Skip to content
BibleKenya

Paliya Bible

युहन्‌ना 19

सीपायड़ा ईसु ना मुंडा पोर काटा नु मुळ्‌यु गुथीन मेके

अळतेण पीलातुस ईसु ने लीजवाड़ीन ह़ड़का देवाड़्‌यो। अने सीपायड़ा कटाळस्‌या नु मुळ्‌यु गुथीन ईसु ना मुंडा पोर मेक देदा, अने जामण्‌यु डगलु पेराया। अने ईसुन्‌तां आवीन केवा बाज ज्‌या, “ए युहदी माणहु ना राजा, वारु से के!” अने तीहया तीने थापड़्‌या देदा।

पीलातुस ईसु ने मारवा नो हुकम आपे

पीलातुस अळी बारो जाय्‌न माणहु ने केदो, “देखो, मारी नींगा मे आनी मे कंय बी खोड़ देखाव नी पड़तो। आहयु तमु बी जाणवा जोवे करीन मे आने अळी बारो तमारी अगळ लवाड़ु।” तीहयी टेमे ईसु ना मुंडा पोर काटा नु मुळ्‌यु मेकलुत हतु, अने तीने जामण्‌यु डगलु पेरावलुत हतु, तेमेत तीहयो बारो आयो। अने पीलातुस माणहु ने केदो, “देखो आहयो से तीहयो माणेह!”

मंदीर ना डायला पुंजारा अने मंदीर ना रखवाळ्‌या सीपायड़ा, ईसु ने देखीन, पीलातुस अगळ आसम आड़ी पड़्‌या, “हीने कुरुस पोर चड़ाव, कुरुस पोर चड़ाव!” पीलातुस तीमने केदो, “मारी नींगा मे आनी मे कंय बी खोड़ नी देखाव पड़तो। एतरे आने तमुत ली जावो, अने तमु आह़फात हीने कुरुस पोर चड़ावीन मार देवो!”

युहदी-पुडार्‌या केदा, “अमारी पांह मुसा नी लारे लीखली सास्‌तर से, तीनी लारे हीने मोत नो डंड जड़वा जोवे। काहाके हीय्‌यो आह़फोत भगवान नो बेटो हयवा नो दावो करलो से।”

पीलातुस तीमनी वात ह़मळीन अळी बी, बीही ज्‌यो। तीहयो अळी ईसु ने हवेली ना आंगणा मे ली जाय्‌न ईसु ने पुछ्‌यो, “तु कां गेथो आवलो से?” बाखीन ईसु तीने कंय जपाप नी आप्‌यो। एतरे पीलातुस ईसु ने केदो, “तु मने जपाप काहा नी आप्‌तो? तने नी मालम हय ह़ु, के मारी पांह तने सोड़वा नो हक से, ‘अने कुरुस पोर चड़ाव्‌वा नो बी हक से।’”

ईसु पीलातुस ने जपाप आप्‌यो, “कदीम तने ह़रगे गेथो हक नी जड़तो, ता तारो मारी पोर कानो बी हक नी रेतो। एतरे जे माणेह मने धरावीन तारा सुपरत करलो से तीहयो वदु पापी से।”

ईसु नी आहयी वात ह़मळीन पीलातुस, ईसु ने सोड़वा नो वीच्‌यार कर्‌यो, पण युहदी-पुडार्‌या आड़ी-आड़ीन केदा, “जे आह़फा ने राजा केय, तीहयो आपणा रोमी राजा नो वीरोद करे, अने तीने डंड जड़वात जोवे। एतरे कदीम तु हीने सोड़ देही, ता तु आपणा रोमी राजा नो दोस्‌तीदार नी हय।”

आहयी वात ह़मळीन पीलातुस, ईसु ने बारो गब्‌बाता नाम ना जागान तां लवाड़्‌यो। युहदी माणहु नी बोली मे आहया नाम नु मतलब “दगड़ा नी पयड़ी” हतु। अने पीलातुस तीहया जागा मे आह़फा नी नीयाव नी गादी पोर बह ज्‌यो। आहयो फसह ना तीवार नी तीयारी नो दाड़ो हतो। अने माथेक दाहड़ु हतु: तत्‌यार पीलातुस युहदी माणहु ने केदो, “देखो आहयो से, तमारो राजा!”

