Paliya Bible
नेवताळा ना काम 8
ईसु नी मंडळी ने वेला पाड़े
साउल तीने मारवा मे राजी हतो। तीहया दाड़े गेथा माणहु यरुसलेम मे वाळी ईसु नी मंडळी ने घण-जबर वेला पाड़वा सुरु कर देदा, अने ईसु ना नेवताळा ने सोड़ीन आखान-आखा युहद्या जीला मे अने सामर्या जीला मे वेरवाय ज्या। ईसु ना भगत माणहु स्तीफनुस ना धोड़ ने घण-जबर फुकु-फुकु रड़ता जाय्न वगे कर देदा। 1
साउल तीहयी टेमे ईसु नी मंडळी ने वेला पाड़ र्यो हतो; अने तीहयो ईसु ना आखा माणहु ना घोरु-घोरु मे जाय्न अदमड़ा ने अने बयरा ने घीहड़ीन लावीन जेल मे घाल देतो हतो।
सामर्या मे फीलीपुस नु परच्यार
जे भरहो करन्या माणहु रीवण्या-तीवण्या हय जेला तीहया हींडी-हींडीन ईसु नी खुस-खबर ह़मळवा बाज ज्या। अने फीलीपुस, सामर्या ह़ेर मे हेटो जाय्न तां ईसु मसी नु परच्यार करवा बाज ज्यो। माणहु फीलीपुस नी वात ह़मळीन अने तीना हाते हयला जुदा-काम नी सेलाणी देखीन, एक-मन्या हय्न घण-जबर मन लगाड़्या। काहाके ढेरेत मे गेथा वीटळ्ळा भुत आड़ीन नीकळ जेला, अने ढेरेत लखवा नी मंदवाड़ वाळा अने लंगड़ा आरगा हय जेला। एतरे तीहया ह़ेर मे घणी खुसी हय जी।
जादु-वीद्या देखाड़न्यो सीमोन
सीमोन नाम नो एक अदमी फीलीपुस गेथो पेले आहया ह़ेर मे आय र्यो हतो। तीहयो जादु-टोणा देखाड़ीन सामर्या ह़ेर वाळा ने वहराड़ र्यो हतो, अने आह़फा ने घणो मोटो माणेह देखाड़तो हतो। नान्ला गेथा मोट्ला लग आखा माणहु तीनी ईज्जत करता हता, अने केता हता, “आहयो माणेह भगवान नी तीहयी सक्ती से जे घण भारी केवाय।” तीहयो ढेरेत दाड़ा गेथो जादु नो खेल खेलीन आखा ने वहराड़ र्यो हतो, एतरे आखा माणहु तीने घण-जबर मानत्ला। बाखीन जत्यार तीहया माणहु फीलीपुस ना लारे भगवान ना राज नी खुस-खबर अने ईसु मसी नु नाम ह़मळ्या, ईसु पोर भरहो कर्या अने बयरा अने अदमड़ा बपतीस्मा लेवा बाज ज्या। अने सीमोन बी ईसु पोर भरहो कर्यो अने बपतीस्मा ली लेदो अने अळतेण फीलीपुस ह़ाते रेवा बाज ज्यो। अने फीलीपुस ना लारे जुदा-काम नी सेलाण्या अने जुदा-कामु देख्यो, ता वहराय ज्यो।
सामर्या मे पतरस अने युहन्ना
जत्यार यरुसलेम मे रेण्या ईसु ना नेवताळा आहयु ह़मळ्या के सामर्या वाळा भगवान ना बोल ने मान लेदा, ता तीहया पतरस अने युहन्ना ने तीमनीन्तां मोकल्या। तीहया जाय्न तीमनी जुगु भगवान पांह वीन्ती कर्या के ईमने चोखली आत्मा जड़वा जोवे। काहाके हजु लग तीमने चोखली आत्मा नी जड़ली हती, तीमने मालीक ईसु ना नाम सी बपतीस्मा एतरा आपला हता। एतरे पतरस अने युहन्नो तीमनी पोर ह़ात मेक्या अने तीमने चोखली आत्मा जड़ जी।
सीमोन आहयु देख्यो के ईसु ना नेवताळा माणहु पोर हात मेके एतरात ने तीमने चोखली आत्मा जड़ जाय। एतरे तीहयो तीमनीन्तां रुप्या लावीन केदो। “मे जीनी पोर बी हात मेकु तीने चोखली आत्मा जड़ जवा जोवे, एसवो हक मने बी आपो।”
पण पतरस तीने जपाप आप्यो, “तारी ह़ाते तारा रुप्या बी खुट जवा जोवे, काहाके तु भगवान ना वाटा ने रुप्या आपीन हात करवा नी हेर कर्यो। आहयी वात मे तारो हीस्सो बी नी हय, अने हक बी नी हय। काहाके भगवान अगळ तारु मन ह़ुते नी हय। एतरे तु तारा मन ने पाप भणी गेथो बदलीन भगवान भणी वाळ अने मालीक ईसु सी वीन्ती कर। कंखर माय्न भगवान तारा मन ना वीच्यार नी माफी आप देय। काहाके मने चोखुझण देखाव पड़ र्यु के तु आखी भातीन पाप मे बंदायलो से।”
आहयी वात ह़मळीन सीमोन जपाप आप्यो, “तमु जे बी वात केदला से, तेम मारी ह़ाते नी हयवा जोवे, करीन तमु मालीक भगवान पांह मारी जुगु वीन्ती करो!”
