Paliya Bible
युहन्ना 20
ठारलु मड़ाट्यु
हप्ता ना पेल्ना दाड़े, ह़वारे भळ-भाकेत, मरीयम मगदलीनी मड़ाट्यान्तां आयी; अने तीहयी मड़ाट्या पोर गेथो दगड़ो हेड़ मेकलो देखी। तीहयी सीमोन पतरस ने तां अने तीना बीजा चेलान्तां दवड़ीन आयी, जीने ईसु मोंग करत्लो, तीने केदी, “तीहया, मालीक ईसु नु धोड़ ने मड़ाट्या मे गेथु काडीन लीजती र्या; अने आमने मालम नी हय के तीहया धोड़ ने कां ह़रा मेल र्या।”
तत्यार पतरस अने ईसु नो बीजो चेलो मड़ाट्या भणी दवड़ी पड़्या। तीहया बेम जणा ह़ाते-ह़ाते दवड़ी र्या हता, पण बीजो चेलो पतरस गेथो अगळ हय्न मड़ाट्यान्तां पेले पुग्यो। अने वाको वळीन लुगड़ा पड़ रेला देख्यो, ते बी तीहयो मड़ाट्या मे मोय नी ज्यो। ता सीमोन पतरस तीनी पसळ पुग्यो, अने मड़ाट्या मे मोय ज्यो अने लुगड़ा पड़ रेला देख्यो। अने तीहयु फटकु जे ईसु ना मुंडे बांदलु हतु, ईसु ना लुगड़ा ह़ाते पड़ रेलु नी हतु पण लुगड़ा गेथु सेटु बमणीन एक जागे मेकलु देख्यो। ता बीजो चेलो बी जे मड़ाट्या मे पेलो पुगलो, मोय ज्यो अने देखीन भरहो कर्यो। तीहया हजु लग तीहयी खरली सास्तर नी वात ने नी ह़मज्या के तीने मरला मे गेथो जीवतो हय्न बठो हयणुत से। अने तीहया बेम चेला तीमना-तीमना घोर जत र्या।
मरीयम ने ईसु देखाव पड़े
पण मरीयम रड़ती जाय्न मड़ाट्यान्तांत उबी री, अने रड़ती-रड़ती मड़ाट्या भणी ढुंगी वळीन, मोय भाळी। अने जां ईसु नु धोड़ मेल्लु हतु, तां ह़रा उजळा लुगड़ा पेर रेला बे ह़रगदुत ने देखी। एक ने मुड़ाख्ये अने एक ने पायता भणी बह रेला देखी। तीहया तीने केदा, “ओ बाय जात! तु काहा रड़ री?” तीहयी केदी, तीहया मारा मालीक! ने चुट लीजला से, अने मने नी मालम हय के तीहया तीने कां ह़रा मेल र्या। आहयु कीन तीहयी पासु फीरीन भाळी अने तीहयी ईसु ने उबो हय रेलो देखी; पण तीने आहयो ईसु से करीन ओळखायु नी। ईसु तीने केदो, “ओ बाय जात! तु काहा रड़ री? कोयने ह़ोद री?” तीहयी मरीयम तीने, वाड़ी मे काम करन्यो पावोर ह़मजीन केदी, “ए दादा कदीम तु तीने चुट ली ज्यो हय ता मने कीदे के तीने कां ह़रो मेल र्यो, अने मे तीने ली आवही।”
आहयु ह़मळीन ईसु तीने केदो, “ओ मरीयम!” तीहयी पासी फीरीन ईसु ने ओळखीन तीने केदी, “रब्बनी” ईब्रानी बोली मे आहया बोल नु मतलब “ए गुरु हतु।”
ईसु तीने केदो, मे हजु लग भगवान बाह ने तां उपर ह़रग मे नी ज्यो। एतरे मने छीमीन ना रोके, पण मारा भायुन तां जाय्न तीमने आहयु कीदे, “के ईसु की र्यो के मे मारा भगवान बाह ने तां जवा हींड र्यो, जे हाव गेथो तमारो बी भगवान बाह से।”
