Paliya Bible
नेवताळा ना काम 2
चोखली आत्मा नु उतरवु
जत्यार पीन्तेकुस्त नो तीवार आयो, मतलब तीवार ना दाड़ा ना अळतेण नो पचाहवो दाड़ो, अने ईसु पोर भरहो करन्या आखा एक जागे भेळा हता। ता उचकाहलु आंजी ना झोकान तेवो अवाज ह़रगे गेथो आयो अने जे घोर मे तीहया बह रेला, तीहयु आखु घोर गुंज उठ्यु। अने तीमने आक्ठु नी आच ने तेवी जीप देखाव पड़ी, अने तीमनी माय्न आखा पोर आवीन थांग जी। अने तीहया आखा माणहु चोखली आत्मा सी भराय ज्या, अने तीहया ते भगवान नी आत्मान लारे आप्ली सक्ती सी भात-भातीन बोली बोलवा बाज ज्या।
अने तीहयी टेमे यरुसलेम मे ह़रग ने हेटा धरती ना आखा देसु मे गेथा आय रेण्या युहदी-धरम ना भक्त माणहु रेता हता। अने तीहया ईसु ना नेवताळा ने भात-भातीन बोली बोलत्ला ह़मळीन वहराय ज्या काहाके तीमनी मे एकीक जणो तीमने तीमनीत बोली मे बोलत्ला ह़मळी र्या हता। तीहया आखान-आखा घण-जबर वीच्यार मे पड़ ज्या, अने वहराय्न केदा, “ह़मळो! आहया बोलवा वाळा आखान-आखा गलील मे रेण्या नी हय ह़ु? ता आपणी मे नो एकीक जणो ईमने आपणा-आपणा देस नी बोली बोलत्ला काहा ह़मळी र्या। आमु ते पारथी ने, मेदी ने, एलामी ने, मीसुपुताम्या मे रेण्या से, अने युहद्या अने कपदुक्या ने, पुंतुस, अने आसीया मे रेण्या से। अने फुरग्या ने, पमफुल्या ने, मीसर ने, लीबुवा देस मे रेण्या से, जे कुरेन देसु धेड़्ये से, आहया आखा देसु मे रेण्या अने रोम मे रेण्या माणहु से, ईमनी मे ना काना युहदी-धरम वाळा, अने काना युहदी-धरम धरीन नवला चेला बणन्या से, अने क्रेते मे रेण्या, अने अरब देस वाळा बी से। मतलब ह़ु युहदी, अने ह़ु युहदी-धरम धरन्या आमु आखा आपणी-आपणी बोली मे ईमना मोडे भगवान ना मोट्ला काम ने नामलत्ला ह़मळवा बाज र्या।” अने तीहया आखान-आखा वहराय ज्या, अने घबराय्न एक-बीजा ने केवा बाज ज्या, “आहयु आसम काहा हय र्यु?”
