Paliya Bible
नेवताळा ना काम 13
बरनाबास अने साउल ने खुस-खबर ह़मळाव्वा मोकले
अंताकीया ह़ेर नी मंडळी मे थोड़ाक भगवान वगे गेथी वात केण्या माणहु अने ह़ीकाड़न्या हता, जीसम बरनाबास, अने सीमोन जे काळ्ळो केवायत्लो अने कुरेनी मे रेण्यो लुकीयुस, अने देस ना चोवथा हीस्सा मे राज करन्यो हेरोद राजा नो बाखड़्यो भाय मनाहेम अने साउल। जत्यार तीहया उपाह़ भेळ मालीक नी भक्ती करवा बाज र्या हता, तत्यार चोखली आत्मा केदी, “मे जे सेवा ना काम जुगु मारीन करते बरनाबास अने साउल ने बोलावली से, तीमने आंग्ये कर लेवो।”
ता तीहया उपाह़ अने वीन्ती करीन बरनाबास अने साउल पोर हात मेकीन तीमने मोकली देदा।
पोलुस नी पेली परच्यार यात्रा
अळतेण बरनाबास अने साउल चोखली आत्मा नी अगवाय मे सीलुकीया ज्या, अने तां गेथा मोट्ला ढुंड्या मे बहीन कुपरुस जत र्या। अने सलमीस ह़ेर पुगीन, तीहया युहदी माणहु ना भक्ती ना घोर मे भगवान नो बोल ह़मळाया। अने युहन्नो तीमनो चाकर्यो हतो।
अने तीहया तां आखा देस फीरता-फीरता, पाफुस मे पुग्या: तां तीमने बार-ईसु नाम नो एक युहदी जाती नो जादु-वीद्या देखाड़न्यो अने झुटो भगवान वगे गेथी वात केण्यो माणेह भेट्यो। तीहयो राजो सीरग्युस पोलुस नी ह़ाते हतो। जे अक्कल वाळो माणेह हतो। तीहयो बरनाबास अने साउल ने बोलावीन भगवान नो बोल ह़मळवा कर्यो। पण आहयो एलीमास जादु देखाड़न्यो हतो। आहयो बरनाबास अने साउल भणी जोर कर्यो। अने सीरग्युस ने भरहो करवा सी रोकवा हींड्यो। बाखीन साउल, जे पोलुस बी केवायतो हतो। चोखली आत्मा ना कब्जा मे हय्न तीहया ईलीमास भणी एकडीट्यो भाळीन केदो। तु भुतड़ा नो सोरो से, तारी मे बीजा ने धोको देवा नी वात अने ठगवा नी वात भरायली से। अने तु आखा धरम नो वेरी से, ह़ु तु भगवान नी ह़ुदी वाट ने वाकी करवा नी सोड़े? हाव देख, मालीक तने डंड आपवा बाज र्यो, तु थोड़ाक दाड़ा लग आंदळो रेही अने दाड़ु ने नी देखे: ता तीनी पोर अंदारलु छवाय ज्यु, अने तीहयो कानो मारो हात धरीन लीजहे करीन आञे ने ह़ेले ह़ोलकवा बाज ज्यो। जे हयु तीहयु आखु देखीन ह़ेर नो हकदार्यो, ईसु पोर भरहो कर लेदो; अने तीहयो मालीक ईसु ना बारा मे ह़मळीन वहराय ज्यो।
पीसीद्या मे पोलुस नु आवणु
पोलुस अने तीना ह़ाती मोट्ला ढुंड्या मे बहीन पाफुस गेथा पमफुल्या देस ना पीरगा ह़ेर मे आया; अने युहन्नो तीमने तां सोड़दीन पासो यरुसलेम जत र्यो। पोलुस अने बरनाबास पीरगा गेथा अगा जाय्न पीसीद्या ना अंताकीया मे पुग्या, अने तीहया अराम ना दाड़े युहदी माणहु ना भक्ती ना घोर मे जाय्न बह ज्या। मुसा ना लारे लीखली सास्तर अने भगवान वगे गेथा लीखण्या माणहु नी कीताप भणीन अळतेण भक्तीन घोर ना पुडारी, बरनाबास ने तां अने पोलुस ने तां आहयी वात की मोकल्या, “ए भायु! कदीम माणहु ने हीम्मत आपवा जुगु तमारी पांह कंय बी वात हय ता केवो।” तत्यार पोलुस उबो हय ज्यो, अने हात उरवतो जाय्न केवा बाज ज्यो; ए ईस्रायली माणहु अने भगवान नी बीक मानीन जीवण्या आड़जात्या माणहु ह़मळो: आपणो ईस्रायली माणहु नो भगवान आपणा आड़ा-बुड़ा ने टाळ लेदलो से, अने जत्यार तीहया मीसर देस मे पारका बणीन