Paliya Bible
नेवताळा ना काम 17
थीसलुनीकीयो ह़ेर मे पोलुस अने सीलास
पोलुस अने सीलास अम्फीपुलीस अने अपुलोनीया ह़ेर छेकीन थीसलुनीकीयो मे आया। ता एक युहदी माणहु नु भक्तीन घोर हतु। अने पोलुस आह़फा नी रीती नी अनसारे भक्ती ना घोर मे ज्यो, अने तीहयो अराम ना तीन दाड़ा लग तीमनी ह़ाते खरला सास्तर मे गेथी वात देखाड़ीन पुरावो दी-दीन वात मे जखड़ी पड़्यो। अने सास्तर ने सरल रीती सी ह़मजाड़तो हतो, के ईसु मसी ने दुख झेलवा, अने मर्या-ह़र्या मे गेथो जीवतो हयवा नु टकायलु से; अने “आहयोत ईसु मसी से” जीना बारा मे, मे परच्यार करु। तीमनी मे गेथा थोड़ाक माणहु जे राजी हय जेला हता, पोलुस अने सीलास ह़ाते भेसकाय ज्या। अने भगवान नी भक्ती करवा वाळा घणा ढेरका युनानी माणहु बी तीमनी ह़ाते भेसकाय ज्या, आमनी मे ढेरेत बयरा बी हता।
पण युहदी माणहु डहवाय करीन हाट मे वाळा लुच्चा-गुंडा माणहु ने भेळा करीन हुहड़ीन आया, अने यासोन ना घोर आय लाग्या, अने तीहया कोसीत करवा बाज ज्या, के पोलुस अने सीलास ने माणहु अगळ लाव्वा हींडता हता। पण तीमने यासोन ना घोर मे नी जड़्या, ता तीहया यासोन अने तां वाळा बीजा भायु ने घीहड़ीन ह़ेर ना नीयाव करन्यान तां ली ज्या, अने आड़ीन केदा, “आहया माणहु आखी कळी मे गरबड़ी कर देद्ला से, अने हाव आञे बी आय लाग्या। अने यासोन तीमने आह़फा ना घोर मे थंगाड़ र्यो। तीहया आखा केसर ना हुकम नो वीरोद करे, अने केय के एक राजो अळी से जीनु नाम ईसु से।” आहयु ह़मळीन ह़ेर ना माणहु अने ह़ेर ना अदीकार्या घण जादा खीजवाय ज्या। तीहया यासोन अने तीनी ह़ाते वाळा बीजा पांह डंड लेदा, अने तीमने सोड़ देदा।
बीर्या ह़ेर मे पोलुस
भरहो करन्या भायु, तीहयीत राते पोलुस अने सीलास ने बीर्या मे मोकली देदा: अने तीहया बीर्या ह़ेर मे पुगीन युहदी ना भक्ती ना घोर मे ज्या। आहया थीसलुनीकीयो ह़ेर वाळा युहदी गेथा जादा वारु हता, अने तीहया घण-जबर मन लगाड़ीन भगवान नो बोल ह़मळ्या, अने पोलुस केदो तीहयी वात पारखवा करीन खरला सास्तर मे भणीन देखता हता। तीमनी मे ढेरेत माणहु, अने युनानी मे मुखी बयरा, अने घणा अदमी बी भरहो कर्या। जत्यार थीसलुनीकीयो मे रेवा वाळा युहदी माणहु ने मालम पड़ ज्यु के पोलुस बीर्या मे भगवान ना बोलु नो परच्यार करवा बाज ज्यो, ता तीहया तां आय लाग्या अने माणहु ने भड़कावीन तीमनो जोर वदाड़वा बाज ज्या। एतरे ईसु पोर भरहो करन्या भायु पोलुस ने तत्यारु तु दर्या धेड़्ये जत रे, करीन केदा; पण सीलास अने तीमुथीयुस तां री ज्या। पोलुस ने, भरहो करन्या भायु मेकवा करीन अथेंस लग ज्या। अने पोलुस सीलास अने तीमुथीयुस जुगु आहयी वात की मोकल्यो के, तमु छोटा आवजो।
एथेंस ह़ेर मे पोलुस
जत्यार पोलुस अथेंस ह़ेर मे तीमुथीयुस अने सीलास नी वाट जोय र्यो हतो, ता तीहया अथेंस ह़ेर मे ढीगारो देवु ना मुरत्या देखीन पोलुस ने आह़फा ना जीव मे घणो दुख लाग्यो। एतरे पोलुस युहदी भक्ती ना घोर मे रीन युहदी माणहु ह़ाते अने आड़जात्या माणहु ह़ाते, जे भगवान नी भक्ती करन्या हता, दाड़ीन वात मे जखड़ी पड़तो हतो। अने चोवराया पोर जे माणहु भेटता हता, तीमनी ह़ाते बी वात मे जखड़ी पड़तो हतो। तां ईपीकुरी अने स्तोईकी मास्तर्या हता, अने तीहया पोलुस ह़ाते जखड़ी पड़्या, अने तीमनी मे थोड़ाक