Skip to content
BibleKenya

Paliya Bible

नेवताळा ना काम 18

कुरीन्‌थुस ह़ेर मे पोलुस

अळतेण पोलुस अथेंस ह़ेर सोड़दीन कुरीन्‌थुस ह़ेर मे ज्‌यो। तां तीने एक अक्‌वीला नाम नो एक युहदी माणेह भेट्‌यो; तीनी पयदावारी पुन्‌तुस मे हयली हती, अने तीहयो तीनी लाडी पीरीस्‌कीला ह़ाते ईटली गेथो नवलो आवलो हतो, काहाके कलोदीयुस राजो आखा युहदी माणहु ने रोम ह़ेर मे गेथा नीकळी जावो करीन हुकम आपलो हतो, एतरे पोलुस तीमनीन्‌तां ज्‌यो। काहाके पोलुस अने तीमनो एकीत धंदो हतो; एतरे पोलुस तीमनी ह़ाते रीन काम करवा बाज ज्‌यो, अने तीमनो धंदो तम्‌बु बणाव्‌वा नो हतो। काहाके तीहया तम्‌बु बणावण्‌या हता। पोलुस अराम ना दाड़ाडीट युहदी माणहु ना भक्‌ती ना घोर मे जाय्‌न वात मे जखड़ी पड़तो हतो अने युहदी माणहु ने अने आड़जात्‌या माणहु ने ह़मजाड़तो हतो।

जत्‌यार सीलास अने तीमुथीयुस मकीदुनीया गेथा आया, ता पोलुस भगवान ना बोलु ह़मळवा झींग पड़ र्‌यो हतो, अने तीहयो युहदी माणहु अगळ आहयु केतो र्‌यो के ईसुत मसी से। बाखीन जत्‌यार तीहया माणहु पोलुस नो वीरोद करीन वाक काडता हता, ता पोलुस आह़फा नु डगलु झटकीन तीमने केदो, “तमारा मोत नो कारण तमुत से। मे वण-गुनाळ्‌ळो से, अने आनो जपापदार मे नी हय। हाव गेथो आड़जात्‌या माणहु मे ईसु नो परच्‌यार करवा जही।” तीहयो तीमने सोड़दीन आड़जात्‌या तीतुस युस्‌तुस नाम ना एक माणेह ना घोर ज्‌यो, तीहयो भगवान नी भक्‌ती करन्‌यो हतो। अने तीनु घोर भगवान ना भक्‌ती ना घोर ना ह़ाते चोटाय्‌न बांदलु हतु। भक्‌ती ना घोर नो मुखी कीरीस्‌पुस आह़फा ना आखा घोराणा भेळ मालीक पोर भरहो कर्‌यो; अने घणा ढेरका कुरन्‌थी ह़ेर वाळा माणहु बी पोलुस ना लारे ईसु ना बारा मे ह़मळीन मालीक पोर भरहो कर्‌या, अने बपतीस्‌मा लेदा।

मालीक ईसु तीहयीत राते ह़पना मे पोलुस ने आहयु केदो, “बीहे ना, पण भगवान नी वात केतो रे, अने होगो ना रेय। काहाके मे तारी ह़ाते से। अने कोय बी तारु नुकसान नी करे; काहाके आहया ह़ेर मे मारा घणा माणहु से।” एतरे पोलुस माणहु ने भगवान नी वात ह़ीकाड़तो जाय्‌न तां एक साल ने छोव मयना र्‌यो।

ते टेमे गल्‌लीयो अखाया परगणा नो मुखी हतो, तात युहदी माणहु एक्‌को करीन पोलुस भणी जोर करीन आया, अने तीने नीयाव करवा ना जागा अगळ लाया, अने केवा बाज ज्‌या, आहयो माणहु ने ह़मजाड़े के “अने भगवान नी भक्‌ती करवा नो आसवो कायदो, ह़ीकाड़े, जे मुसा ना कायदा गेथो अलग से।”

