Kulvi Outer Seraji Bible
1 इतिहास 12
दाबेदे सैना दी ज़ुंण होर जोधै ज़ुल़ै
दाबेद त कीशे शोहरू राज़ै शाऊले डरै ठुर्ही सकाल़ग नगरी पुजअ द। तिधी ज़ुल़ै तेऊ संघै कई जोधै ज़ुंणीं जुधा लै तेऊओ साथ दैनअ। बिन्यामीन गोत्र ज़ेता का राज़अ शाऊल बी थिअ, तिन्नां मांझ़ै ज़ुल़ै तिंयां शूरबीर ज़ुंण दोहरै हाथै कतीर-कबाण अर फर्णैक्की ज़ाणा तै बाही। इने दलपति थिऐ गिबा नगरी का शमाहो शोहरू आहीजेर अर तेऊ बाद तेऊओ भाऊ जोआश। तिन्नां बाद होर जोधै आसा तै:
अज़मबेथे शोहरू जजेल अर पलेत,
बराका,
अनातोता का जेहू
गबोन नगरी का इशमाया ज़ुंण तिहा जोधै मांझ़ै मशूर जोधअ अर सैणअ थिअ।
गदेरा नगरी का जेरमयाह, जाहजील, जोहनान अर जोजबाद।
हारूप नगरी का एलुजी, जरमोत, बिल्या, शेमारीया अर शपताह।
कोराह टोली का एलकाना, इशिया, अजरेल, जोएजर अर जाशोबीम।
गदोर नगरी का जेरोहामे शोहरू जोएला अर जबदीया।
गाद गोत्रा का ज़ुंण जोधै दाबेदा संघै ज़ुल़ै
ज़धू दाबेद रेगीस्तानै गहल़ै रहा त, तधू ज़ुल़ै गाद गोत्रा मांझ़ै जुधा लै मनै-तनै दै मशूर जोधै। तिंयां थिऐ ढाल़, बर्छ़ै च़लाऊंदै लै मशूर अर मुंहां का फ्रिशिआ तै तिंयां सिहा ज़िहै अर ठुहर्दै थिऐ तिंयां धारे हरना ज़िहै छ़ल़ैघ। तिंयां थिऐ पठी गैरा ज़ण्हैं:
एजेर त तिन्नां सोभी प्रैंदै सैणअ,
तेऊ बाद त ओबेदियो,
चिऊथअ त एलीआब,
च़ौथअ त मिशमन्ना,
पांज़ूअ त जेरमयाह,
छ़हुअ त अताई,
सातुअ थिअ एलीएल,
आठुअ थिअ जोहनान,
नहुअ एलजाबाद,
दसुअ जेरमयाह अर
मकबानी थिअ गैर्हुअ।
गाद गोत्रा का तै ईंयां खास-खास जोधै अर ईंयां सोभै तै सोभै आपणैं-आपणैं दले दलपति। इना मांझ़ै ज़ुंण सोभी का होछ़ै दलो दलपति त शौआ शूरबीरा प्रैंदै अर सोभी का बडै दलो दलपति त एक हज़ार शूरबीरा प्रैंदै। ईंयां तै तिंयां जोधै ज़ुंणीं च़ैत्रै ज़ेभै जरदण नदी भर्हुई दी हआ ती, तेभै पार टपी संघा काढै तेथ दोहरै बाढै सऊंऐं मुल्खै बस्सै दै लोग दरल़ाऊई।
बिन्यामीन अर यहूदा गोत्रा का ज़ुंण दाबेदा संघै ज़ुल़ै
एकी बारी डेऊअ बिन्यामीन अर यहूदा गोत्रो एक दल गहल़ा लै ज़िधी दाबेद थिअ। दाबेद बी निखल़अ तिन्नां सेटा लै मिलदअ संघा बोलअ तिन्नां लै, “ज़ै तम्हैं मेरै साथ दैंदै आऐ, तै रहा इधी, संघा ज़ुल़ा हाम्हां संघै। पर ज़ै थारै दिलै इहअ आसा कि हुंह बझ़ैल़णअ तम्हां मेरै दुशमणा का ढाकणैं, तै लोल़ी थारै दादा-बाबे तेऊ परमेशरै तम्हां लै आप्पै सज़ा दैनी, किल्हैकि मंऐं निं थारी किछ़ हान्नी किई।”
