Paliya Bible
नेवताळा ना काम 6
ह़ात चाकर्या ने टाळे
तीहया दाड़ा मे जत्यार चेला नी गीनती बड़वा बाज जी। ता युनानी बोली बोलन्या, अने ईब्रानी बोली बोलन्या नी वच मे झगड़ो हयवा बाज ज्यो, ईब्रानी भासा बोलन्या आहयो दावो कर र्या हता के आमनी दाड़ीक नी सेवा मे रंडायला बयरा नी खबर नी लेता। तत्यार ईसु ना बारे नेवताळा, चेला नी मंडळी बोलावीन केदा, “आहयु ताले नी हय के आमु खाणु वाटवान करते वारती बणीन भगवान नो बोल सोड़ दीया। एतरे ए भायु, तमु, तमारी मे गेथा वारला गुण वाळा नामह़ाद्या ह़ात अदमी ने टाळ लेवो, तीमनी मे चोखली आत्मा पुरीन-पुरी भरायली से, अने तीहया अक्कल वाळा अने ईमानदार से, अने आमु तीमने खाणु अने ह़मान आपवा नो हक आप देह़ु। पण आमु ते वीन्ती मे अने बोलु ने वाटवा नी सेवा-चाकरी करता रेहु।”
आहयी वात ह़मळीन आखी मंडळी ना माणहु खुस हय ज्या। अने तीहया स्तीफनुस ने टाळ लेदा, तीनी मे चोखली आत्मा पुरीन-पुरी भरायली हती, अने तीहयो ईसु पोर पक्को भरहो करन्यो हतो। अने तीहया फीलीपुस ने, अने परखरुस ने, अने नीकानोर ने, अने तीमोन ने, अने परमीनास ने, अने अंताकीया वाळा नीकलाउस ने, जे युहदी-धरम ने मानवा बाज जेलो हतो, टाळ्या। अने तीहया तीमने नेवताळा अगळ उबा कर देदा अने नेवताळा तीहया टाळला जुगु भगवान ह़ाते वीन्ती कर्या अने अळतेण तीमनी पोर तीहया हात मेल्या।
भगवान ना बोलु फेलता ज्या, अने यरुसलेम मे घण ढेरका ईसु पोर भरहो करीन चेला बण ज्या; अने भगवान ना डायला पुंजारा नो मोट्लो टोळो ईसु ना भरहा ने मान लेदो।
स्तीफनुस ने धरीन ली जाय
स्तीफनुस भगवान नी दया अने भगवान ना जोर सी भराय्न माणहु मे सेलाणी ना जुदा-काम, अने सेल-भात्या जुदा-कामु देखाड़त्लो। तीहयी टेमे युहदी माणहु ना भक्ती ना घोर मे गेथा थोड़ाक जणा स्तीफनुस ह़ाते वात मे झटा-पटी करवा बाज ज्या। वात मे जखड़ी पड़न्या मे कुरेनी वाळा अने सीकंदर्या वाळा अने कीलीकीया वाळा, अने आसीया वाळा हता। पण स्तीफनुस भगवान नी आत्मा नी अगवाय मे अने भगवान नी अक्कल नी अगवाय मे बोलत्लो एतरे तीहया स्तीफनुस नी वात काटी नी सक्या। एतरे तीहया पय्हा आपीन थोड़ाक अदमी ने आहयी झुटी गवा देवाड़्या, “आमु आहया स्तीफनुस ने मुसा नी अने भगवान नी नामबद्दी करत्लो ह़मळ्ळा से।” आसम करीन तीहया माणहु ने, अने पुडार्या ने अने युहदी-धरम ह़ीकाड़न्या ने भड़कावीन उचकाहला स्तीफनुस ने तां आय लाग्या, अने तीने धरीन मोट्ली बठक अगळ ली ज्या। अने तां तीहया झुटा गवा उबा कर्या, अने तीहया झुटी गवा देण्या केदा “आहयो अदमी” दाड़ीन आहया चोखला मंदीर अने मुसा नी लीखली सास्तर नी नामबद्दी करे। आमु ईने आहयु केतलो ह़मळ्ळा से, “ईसु नासरी आहया मंदीर ने ओदार देहे, अने मुसा नी आपली रीती-भाती ने बदली देहे।” मोट्ली बठक मे बहला आखा माणहु स्तीफनुस भणी एकडीट्या भाळ र्या हता, ता तीमने, स्तीफनुस नो मुख नो सीको ह़रगदुत ने तेवो देखाव पड़्यो।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.