केदा, “आहयो, झपाट्यो ह़ु केवा हींडे?” अने बीजा केदा, “आहयो बीजा देवता नो परच्यार करन्यो मालम पड़े।” काहाके पोलुस, ईसु ना बारा मे आहयी ह़ीकापण आपत्लो के, ईसु मर्या-ह़र्या मे गेथो जीवतो हय्न बठो हय जेलो से। एतरे तीहया पोलुस ने धरीन अरीयुपगुस नाम ना ह़ेर नी एक बठक मे ली ज्या अने पुछ्या, “तु आहयी नवली ह़ीकापण माणहु ने आपवा बाज र्यो, तीहयी ह़ु से। काहाके तु आमने जे वात आमु ह़मळ्या नी तीहयी वात ह़मळावे, एतरे आमु जाणवा हींड र्या, के आनु मतलब ह़ु से?” तां रेण्या आखा अथेंस ना माणहु अने पारका माणहु नवली-नवली वात केवा मे अने ह़मळवा मे टेम लगाड़त्ला। आहयी वात ने सोड़ीन बीजु तीमनु कामेत नी हतु।
तत्यार पोलुस अरीयुपगुस नाम ह़ेर नी बठक मे उबो हय्न केदो, ए अथेंस वाळा माणहु! मे देखवा बाज र्यो के तमु आखी भाते धरमी से। मे ह़ेर मे फीरतो जाय्न तमारा भक्ती करवा ना जागा ने देखवा बाज र्यो हतो, ता मने एक आसवी वेदी देखाव पड़ी, ते वेदी पोर आहयु लीखलु हतु, अंजाणला भगवान जुगु। एतरे तमु तीने जाण्या वगर तीनी भक्ती कर र्या, तीना बारा मे, मे तमने ह़मळावु। 1जे भगवान धरती अने तीनी मे जे कंय से, तीहयु आखु बणावलो से; अने जे ह़रग अने धरती नो मालीक से। तीहयो हाते बणावला मंदीरु मे नी रेय। तीने कानी बी चीज नी कसर नी हय, एतरे तीने कानी बी चीज नी जोवती, काहाके तीहयो आखा माणहु ने जीवाय अने जीवाय नो दम आपे, अने आखु आप्या करे। तीहयो ते एकी माणेह मे गेथो आखी जाती ना माणहु ने उबजाड़ीन बणायो; अने तीमने आखी धरती पोर रेवा आप देदो; तीहयो तीमनी जीव्वा नी टेम टाक देदो, अने तीमने रेवा ना जागा नी जां तीहया रेय काकड़ बांद देदो। आहयु आखु आनीन करते कर्यो के माणहु भगवान ने ह़ोदे, अने हय सके तीहया तीने तीनीन्तां तक पुगीन पाळे, ते बी तीहयो अमारी मे गेथो काना सी बी सेटो नी हय। जीसम कोय केदलु से
के तीनी मे जीवत्ला रीया, अने तीनी मे हींडया-फीरया, अने तीनी मे हजुर से।
आहयीत रीते तमारात लीखण्या बी केदला से,
के आमु तीना सोरा-सोरी से।
एतरे भगवान ना सोरा-सोरी हय्न आपणु ने आहयु नी ह़मजवा जोवे के भगवान, माणहु ना वीच्यार सी ह़ोनु-चांदी, नी नीता दगड़ा नी बणावली मुर्तीन तेवो हहे। जत्यार माणहु भगवान ने नी जाणता हता, तीहयी टेमे भगवान धीयान नी देदो, पण हाव आखा जागे आखा माणहु ने मन फीराव्वा नो हुकम आपे। भगवान एक दाड़ो टाकलो से, तीहया दाड़े तीहयो आह़फा ना टाळला माणेह नी लारे सच्चाय सी कळी नो नीयाव करहे, अने आहयी वात नो पुरावो तीहयो तीहया माणहे ने मर्या-ह़र्या मे गेथो जीवाड़ीन एक-एक जणा ने आपलो से।
मर्या-ह़र्या मे गेथा पासा जीवता हयवा नी वात ह़मळीन थोड़ाक माणहु पोलुस नी हाही-ठट्टा करवा बाज ज्या, पण थोड़ाक बीजा माणहु केदा, “मर्या-ह़र्या मे गेथा पासा जीवता हयवा नी वात अळी पासा ह़मळवा हय र्या।” एतरे पोलुस तीमने रेवा दीन जत र्यो। पण ते बी थोड़ाक माणहु पोलुस नी वात पोर भरहो कर्या अने तीनी ह़ाते चाल पड़्या, तीमनी मे दीयुनुसीयुस हतो, तीहयो अरीयुपगुस नो एक मेहमर हतो, अने दमरीस नाम नी एक बयर हती, अने तीमनी ह़ाते अळी थोड़ाक माणहु हता।
Source notes (1)
- Cross-reference नेवताळा ना काम 7:48
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.