Paliya Bible
नेवताळा ना काम 12
अळी बुराय
तीहयी टेमे हेरोद राजा मंडळी ने वेला पाड़वा सुरु कर देदो। तीहयो युहन्ना ना भाय याकुब ने तलवार सी झटकावीन मराय नाख्यो। अने जत्यार तीहयो देख्यो के आसम करवा सी युहदी माणहु खुस हये, ता तीहयो पतरस ने धर लेदो: तीहया दाड़ा मे खमीर वगर ना रोट्ला नो तीवार हतो। तीहयो पतरस ने धराय्न जेल मे बंद कराय नाख्यो, अने तीनी रखवाळी करवा करीन च्यार-च्यार सीपायड़ा ने च्यार टोळा बणावीन मेल देदो: हेरोद राजा नो वीच्यार हतो के मे आमने फसह ना तीवार ना दाड़े माणहु अगळ लावही। तीहयो जेल मे पतरस नी रखवाळी करवा करीन पेहरा बहाड़ र्यो हतो; पण मंडळी ना माणहु मन लगाड़ीन पतरस जुगु भगवान सी वीन्ती करवा बाज र्या हता।
पतरस नो छुटकारो
अने हेरोद राजा पतरस ने माणहु अगळ लाव्वा वाळो हतो, तीहयीत राते पतरस बे हातकड़ी मे बंदायलो, बे सीपायड़ान वच मे ह़ुव्वा बाज र्यो हतो, अने झापला पोर बी पेहरो देण्या सीपायड़ा पेहरो दी र्या हता। उचकाहलोत ह़रगदुत आवीन उबो हय ज्यो: अने कोपरो उजड़ान हय ज्यो; अने तीहयो पतरस ने कुखे टुचलीन तीने जगाड़्यो, अने केदो, “छोटो उठ।” एतरा मे आह़फात हातकड़्या छुटीन पड़ ज्या। तत्यार ह़रगदुत हुकम आपीन केदो, “केड़ बांद अने चाट्या पेर ले।” एतरे तीनी ह़मळीन तेमेत कर्यो। तीहयो पतरस ने अळी केदो, “तारु डगलु पेर ले अने मारी पसळ आव।” पतरस ह़रगदुत पसळ चालतो-चालतो कुंडवाड़ा मे गेथो बारो नीकळी पड़्यो। पण तीने तीहयु पल्ले नी पड़्यु, के आहयु ह़ाची से। पण तीहयो आहयु ह़मज्यो के मे ह़पनु देखवा बाज र्यो। ता तीहया पेल्नो पेहरो अने बीजो पेहरो छेकीन तीहया लुहड़ा ना झापलान्तां लग आया, जे ह़ेर भणी वाट जाय। तीहयु झापलु तीमनी जुगु आफुत उगड़ी ज्यु, अने तीहया बारा नीकळी ज्या। अने तीहया गळीन सींडे लग आया अने ह़रगदुत पतरस ने तां सोड़ीन जत र्यो।
अळतेण जत्यार पतरस ने ह़मज आयु, ता तीहयो की पड़्यो, “हाव मने ह़ाचलीन पल्ले पड़ ज्यु के आहयु हयु तीहयु खरलु से। मालीक आह़फा ना ह़रगदुत ने मोकलीन मने हेरोद राजा ना हात मे गेथो छोड़ाय लेदलो से, अने युहद्या नी आखी आह तोड़ देदली से।”
जत्यार पतरस ने आहयी वात ह़मज आय जी, ता तीहयो युहन्ना नी आय्ह मरीयम ना घोर जत र्यो। आहयो युहन्ना मरकुस बी केवाय। तां ह़रा ढेरेत जणा भेळा हय्न वीन्ती करवा बाज र्या हता। पतरस बारो झापलु ने ठोक्यो, ता कोय से करीन पतो लगाड़वा, रुदे नाम नी एक पावर्याण आयी। तीहयी पतरस नी अवाज पारखी लेदी, अने झापलु उगाड़वा भुल ज्यी अने पासी दवड़ीन जी अने तां भेळा हय रेला तीमने केदी, के पतरस झापला पोर उबो हय र्यो। तीहया तीने केदा, “तु मजाक कर री।” पण तीहयी पक्को भरहो करीन केतीत री के मे जे की री, तीहयी खरली वात से। तत्यार तीहया केदा, “तीमनो ह़रगदुत हहे।”
पण पतरस झापलु ठोकटोत र्यो। तत्यार तीहया झापलु उगाड़्या अने पतरस ने देख्या, ता तीहया घण-जबर वहराय ज्या। अने पतरस हात सी होगा रेवा नो ईसारो कर्यो, अने कानी रीते भगवान मने जेल मे गेथो नीकाळ लायो तीहयु तीमने की देदो; अळतेण अळी तीहयो केदो “याकुब ने अने भाय-बेन्या ने आहयी वात नी खबर की देजो।” अने कीदीन तीहयो ते घोर मे गेथो नीकळीन तां गेथो जत र्यो।
ह़वारे हयु ता सीपायड़ा थतवाय वळ्या; के पतरस नु ह़ु हयु। जत्यार हेरोद पतरस ने ह़ोदवाळ्या आखी दुर मोकल्यो, अने तीमने पतरस नी जड़्यो। ता अळतेण हेरोद सीपायड़ा ने हुकम आप्यो के तमु आहया पेहरो देण्या ने मार नाखो। अने हेरोद युहद्या ने सोड़ीन केसर्या ह़ेर मे जाय्न रेवा बाज ज्यो।
हेरोद नु मरनु
हेरोद राजा सुर अने सेदा ह़ेर ना माणहु पोर खीजवाय र्यो हतो; एतरे तीहया एक-मन्या हय्न आया, अने हेरोद राजा ना पावोर बलास्तुस ने पटाड़ीन तीनी लारे हेरोद राजा ह़ाते भेळा हयवा हंडता हता। काहाके तीमने हेरोद राजा ना देस गेथु खावा नो सादन जड़त्लो।
अने टाकला दाड़े हेरोद राजा राज ना लुगड़ा पेरीन नीयाव नी गादी पोर बह्यो, अने माणहु मे परच्यार करवा बाज ज्यो। माणहु आड़ीन केदा, “आहयी माणेह नी अवाज नी हय, पण भगवान नी अवाज से।” तीहयी टेमे मालीक नो ह़रगदुत हेरोद ने देदो, अने तीना डील मे कीड़ा पड़ ज्या अने तीहयो मर ज्यो, काहाके तीहयो भगवान नी बड़ाय नी कर्यो।
भगवान ना बोलु वद्ता अने फेलता ज्या।
जत्यार बरनाबास अने साउल यरुसलेम मे आह़फाम नी सेवा-चाकरी करीन पासा आया, अने मरकुस ने लीन आया। जे युहन्नो केवातो हतो।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.