Kulvi Outer Seraji Bible
1 इतिहास 27
सैने दल अर सैनापति
इज़राईले सैना ती बारा दला दी बांडी दी। हर भिन्नैं करा त च़ौबी हज़ार पल़टणो एक-एक दल आपणीं-आपणीं बारी दी राज़े च़ाकरी। इज़राईली टोलीए सैणैं अर कार-करिंदै मांझ़ै हआ तै तिन्नां दला प्रैंदै एकी-एकी भिन्नैं लै ज़ुदै-ज़ुदै सैनाध्यक्ष:
च़ैत्रे भिन्नैं ती च़ौबी हज़ार पल़टणें दला प्रैंदै जबदीएलो शोहरू जाशोबीमे बारी। सह थिअ यहूदा गोत्रे फिरिस टोली का अर च़ैत्रे भिन्नैं सोभी दलपति अर सैनापति प्रैंदै सैनाध्यक्ष।
बशाहे भिन्नैं लै थिअ च़ौबी हज़ार पल़टणें दुजै दला प्रैंदै अहोह टोली का दोदी सैणअ। मिकलोत थिअ तेऊ दलो सैनापति।
ज़ेठै भिन्नैं लै थिअ च़ौबी हज़ार पल़टणें चिऐ दला प्रैंदै जहोयादा प्रोहतो शोहरू बेनियाह सैनाध्यक्ष। बेनियाह त राज़ै दाबेदे तिहा जोधै प्रैंदै प्रधान अर तेऊओ शोहरू अमीजाबाद थिअ तेऊ दलो सैनापति।
जोआबो भाई असाहेल थिअ च़ौबी हज़ार पल़टणें च़ौथै दलो सैनाध्यक्ष ज़सरी बारी शाल़्है एछा ती। असाहेलो शोहरू जबदीया थिअ तेऊ दलो सैनापति।
इज्राही टोली का शमहूत थिअ च़ौबी हज़ार पल़टणें पांज़ूऐ दलो सैनाध्यक्ष ज़सरी बारी शाऊंणैं एछा ती।
तकोआ नगरी का इकेशो शोहरू ईरा थिअ च़ौबी हज़ार पल़टणें छ़हुऐ दलो सैनाध्यक्ष ज़सरी बारी भदरै एछा ती
एप्रैमे आद-लुआदा मांझ़ै पेलोन नगरी का हेलेस थिअ च़ौबी हज़ार पल़टणें सातुऐ दलो सैनाध्यक्ष ज़सरी बारी शऊजै एछा ती।
जेराह टोलीओ हुशाई नगरी का सिबकै थिअ च़ौबी हज़ार पल़टणें आठुऐ दलो सैनाध्यक्ष ज़सरी बारी काती एछा ती।
बिन्यामीने आद-लुआदा मांझ़ै अनातोत नगरी का एबीएजेर थिअ च़ौबी हज़ार पल़टणें नहुऐ दलो सैनाध्यक्ष ज़सरी बारी मकशीरै एछा ती।
नतपाह नगरी का जेराह टोलीओ महरै थिअ च़ौबी हज़ार पल़टणें दसुऐ दलो सैनाध्यक्ष ज़सरी बारी पोशै एछा ती।
एप्रैमे आद-लुआदा मांझ़ै पिरातोन नगरीओ बेनियाह थिअ च़ौबी हज़ार पल़टणें गैर्हुऐ दलो सैनाध्यक्ष ज़सरी बारी माघै एछा ती।
ओतनिएले आद-लुआदा मांझ़ै नतपाह नगरी का हेलदाई थिअ च़ौबी हज़ार पल़टणें बार्हूऐ दलो सैनाध्यक्ष ज़सरी बारी फागणै एछा ती।
इज़राईले सोभी गोत्रा लै दरोगै
इज़राईली गोत्रा लै थिऐ ईंयां सैणैं दरोगै डाहै दै:
रूबेन गोत्रा लै थिअ बेन-ज़िक्रीओ शोहरू एलीआजर दरोगअ।
शमौन गोत्रा लै थिअ शपताहो शोहरू माकाहा दरोगअ।
लेबी गोत्रा लै थिअ बेन-कमूएलो शोहरू हशाबिया दरोगअ।
हारणे आद-लुआदा लै थिअ सदोक दरोगअ।
यहूदा गोत्रा लै थिअ एलीहू दरोगअ ज़ुंण दाबेदो भाई थिअ।
इस्साकार गोत्रा लै थिअ बेन-मिकाईलो शोहरू ओमरी दरोगअ।
ज़बलून गोत्रा लै थिअ बेन-ओबेदियो शोहरू इशमाया दरोगअ।