ता युहदी-पुडार्‌या अळी आड़ीन केदा, आने आञे गेथो ली जा! आने आञे गेथो ली जा!

अने आने कुरुस पोर चड़ाय दे! पीलातुस तीमने पुछ्‌यो, “मे तमारा राजा ने कुरुस चड़ाय देम ह़ु?”

मंदीर ना डायला पुंजारा केदा, “रोमी राजा ने सोड़ीन अमारो कानो बी राजा नी हय।”

एतरे पीलातुस ईसु ने तीमना हात मे आनीन करते ह़ोप देदो, के तीहया हीने कुरुस पोर चड़ावे।

सीपायड़ा ईसु ने कुरुस पोर चड़ावे

तत्‌यार तीहया ईसु ने ली ज्‌या, अने तीहयो आह़फा नु कुरुस उचलीन तीहया जागान्‌तां तक बारो ज्‌यो, जे “खोपड़ी नो जागो” अने ईब्‌रानी बोली मे “गुलगुता” केवाय। तां तीहया तीने अने अळी बे माणहु ने कुरुस पोर चड़ाया, एक ने आंखर अने एक ने तींखर अने वच मे ईसु ने। पीलातुस एक गुना नी चीट्‌ठी लीखाड़ीन कुरुस पोर लगाड़ देदो, तीनी पोर लीखलु हतु, “ईसु नासरी युहदी माणहु नो राजा।” आहयी गुना नी चीट्‌ठी घणा युहदी माणहु भण्‌या, काहाके तीहयो जागो जां ईसु ने कुरुस पोर चड़ावला, ह़ेर ह़ाते हतो अने गुना नी चीट्‌ठी ईब्‌रानी अने लतीनी अने युनानी भासा मे लीखली हती। तत्‌यार युहदी माणहु ना मुख्‌या पुंजारा पीलातुस ने केदो, युहद्‌या ना राजा ना लीखे, बाखीन तीहयो केदलो के मे युहद्‌या नो राजा से।

पीलातुस तीमने जपाप आप्‌यो, “मे जे लीखाड़ देदो, तीहयुत रेहे।”

अळतेण सीपायड़ा ईसु ने कुरुस पोर चड़ाय देदा: तत्‌यार तीहया ईसु ना लुगड़ा ना च्‌यार वाटा पाड़्‌या: एकीक सीपायड़ा जुगु एकीक वाटो पाड़्‌या। पण ईसु नु डगलु ह़ीवीन बणावलु नी हतु, अने पुरु गुथीन बणावलु हतु। तीहया आह़फा-आह़फा केदा,

आपणु आने नी फाड़ता पण आनी पोर चीट्‌ठी नाखीया के आहयु कोयने जड़े,

आहयु आनीन करते हयु के खरला सास्‌तर मे लीखलु हतु पुरु हयु,

तीहया मारा लुगड़ा आह़फा वाट लेदा अने चीट्‌ठी नाख्‌या।

ईसु ना कुरुस धेड़्‌ये, ईसु नी आह्‌य, अने ईसु नी आह्‌य नी बेनेह, अने केलपास नी लाडी मरीयम, अने मगदलीनी मरीयम उबा हय र्‌या हता। ईसु तां ह़रो आह़फा नी आह्‌य ने देख्‌यो, अने तीना चेला ने बी देख्‌यो जे ईसु नो लाडलो चेलो केवायतो हतो; ता तीहयो आह़फा नी आह्‌य ने केदो, “ओ बाय! आहयो तारो बेटो से।”

तत्‌यार तीहया चेला ने केदो, “देख, आहयी तारी आय्‌ह से।” अने तीहयी टेमे तीहयो चेलो, तीने आह़फा ना घोर ली ज्‌यो।

