Paliya Bible
नेवताळा ना काम 28
मालटा ह़ेर मे पोलुस
जत्यार आमु बचीन दर्या धेड़े एक टापु मे पुग ज्या, ता मालम पड़्यु के आहयु टापु ने मालटा केय। अने तां वाळा माणहु अमारी पोर गीण कर्या; पाणी पड़वा बाज र्यो हतो अने टाडु बी लागवा बाज र्यु हतु, एतरे तीहया आक्ठु धपाड़्या, अने रेवा नो आसरो आप्या। जत्यार पोलुस लाकड़ा भेळा करीन आक्ठा मे मेल्यो, ता आक्ठा नी आच लागवा सी एक गड़हो नीकळ्यो, अने पोलुस ना हाते वळगी ज्यो। जत्यार तां वाळा माणहु गहड़ा ने हाते वळगी रेलो देख्या, ता आह़फा-आह़फात केदा, “ह़ाचलीन आहयो हत्यारो माणेह से, भले आहयो दर्या मे गेथो बच ज्यो, पण ते बी नीयाव आने नी जीव्वा देदो।” तत्यार पोलुस आह़फोत हात झीझड़ीन गहड़ा ने आक्ठा मे पाड़ देदो, अने पोलुस ने कंय बी नुकसान नी हयु। पण तीहया वाट जोवतात र्या के पोलुस नो हात ह़ुजी आवहे, नीता हीय्यो पड़ जहे अने मर जहे, पण तीहया वाट जोवी-जोवीन थाक ज्या, पण ईनु कंय बी नी नुकसान नी हयु, ता तीमना मन मे बीजोत वीच्यार आयो अने तीहया केदा, “आहयो ते कानो देवता से।”
जां आमु जेला तां दर्या धेड़े पुबलीयुस नाम ना माणहे नी जागा हती, तीहयो ते मालटा टापु नो डायलो हतो; तीहयो आमने तीना घोर ली जाय्न तीन दाड़ा लग पोरणा कर्यो। ते पुबलीयुस ना बाह ने घण जादा ताव चड़ रेलो, अने तीहयो गोदड़ा मे पड़ र्यो हतो, पोलुस तीनीन्तां जाय्न तीनी वाटु भगवान सी वीन्ती कर्यो, अने ते टापु ना डायला ना बाह पोर हात मेक्यो अने तीहयो आरगो हय ज्यो जत्यार आसम हयु, तत्यार ते टापु मे रेण्या माणहु बी आया; अने तां आवीन आरगा हय ज्या। अने तीहया अमारो घण-जबर आव-भाव कर्या, अने आमु जवा बाज ज्या ता तीहया आमने जे बी जोवतु हतु तीहयु ढुंड्या मे मेळ देदा।
पोलुस नु रोम ह़ेर मे जाणु
तीन मयनान बाद आमु सीकंदर्या गेथा ढुंड्या मे बहीन चाल पड़्या। ते ढुंड्यु टाड ना दाड़ा मे तांत रेलु हतु; अने जीनी पोर जोवळ्या सोरा नी सेलाणी हती। अळतेण आमु सुरकुसा मे ज्या, अने तां आमु तीन दाड़ा र्या। तां गेथा आमु रेगीयुम मे ज्या: अने बीजा दाड़े दखणाव गेथु वाहळु आव्वा बाज ज्यु, एतरे आमु बीजा दाड़े पुतीयुली मे जत र्या। तां आमने थोड़ाक भरहो करन्या भायु भेट्या, अने तीहया घणा रावण्या कर्या करीन आमु तीमनीन्तां ह़ात दाड़ा र्या; अने आसम करीन तां गेथा रोम ह़ेर भणी चाल पड़्या। अळतेण तां भरहो करन्या भायु ने मालम पड़्यु के आमु आव्वा बाज र्या, ता तीहया आमने भेटवा करीन अपीयुस ना चोवराया लग अने तीन धरमसाहळान तां लग आया, तीमने देखीन पोलुस भगवान ने तु घणो वारु से केदो, अने आह़फो हीम्मत कर्यो।
रोम ह़ेर मे पोलुस
जत्यार आमु रोम ह़ेर मे पुग्या, ता पोलुस ने एक सीपायड़ु नी ह़ाते जे तीनी रखवाळी करतो हतो, आंग्ये रेवा नो हुकम जड़ ज्यो।