नप्ताली गोत्रा लै थिअ बेन-अजरीएलो शोहरू जरमोत दरोगअ।
एप्रैम गोत्रा लै थिअ अजाज्यो शोहरू होशे दरोगअ।
मनिश्शे गोत्रा मांझ़ै आधै ज़ुंण जरदण नदी पार पछ़मा बाखा बाढै तै बस्सै दै,
तिन्नां लै थिअ पदायो शोहरू जोएल दरोगअ।
मनिश्शे गोत्रा मांझ़ै आधै ज़ुंण जरदण नदी आर पुर्बा बाखा बाढै गलाद तै बस्सै दै,
तिन्नां लै थिअ बेन-जकर्यो शोहरू ईदू दरोगअ।
बिन्यामीन गोत्रा लै थिअ अबनेरो शोहरू जासीएल दरोगअ।
दान गोत्रा लै थिअ बेन-जेरोहामो शोहरू अजरेल दरोगअ।
ईंयां एतरै सैणैं थिऐ इज़राईली गोत्रा लै दरोगै छ़ांटै दै। इज़राईला दी ज़ुंण बिहा साला का होछ़ी अमरे थिऐ, तिन्नें निं राज़ै दाबेदै गणांई किई आथी। किल्हैकि बिधाता त इहअ बोलअ द कि इज़राईले आद-लुआद लोल़ी सरगे तारै ज़ेही खास्सी हुई। सरूयाहो शोहरू जोआब त सोभी इज़राईलीए गणांई करदअ लागअ द पर सह निं तेता पूरी करी सकअ। तैहा गणांई करनै पिछ़ू पल़अ इज़राईली लै बिधातो कोप। इहअ करै निं राज़ै दाबेदै इतिहासे कताबा दी लिखअ द आथी कि पठी इज़राईली असली दी आसा केतरै थिऐ।
राज़े ज़ैदाते दरोगै
ईंयां एतरै थिऐ राज़े ज़ैदाता सभाल़दै ज़ुदै-ज़ुदै दरोगै बणाऐं दै:
आदीएलो शोहरू अज़मबेथ राज़े मैहले भढारो दरोगअ।
राज़े ज़ुंण भढार सारै इज़राईल देशै नगरी, गहल़ै अर गराऊंऐं थिऐ, तेतो दरोगअ थिअ उज़ियाहो शोहरू जोनातान।
कालूबो शोहरू एज्री थिअ राज़े ज़िम्मीं दी काम करनै आल़ै बेठूओ दरोगअ।
रामाह नगरी का शिमी थिअ राज़े सोभी दाखे बागो दरोगअ।
शापाम नगरीओ जबदी थिअ तेऊ संघै दाखे रसे भढारो दरोगअ।
गदेरा नगरीओ बाल-हनान थिअ यहूदा दखण बाखा जैतून अर फेडूए बूटे बागो दरोगअ
जैतूने सोभी तेले भढारो दरोगअ थिअ जोआश।
शारोन सऊंऐं मुल्खै गाऊई-बल्दो दरोगअ थिअ शारोन नगरीओ शितराई।
शारोन धारा बाखा खागै डागै-धणों दरोगअ थिअ अदलाईओ शोहरू शापात।
सोभी ज़ैगा राज़े ऊँटो दरोगअ थिअ इशमाईली ओबील।
सोभी ज़ैगा राज़े ज़ेतरी गाधी थिई, तिन्नों दरोगअ थिअ मरनोत नगरीओ जेहदीया।
हागार नगरीओ जाजीज थिअ राज़ै दाबेदे सोभी भेडा-बाकरीए हेल़्हीओ दरोगअ।
राज़ै दाबेदे आपणैं खास बज़ीर
राज़ै दाबेदे च़ाच़ूओ शोहरू जोनातान थिअ शास्त्री अर तेऊओ काईथ बी, सह दैआ त बडी सैणीं सलाह। सह अर हाकमोनीओ शोहरू जेहीएल थिऐ राज़ै दाबेदे बज़ीर अर राज़े शोहरू लै गूरू बी थिऐ तिंयां ई। आहीतपेल बी थिअ राज़ैओ मंत्री अर अरेकी नगरीए हुशाई संघै थिई राज़ै दाबेदे साथ अर सह बी थिअ तेऊओ खास सलाह दैणैं आल़अ बज़ीर। आहीतपेला मरनै का बाद तै बेनियाहो शोहरू जहोयादा अर अबतार राज़ै दाबेदे बज़ीर।
जोआब थिअ इज़राईले सारी सैना प्रैंदै सैनापति।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.