1 इतिहास 11

दाबेद बणअ सारै इज़राईलो राज़अ

(2 शमूएल 5:1-10)

1इज़राईले सोभ गोत्र हुऐ हेब्रोन नगरी दाबेदा सेटा कठा संघा लागै तेऊ लै बोल्दै, “हाम्हैं सोभै आसा एकी हाड-खिंबे। 2ज़धू शाऊल राज़अ त, तधू बी थिअ जुधे बगती इज़राईली लै सोभी का आजू तूह ई अर बिधाता आसा ताल्है इहअ बोलअ द, ‘मेरी परज़ा इज़राईलीओ फुआल अर तिन्‍नां प्रैंदै राज़अ हणअ तूह ई।’” 3हेब्रोन तैहा सभा दी किई इज़राईली सोभी सैणैं अर दाबेदै आप्पू मांझ़ै करार अर बिधाता डाहअ तेतो शाजत। तेखअ किअ इज़राईली सैणैं दाबेदे मुंडै जैतूनो तेल तरैल़ी अभिषेक अर दाबेद बणअ इज़राईलीओ राज़अ ज़िहअ बिधाता आपणैं गूर शमूएला का पैहलै ई त बोली हेरअ द।

4राज़ै दाबेद अर सोभी इज़राईली छ़ेल़अ एरुशलेम नगरी संघै जुध। तेऊ ज़मानै बोला तै तैहा नगरी लै जबेश नगरी किल्हैकि तैहा ज़ैगे मूल़ बशिंदै तै जबेशी अर तिंयां थिऐ तेऊ ज़मानै बी तिधी बस्सै दै। 5जबेशी बोलअ दाबेदा लै इहअ, “तूह निं म्हारी नगरी भितरी कधि एछी सकदअ!” पर दाबेदै ज़ितअ तिन्‍नों सियोन नाओं गहल़ अर तेता नाअं आसा आझ़ तैणीं बी दाबेदपूर पल़अ द। 6दाबेदै बोलअ आपणीं सैना लै इहअ, “ज़ुंण इना जबेशी मारी एछे, सह बणाणअं मुंह सैनापति!” जोआब ज़सरी ईजा नाअं सरूयाह थिअ, सह डेऊअ सैना संघी जुधा लै आजू संघा बणअ सह इज़राईली सैनो सैनापति। 7सियोन गहल़ा गिम्मी बस्सअ दाबेद तिधी अर तैहा नगरी नाअं पल़अ, “दाबेद नगरी।” 8तेऊ बणाअं तैहा नगरी फेर भिई धारे पुर्बा बाखा बढेरी करै बडअ गहल़ अर बाकी सारी नगरी भिई च़िणनेओ काम किअ जोआबै पूरअ। 9दाबेद रहअ बलबान अर मशूर हंदअ लागी किल्हैकि स्वर्गे सारी सैने मालक बिधाता ज़हा का सारअ बल आसा सह थिअ तेऊ संघा।

राज़ै दाबेदे मशूर जोधै

(2 शमूएल 23:8-39)

10ज़िहअ बिधाता पैहलै ई त बोली हेरअ द कि दाबेद बणनअ राज़अ अर ऐहा गल्‍ला पूरी हणां लै दैनअ सोभी इज़राईली दाबेदो साथ। राज़ै दाबेदे सैना दी थिऐ ईंयां मशूर जोधै:

11एक जोधअ थिअ राज़ै दाबेदो हाकमोनी टोली का जाशोबीम ज़ुंण चिई दले सरदारा प्रैंदै दलपति थिअ। तेऊ मारै तै एकी जुधा लै आपणैं बर्छ़ै करै दुशमणे चअन शौ सपाही। 12दुजअ मशूर जोधअ थिअ दाबेदे चिई जोधै मांझ़ै अहोह टोली का दोदैओ शोहरू एलीआजर। 13एकी बारी तै पलिश्ती जुधा लै दमीम खागै झाल़्हुऐ दै ज़िधी ज़ौओ खेच थिअ, दाबेदै बोलअ पलिश्ती लै ज़ै तम्हैं तिहै फिरा तै एछा हाम्हां संघै मकाबलै लै! ज़ै कि होर इज़राईली तै गऐ दै जुधा करनै का पिछ़ू ठुर्ही! 14पर एलीआजर अर तेऊए आदमी रहै पलिश्ती संघै मकाबलै करदै लागी। तैहा धैल़ी दैनी ती बिधाता तेऊ अर इज़राईला लै बडी ज़ीत।