री र्या हता, ता तीमनो वेल वदाड़ीन तीमने मोटा बणायो, अने आह़फा ना हात ना ज्योरे तीमने तां गेथो नीकाळ लायो। तीहयो चाळीह साल लग जंगल मे तीमनी रखवाळी कर्यो। अने भगवान कनान देस मे ह़ात जाती ने खत्तम कर देदो, अने तीहयु देस आपणा आड़ा-बुड़ा ना हक मे कर देदो। अने अळतेण भगवान भणी गेथी वात केण्या माणेह समुएल लग नीयाव करन्या ठेरायो। भगवान पांह एक राजा नी मांग कर्या: ता भगवान तीमनी जुगु बीन्यामीन नी कुळी मे गेथो कीस नो बेटो साउल ने राजा बणाय देदो। अने अळतेण भगवान साउल ने राज गेथो सेटो करीन दावुद ने तीमनो राजा बणायो; आहया दावुद ना बारा मे भगवान आहयी गवा देदो, “के मने एक माणेह मारा मन ना अनसारे जड़ जेलो से, जे यीसे नो बेटो दावुद से। आहयोत दावुद मारी मरजी पुरी करहे।” आहया दावुद नी अवल्यात मे गेथोत भगवान आह़फा ना वायदा ना अनसारे ईस्रायली माणहुन तां एक सोड़ाव्वा वाळा ने ईसु ना रुप मे मोकल्यो। 1तीने आव्वान पेले युहन्नो आखा ईस्रायली माणहु ने पाप भणी गेथा मन फीरवीन भगवान वगा वळवा ना बपतीस्मान परच्यार करतो हतो 2अने युहन्नो भगवान नु काम पुरु करवात वाळो हतो, ता केदो, तमु मने जे ह़मजी र्या, तीहयो मे नी हय! बाखीन देखो, एक आसवो से जे मार गेथो अळतेण आव्वा बाज र्यो। अने मे तीना खाहड़ा ना बोंद सोड़वान लायक नी हय।
ए भायु, अब्राहम नी अवल्यात! अने भगवान नी बीक मानीन जीवण्या आड़जात्या माणहु! छुटकारा नी आहयी खुस-खबर आपणु आखा जुगु से। यरुसलेम मे रेवा वाळा अने तां नीयाव करन्या मुखी ईसु ने नी ओळख्या, अने तीहया भगवान वगे गेथी वात केण्या नी कीताप मे लीखली वात ने नी ह़मज्या; जे अराम ना दाड़ाडीट भणत्ला। जाण बुजीन तीने गुनाळ्ळो ठेरावीन लीखली वात पुरी कर्या। 3भले तीमने डंड आपे एवो गुनो तीनी मे देखावा नी पड़्यो, ते बी तीहया पीलातुस ह़ाते रावण्या कर्या, के हीने मराय नाख। 4अने तीहया ईसु ना बारा मे जे कंय लीखलु हतु, तीहयु आखु पुरु कर लेदा, ता तीहया ईसु ने कुरुस पोर गेथा उतार लेदा, मड़ाट्या मे गाड़ देदा। पण भगवान ईसु ने मर्या-ह़र्या मे गेथो पासो जीवाड़ीन बठो कर देदो। 5अने तीहयो घणा दाड़ा लग तीहया माणहु ने देखाव पड़तो र्यो, जे तीनी ह़ाते गलील जीला मे गेथा यरुसलेम मे आवता हता। हाव तीहयात माणहु अगळ तीना गवा से। अने आमु तमने तीहया बोली करला वायदा नी खुस-खबर ह़मळावया, जे वायदो भगवान आपणा आड़ा-बुड़ा ह़ाते करलो हतो। भगवान ईसु मसी ने मर्या-ह़र्या मे गेथो जीवतो करीन तीहयोत वायदो आपणी अवल्यात जुगु पुरो करलो से, जीसम भजन मे बी लीखलु से:
तु मारो सोरो से;
आज गेथो मे तारो बाह बण ज्यो।
भगवान ईसु ने मर्या-ह़र्या मे गेथो पासो जीवाड़वा ना बारा मे केदो, के तीहयो कदी नी ह़ड़े। काहाके भगवान तीने केदलो हतो,
मे तने चोखली अने जलमकी संयबरकत आपही,
जे संयबरकत मे दावुद ने आपवा नी बोली करलो हतो।
एतरे तीहयो एक अळी बीजा भजन मे केदलो;
तु आपणा चोखला भगत ने ह़ड़वा नी देय।
