Kulvi Outer Seraji Bible
1 इतिहास 2
इज़राईले शोहरू
इज़राईले हुऐ बारा शोहरू रूबेन, शमौन, लेबी, यहूदा, इस्साकार, ज़बलून, दान, युसुफ, बिन्यामीन, नप्ताली, गाद अर आशेर।
राज़ै दाबेदा तैणीं यहूदो खिंब
यहूदे तै पठी पांज़ शोहरू। तेऊ ती बेथ-शुआ नाओंए एक कनानी बेटल़ी बैही दी, तैहा का हुऐ तेऊए चअन शोहरू: एर, ओनान अर शेलाह। इना मांझ़ै त एर बेघै कदुष्ट अर सह निं बिधाता खास्सअ ज़िऊंदअ डाहअ। तामार ज़ुंण यहूदे नुश थिई, तैहा का हुऐ तेऊए दूई शोहरू फिरिस अर जेराह।
फिरिसे हुऐ आजू दूई शोहरू हिस्रोन अर हामल। जेराहे हुऐ पांज़ शोहरू ज़िम्री, एतान, हमान, कलकोल अर दारा। जेराहे आद-लुआदा मांझ़ै थिअ आजू कर्मींओ शोहरू अकार, तेऊ पाई ती बिधाता लै मानत मनी दी च़िज़ा आप्पू लै च़ोरी डाही करै इज़राईली लै घोर आफ़त।
जेराहे शोहरू एतानो त आजू एक्कै शोहरू अजर्याह।
राज़ै दाबेदो खिंब
यहूदा अर तामारे पोचै हिस्रोने हुऐ चअन शोहरू: जर्मेल, राम अर कालूब।
रामो खिंब त ईशैई तैणीं इहअ: रामो शोहरू त अमीनादाब, तेऊओ हुअ आजू नहशोन ज़ुंण यहूदे आद-लुआदा मांझ़ै सैणअ बणअ। नहशोना का हुअ सल्मा, तेऊओ शोहरू त बोआज़ अर तेऊओ हुअ आजू ओबेद अर तेऊ का हुअ ईशैई।
ईशैईए थिऐ सात शोहरू। तिंयां थिऐ ज़ेठै का कान्हैं तैणीं ईंयां: सोभी का ज़ेठअ एलीआब, तेऊ का कान्हअ अबीनादाब, तेखअ तिसरा, शिमा, नतनेल, रदाई, ओसेम अर सोभी का कान्हअ दाबेद। ईशैईए थिई सरूयाह अर अबीगेल नाओंए दूई शोहरी बी।
सरूयाहे तै चअन शोहरू अबीशै, जोआब अर असाहेल। अबीगेलो बैह त इशमाईले खिंबा दी जतेरा संघै हुअ द। तिन्नों त एक शोहरू तेऊ नाअं त अमासा।
हिस्रोने आद-लुआद
हिस्रोने शोहरू कालेबै त अजूबा नाओंए बेटल़ी संघै बैह किअ द अर तिन्नें हुई एक शोहरी तैहा नाअं त जेरीओत। तेसे हुऐ चअन शोहरू जशेर, शोबाब अर अर्दोन। ज़ांऊं अजूबा मूंईं, कालेबै किअ एप्रात नाओंए बेटल़ी संघै बैह। तिन्नों हुअ एक शोहरू तेऊ नाअं त हूर। हूरो हुअ शोहरू तेऊ नाअं त ऊरी अर आजू हुअ हूरो पोचअ बसलेल।
शाठी साले अमरा किअ हेस्रोनै माकीरे शोहरी संघै बैह ज़ुंण गलादे बैहण थिई। तैहा का हुअ हिस्रोनो एक शोहरू तेऊ नाअं त सगूब अर सगूबो हुअ आजू शोहरू तेऊ नाअं त याईर। याईर थिअ गलाद मुल्खै त्रेई नगरी प्रैंदै राज़अ। पर गशूर अर अराम देशै किअ तिन्नां मांझ़ै सोल़ा नगरी दी याईर अर कनाते गराऊंआं संघी कबज़अ। तेथ बस्सै दै सोभ लोग थिऐ गलादे बाब माकीरे आद-लुआद। ज़ांऊं हिस्रोन कालेब-एप्रात नगरी मूंअ, तेऊए शोहरू कालेबै किअ तेऊए बिधबा बेटल़ी अबियाह संघै बैह। तिन्नां दूई का हुअ एक शोहरू तेऊ नाअं त अशहूर ज़ुंण बादा का तकोआ नगरी बस्सअ।
जर्मेले आद-लुआद
जर्मेल थिअ हिस्रोनो ज़ेठअ शोहरू तेऊए हुऐ आजू पांज़ शोहरू: सोभी का ज़ेठअ राम, तेऊ कान्हअ बूना, ओरेन, ओसेम अर आहिजा। रामे हुऐ आजू चअन शोहरू माज़, जामीन अर एकेर। जर्मेले ती एक होर बेटल़ी, तैहा नाअं त अतारा, तैहा का हुअ तेऊओ एक शोहरू तेऊ नाअं त ओनाम। ओनामे तै दूई शोहरू शमाई अर जादा। शमाईए बी हुऐ आजू दूई शोहरू नादाब अर अबीशूर।
