1 इतिहास

1 इतिहास

राज़ै दाबेदो महान राज़

भेत

लिखणैं आल़अ: खास थोघ निं आथी पर कोऐ बोला अह आसा एज्रा लिखी दी

सन: 450 का 400 ईसा आजी

पहल़णैं आल़ै: इज़राईली

1 इतिहास अर 2 इतिहासे कताबा थिई शुरू दी एक्‍कै कताब। इना दुही कताबा दी आसा पैहलै मणछ आदमी पोर्ही इज़राईलीए 538 ईसा आजी बाबेल देशे गलामी का बापस फिरनैं तैणीं बिधाते परज़ो इतिहास खोज़अ द। ऐहा कताबा लिखणैं आल़ै किई इब्रानी अर होरी इतिहासे कताबा का लोल़ी-ज़ोल़ी करै गल्‍ला कठा संघा डाही खास्सी मैन्थ करी एक कताब लिखी।

ऐहा कताबा दी आसा खास मणछ दाबेदे बारै ज़ुंण बिधाता लै खास्सअ झ़ूरा त। एथ आसा खासकर यहूदा मुल्ख, बिन्यामीन अर प्रोहतो काम करनै आल़ै लेबी गोत्रे बारै खोज़अ द। बिधाता दैनी राज़ै दाबेदा लै एही बर्गत कि तेऊओ राज़ किअ सदा लै पाक्‍कअ। राज़अ दाबेद रहअ बिधाता लै इहअ शुचअ-पाक्‍कअ कि संसारै राज़अ बणी तिहअ रहणअ हआ बेघै कठण। एरुशलेम नगरी बिधाता लै भबन बणाणें सोठ बी थिई राज़ै दाबेदे अर आजू दैनअ बिधाता राज़ै सुलैमाने हाथै एता पूरअ हणैं। ज़ांऊं राज़अ दाबेद खास्सअ प्रोढअ हुअ, तेऊ किई खिरी सोभी परज़ा नदरी बिधाते एही ज़ै-ज़ैकार:

“बिधाता, मुंह करनीं तेरी सदा ज़ै-ज़ैकार! तूह आसा सह परमेशर ज़हा मेरअ दाद-बाब याकब मना त। तेरअ बल आसा महान अर तेरअ झ़ामण शुझिआ सारै भ्रमंडै। माहा राज़अ आसा तूह ई अर सोभी प्रैंदै आसा तेरअ ई राज़। तूह करा आपणैं बल अर ज़ोरा करै राज़। मणछा करा सेठ, बलबान अर मशूर तूह ई।”

(29:10-12)

कताबे बांड

राज़ै शाऊला तैणीं पैहलै आदमीए आद-लुआद 1:1—9:44

राज़ै शाऊल अर तेऊए शोहरूए मौत 10:1-14

दाबेद राज़अ इज़राईलो राज़अ 11:1—29:30