तीन दाड़ा हय ज्या अने अळतेण पोलुस तां वाळा युहदी माणहु ना डायला पुडारी ने बोलायो, अने जत्यार तीहया भेळा हय ज्या ता तीहयो तीमने केदो, “ए भायु, मे आपणा माणहु ना अने आपणा डाह-डाहान वीरोद मे कंय बी नी केदो, ते बी मने यरुसलेम गेथा धरावीन रोमी सीपायड़ा ना हात मे ह़ोप देदा। तीहया मारी पारख करीन सोड़ देवा हींडता हता काहाके मे मोत नो डंड जड़े ईसम कंय बी गुनो नी कर्यो। 1पण जत्यार युहदी माणहु मारा वीरोद मे केवा बाज ज्या, ता केसर राजा सी मारा बारा मे वीच्यार करवा करीन रावण्या करवा पड़्यु: आनीन करते नी के मे मारा माणहु पोर गुनो लगाड़ु। अने मे तमने आनीन करते बोलायो, के तमारी सी भेटु अने वात करु; काहाके मे ईस्रायली माणहु नी आह जुगु ह़ाकळ्या मे बंदाय र्यो।”
आहयु ह़मळीन तीहया केदा, “नी ते आमने तारा बारा मे युहदी माणहु पांह गेथी चीट्ठी जड़ी, अने नी ते युहदी भायु मे ना कोय आवीन तारा बारा मे केदा, अने नी ते बुरु-भलु केदा। पण तारो ह़ु वीच्यार से, तीहयो आमु ह़मळवा हींड र्या, काहाके आमने मालम से के आखी दुर आहया पंथ ना वीरोद मे माणहु वात करवा बाज र्या।”
तत्यार तीहया माणहु एक दाड़ो नक्खी कर्या, अने तीहया दाड़े ढेरेत माणहु पोलुस ने तां भेळा हया, अने पोलुस तीमने ईसु ना बारा मे मुसा ना लारे लीखली सास्तर मे गेथु अने भगवान वगे गेथा वात करन्या माणहु नी लीखली सास्तर मे गेथु ह़वारे गेथो ह़ांतो लग ह़मजाड़तो र्यो अने भगवान ना राज ना बारा मे गवा देतो र्यो। ता थोड़ाक तीहयी वात ने मान लेदा, अने थोड़ाक भरहो नी कर्या। जत्यार तीहया एक-मन्या नी हया, ता पोलुस तीमने केदो, चोखली आत्मा भगवान वगे गेथी वात केण्या माणेह यसाया ना लारे तमारा डाह-डाहा ने आहयु केदली हती,
जाय्न आहया माणहु ने कीदे,
तमु ह़मळह़ु, पण ह़मज मे नी आवे,
अने तमु देखहु, पण तमने देखाय नी।
काहाके आहया माणहु नु मन काठु,
अने तीहया मन बेरा हय जेला से,
अने आहया डोळा मीच लेदला से,
आसम नी हय जाय के तीहया कदी डोळा सी देखे,
अने कान्टा सी ह़मळे, अने मन सी ह़मजे,
अने फीरे, अने मे तीमने आरगा करु।
एतरे “तमु जाण लेवो के भगवान नी छुटकारा नी आहयी खुस-खबर आड़जात्या मे ह़मळावा करीन मोकली र्यो, तीहया ध्यान सी आहयी खुस-खबर ने ह़मळहे।” पोलुस आहयी वात की देदो, अने अळतेण युहदी माणहु वात मे जखड़ी पड़ ज्या, अने तीनीन्तां गेथा जत र्या।
अने पोलुस रोम ह़ेर मे बे साल लग कीराया ना घोर मे र्यो। अने जे तीनीन्तां आवत्ला तीमने आखा ने भेट्यो अने बीना धाक सी अने बीना रोक-टोक सी भगवान ना राज नो परच्यार कर्यो, अने मालीक ईसु मसी नी वात ह़ीकाड़तो र्यो।
Source notes (1)
- Cross-reference नेवताळा ना काम 25:11
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.