Paliya Bible
नेवताळा ना काम 1
कीताप ना बारा मे
ए थीयुफीलुस! मे मारी पेल्नी कीताप तीहया आखा काम ना बारा मे लीखलो से, जे काम ईसु सुरु कर्यो अने ह़ीकाड़तो र्यो। अने जत्यार लग तीहयो चोखली आत्मा ना लारे आह़फा ना टाळला नेवताळा ने हुकम आप्यो अने ह़रगे नी उचलायो, तां लग तीहयो तीमने ह़ीकाड़तो र्यो। अने ईसु खुद मरवा नी अळतेण नेवताळा ने घणा पाका पुरावा भेळ देखाव पड़्यो, के तीहयो जीवत्लो से, अने तीहयो चाळीह दाड़ा लग तीमने देखावा पड़तो र्यो, अने तीमनी ह़ाते भगवान ना राज ना बारा मे वात करतो र्यो। 2अने चेला ह़ाते आय्न तीमने हुकम आप्यो के “बाह जे वायदो करलो से तीहयो वायदो पुरो हयता लग तमु यरुसलेम ह़ेर मे गेथा नी जजो, अने तमु तीहयो वायदो पुरो हयवा नी वाट जोवता रेजो। मे तमने तीहया वायदा ना बारा मे देखाड़ देदलो से। 3युहन्नो ते पाणी सी बपतीस्मा आपलो से, पण थोड़ाक दाड़ान अळतेण तमु चोखली आत्मा सी बपतीस्मा लेहु।”
ईसु नु ह़रगे उचलायणु
एतरे तीहया ईसुन्तां भेळा हय्न आहयी वात पुछ्या, “ए मालीक! तु आहयी टेमे ईस्रायल राज्य ने पासु बणावही ह़ु?”
ईसु जपाप आप्यो, “तीहयी टेम अने सीजन ने जाणवा नो हक बाह ना हात मे से, तमारु काम नी हय। 4बाखीन चोखली आत्मा तमारी पोर उतरहे, ता तमु सक्ती हात करहु; अने यरुसलेम ह़ेर मे आखा युहद्या मे, अने सामर्या ह़ेर मे अने धरती नी सेल्ली काकड़ लग मारा गवा बणहु।” 5आहयी वात की देदो अने अळतेण ईसु तीमनी देखणते उपर ह़रग मे उचलाय ज्यो, अने वादळु तीने ढाक लेदु।
तीनी जती वखत चेला ह़रग भणी एकडीट्या भाळ रेला हता, तत्यार धोळासप लुगड़ा पेर रेला बे अदमड़ा तीनीन्तां आवीन उबा हय ज्या। अने केदा, “ए गलील मे रेण्या माणहु! तमु ह़रग भणी काहा भाळ र्या? आहयोत ईसु, तमारी वच मे गेथो ह़रग मे उचलाय जेलो से, आहयीत रीते पासो आवहे, जीसम तमु हीने जत्लो देखला से।”
यहुदा ना जागे मत्ती ने टाळणु
ता चेला जेतुन नाम ना बड़ा मे गेथा पासा यरुसलेम आया, आहयो बड़ो यरुसलेम ह़ेर गेथो एक कीलोमीटरेक नाम्बे हतो। 6तां पुगीन तीहया घोर नी बीजी मंजली पोर चड़्या, जां तीहया रेता हता। पतरस, युहन्नो, याकुब, अंदर्यास, फीलीपुस, थोमस, बरतुलमय, मत्ती हलफाय नो सोरो याकुब, सीमोन जलोतेस अने याकुब नो सोरो यहुदा। तीमनी ह़ाते ढेरेत बयरा अने ईसु नी आय्ह मरीयम अने भाय बी हता। आहया आखा एक्ठा हय्न वीन्ती करवा बाज र्या हता।
तां आखा मेळीन एक ह़ोन वीह जणा हता तीहया दाड़े पतरस भाय-बेन्या ना वच मे उबो हय्न केवा बाज ज्यो। “ए भाय-बेन्या, सास्तर मे चोखली आत्मा दावुद ना मोडा सी यहुदा ना बारा मे जे पेले गेथी हती केदली तीहयी वात पुरी हयवा जरुड़ी हती। के यहुदा ईसु ने धरवा वाळा नो अगवो बणहे। अने तीहयो आपणी मे गणायतो हतो अने ईनी सेवा-चाकरी मे तीनो बी हीस्सो हतो।” 7
पण तीहयो पाप-धंदा ना कमायला पय्हा सी एक खेतर वेचातु लेदो; अने तीहयो ते खेतर ना झाड़े जाय्न टंगाय ज्यो, अने मोडान भरहे पड़्यो, तीनु पेट फाट ज्यु, अने तीना आखा आतड़ा बारा नीकळी आया। आहयी वात यरुसलेम ह़ेर मे आखा रेवा वाळा ने पतो हय जी, अने तीहया खेतर नु नाम हकळदमा मतलब लोय नु खेतर पड़ ज्यु।
भजन नी कीताप मे बी आहयु लीखलु से,
“तीनी जागा उजड़ी जवा जोवे,
अने तीनी मे रेण्या एक बी नी बचवा जोवे।”
अने “तीहया माणेह नी आवजी पोर कोय बीजो रेवा जोवे।” 8
एतरे तालेत से के जेतरी टेमे लग मालीक ईसु अमारीन्तां आवतो-जतो र्यो मतलब तीहयो ईसु, युहन्नो बपतीस्मा आपलो तीहयी टेमे गेथो मरीन जीवतो हय्न ह़रगे जता लग अमारी ह़ाते र्यो, तीहयी टेमे जे माणहु आपणी ह़ाते र्या। मतलब युहन्ना ना बपतीस्मा सी लीन मालीक ना ह़रगे जवा ना दाड़े लग जे माणहु बराबर अमारी ह़ाते हता, तीमनी माय्न एक अमारी ह़ाते मालीक नो मर्या-ह़र्या मे गेथो जीव उठवा नो गवा बणे।
एतरे तीहया बे अदमी ने ह़ाम्बा लाया युसुफ ने, जे बरसबा केवायतो हतो, अने जीनु नामह़ाद्यु नाम युसतुस हतु, अने मतीयाह ने। ता तीहया भगवान सी आसम वीन्ती कर्या, “ए मालीक! तु आखा ना मन ने जाणे। आमने आहयु देखाड़, के तु आहया बे जणा मे गेथो कोयने टाळलो से, अने तीहयो एक ईसुन नेवताळान रुप मे यहुदा नी आवजी पोर आहयी सेवा-चाकरी नो जागो लेय। जे जागा ने सोड़ीन यहुदो आह़फा ना जागे जत र्यो।” अने तीहया ते बे जणा ना नाम सी चीट्ठी नाख्या ता तीहयी चीट्ठी मतीयाह ना नाम पोर नीकळी। आसम करीन तीहयो मतीयाह ईसु ना ग्यारे नेवताळा मे भेसकाय ज्यो।
Source notes (8)
- Cross-reference लुका 1:1-4
- Cross-reference लुका 24:49
- Cross-reference मत्ती 3:11; मरकुस 1:8; लुका 3:16; युहन्ना 1:33
- Cross-reference मत्ती 28:19; मरकुस 16:15; लुका 24:47,48
- Cross-reference मरकुस 16:19; लुका 24:50,51
- Cross-reference मत्ती 10:2-4; मरकुस 3:16-19; लुका 6:14-16
- Cross-reference मत्ती 27:3-8
- Cross-reference मत्ती 3:16; मरकुस 1:9; लुका 3:21; मरकुस 16:19; लुका 24:51
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.