Paliya Bible
नेवताळा ना काम 5
हनन्या अने सफीरा
हनन्या नाम नो एक अदमी अने तीनी लाडी सफीरा एक खेतर वेच्या। तीहयो खेतर ना कीमत नो एक वाटो आह़फो राख लेदो आहयी वात तीनी घोरवाळी बी जाणती हती, अने तीहयो बीजो वाटो लावीन चेला ना पोगु मे मेक देदो। पण पतरस केदो, “ए हनन्या! भुतड़ो तारा मन मे आहयी वात काहा नाख देदो, के तु चोखली आत्मा ने झुट मेके अने जागो वेचलो तीनी कीमत मे गेथो थोड़ाक पय्हा बचाड़ीन मेक ले? वेचवा नी पेले तीहयु खेतर तारु नी हतु ह़ु? अने तीहया वेचला खेतर नी कीमत पोर तारो हक नी हतो ह़ु? अने तु आह़फा ना मन मे आवो वीच्यार काहा कर्यो? तु माणहु ने नी, पण भगवान ने झुट मेकलो से।” हनन्यो आहयी वात ह़मळीन पड़्यो अने तीनो जीव नीकळी ज्यो। अने जे बी तीना बारा मे ह़मळ्या, तीहया घण-जबर बीही ज्या। अळतेण जुवान्या धोड़ ने उचलीन कफन ना लुगड़ा मे गुचवीन, तीने बारथा ली जाय्न वगे कर देदा।
आसम हयु, तीहयी वात ना बारा मे हनन्या नी लाडी ने मालम नी हतु, अने तीन घंटान अळतेण तीहयी पतरस हतो तीहयात घोर मे आयी।
तत्यार पतरस तीहयी बयर ने आहयो सवाल पुछ्यो, “मने देखाड़, तमु तीहयु खेतर एतरात मे वेचला ह़ु?” तीहयी केदी, “होव, एतरात मे वेचला।”
तीनो जपाप ह़मळीन पतरस तीहयी बयर ने केदो, “तमु बेम जणा मालीक भगवान नी आत्मा ने पारखवा करीन एको करला से? ह़मळ! आहया माणहु तारा धणी ने वगे करवा जेला, तीहयात पासा आवीन झापलेत उबा हय र्या, अने हाव तीहया तने बी वगे करवा बारथा लीजहे।” आहयी वात ह़मळतेत तीहयी पतरस ना पोगु मे पड़ी, अने मर जी। अने तीहया जुवान्या घोर मे आवीन तीने मरली देख्या, अने तीने बी बारथा ली जाय्न तीना अदमी ना धेड़े वगे कर देदा। एतरे आखी मंडळी ना माणहु अने आहयी वात ह़मळन्या आखा घणा बीह ज्या।
जुदा-काम अने सेलाणी
ईसु ना नेवताळा घणा ढेरका जुदा-कामु अने सेलाणी देखाड़ता हता, अने आखा एक मन हय्न सुलेमान ना मांडवा मे भेळा हया करता हता। पण बीजा माणहु ने ईसु ना नेवताळा ह़ाते भेसकावा नी हीम्मत नी हयती हती। पण तीहया माणहु ईसु ना नेवताळा ने घणा वारु से, करीन केता हता। पण भरहो करन्या ढेरेत अदमी अने बयरा आवीन मालीक नी मंडळी मे भेसकायता ज्या। आञे लग के माणहु मांदला ने ह़ड़क पोर लावी-लावीन, खाटला पोर ह़ुवाड़ देता हता, के जत्यार पतरस आञे माय्न सरके ता मांदला माणहु पोर पतरस नो साहळो कोय पोर पड़ जाय। यरुसलेम ना ह़ेर ना आड़े-धेड़े ना ह़ेर वाळा बी मांदला अने वीटळ्ळा भुत लागला माणहु ने लावत्ला अने तीहया आखा आरगा हय जत्ला।
नेवताळा ने धरीन ली जाणु
आहयु आखु देखीन डायलो पुंजारो, अने सदुकी पंथवाळा अने तीना आखा ह़ाती-ह़ंगात वाळा कुहरायवा बाज ज्या। अने तीहया ईसु ना नेवताळा ने धरीन जेल मे कुंड देदा। पण मालीक भगवान नो एक ह़रगदुत, जेल नु झापलु उगाड़ देदो, अने तीहयो तीमने बारथा ली जाय्न केदो, अने तीहयो तत्यारुत भगवान ना भक्ती ना घोर मे ज्यो अने ईसु नु परच्यार करवा बाज ज्यो के तीहयो भगवान नो सोरो से। अने ईसु ना नेवताळा ह़रगदुत नी वात ह़मळीन ह़वारे हयतात मंदीर मे जाय्न नवली जीवाय नी ह़ीकापण आपवा बाज ज्या। तत्यार भगवान नो डायलो पुंजारो, अने सदुकी पंथवाळा अने तीना आखा ह़ात-ह़ंगात वाळा आवीन युहदी माणहु नी बठक ने अने ईस्रायली जाती ना आखा पुडार्या ने भेळा कर्या, अने सीपायड़ा ने की मोकल्या के तमु जेल मे गेथा ईसु ना नेवताळा ने ली आवो। पण जत्यार सीपायड़ा तां पुग्या, ता ईसु ना नेवताळा तीमने जेल मे नी जड़्या। ता सीपायड़ा पासा आवीन भगवान ना डायला पुंजारा ने अने सदुकी पंथवाळा ने आहयु केदा, “आमु जाय्न देख्या ता जेल मे वारु ह़च करीन बंद कर मेकला हयला, अने झापले पोहरो देण्या पोहरो देता जाय्न उबा हय रेला; पण जत्यार आमु मोय ज्या, तत्यार