15एकी धैल़ै डेऊऐ तिहा-तिहा जोधै प्रैंदै चअन दलपति अदुलाम डुआरा नेल़ तैहा बडी टोल्हा सेटा ज़िधी दाबेद थिअ अर पलिश्ती तै रपाईम खागै डेरै पाऐ दै। 16दाबेद त उझै धारा गहल़ै अर पलिश्ती सैने एकी दलै किअ बेतलेम नगरी कबज़अ। 17दाबेदा फिरी घरकी आद संघा बोलअ, “तै भाल़ किहअ हणअ त ज़ै कुंण बेतलेम नगरीए प्रऊल़ी सेटे कुहै का मुल्है झुटणा लै पाणीं दैंदअ आणी!” 18तिंयां चअन मशूर जोधै डेऊऐ पलिश्ती डेरै बाती, संघा आणअ बेतलेम नगरीए प्रऊल़ी सेटे कुहै का पाणीं भरी राज़ै दाबेदा सेटा। पर तेऊ निं सह पाणीं झुटअ अर तेऊ दैनअ तेऊ पाणीं करै बिधाता लै अर्घअ! 19संघा बोलअ इहअ, “हे बिधाता, अह निं एता झुटी सकदअ! अह हणअ तिन्‍नां मणछे लोहू झुटणैं ज़िहअ ज़ुंणीं एता मुल्है आणना लै आपणीं ज़िन्दगी बी पाई खातरै दी।” तेखअ निं दाबेदै सह पाणीं झुटअ।

इना चिई मशूर जोधे तै इहै हिम्मती आल़ै काम।

20जोआब अर तेऊए भाई अबीशे ईज थिई सरूयाह। अबीशै थिअ तिन्‍नां तिहा जोधै प्रैंदै प्रधान अर मशूर जोधअ। एकी जुधा लै मारै तै तेऊ एकी ज़ण्हैं आपणैं बर्छ़ै करै चअन शौ दुशमण संघा हुअ तिहा जोधै मांझ़ै तेऊओ नाअं मशूर। 21सह हुअ इहअ मशूर कि तेखअ बणाअं सह तिन्‍नां ई तिहा मशूर जोधैओ दलपति। पर अज़ी बी निं सह खास चिई जोधै ज़िहअ मशूर हुअ त।

22कबसेल नगरी का थिअ जहोयादो शोहरू बेनियाह मशूर सपाही, तेऊ किऐ बडै-बडै नुआहरै काम। एकी बारी पाऐ तै तेऊ मोआबीए सोभी का तगल़ै जोधै मारी। सह होथअ हिंऊंदै उंधै एकी जुहल़ी लै संघा पाअ एक बडअ सिह मारी। 23एकी बारी मारअ तेऊ मिसर देशो एक सात फुट लाम्मअ दैंत्तर जोधअ। मिसर देशे तेऊ जोधे हाथै थिअ राछ़े लाठै ज़िहअ एक बर्छ़अ, पर बेनियाह डेऊअ तेऊए मकाबलै करदअ शोठी पाई संघा छ़ड़ैऊअ तेऊए ई हाथा का बर्छ़अ संघा पाअ सह तेता ई करै मारी। 24जहोयादे शोहरू बेनियाह किऐ इहै-इहै ज़बर काम। खास चिई जोधै मांझ़ै ता निं तेऊ ज़ैगा भेटी 25पर सह थिअ खास तिह जोधै जैंदरी मशूर। दाबेदै बणाअं सह तेखअ आपणीं फाज़त करनै आल़ै शूर-बीरो दलपति।

26राज़ै दाबेदे मशूर जोधै तै ईंयां:

जोआबो भाई असाहेल,

बेतलेम नगरीए दोदो शोहरू एलहान,

27हारोरा का शमोत अर एलिका,

पेलोन नगरी का हेलेस,

28तकोआ नगरी का इकेशो शोहरू ईरा,

अनातोत नगरी का एबीएजेर,

29हुशाई नगरी का सिबकै,

अहोह नगरी का ईलाई,

30नतपाह नगरी का महरै

नतपाह ई नगरी का एक होर बानाहो शोहरू हेलेद

31बिन्यामीन मुल्खे गिबा नगरी का रिबैओ शोहरू ईताई

पिरातोन नगरी का बेनियाह,

32गाश धारे गाडा नेल़ रहणैं आल़अ हूराई,

बेथ-अराबा का एबीएल,

33बहूरीम नगरी का अज़मबेथ

एलीआबा का शालबोनी

34हाशेमे खिंबा का थिऐ गज़ोन नगरीओ जोनातान

हरार नगरी का शागी,

35साकारो शोहरू आहीआम,

ऊरो शोहरू हरारो शोहरू एलीपाल,

36मकात नगरी का हेपेर

पेलोन नगरी का आहिजा,

37कर्मेल नगरी का हेस्रो,

अजाबीओ शोहरू नाराई,

38नातानो भाई जोएल,

हागारीओ शोहरू मिभार

39अमोन नगरी का सेलेक,

बरोत नगरी का नहारी सह थिअ सरूयाहे शोहरू जोआबे अस्त्र-शस्त्रा ढोणै आल़अ।

40इतेरा नगरी का ईरा अर गारेब

41हित्ती उरियाह

अहलाईओ शोहरू जाबाद।

42रूबेन गोत्रा का शिजो शोहरू अदीना, सह थिअ तिहा जोधै प्रैंदै दलपति।

43माको शोहरू हनान,

मतान नगरी का जोशापात

44अशतरोत नगरी का उज़ियाह,

अरोर नगरी का होतामे शोहरू शामा अर जेइल।

45शिम्रीओ शोहरू जदीएल,

तीज़ नगरी का जोहा अर तेऊओ भाऊ।

46महावा का एलीएल,

एलनामे शोहरू जरबाई अर जोशबा,

मोआबा का ईतमा,

47एलीएल अर ओबेद,

जोबाह का जासीएल।