पण थोड़ाक बीजा माणहु ह़ाही करता जाय्न केदा, “आहया ते ह़रु पीन नस्या मे से।”
पतरस आखा अगळ उजन्तो केय
पतरस ग्यारे नेवताळान वच मे उबो हय ज्यो, अने मोटेत केदो, ए युहदी माणहु अने यरुसलेम मे रेण्या, तमु मारी वात कान्टा लगाड़ीन ह़मळो अने आहयु जाण लेवो। आहया माणहु नस्या मे नी हय, जेम तमु ह़मजी र्या। हमणे ते ह़वारे नी नवेत बज री। पण आहयी तीहयी वात से, जीना बारा मे भगवान वगे गेथो वात केण्यो योयल केदलो हतो:
आहया आखरी दाड़ा ना बारा मे भगवान आहयु केय:
मे सेला दाड़ा मे आखा माणहुन डील मे मारी चोखली आत्मा उतारही।
अने तमारा बेटा-बेटी भगवान वगे गेथी वात केहे;
अने तमारा जुवान्या मोटा दरसन देखहे,
अने तमारा डायला माणहु ह़पना मे भगवान ह़ाते वात करहे।
अने मे तीहया दाड़ा मे मारा पावर्या अने पावर्याण पोर बी
मारी चोखली आत्मा उतारही,
अने तीहया बी भगवान वगे गेथी वात केहे।
मे उपर ह़रग मे सेल-भात्या जुदा-काम देखाड़ही,
अने हेटो धरती पोर सेलाणी देखाड़ही,
मतलब लोय, आक्ठी, अने धुकरा नु वादळु देखाड़ही।
मालीक ना मोटा भारी अने बड़ाय भर्या दाड़ा आव्वान
पेले दाहड़ु अंदारु डुब हय जहे, अने चांद लोय
ने तेवो रातो हय जहे।
अने तीहया दाड़ा मे जे कोय मालीक नाम सी वीन्ती करहे,
तीहयो छुटकारो हात करहे।
ए ईस्रायली जाती ना मारा भायु! मारी वात मन लगाड़ीन ह़मळो! तमु आह़फा जाणो के ईसु नासरी ना लारे तमारी अगळ सेल-भात्या जुदा-कामु अने वहराड़न्या जुदा भारी कामु नी सेलाणी देखाड़लो से। तीनी सी आहयु मालम पड़ जेलु के ईसु, भगवान वगे गेथो मोकल्लो हतो। 1तीहयो ईसु भगवान नी टाकली मरजीन अनसारे, अने भगवान नी योजना नी अनसारे धरायलो अने तमु कायदो तोड़न्या ना हात सी तीने कुरुस पोर खुटा ठोकाड़ीन चड़ाय मांग्या अने मराय नाख्या। 2बाखीन भगवान मोत ना बोंदु सोड़ीन ईसु ने मर्या-ह़र्या मे गेथो पासो जीवाड़्यो। काहाके ईसु मनख्यान तेम मोत नी बंदण मे रेय एम नी हतो।
काहाके ईसु ना बारा मे दावुद आहयु केय,
मे जलम मालीक भणी भाळ रेम, तीहयो मारी जमणी धेड़े रेय; एतरे मे केवा बी दुख मे लथड़ीन नी पड़ु।
एतरे मारु मन बी घण-जबर खुस रेय।
अने मारी आत्मा बी घण-जबर खुस हयहे,
अने मारु डील बी आह मे अराम हात करहे।
काहाके तु मारा जीव ने पताळ मे नी नाखे। अने नी ते तु तारा खरला भगत ने मड़ाट्या मे ह़ड़वा देय।
तु मने जीवाय नी खरली वाट देखाड़ही,
तारी हजरी मे रेवा सी मने सेलभात्याण खुसी सी भर देही।
ए भायु! मे आड़ा-बुड़ा डायला बाह दावुद ना बारा मे तमारो धाक राख्या वगर आहयु केम के तीहयो मर ज्यो अने तीने गाड़ बी देदा। अने तीनु मड़ाट्यु आज लग अमारी वच मे से। दावुद भगवान वगे गेथी वात केण्यो माणेह हतो, एतरे तीहयो आहयी वात जाणतो हतो, के भगवान ह़ाम खाय्न मने आहयु केदलो हतो के मे तारीत कुळी मे गेथो एक जणा ने तारी राजगादी पोर बहाड़ही। तीहयो हयवा वाळी वात ने पेले गेथोत देखीन मसी ने मरला मे गेथो पासो जीव उठवा ना बारा मे भगवान वगे गेथी आहयी वात केदो, के
नी ते तु तीना जीव ने पताळ मे नाखे।
अने तु तारा खरला भगत ने नी ह़ड़वा देय।
आहयात ईसु ने भगवान मर्या-ह़र्या मे गेथो पासो जीवतो करीन बठो कर देदलो से, अने आमु आखा आहयी वात ना गवा से। अने आहया ईसु ने भगवान आखी कळजुग नो हकदार्यो बणावीन आह़फा नी जमणी धेड़े बहाड़ देदो, अने आहयो ईसु वायदो करली चोखली आत्मा ने बाह पांह ह़ात करीन आञे ह़ारीक पोखड़ी देदलो से, तीने तमु देख र्या, अने ह़मळी र्या। दावुद आह़फो डील भेळो ह़रग मे नी ज्यो, पण तीहयो आह़फोत केय,
यहोवा भगवान मारा मालीक भगवान ने केय:
तु मारी जमणी धेड़े बह,
जत्यार लग मे तारा वेरी ने, तारा पोगु मेलवा नो जागो नी बणाय देम।
“ईस्रायली जाती नी आखी कुळी आहयु जाण लेवा जोवे के भगवान ईसु नेत जीने तमु कुरुस पोर चड़ावला, मालीक बी, अने मसी बी ठेराय देदलो से!”