ज़ुंण दाबेदा सेटा लै थिऐ आऐ दै, तिन्नां आदमी संघै त अमासा बी ज़ुंण बादा का तिहा शूरबीरा प्रैंदै दलपति बणअ। तेऊ दी आई बिधाते पबित्र आत्मां संघा लागअ सह इहअ बोल्दअ,
“दाबेद, ईशैई शोहरूआ, हाम्हैं आसा दिला का ताह संघै,
तूह अर तेरअ साथ दैणैं आल़ै हणैं सदा सफल,
किल्हैकि ताह बाखा जुध करनै आल़अ आसा बिधाता आप्पै।”
दाबेदै किअ तिन्नों खूब अदर संघा डाहै तिंयां आप्पू संघै अर तिंयां बणाऐं तेऊ एकी-एकी दले सैणैं।
मनिश्शे गोत्रा का ज़ुंण दाबेदा संघै ज़ुल़ै
मनिश्शे गोत्रा का ज़ुल़ै थोल़ै शूरबीर दाबेदा संघै। ईंयां आऐ तै तधू दाबेदा सेटा लै ठुर्ही ज़धू तेऊ इज़राईले राज़ै शाऊला संघै जुध करना लै पलिश्ती राज़े सैना बाखा जुध करना लै हाँ किअ त। पर पलिश्ती राज़ै निं दाबेद अर तेऊए आदमी आप्पू संघै जुधा लै एछणैं दैनअ। पलिश्ती राज़ै तै ऐहा गल्ला का डरै दै कि दाबेद सका तिन्नां लै धोखअ करी अर आपणैं पराणैं मालक शाऊला खुश करना लै सका सह हाम्हां ई मारी! तेखअ छ़ाडअ तिन्नैं दाबेद तेऊए आदमी संघी सकाल़ग नगरी लै बापस। दाबेद त सकाल़ग नगरी लै बापस एछदअ लागअ द अर मनिश्शे गोत्रा मांझ़ै आऐ तै थोल़ै शूरबीर दाबेदे साथ दैंदै, तिंयां थिऐ: अदना, जोजबाद, जदीएल, मिकाईल, जोजबाद, एलीहू अर सिलताई। ईंयां सोभ थिऐ हज़ार-हज़ार सपाहीए दला प्रैंदै दलपति अर ईंयां तै ज़बर शूरबीर अर दाबेदै बणाऐं ईंयां बादा का आपणीं सैना दी एकी-एकी दले दलपति। ज़ेभै बी दुशमण जुध छ़ेल़ा तै, ईंयां करा तै दाबेदा बाखा जुध। बादा का बणै ईंयां दाबेदे सैना दी दलपति। हर धैल़ै रहा त दाबेदा संघै कुंण नां कुंण दाबेदे सैना दी ज़ुल़दअ लागी अर इहअ करै हुई दाबेदे सैना परमेशरे सैना ज़ेही खास्सी अर बलबान।
दाबेदे पठी सैना
ज़धू दाबेद हेब्रोन नगरी थिअ, तेऊए सैना दी ज़ुल़ै खास्सै जुध बिद्ये मशूर शूरबीर। तिन्नैं दैनअ दाबेदो साथ कि सह शाऊले ज़ैगा राज़अ बणें, ज़िहअ बिधाता पैहलै ई त बोली डाहअ द कि इहअ हणअ। तिंयां थिऐ हर गोत्रा का गणी करै पठी एतरै:
यहूदा गोत्रा का थिऐ, छ़ह हज़ार आठ शौ ढाल़ अर बर्छ़ै संघै जुध करनै आल़ै जोधै।
