Kulvi Outer Seraji Bible
1 इतिहास 21
दाबेदै किई आपणीं परज़े गणांई
(2 शमूएल 24:1-25)
परमेशरो बरोधी स्वर्ग दूत च़ाहा त इहअ कि इज़राईली लै लोल़ी आफ़त पल़ी, तेऊ पाई राज़ै दाबेदे मन्नैं एही गल्ल कि इज़राईल अर यहूदा बस्सै दै सोभी इज़राईलीए गणांई करनी! राज़ै दाबेदै किअ आपणैं सैनापति जोआबा लै हुकम, “तूह डेऊ आपणैं कार-करिंदै संघा निंईं उतरा बाखा दान मुल्खा उंधै दखण बेर्शेबा तैणीं सारै इज़राईली गोत्रा सेटा संघा करा सारी परज़े गणांई। हुंह च़ाहा इहअ भाल़णअ कि तिन्नां मांझ़ै केतरै मणछ आसा सैना दी डाहणैं जोगी।”
पर जोआबै दैनअ दाबेदा लै ज़बाब, “माहा राज़अ, च़ाऐ एभै ज़ेतरै बी होए, तेरै परमेशर बिधाता बढेरनीं तेरी सैना शौ गुणा खास्सी! तिन्नां सोभी प्रैंदै आसा तेरअ ई राज़, पर हे मेरै मालक, तूह इहअ किल्है च़ाहा करनअ? इहअ करै किल्है लाऐ तंऐं ज़ोरा-ज़ोरी सारै इज़राईली दोशी बणाईं?” पर राज़ै बोलअ जोआब अर तेऊए कार-करिंदै लै कि ज़िहअ हुकम किअ तिहअ ई करा। तिंयां आऐ सारै इज़राईल देशै हांढी संघा फिरै सोभिए गणांई करी एरुशलेम नगरी लै बापस। जोआबै खोज़अ राज़ै दाबेदा का इज़राईली परज़े गणांईओ पठी साब कि इज़राईला दी आसा सैना जोगी कोई गैरा लाख मर्ध अर यहूदा दी आसा च़ार लाख सत्तर हज़ार मर्ध ज़ुंण सैना दी आपणीं च़ाकरी सका दैई। लेबी अर बिन्यामीन गोत्रा मांझ़ै निं जोआबै गणै आथी, किल्हैकि सह निं राज़े तेऊ हुकमा लै सैहमत आथी त।
इज़राईले गणांई करनै का थिअ बिधाता नराज़, अर बिधाता दैनी इज़राईला लै तेते सज़ा। तेखअ किई राज़ै दाबेदै बिधाता सेटा अरज़, “हे बिधाता, हुंह आसा तेरअ दास, पर गणांई करी हुअ मेरै भलै घोर पाप! ज़ीबाण, मेरै एऊ ऐडै कामां लै छ़ाड तूह मुल्है माफी।”
बिधाता बोलअ गाद नाओंए गूरा लै ज़ुंण राज़ै दाबेदो गूर थिअ, “दाबेद राज़ै सेटा डेऊ, संघा बोल तेऊ लै इहअ कि मंऐं लाई ताल्है पल़णै आल़ी चअन आफ़ता रहैऊई, तूह छ़ांट तेता मांझ़ै एक कि हुंह ताह प्रैंदै कहा पाऊं?”
गाद डेऊअ तेऊ सेटा, संघा खोज़अ तेऊ कि बिधाता बोला ताल्है इहअ-इहअ। तेखअ पुछ़अ दाबेदा का इहअ, “ताह आप्पू लै कुंण ज़ेही सज़ा लोल़ी? आपणैं इज़राईल देशै चिई साला तैणीं घोर नकाल़? कि चिई भिन्नैं तैणीं तेरै दुशमण तलबारा पाई ताह पिछ़ू रहे पल़ी? कि चिई धैल़ै तैणीं तेरै देशै माहा-मरी लोल़ी पल़ी कि बिधातो स्वर्ग दूत सारै देशो बनाश करे? ऐबै कर तूह राम्बल़ै करै बच़ार संघा खोज़ मुखा कि हुंह बिधाता लै बापस किज़ै ज़बाब खोज़ूं?”