अबीशूरै किअ अबिहेल नाओंए बेटल़ी संघै बैह अर तिन्नें हुऐ दूई शोहरू आहबान अर मोलीद। नादाबे बी हुऐ दूई शोहरू सेलेद अर अपैम, पर सेलेदे निं आजू किछ़ै लुआद हुई, सह मूंअ तिहअ ई। अपैमो शोहरू त ईशी, ईशीओ शोहरू त शेशान अर तेऊओ शोहरू त अहलाई।
शमाईए भाऊ जादे थिऐ दूई शोहरू जतेर अर जोनातान, जतेर मूंअ आद-लुआदा बाझ़ी। जोनाताने बी थिऐ दूई शोहरू पलेत अर जाजा। ईंयां एतरै थिऐ जर्मेले आद-लुआद।
शेशाने हुई निरी शोहरी, तेऊओ निं शोहरू हुअ। तेऊ सेटा थिअ मिसर देशा का जराहा नाओं एक दास। तेऊ किअ आपणीं एकी शोहरीओ बैह जराहा संघै। तिन्नों हुअ एक शोहरू तेऊ नाअं त अताई। एलीशामा तैणीं अताईओ खिंब निखल़अ इहअ: अताई, नातान, जाबाद, एपलाल, ओबेद, जेहू, अजर्याह, हेलेज़, एलासा, सिसमी, शलूम, जकमिया अर खिरी तेऊओ शोहरू एलीशामा।
कालेबे होर आद-लुआद
जर्मेले कान्हैं भाई कालेबो ज़ेठअ शोहरू थिअ मेशा। तेऊओ शोहरू हुअ आजू जीप, तेऊओ शोहरू त मारेशा ज़ुंण हेब्रोनो बाब थिअ।
हेब्रोने तै च़ार शोहरू: कोराह, तपूह, रकेम अर शेमा। शामाई थिअ रहामो बाब अर जोरकीमो दादू। शेमो भाई रकेम थिअ शमाईओ बाब। शामाई त मिऊनो बाब अर मिऊनो शोहरू त बेथ-सूर।
कालेबे ती एपा नाओंए एक डाही दी बेटल़ी। तैहा का हुऐ कालेबे चअन शोहरू: हारान, मोजा अर गाजेज। हारानो बी थिअ एक शोहरू हुअ द, तेऊ नाअं बी थिअ गाजेज।
एपा थिई जादाईए शोहरी। जदाईए थिऐ पांज़ शोहरू बी: रगेम, जताम, गशान, पलेत अर शाप।
कालेबै ती माकाहा नाओंए एक होर बेटल़ी डाही दी, तैहा का हुऐ तेऊए दूई शोहरू शबेर अर तिर्हाना। बादा का हुऐ तेसे दूई होर शोहरू शाप अर शेबा। शाप थिअ मदमन्नो बाब अर शेबा आसा मकबेना अर गिबो बाब।
इना का लाऊआ थिई कालेबे एक शोहरी तैहा नाअं त अकसा।
ईंयां एतरै थिऐ कालेबे आद-लुआद:
कालेब अर तेऊए लाल़ी एप्रातो शोहरू हूर थिअ सोभी का ज़ेठअ। हूरे शोहरू त शोबाल ज़ुंणीं आपणैं शोहरूए नाओंऐं किर्यात-ज़रीम नगरी बसाऊई। हूरो दुजअ शोहरू सल्मा ज़ुंणीं आपणैं शोहरूए नाओंऐं बेतलेम नगरी बस्साऊई। हूरो चिऊथअ शोहरू थिअ हारेप ज़ुंणीं आपणैं शोहरूए नाओंऐं बेथ-गदेरा नगरी बस्साऊई।
हारोए अर मनूहोते आधी टोली बी थिई किर्यात-ज़रीमे बाब शोबाले खिंबा का अर किर्यात-ज़रीम नगरी बस्सी दी टोली बी थिई तेऊए ई आद-लुआद। तिधी बस्सी दी टोली आसा ती: इतेरी, पुती, शमाती अर मिश्री। जोराह अर एश्तोल नगरीए लोग थिऐ मिश्री टोली का निखल़ै दै।
सल्मे आद-लुआद तै बेतलेम, नतपाह, अतरोत-बेथ-जोआब सूर नगरी अर मनाहत नगरीए आधै लोग।
जबेश नगरी बस्सी दी टोली बी थिई सल्मा का निखल़ी दी, तिंयां थिऐ दालत अर राज़ दरबारे काईथ। तिंयां ती तिराती, शमाती, सकाती। ईंयां थिऐ कैनी टोली का हमाते आद-लुआद ज़ुंण रकाबी संघै बैहुऐ अर इहअ करै गण्हिंआं तिंयां रकाबे खिंबा का बी।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.