शमौन गोत्रा का थिऐ सात हज़ार एक शौ शूरबीर।
लेबी गोत्रा का थिऐ च़ार हज़ार छ़ह शौ जोधै। हारणे खिंबा का थिऐ चअन हज़ार सात शौ आऐ दै, तिन्नां प्रैंदै सैणअ थिअ जहोयादा। तिन्नां संघै आअ सदोक नाओं एक ज़ुआन जोधअ अर तेऊ संघै आऐ तेऊए टोली का बाई ज़ण्हैं ज़ुंण आपणैं-आपणैं दले सैणैं थिऐ।
बिन्यामीन गोत्रा का आऐ राज़ै शाऊले भाई-बंधा मांझ़ै चअन हज़ार जोधै। बाकी बिन्यामीन गोत्रे रहै सोभ शाऊले पक्षा लै तेऊओ साथ दैंदै लागी।
एप्रैम गोत्रा का आऐ बिह हज़ार आठ शौ जोधै ज़ुंण आपणीं-आपणीं टोली दी मनै-तनै दै थिऐ।
जरदण नदी पछ़मा बाखा बस्सै दै मनिश्शे आधै गोत्रा मांझ़ै आऐ छ़ांटी करै ठारा हज़ार मर्ध कि तिंयां दाबेदा राज़ै बणाणां लै साथ दैए।
इस्साकार गोत्रा का आऐ दूई शौ सैणैं आपणैं सोभी भाई-बंधा संघी। ईंयां मणछ हेरा तै समझ़ी कि बगत किज़ै बोल बोला अर केऊ बगती किज़ै लागा करनअ।
ज़बलून गोत्रा का आऐ पज़ाह हज़ार जुध बिद्या लै मशूर अर तिंयां ज़ाणा तै कई रंगे अस्त्र-शस्त्र च़लाऊई।
नप्ताली गोत्रा का आऐ एक हज़ार सैणैं अर सैईंती हज़ार जोधै ज़ुंण ढाल़ अर बर्छ़ै करै जुध करना लै मशूर थिऐ।
दान गोत्रा का आऐ ठाई हज़ार छ़ह शौ शूरबीर।
आशेर गोत्रा का आऐ च़ाल़्ही हज़ार जुध बिद्ये ज़ाणकार जोधै।
इज़राईली मांझ़ै जरदण नदी पुर्बा बाखा बस्सै दै रूबेन, गाद अर मनिश्शे आधै गोत्रा मांझ़ै आऐ एक लाख बिह हज़ार अस्त्र-शस्त्रा च़लाऊंणैं आल़ै मशूर जोधै।
ईंयां सोभै शूरबीर तै जुधा लै तैर। ईंयां आऐ हेब्रोन नगरी कि दाबेदा इज़राईली प्रैंदै राज़अ बणांए। इना का लाऊआ बाकी इज़राईली बी च़ाहा तै इहअ ई कि दाबेद ई लोल़ी राज़अ बणअ। तिंयां रहै हेब्रोन नगरी दाबेदा सेटा चिई धैल़ै तैणीं खांदै-पिंदै लागी। किल्हैकि तिधी ती तिन्नें भाई-बंधै तिन्नां लै धामा लाई दी। होर इज़राईली बी आऐ दूरा-दूरा का ज़ुंण इस्साकार, ज़बलून अर नप्ताली गोत्रे मुल्खै तैणीं बी रहा तै, तिन्नैं आणी आपणैं गाधै, ऊँट, खच़रा, बल्दा प्रैंदै ज़िणस लादी। तेथ आणै तिन्नैं, पिठअ, फेडू अर दाखे टिक्की, दाखो रस अर जैतूनो तेल। शिखा लै आणी तिन्नैं होर भेडा-बाकरी अर पशूए हेल़्ही। किल्हैकि इज़राईल देशै तै सोभ खुश हुऐ दै।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.