Paliya Bible
युहन्ना 21
ईसु चेला अगळ उजन्तो हये
तीबर्या दर्या धेड़े ईसु अळी आह़फा ना चेला अगळ आहयी रीते उजन्तो देखाव पड़्यो। एक दाड़े, सीमोन पतरस, थोमस, जे दीदुमस बी केवायतो हतो, नतनेल, जे गलील ना काना ह़ेर नो हतो, अने जब्दी ना बे बेटा अने ईसु ना बे बीजा चेला आहया आखा भेळात हता। 1सीमोन पतरस, तीमने केदो, “मे ते माछला मारवा जाम।” अने तीहया पतरस ने केदा, “आमु बी तारी ह़ाते आवये।” अने तीहया तीनी ह़ाते चाल पड़्या, अने ढुंड्या मे चड़ीन बह ज्या, पण तीहयी राते तीमने एक बी माछली नी मरी। ह़वारे हयतेत ईसु दर्या नी धेड़े आवीन उबो री ज्यो; बाखीन चेला ईसु ने नी ओळख्या। तत्यार ईसु तीहया चेला ने केदो, “ए सोरा! तमने खावा करीन एक बी माछली नी मरी ह़ु?” तीहया चेला जपाप आप्या, “एक बी नी मरी।” 2
तत्यार ईसु तीमने केदो, “ढुंड्या नी जमणी धेड़े जाळ नाखो ता तमने माछला मरहे।” तीहया जाळ नाख्या अने एतरा माछला आया के तीमने जाळ नी हपकायी।
ता तीहयो चेलो, जे ईसु नो लाडलो चेलो केवायतो हतो, पतरस ने केदो, “आहयो ते मालीक ईसुत से।” जत्यार सीमोन पतरस ह़मळ्यो के आहयो मालीक ईसुत से, ता तीहयो अरदो नागरलो हतो करीन फटकु सी केड़ वाळ लेदो, अने ईसु ने भेटवा जवा करीन दर्या मे कुद पड़्यो। पण बीजा चेला, माछला भरायली जाळ ने हापकता जाय्न नान्ला ढुंड्या ने दर्या नी धेड़े लाया। काहाके तीहया दर्या नी धेड़े गेथा सेटा नी हता, तीहया दर्या धेड़े गेथा बेक ह़ोव हात सेटा हता। जत्यार धेड़े पुग्या, ता तीहया कोयला नु आक्ठु, अने तीनी पोर माछला मेकला देख्या, अने रोट्ला देख्या। ईसु तीमने केदो, जे माछला तमु हमणे मारला से, तीनी मे गेथा थोड़ाक लावो।
सीमोन पतरस ढुंड्या पोर चड़ीन एक ह़ो तीरपन मोट्ला माछला सी भरायली जाळ धेड़े हापक्यो, अने एतरा माछला हता ते बी जाळ नी फाटी। ईसु तीमने केदो, आवो, खाणु खाय लेवो, अने चेला मे गेथा कोयनी बी हीम्मत नी आयी, के तीने पुसे, तु कोय से? काहाके तीहया जाणता हता के आहयो मालीक ईसु से। ईसु अगो आयो, अने खावा करीन तीहयो तीमने रोट्लो आप्यो, अने आसमेत माछला बी आप्यो।
मर्या-ह़र्या मे गेथो पासो जीवतो हय्न ईसु तीसरी कावा आह़फा ना चेला अगळ उजन्तो देखाव पड़्यो।
ईसु अने पतरस
खायलीन नवराय्न ईसु, पतरस ने पुछ्यो, “ए सीमोन, युहन्ना ना बेटा! तु ह़ाचलीनेत आमनी गेथो वदु मने मोंग करे ह़ु?” पतरस ईसु ने केदो, “होव, मालीक! तु जाणे के मे तने मोंग करु, तीहयो तीने केदो, मारा गाडरा ने चार।” ईसु बीजी कावा अळी सीमोन पतरस ने केदो, “ए सीमोन, युहन्ना ना बेटा! तु ह़ाचली मने मोंग करे ह़ु?” पतरस ईसु ने जपाप आप्यो, “होव मालीक! तु जाणे के मे तने मोंग करु।” ईसु पतरस ने केदो, “मारा गाडरा नी गुवाळी कर।” ईसु तीसरी कावा पतरस ने केदो, ए सीमोन, युहन्ना ना बेटा, तु मने मोंग करे ह़ुं? पतरस उदास हय ज्यो, के ईसु तीने तीसरी कावा आसम केदो, तु मने मोंग करे ह़ुं? अने ईसु ने केदो, ए मालीक, तने ते आखु कंय मालम से, तने आहयु बी मालम से के मे तने मोंग करु। ईसु तीने केदो, मारा गाडरा नो ध्यान राख। मे तने ह़ाची-ह़ाची केम, जत्यार तु जुवान हतो, ता तु तीयार हय जतो हतो अने जां जवा लागे, तां फीरतो हतो, पण जत्यार तु डायो हयही, ता तारा हात नाम्बा करही, अने बीजो तने तीयार करीन जां तने जवा नी लागे तां तने लीजहे। ईसु आहयी वात ना लारे आहयु देखाड़्यो के पतरस केवी मोत सी भगवान नी बड़ाय करहे, अळी ईसु केदो, मारी पसळ आव।
ईसु अने तीनो मोंगाळ्ळो चेलो
पतरस पासो फीरीन ईसु ना तीहया चेला ने पसळ आवत्ला देख्यो, जीने ईसु मोंग करतो हतो, आहयो तीहयोत हतो, जे ईसु नी छाती भणी वळीन “ए मालीक! तने धराव्वा वाळो कोय से?” करीन पुछलो हतो। पतरस तीने देखीन ईसु ने पुछ्यो, “मालीक! आनी पोर ह़ु वीतवा वाळु से?”
ईसु केदो, “कदी मने आवते लग हीय्यो जीवत्लो री जाय, ता तारु ह़ु लेणु-देणु से? तु मारी पसळ चाल्या कर।”
एतरे ईसु पोर भरहो करन्या भायु मे आहयी वात फीर ज्यी के हीय्यो चेलो नी मरे; पण ईसु आसम नी केदो के “हीय्यो चेलो नी मरे” पण आसम केदलो के “हीय्यो मने पासो आवते लग कदी जीवत्लो री जाय, ता आहयी वात मे तारु ह़ु लेणु-देणु से?”
आहयो तीहयोत चेलो से, जे आहयी वात नी गवा देवा करीन आहयी वात लीखलो से, आमु जाणये के आनी गवाय ह़ाची से।
खत्तम हयणु
ईसु अळी बी रेट काम कर्यो; कदी एकीक करीन तीहया काम ना बारा मे लीखता, ता मे ह़मजु के जे कीताप्या लीखायता, ता तीहया कीताप्या एतरा जबर हय जता के आहयी कळी मे बी नी ह़माता।
Source notes (3)
- Cross-reference लुका 5:5
- Cross-reference लुका 5:6
- Cross-reference युहन्ना 13:25
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.