“काहाके दावुद ते भगवान नो हुकम मानीन भगवान नी मरजी पुरी कर्यो; अने मर ज्यो; अने तीने आड़ा-बुड़ा ने गाड़ला तां गाड़ देदा; अने तीनु डील तां ह़ड़ ज्यु। बाखीन भगवान तीने मर्या-ह़र्या मे गेथो जीवाड़ीन पासो बठो कर्यो, तीनु डील नी ह़ड़्यु। एतरे ए भायु! तमु वारु रीते ह़मजी लेवो के आहयात ईसु ना लारे तमने पाप नी माफी नी ह़ीकापण ह़मळावलो से। मुसान लारे लीखली सास्तर आहया पाप मे गेथो छुटकारो आपीन तमने धरमी नी बणावे। पण भगवान ईसु पोर भरहो करन्या नेत वण-गुनाळ्ळा ठेरावे। एतरे चेतीन रेवो, कंखर माय्न भगवान वगे गेथी वात केण्या माणहु ना कीताप मे लीखली वात पुरी नी हय जाय:
ए वाक काडण्या, वहराय्न मर जावो;
काहाके मे तमारा जमाना मे एक जुदु काम करवा वाळो से;
एक आसवु काम, कदी तमारी मे ना कोय आना बारा मे वात बी करहे,
ते बी कोयने आहयी वात नो भरहो नी आवे।”
जत्यार पोलुस अने बरनाबास बारा नीकळवा बाज र्या हता ता माणहु तीमनी पांह रावण्या कर्या, तमु आवता अराम ना दाड़े आहयी वात ना बारा मे केजो। जत्यार तीमनी भक्ती नी बठक हय जी, ता युहदी माणहु अने आड़जात्या युहदी-धरम मानवा वाळा नवला चेला, पोलुस अने बरनाबास नी वात मानवा बाज ज्या। पोलुस अने बरनाबास तीमने ह़मजाड़ीन केदा, भगवान नी दया मे बणला रेजो।
आड़जात्या मे पोलुस खुस-खबर ह़मळावे
आवता अराम ना दाड़े ह़ेर ना आखा माणहु मालीक भगवान नो बोल ह़मळवा करीन भेळा हय ज्या। पण ढेरेत माणहु आवत्ला देखीन युहदी माणहु कुहरायवा बाज ज्या, अने वीरोद करीन पोलुस नी वात नो वाक काडवा बाज ज्या। पोलुस अने बरनाबास बीह्या वगर केदा, जरुड़ी हतु के पेले तमने भगवान नो बोल ह़मळावु हतु, बाखीन तमु भगवान नो बोल नीकारो करीन ह़मळवा नी हींडता, अने तमु आह़फा ने अमरकाय नी जलमकी जीवाय्न लायक नी ह़मज्ता; एतरे आमु हाव आड़जात्या माणहुन तां भगवान नो बोल लीजीया। काहाके मालीक भगवान आमने आहयो हुकम आपलो से,
मे तमने आड़जात्या माणहु जुगु वीजाळु बणावलो से,
आनीन करीन के तमारी लारे धरती ना खुणे-कोपरे लग माणहु छुटकारो हात करे तेम।
आड़जात्या माणहु पोलुस नी अने बरनाबास नी वात ह़मळीन घणा खुस हया अने तीहया मालीक भगवान ना बोल नी ईज्जत कर्या। जेतरा माणहु अमरकाय नी जीवाय जुगु टाळला हता, तीहया ईसु पोर भरहो कर्या।
अने आखा परगणा मे मालीक नो बोल फीर ज्यो। पण युहदी माणहु, उची कुळी ना भगत माणहु ने अने ह़ेर ना बयरा ने जोर चड़ाय देदा, अने पोलुस अने बरनाबास नो वीरोद कराव्वा हुहड़ीन आय लाग्या, अने तीमने आह़फा ना परगणा मे गेथा काड देदा। 6अने अळतेण पोलुस अने बरनाबास तीमना वीरोद मे आपणा पोगु नो धुळो झाटकीन ईकुनीयुम ह़ेर मे जत र्या। पण चेला खुसी अने चोखली आत्मा सी पुरान-पुरा भरायला हता।
Source notes (6)
- Cross-reference मरकुस 1:4; लुका 3:3
- Cross-reference युहन्ना 1:20; मत्ती 3:11; मरकुस 1:7; लुका 3:16; युहन्ना 1:27
- Cross-reference मत्ती 27:22,23; मरकुस 15:13,14; लुका 23:21-23; युहन्ना 19:15
- Cross-reference मत्ती 27:57-61; मरकुस 15:42-47; लुका 23:50-56; युहन्ना 19:38-42
- Cross-reference नेवताळा ना काम 1:3
- Cross-reference मत्ती 10:14; मरकुस 6:11; लुका 9:5; 10:11
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.