1 इतिहास 23

1ज़ांऊं राज़अ दाबेद खास्सअ प्रोढअ हुअ, तेऊ बणाअं आपणअ शोहरू सुलैमान इज़राईलो राज़अ।

लेबी लै ज़िम्मैंबारी

2राज़ै दाबेदै किऐ सोभ इज़राईली सैणैं, प्रोहत अर लेबी कठा। 3तेखअ गणै तिंयां लेबी ज़ुंण तिहा साले अर तेता का खास्सी अमरे थिऐ। तिंयां निखल़ै पठी ठत्ती हज़ार। 4तिन्‍नां मांझ़ै दैनी बिह हज़ार मणछा लै बिधाते भबने च़ाकरी करने ज़िम्मैंबारी अर छ़ह हज़ार बणाऐं दरोगै अर पांच़। 5च़ार हज़ार ज़ण्हैं लै सभाल़अ पहरै करनैओ काम अर च़ार हज़ारा लै सभाल़अ तिन्‍नां साज़-बाज़ बाज़णैंओ काम ज़ुंण बिधाते स्तोती करना लै थिऐ बणाऐं दै।

6राज़ै दाबेदै बांडै लेबी तिन्‍नें टोलीए साबै चिई दला दी: गर्शोन, कहात अर मरारी।

7गर्शोने तै दूई शोहरू: लादान अर शिमी। 8लादाने तै आजू चअन शोहरू: जेहीएल, जताम अर जोएल ज़ुंण लादाना का निखल़ी दी आजू टोलीए मूल़ थिऐ। 9शिमीए थिऐ चअन शोहरू: शेलोमीत, हज़ीएल अर हारान। लादाने आद-लुआदे मूल़ तै ईंयां ई। 10-11इना बाद तै शिमीए च़ार होर शोहरू हुऐ दै तिंयां थिऐ बडै का होछ़ै तैणीं ईंयां: जहात, ज़ीना, जेऊश, बरीया।

12कहाते तै च़ार शोहरू: अमराम, इसहार, हेब्रोन अर उज्जीएल। 13तेऊओ ज़ेठअ शोहरू अमराम थिअ हारण अर मोसो बाब। हारण अर तेऊए आद-लुआद तै सदा लै ज़ुदै किऐ दै कि तिंयां खास पबित्र च़िज़े प्रतिष्ठा करे, बिधाता सेटा धूप ज़ाल़े, बल़ीदान करे अर तेऊए नाओंऐं लोगा लै बर्गत दैए अर सदा तेऊए च़ाकरी करे। 14पर परमेशरे गूर मोसे शोहरू बी गणै आजू होरी लेबीए टोली संघै ई। 15मोसे थिऐ दूई शोहरू: गर्शोम अर एलीआजर।

16गर्शोमो ज़ेठअ शोहरू त शबूएल। 17एलीआजरो त एक्‍कै शोहरू तेऊ नाअं त रहाबयाह। पर रहाबयाहे थिई आजू खास्सी आद-लुआद।

18कहाते दुजै शोहरू इसहारो थिअ शेलोमीत नाओं एक शोहरू, सह हुअ तैहा टोलीओ मूल़। 19कहाते चिऐ शोहरू हेब्रोने थिऐ च़ार शोहरू: जरीयाह, अमर्या, जहजीएल अर जकमाम। 20कहाते च़ौथै शोहरू उज्जीएले थिऐ दूई शोहरू: मिका अर इशिया।

21मरारीए थिऐ दूई शोहरू महली अर मूशी। महलीए बी थिऐ आजू दूई शोहरू हुऐ दै: एलीआजर अर कीश। 22पर एलीआजरे निं शोहरू हुऐ, तेऊए ती सिधी शोहरी, इहअ करै मूंअ सह बाझ़ी शोहरू। तेऊए सोभी शोहरी बैहूई आपणैं च़ाच़ू कीशे शोहरू संघै। 23मरारीए दुजै शोहरू मूशीए थिऐ आजू चअन शोहरू हुऐ दै: महली, एदेर अर जरमोत।

24ईंयां तै लेबी गोत्रा का आजू आद-लुआद, ज़ुंण आजू तिन्‍नें खिंब अर टोलीए सैणैं थिऐ। इना सोभिए नाअं डाहै लिखी, ज़ुंण बिहा साले अर तेता का उझे अमरे थिऐ, तिन्‍नां सोभी लै सभाल़अ बिधाते भबनै च़ाकरी करनैओ काम।

25राज़ै दाबेदै बोलअ इहअ, “इज़राईले परमेशर बिधाता दैनी आपणीं परज़ा लै शांती, सह रहणअ एरुशलेम नगरी सदा। 26तेखअ निं लेबी पबित्र खिम्भ अर बिधाते पूज़ा-गाज़ा करने च़िज़ा ज़ैगै-ज़ैगै च़कणें ज़रुरत आथी। 27राज़ै दाबेदे खिरी ज़ुंण सलाह दैनी, तेऊ साबै गणै तिंयां सोभ लेबी ज़सरी अमर बिहा साले ती हई गई दी। 28तिन्‍नां का सभाल़ी ईंयां ज़िम्मैंबारी: हारणे आद-लुआदा का ज़ुंण प्रोहत हणैं, तिन्‍नां संघै करनी ज़ेही ज़रुरत पल़ी तेही च़ाकरी। बिधाते भबना बागै भितरी, भढारे, सोभी पबित्र च़िज़े साफ-सफाई अर पूज़ा-गाज़ा करने च़िज़ा डाहणीं धोई-शोई शुची करी। 29एता का लाऊआ बिधाता लै भोज़न, भैंट छ़ाडणा लै पिठअ, लुच़ी, रोट जैतूनो तेल राल़अ द पिठअ, इना सोभी च़िज़ा नापी-तोली करै दैणैंओ काम थिअ तिन्‍नां का सभाल़अ द। 30हर धैल़ै दोत्ती अर उडै लागा त तिन्‍नां प्रोहता संघै खल़्हुई बिधातो शूकर करनअ अर गिहा बोल़णीं। 31बशैघे, पुनूंईए अर होरी तिह-थैरे धैल़ी बी लागा त तिन्‍नां प्रोहता संघै रही बिधातो हूम अर मेल़-ज़ोल़ो बल़ीदान करी शूकर करनअ। तिन्‍नां लै थिअ सूल बणाअं द कि तेभै केतरै लेबी किधी लोल़ी अर तिन्‍नां किज़ै लागा करनअ। 32बिधाते मेल़-ज़ोल़े खिम्भे हेर-सभाल़ करने ज़िम्मैंबारी थिई पैहलै बी तिन्‍नें ई अर ऐबै सभाल़ी तिन्‍नां का बिधाते भबने अर हारणे आद-लुआदा संघै च़ाकरी करने ज़िम्मैंबारी।”