मरीयम मगदलीनी जाय्न आहयी वात चेला ने केदी के “मे मालीक ने देखली से, अने तीहयो मने आहयी वात की मोकल्यो।”
ईसु चेला ने देखावा पड़े
तीहयात दाड़े, हप्ता नो पेल्नो दाड़ो हतो, ह़ांती वळे ईसु ना चेला युहदी माणहु ना धाके आह़फात झापला दीन घोर मे कुंडाय र्या हता। अने ईसु तीमना वच मे आवीन उबो हय ज्यो। अने चेला ने केदो, “तमने सांती जड़े!” आहयु कीदीन ईसु आह़फा ना हाते ना घावु, अने आह़फा ना कुखे ना घाव देखाड़्यो: ता तीना चेला, मालीक ईसु ने देखीन खुस हय ज्या। एतरे ईसु तीमने अळी केदो, “तमु सांती सी रेवो! जीसम भगवान बाह मने मोकल्लो से, तेमेत मे बी तमने मोकलु।” आहयु कीदीन ईसु तीमनी पोर फुक्यो अने तीमने केदो, “लेवो, आहयी चोखली आत्मा तमारा जीव मे आवरी लेवो।” 1तमु जे माणहु ने पाप नी माफी आपहु, तीहया माणहु ने पाप नी माफी जड़ जहे, अने जे माणहु ने तमु पाप नी माफी नी आपो, तीहया माणहु ने पाप नी माफी नी जड़े।
पासो जीवतो हयलो ईसु थोमास ने देखावा पड़े
जत्यार ईसु चेलान्तां आयो, ता थोमस तीमनी भेळतो नी हतो, तीहयो बी बारे चेला मे नो एक हतो, आहयो दीदुमस नीता जोवळ्यो बी केवायतो हतो। बीजा चेला तीने केदा, “आमु मालीक ईसु ने देखला से।” ता तीहयो केदो, “जत्यार लग मे तीना हात मे खुटा ना घाव नी देख लेम, अने खुटा ना लारे पड़ला घाव मे, मारी आंगळी नी घाल देम, अने तीना कोख मे पड़ला घाव मे मारो हात नी घाल देम, तां लग मे भरहो नी करु।”
आंठ दाड़ा वीत ज्या अने अळतेण ईसु ना अळी चेला घोर मे हता, अने थोमस बी तीमनी ह़ाते हतो। तीहयी टेमे घोर नु झापलु देदलु हतु। ते बी ईसु तीमनी वच मे आवीन उबो हय ज्यो, अने केदो, “तमु ह़ुकना रेवो!” ता ईसु थोमस ने आह़फा ना हात देखाड़ीन केदो, “तारी आंगळी आहया हात ना घाव मे घाल, अने तारो हात ओरो कर, अने मारा कोख मे वाळा घाव मे तारो हात घाल। अने वण-भरह्यो ना बणे, पण मार पोर भरहो कर।”
थोमस ईसु ने जपाप आप्यो, “ए मारा मालीक! ए मारा भगवान!”
ता ईसु थोमास ने केदो, “तु ते मने देखीन मार पोर भरहो करलो से। जुगाळा से तीहया, जे मने देख्या वगर मार पोर भरहो करे।”
ईसु आह़फा ना चेला अगळ अळी रेट जुदा-कामु ना सेलाण्या देखाड़्यो, पण तीहयी जुदा-काम नी सेलाणी ना बारा मे आहया कीताप मे लीखलु नी हय।
आहयी कीताप नो मकसत
पण आहयी वात आञे आनीन करते लीखली से, के तमु आहयो भरहो करो के ईसुत भगवान नो बेटो मसी से, अने तीनी पोर भरहो करीन तीना नाम ना लारे अमर जीवाय हात करो तेम।
Source notes (1)
- Cross-reference मत्ती 16:19; 18:18
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.