आहयु ह़मळीन तीमनु मन ने घण-जबर ठेह लागी, अने तीहया पतरस ने अने ईसु ना बीजा नेवताळा ने पुसवा बाज ज्या, “ए भायु! आमने ह़ु करवा जोवे?”
पतरस तीमने आहयो जपाप आप्यो, “तमु पाप भणी गेथा मन फीरवीन भगवान वगा वळो, अने तमारी मे गेथो एकीक जणो आपणा-आपणा पाप नी माफी जुगु ईसु मसी ना नाम सी बपतीस्मा लेवो; ता तमु चोखली आत्मा नो वाटो हात करहु। काहाके भगवान नी चोखली आत्मा नो वाटो आपवा नो वायदो तमारी जुगु, अने तमारी अवल्यात जुगु से, अने तीहया आखा जुगु से, जे हमणे सेटा से, अने जीमने अमारो मालीक भगवान बोलाव्वा वाळो से।”
पतरस अळी ढेरेत वात नी लारे गवाय देदो, अने आहयु केतो जाय्न तीमनी पांह रावण्या करीन केदो, “तमु आह़फा ने आहयी पीड़ी ना घाड़्या माणहु सी बचाड़ो!” जे पतरस पोर भरहो कर्या तीहया बपतीस्मा ली लेदा; अने तीहया दाड़े तीनेक हजार माणहु ईसु ना नेवताळा ह़ाते भेसकाय ज्या। अने तीहया ईसु ना नेवताळा पांह ह़ीकवा मे, ह़ात-ह़ंगात मे, अने ईसु नी खतरीन रीती3 मे, अने ईसु पांह वीन्ती करवा मे झींग पड़ला र्या।
ईसु पोर भरहो करन्या नी ह़ात-ह़ंगात
ईसु ना नेवताळा ना लारे सेल-भात्या कामु अने सेलाण्या हयता हता एतरे आखा माणहु बीही ज्या। 4अने आखा ईसु पोर भरहो करन्या भेळात रेता हता, अने तीमनी पांह जे कंय बी हतु तीनी मे आखा नो साजो हतो। तीहया आपणु-आपणु माल-धन वेचीन, जे रुप्या-टका जड़े, तीहया रुप्या-टका जीने जोवे तीने आप देता हता। तीहया आखा एक-मन्या हय्न दाड़ीन मंदीर मे भेळा हयत्ला, अने आखान घोरे-घोरे जाय्न खुस हय्न मालीक नी खतरीन रीती मे भेसकायत्ला अने ह़ुदला मन सी भेळा हय्न खाणु खात्ला। अने तीहया भगवान नो गुण गाया करता हता, अने आखा माणहु तीमनी सी खुस हता। अने जे-जे पाप मे गेथो छुटकारो हात करत्ला, तीमने मालीक ईसु दाड़ीत तीमनी ह़ाते भेसकी देत्लो।
Source notes (4)
- Cross-reference मत्ती 27:35; मरकुस 15:24; लुका 23:33; युहन्ना 19:18
- Cross-reference मत्ती 28:5,6; मरकुस 16:6; लुका 24:5
- Footnote युनानी बोलु मे आञे ह़ारीक रोट्लो तोड़वा मे लीखलु से।
- Cross-reference नेवताळा ना काम 4:32-35
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.