तां कोय नी हतु।” आहयी वात ह़मळीन मंदीर ना रखवाळ्या डखी अने भगवान ना डायला पुंजारा ने ह़मज मे नी आयु, के चेला नु ह़ु हयु अने “हाव ह़ु हयहे।” तीहयीत टेमे कानो आवीन तीमने आहयी खबर आप्यो, “देखो, जे माणहु ने तमु जेल मे कुंड देदला, तीहयात माणहु मंदीर मे उबा हय्न माणहु ने नवली जीवाय ना बारा मे ह़ीकाड़वा बाज र्या।” तत्यार मंदीर रखवाळ्या सीपायड़ा नो डखी, तीना सीपायड़ा ने लीन ज्यो, अने ईसु ना नेवताळा ने धर लायो। पण माणहु दगड़ाट देहे, करीन जबराण धरीन नी लायो, काहाके तीहया माणहु ने देखीन बीहता हता।
तीहया नेवताळा ने लावीन मोट्ली बठक अगळ उबा कर देदा; अने भगवान नो डायलो पुंजारो तीमने केदो, 1“आमु तमने घणा जुदा हुकम आपला के तमु तीनु नाम लीन माणहु ने नी ह़ीकाड़जो? ते बी तमु आखा यरुसलेम ह़ेर ने तमारी ह़ीकापण सी भर देदा, अने तीहया माणेह ना लोय नो गुनो अमारी पोर लगाड़वा हींड र्या।”
पतरस अने ईसु ना नेवताळा आहयो जपाप आप्या, “माणहु नो हुकम पाळवा सी भगवान नो हुकम पाळवा वदु वारु से। जे ईसु ने तमु कुरुस पोर चड़ावीन खुटा ठोकीन मार नाख्या, तीहया ईसु ने आपणा डाह-डाहा नो भगवान मर्या-ह़र्या मे गेथो जीवाड़ देदो। आहयात ईसु ने भगवान, डायलो अने पाप मे गेथो सोड़ाव्वा वाळो ठेरावीन, तीनी जमणी धेड़े बहाड़ीन मोट्लो हक आप देदो, अने तीहयो ईस्रायली जाती ना माणहु ने पाप भणी गेथा मन फीरवीन, भगवान भणी वाळवा नी सक्ती अने पाप नी माफी आपे तेम। आहयी आखी वात ना गवा आमु से, अने चोखली आत्मा बी से, अने आहयी चोखली आत्मा, भगवान तीहया माणहु ने आपलो से, जे भगवान नो हुकम पाळे।”
आहयी वात ह़मळीन तीहया घण-जबर रीहवाय ज्या, अने नेवताळा ने मार नाखवा नो वीच्यार कर्या। तीहयी मोट्ली बठक मे गमलीएल नाम नो एक फरीसी पंथवाळो हतो, तीहयो मुसा नी लीखली सास्तर ना कायदा ह़ीकाड़न्यो मास्तर हतो, अने तीनी ईज्जत आखा करत्ला। तीहयो मोट्ली बठक मे उबो हय्न हुकम आप्यो के “आहया नेवताळा ने जरीक वार लग बारा ली जावो।” अने अळतेण तीहयो बठक मे वाळा ईस्रायली माणहु ने केदो, “ए ईस्रायली जाती ना माणहु, तमु आहया माणहु ह़ाते जे कंय करवा हींड र्या, तीहयु वारु वीच्यार करीन नेत करजो। काहाके आहया दाड़ा गेथो पेले थीयुदास नाम नो एक माणेह आहयु केतो जाय्न उबो हयो, के ‘मे बी कंय से’ अने च्यारेक ह़ोव माणहु तीनी पोर भरहो करीन तीनी ह़ाते चाल पड़्या, पण तीने कानो मार नाख्यो; अने जेतरा बी माणहु तीनी ह़ाते हता, तीहया रीवण्या-तीवण्या हय्न मीट ज्या। अळतेण माणहु नी गीनती नी टेम आयी, तीहयी टेमे गलील जीला मे रेण्यो यहुदा उठ्यो। तीहयो थोड़ाक माणहु ने पटाड़ीन पाल्टी बणाय लेदो। पण तीने बी कानो मार नाख्यो। अने तीनी पोर भरहो करन्या बी रीवण्या-तीवण्या हय ज्या। एतरे मे तमने केम के तमु आहया नेवताळा गेथा सेटा रेवो, अने हीमना काम मे आडा ना देवायो, काहाके हीमनु काम माणहु वगे गेथु हहे ता तीहयु आह़फुत मीट जहे। पण आहयु काम भगवान वगे गेथु हहे, ता तमु हीमने कदी मटाड़ी नी सके; अने तमु भगवान ना वीरोद मे हय्न तीनी ह़ाते झुमायण्या बी गणायहु।” तत्यार बठक मे वाळा माणहु गमलीएल नी वात मान लेदा। अने तीहया नेवताळा ने बोलावीन तीमने ठोकाड़्या; अने तीमने आहयो हुकम आपीन केदा, “ईसु नु नाम लीन कोय ह़ाते वात नी करजो।” अने अळतेण तीमने सोड़ देदा। अने नेवताळा आहयी वात सी खुस हय्न आहयु केता जाय्न मोट्ली बठक मे गेथा जत र्या, के कम सी कम अमारी ईसु ना नाम सी नामबद्दी ते हयी। तीहया दाड़ीत मंदीर मे, अने घोर-घोर जाय्न ईसु नी ह़ीकापण ह़मळावता र्या, अने ईसु नी आहयी खुस-खबर ह़मळावता ज्या के “ईसुत मसी से।”
Source notes (1)
- Cross-reference मत्ती 27:25
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.