पोलुस आह़फा ने बचाड़वा करीन केवा हींडत्‌लो, ता गल्‌लीयो युहदी माणहु ने केदो, “ए युहदी माणहु! कदी आहयो कायदा ना वीरोद मे कंय बी गुनो करलो हतो नीता मोटो गुनो करलो हतो, ता मे तमारी वात ह़मळवा तीयार रेतो। पण आहयी वात नी झटा-पटी ते ढेरेत नाम ना बारा मे अने मुसान लारे लीखला कायदा ना बारा मे से। एतरे आहयी वात मे, मे नीयाव करन्‌यो नी बणु। तमुत आहयी वात ना बारा मे जाणो।” अने तीहयो गल्‌लीयो पोलुस ने नीयाव करे तीहयी कोरट-कचवरी मे गेथो काड देदो। ता आखा युहदी माणहु भक्‌तीन घोर ना मुखी सोस्‌थीनेस ने कोरट-कचवरी अगळ धर पाड़्‌या, अने घण-जबर ठोक्‌या: पण गल्‌लीयो आहयी वात पोर धीयान नी देदो।

पोलुस अंताकीया पासो जाय

पोलुस ढेरेत दाड़ा लग तां र्‌यो, अने अळतेण तीहयो भरहो करन्‌या भायु ने आवजो कीन पीरीस्‌कीला अने अक्‌वीला ह़ाते ढुंड्‌या मे बहीन सीरीया भणी चाल पड़्‌यो। अने तीहयो बादा लेदलो करीन कीरख्‌या मे आह़फा नु मुंडु बोड़ायो। अळतेण तीहया ईफीसुस पुग्‌या, ता पोलुस पीरीस्‌कीला अने अक्‌वीला ने तां रेवा दीन युहदी माणहु ना भक्‌ती ना घोर मे जाय्‌न युहदी माणहु ह़ाते भगवान नी वात मे जखड़ी पड़ ज्‌यो। जत्‌यार तां वाळा माणहु वीन्‌ती कर्‌या, “थोड़ाक दाड़ा अळी आञे रे।” पण पोलुस केदो, “मे नी रेतो।” अने तीमने सोड़ीन जवा नी टेमे केदो, “भगवान नी मरजी हहे, ता मे अळी तमारीन्‌तां आवही।” अळतेण पोलुस ईफीसुस गेथो ढुंड्‌या मे बहीन चाल देदो।

अळतेण तीहयो केसर्‌या ह़ेर मे पुग्‌यो। अने ता गेथो यरुसलेम ह़ेर मे ज्‌यो, अने तां वाळी ईसु नी मंडळी ने भेट्‌यो। अळतेण तीहयो तां गेथो अंताकीया ह़ेर मे जत र्‌यो। पोलुस थोड़ाक दाड़ा अंताकीया ह़ेर मे र्‌यो अने अळतेण आवजो कीन तीहयो गलातीया अने अळतेण फुरग्‌या फीरतो जाय्‌न आखा चेला ने भरहा मे वातड़ा करतो ज्‌यो।

ईफीसुस अने कुरीन्‌थी मे अपुल्‌लोस

एक युहदी माणेह हतो, तीनु नाम अपुल्‌लोस हतु। तीहयो सीकंदर्‌या मे पयदा हयलो हतो। तीहयो अक्‌कल वाळो माणेह हतो अने सास्‌तर ने वारु रीते जाणतो हतो। तीहयो ईफीसुस मे आयो। तीने मालीक ना केणा मे चालवा नी ह़ीकापण जड़ली हती। अने मन लगाड़ीन अने पुरी हीम्‌मत सी ईसु ना बारा मे ह़ाची-ह़ाची ह़ीकाड़तो हतो। पण तीने युहन्‌नान बपतीस्‌मान बारा मे एतरुत मालम हतु। तीहयो भक्‌ती ना घोर मे धाक राख्‌या वगर भगवान नी वात केवा बाज ज्‌यो। पीरीस्‌कीला अने अक्‌वीला तीनी वात ह़मळीन तीने आह़फाम ना घोर ली ज्‌या, अने तीने वदु उंडे रीते भगवान नी वात ह़मजाड़्‌या। अने जत्‌यार अपुल्‌लोस दर्‌या छेकीन अखाया जवा करीन ठान लेदो। ता ईफीसुस ना ईसु पोर भरहो करन्‌या भायु तीने हीम्‌मत आप्‌या। अने चेला जुगु आहयु लीख्‌या के तमु पोलुस नो आव-भाव करजो। जत्‌यार पोलुस अखाया पुग्‌यो ता तां वाळा माणहु तीनी घण मदत कर्‌या। जे भगवान नी दया सीत ईसु पोर भरहो करला हता। काहाके तीहयो खरला सास्‌तर मे गेथो केतलो के “ईसुत मसी से।” अने युहदी माणहु अगळ खरला सास्‌तर मे गेथो घण-जबर वात कीन तीमनु मोडु बंद कर देत्‌लो।

Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.