दाबेद राज़ै बोलअ गाद गूरा लै, “मुल्है पल़ी अह बेघै बूरी आफ़त! हुंह निं च़ाहंदअ कि कुंण मणछ मुल्है सज़ा दैए। बिधाता दै हाम्हां लै आप्पै सज़ा दैणैं, किल्हैकि सह आसा खास्सअ झणैल़ू।”
बिधाता पाई तेखअ तैहा दोत्ती पोर्ही इज़राईला मांझ़ै माहा-मरी। सारै इज़राईल देशै मूंऐं सत्तर हज़ार मर्ध। तेखअ छ़ाडअ बिधाता एक स्वर्ग दूत तेऊ लाई ती एरुशलेम नगरी पठी खतम करी, पर बिधाता किअ सह मारनै आल़अ स्वर्ग दूत पिछ़ू, “ऐबै हुअ बतेर्हअ!” तेभै त सह स्वर्ग दूत अरोना नाओंए एकी जबेशी मणछे ताटी।
दाबेदा का शुझुअ आपणीं आछी कि सरगै आसा बिधातो सह स्वर्ग दूत खल़्हुअ द अर तेऊए हाथै आसा तलबार अर तेऊ लाई एरुशलेम नगरी पठी खतम करी। राज़ै दाबेद अर सोभी इज़राईली सैणैं तै तैहा खरी घेरी खिंथल़ै पल़ेटै दै, तिन्नैं टेक्कअ धरनीं उटै पल़ी माथअ। राज़ै दाबेदै किई बिधाता का एही अरज़, “हे परमेशर, अह आसा पठी मेरअ कशूर, सह थिअ हुंह ज़ुंणीं गणांई करनैओ हुकम किअ। ईंयां रैनै-गरीब मणछ ज़ुंण भेडा-बाकरीए हेल़्ही ज़िहै आसा, इनो निं एथ किछ़ै कशूर आथी! बिधाता, मेरै परमेशर, तूह दै मुल्है अर मेरै टबरा लै सज़ा, इना होरी लोगा निं मारी आथी।”
बिधाते स्वर्ग दूतै बोलअ गाद गूरा लै, “दाबेदा लै कर इहअ हुकम कि अरोना जबेशीए ताटी बणाऐं बिधाता लै बेदी।” ज़िहअ बिधाता हुकम किअ, दाबेदै किअ तिहअ ई संघा डेऊअ तिधा लै ज़िहअ गाद गूरै तेऊ का खोज़अ। अरोना अर तेऊए च़ार शोहरू तै खहल़ै कणका मांडदै लागै दै। ज़ांऊं तिन्नैं स्वर्ग दूत भाल़अ, तिंयां शोहरू ठुर्है तिधा का संघा रहै लुक्की। अरोना भाल़अ कि राज़अ दाबेद आअ अर तेऊ पाई ताटी दी नाज़ा मांडणे छ़ाड़ अर सह पल़अ धरनीं उटी बाखा संघा टेक्कअ राज़ै दाबेदा सेटा माथअ। राज़ै दाबेदै बोलअ अरोना लै, “ऐहा ताटी दै तूह मुल्है, हुंह दैंऊं ताल्है एतो ज़ेतरअ तूह बोले तेतरै ढब्बै मोल। मंऐं लाई बिधाता लै इधी बेदी बणाईं ताकि सह परज़ा मांझ़ा का ऐहा माहा-मरी दूर करे।”
अरोना बोलअ राज़ै दाबेदा लै, “मेरै मालक, तूह लाग निंदअ, संघा दै बिधाता लै ज़िहअ तूह च़ाहा तिहअ। इधी आसा भाल़ मेरै बल्द हूम बल़ी करना लै, खहल़ा मांडणे चाण अर हणैं बेदी दी आगी ज़ाल़णा लै। नाज़ बल़ी करना लै आसा इधी कणक। मंऐं दैनै ईंयां सोभै ताल्है।”
पर राज़ै दाबेदै बोलअ अरोना लै, “मुंह निं ईंयां बाझ़ी ढब्बै लोल़ी, मुंह दैणअ ताल्है एतो मोल। मुंह निं बिधाता लै सह हूम बल़ीदान करनअ ज़ुंण तेरअ आसा अर ज़ेतो मंऐं मोल ई निं आथी दैनअ द।” राज़ै दाबेदै दैनै अरोना लै छ़ह शौ सुन्नें सिक्कै1 तैहा खहल़े ज़ैगो मोल। तेखअ च़िणीं तिधी तेऊ बिधाता लै एक बेदी संघा किअ तेथ हूम अर मेल़-ज़ोल़ो बल़ीदान। बिधाता शूणीं दाबेद राज़े अरज़ संघा किई इज़राईला मांझ़ा का माहा मरी दूर।
बिधाता किअ स्वर्ग दूता लै हुकम कि आपणीं तलबार डाह पिछ़ू अर तेऊ किअ ज़िहअ बिधाता बोलअ तिहअ ई। ज़ांऊं राज़ै दाबेदै भाल़अ कि बिधाता हेरी तेऊए अरज़ शूणीं, तेखअ किअ तेऊ अरोना जबेशीए ताटी बणाईं दी तैहा बेदी प्रैंदै बल़ीदान। बिधाता लै खिम्भ ज़ुंण मोसा रेगीस्तानै बणाअं त अर हूम बल़ीदान करने बेदी ती अज़ी बी गबोन ज़िधी बिधाते पूज़ा-गाज़ा करा तै करी। पर राज़अ दाबेद निं तिधी बिधाता सेटा माथै टेक्कदअ डेऊअ किल्हैकि सह थिअ बिधाते स्वर्ग दूते तलबारा का खास्सअ डरअ द।
Source notes (1)
- Footnote छ़ह शौ सुन्नें सिक्कै कोई सात किलू सुन्नअ
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.