अने जरीक बी खाणु नी खादा। मे तमने आनीन करते ह़मजाड़ु; के कंय खाय लेवो जीनी सी तमारो बचावो हये; काहाके तमारी गेथा काना ना मुंडा नो एक बी नीम्बाळो नी पड़े।” अने आहयु कीन पोलुस रोट्लो हात मे लेदो, अने आखा अगळ रोट्ला जुगु भगवान ने तु घणो वारु से केदो अने रोट्लो भागीन खावा बाज ज्यो। ता आखा बीजा बी हीम्मत राखीन खाणु खावा बाज ज्या। आमु ढुंड्या मे आखा मेळीन बे ह़ो छीयोत्तर जणा हता। तीहया खायलीन आफरी ज्या अने ढुंड्यु ने फोवरु करवा करीन गम ने दर्या मे नाखवा बाज ज्या।
ढुंड्यु नु टुटणु
जत्यार ह़वारे हयु ता तीहया ते देस ने ओळख्या नी, पण एक खाय देख्या तीनी च्यारो-मेर बराबर धेकड़ हती तीहया वीच्यार कर्या के हय सके ता आञे ढुंड्यु ने उबु राख देता। ता तीहया मांजरी ने दर्या मे नाख देदा, अने बरसादी बांदला नाड़ा सोड़ देदा, अने जंय गेथी वाहळी आवे तींखर बरसादी बांदीन धेड़े चाल पड़्या। तीहया दर्या भेसकायवा ना जागा पोर मोट्लु ढुंड्यु उबु राख देदा, अने ढुंड्या नो अगलो हीस्सो राबड़ा मे गड़ाय ज्यो, अने पासलो हीस्सो लेहर ठोकाय-ठोकाय्न भागवा बाज ज्यो।
ता सीपायड़ा वीच्यार काड्या, के केदी माणहु ने मार नाख्ता; कदीम आसम नी हय जाय के तीहया तीरीन बारा नीकळीन नाह जाय। पण सुबेदार पोलुस ने बचाड़वा करीन तीमने आहया वीच्यार सी रोक्यो, अने केदो जीने तीरते अवड़ी जाय, तीहया तीरीन दर्या धेड़े जत रेवो। अने जीने तीरते नी अवड़े तीहया ढुंड्या ना पाट्या पोर बहीन जत रेवो। अने आसम करीन आखान-आखा दर्या धेड़े जत र्या।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.