ईसु नी मोत

अळतेण ईसु आहयु जाणीन के हाव आखु कंय पुरु हय ज्‌यु; आनी लेदे के चोखली सास्‌तर मे जे की मेल्‌यु तीहयु पुरु करवा केदो, “मे तरहेलो से।”

ता एक ठाहरा मे अंगुर नो कड़वलो रोह भरीन मेल्‌लो हतो; रोह मे पोतु भीगवीन जुफा नी लाकड़ी पोर मेलीन ईसु ना मोडे लगाड़्‌या। जत्‌यार ईसु अंगुर नो कड़वलो रोह चाख्‌यो, ता केदो, “पुरु हय ज्‌यु।” अने आह़फा नु मुंडु हेटु वाळ लेदो, अने आह़फा नो जीव भगवान ने आप देदो।

भालो पाहळी मे गोपे

अने आनी लेदे के तीहयो तीयारी नो दाड़ो हतो, युहदी माणहु पीलातुस सी वीन्‌ती कर्‌या के हीना पोगु तोड़ दे अने उतार देवो काहाके अराम ना दाड़े हीय्‌यो कुरुस पोर नी रेय, काहाके तीहयो तीवार नो दाड़ो हतो एतरे सीपायड़ा आवीन ईसु नी आड़े-धेड़े कुरुस पोर चड़ावला माणहु ना पोगु भांग देदा। पण अळतेण तीहया ईसु ह़ाते आवीन देख्‌या, ता तीमने मालम पड़्‌यु के तीहयो मर जेलो से। ता तीहया तीना पोगु नी भांग्‌या। बाखीन तीहया सीपायड़ा मे नु एक सीपायड़ु ईसु ना कुखे भालो गोप्‌यु, अने कुखे गेथु तत्‌यारु लोय अने पाणी नीकळ्‌यु। जे कोय आहयु देख्‌यो, तीहयोत गवाय देदो, तीनी गवाय ह़ाचली से; तीहयो जाणे के हीय्‌यो ह़ाची की र्‌यो, के तमु बी भरहो करो। आहयी वात आनीन करते हयी के चोखली सास्‌तर मे लीखली वात पुरी हये तीनु कानु बी हाटकु नी भांगे। 1ते बी सास्‌तर मे एक जागा मे आहयु लीखलु से, जे बी तीने खुटा ठोकला से, तीनी भणी भाळहे।

ईसु नु गाड़नु

(मत्‌ती 27:57-61; मरकुस 15:42-47; लुका 23:50-56)

आनीन अळतेण अरीमीतीया नो युसुफ ने जे ईसु नो चेलो हतो, पण युहदी माणहु ना धाके आहयी वात ने ह़ताड़ीन राखतो हतो, पीलातुस सी वीन्‌ती कर्‌यो के मे ईसु ना धोड़ ने ली जाय सकु, पीलातुस तीनी वीन्‌ती ह़मळ्‌यो, अने तीहयो आवीन तीनु धोड़ ली ज्‌यो। 2नीकुदेमुस बी जे पेले ईसुन्‌तां राते जेलो हतो, तयतीस कीला नी आड़े-धेड़े गंदाण्‌यो मसालो लीन आयो। अने युहदी माणहु जीसम मरला माणहु ना धोड़ ने वगे करे तेमेत तीहया ईसु ना धोड़ ने वारु गंदाण्‌यो मसालो चोपड़्‌या अने लेफड़्‌या कफन मे वीटाळ देदा। जे जागा मे ईसु ने कुरुस पोर चड़ावला, ते जागा ह़ातेत एक वाड़ी हती; अने तीहयी वाड़ी मे एक नवलु मड़ाट्‌यु हतु; तीहया मड़ाट्‌या मे हजु लग कोयने वगे नी करला हता। हाव युहदी माणहु नो अराम नो दाड़ो सुरु हयवा वाळो हतो। अने तीहयु मड़ाट्‌यु ह़ातेत हतु करीन ईसु ना धोड़ ने तीहयात मड़ाट्‌या मे मेल देदा।

Source notes (2)
  1. Cross-reference परकासीतवाक्‌य 1:7
  2. Cross-reference युहन्‌ना 3:1,2

Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.