अळतेण ईसु ना नेवताळा, मालीक ईसु नी गवाय दीन अने भगवान ना बोल ह़मळावीन यरुसलेम पासा जत र्या, अने वाट्ये-वाट्ये ढेरेत सामरी जीला ना गाम मे ईसु नी खुस-खबर ह़मळावता ज्या।
फीलीपुस कुस देस ना मंत्री ने बपतीस्मा आपे
अळतेण मालीक नो एक ह़रगदुत फीलीपुस ने केदो, “उठ, यरुसलेम गेथी गाजा ह़ेर भणी जवा वाळी वाट पोर दखणाव भणी जा।” आहयी वाट उजाड़ी बड़ा मे से। ह़रगदुत नी वात ह़मळीन फीलीपुस चाल पड़्यो। ता वाट्येत कुस देस नो एक माणेह जवा बाज र्यो हतो, तीहयो गतराड़ो हतो अने कुस देस नी कंदाके राणी नो मंत्री अने पय्हा टका नो हीसाब राखण्यो हतो, अने तीहयो भगवान नी पुजा-पाट करवा करीन यरुसलेम आवलो हतो, अने पुजा-पाट करीन पासो जवा बाज र्यो हतो। तीहयो आह़फा नी घोड़ागाडी पोर बह र्यो हतो, अने भगवान वगे गेथी वात केण्या यसाया नी कीताप भणवा बाज र्यो हतो। भगवान नी आत्मा फीलीपुस ने केदी, “अगो जा, अने घोड़ागाडी ह़ाते चाल पड़।” फीलीपुस दवड़ीन तीनीन्तां ज्यो अने तीहयो तीने भगवान वगे गेथी वात केण्या माणेह यसाया नी कीताप भणत्लो ह़मळ्यो, अने तीने पुछ्यो, “तु जे वात भणवा बाज र्यो, तीहयी वात ह़मजी र्यो ह़ु?”
तीहयो जपाप आप्यो, “जत्यार लग कोय मने नी ह़मजाड़े, तांह लग मे कीसम ह़मजु?” आहयु कीदीन तीहयो फीलीपुस ने आह़फा नी घोड़ागाडी पोर चड़ावीन बहाड़ लेदो। खरला सास्तर नो जे तोड़पो तीहयो भणवा बाज र्यो हतो, तीहयो तोड़पो आहयो हतो,
तीने गाडरान तेम मारवा ली ज्या,
अने जीसम गाडरु तीना नीम्बाळा वाडवा नी टेमे होगु हय रेय,
तेमेत तीहयो होगो हय र्यो अने आह़फा नु मोडु लग नी उगाड़्यो।
तीहयो भोळो बणीन र्यो, पण आहयी टेमे तीनो नीयाव नी हयो,
अने तीहयी टेमे ना माणहु ना बारा मे कोय केहे,
काहाके धरती पोर गेथो तीनो जीव उचलाय ज्यो।
आहयी टेमे गतराड़ो फीलीपुस ने पुछ्यो, “तु मने दया करीन देखाड़ के भगवान वगे गेथी वात केण्यो माणेह आहयी वात कोयना बारा मे की र्यो, आह़फा ना बारा मे की र्यो के काना बीजा ना बारा मे की र्यो?” ता फीलीपुस आहयी खरली सास्तर मे गेथो सुरु करीन ईसु नी खुस-खबर ह़मळायो। वाट्ये जता-जता तीहया पाणी हतु तां पुग ज्या। पाणी ने देखीन खोजो केदो, “देख, ह़ेलु हयु पाणी। हाव मने बपतीस्मा लेवा मे ह़ु रोक से?” फीलीपुस केदो, कदीम तु पुरो मन लगाड़ीन भरहो करे, ता ली सके। तीहयो जपाप आप्यो, “होव, मे भरहो करु के ईसु मसी भगवान नो बेटो से।”2
तत्यार खोजो घोड़ागाडी चलाड़न्या ने घोड़ागाडी उबराखवा केदो, अने फीलीपुस अने खोजो बेम जणा पाणी मे भराया अने फीलीपुस तीने बपतीस्मा आप्यो। जत्यार तीहया पाणी मे गेथा बारा आया, ता मालीक भगवान नी आत्मा फीलीपुस ने चुट ली जी। खोजो, तीहया फीलीपुस ने अळी नी देख्यो; अने तीहयो खोजो खुस हय्न आह़फा नी वाट्ये अगो चाल पड़्यो। अने फीलीपुस असदोद मे देखाव पड़्यो, अने तीहयो जत्यार लग केसर्या नी पुग्यो तां लग ह़ेर-ह़ेर मे ईसु नी खुस-खबर ह़मळावतो ज्यो।
Source notes (2)
- Cross-reference नेवताळा ना काम 22:4,5; 26:9-11
- Footnote आहयो बोल आखा कीताप्या मे नी हय
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.