Kulvi Outer Seraji Bible
1 इतिहास 4
यहूदो खिंब
यहूदे थिऐ पांज़ शोहरू: फिरिस, हिस्रोन, कर्मीं, हूर अर शोबाल। शोबाल त रायाहो बाब अर जहातो दादू। जहातो हुअ आहूमाई अर लाहाद, जोराह नगरी बस्सी दी टोली थिई आजू इने आद-लुआद। हूर थिअ कालेब अर एप्राता का हुअ द सोभी का ज़ेठअ शोहरू। तेऊए आद-लुआदा मांझ़ै बस्सै कई बेतलेम नगरी। हूरे थिऐ चअन शोहरू: एताम, पनूएल, एजेर। एतामे शोहरू तै जज्रेल, इशमा अर इदबाश। इने ती एक बैहण बी तैहा नाअं त हसलेलपूनी।
पनूएलै बस्साऊई आपणैं शोहरूए नाओंऐं गदोर नगरी अर एजेरै बस्साऊई आपणैं शोहरू हुशाहे नाओंऐं हुशाई नगरी।
अशहूर ज़ुंणीं आपणैं शोहरूए नाओंऐं तकोआ नगरी बस्साऊई, तेऊ ती दूई बेटल़ी आणी दी, हेला अर नारा। नारा का हुऐ अशहूरे च़ार शोहरू: आहुजाम, हेपेर, तेमनी, हाहाशतारी। हेला का हुऐ अशहूरे चअन शोहरू: सेरेत, सोहार अर एतनान।
कोज़ थिअ अनूब अर सोबेबो बाब अर हारूमे शोहरू अहारहेले टोली बी थिई कोज़े ई आद-लुआद।
तिन्नां मांझ़ै त जबेश नाओं एक मणछ, तेऊओ हआ त टोली दी तेऊए सोभी भाई-बंधा का खास्सअ अदर। तेऊए ईजा डाहअ तेऊ नाअं जबेश किल्हैकि तैहा हुई ती तेऊ सुंदा बारी खास्सी दाह। पर जबेशै किई इज़राईले परमेशर बिधाता सेटा एही अरज़, “परमेशर, तंऐं लोल़ी ती मुल्है खास्सी बर्गत दैनी, हुंह च़ाहा त इहअ कि तूह मुल्है खास्सअ देश दैए। हुंह च़ाहा त इहअ कि तूह लोल़ी मुंह संघा रहअ अर तंऐं लोल़ी त हुंह इहै बूरै करनै का बच़ाऊई डाहअ ज़ेता करै मुल्है दाह-दुख एछी सका।” बिधाता दैनअ तेऊ लै तिहअ ई बरदान ज़िहअ तेऊ मांगअ।
होर खिंब
शूहे भाई कालूबो शोहरू त मेहर। बादा का हुअ मेहरो शोहरू एशतोन। एशतोने हुऐ चअन शोहरू: बेथ-रापा, पसेह अर तेहीना। तेहीना बसाऊई आपणैं शोहरूए नाओंऐं नहाश नगरी। इने आद-लुआद रहा ती रेका नगरी।
कनजीए तै दूई शोहरू ओतनिएल अर सरयाह। आजू हुऐ ओतनिएले बी दूई शोहरू हातात अर मेनतैई। मेनतैई थिअ ओफरो बाब।
सरयाह थिअ जोआबो बाब। ज़िधी जोआब बस्सअ, तेऊ बसाऊअ गेहरशीम खाग किल्हैकि तिधी बस्सै दै थिऐ सोभ काठे कारीगीर।
यपुन्नें शोहरू कालेबे थिऐ चअन शोहरू: ईरू, एला अर नांम। एलो शोहरू त कनज।
जहलेले तै च़ार शोहरू: जीप, जिपा, तिरिया अर असरेल।
एज्रे थिऐ च़ार शोहरू: जतेर, मेरेद, एपेर अर जलोन। मेरेदै किअ मिसर देशे माहा राज़ेए देई बितिया संघै बैह अर तिन्नें हुई एक शोहरी तैहा नाअं त मिर्याम अर दूई हुऐ शोहरू शमाई अर इशबा। इशबा बसाऊई एश्तमो नगरी। मेरेदै किअ यहूदा गोत्रे एकी शोहरी संघै बैह अर तिन्नें हुऐ चअन शोहरू: जेरेद ज़ुंणीं गदोर नगरी बसाऊई, हेबेर ज़ुंणीं सोको नगरी बसाऊई अर ज़गतीएल ज़ुंणीं जानोह नगरी बसाऊई।
होदिया किअ नाहामे बैहणी संघै बैह। होदिये खिंबा का निखल़ी गरेम टोली ज़ुंण केलाह नगरी बस्सै अर मकात टोली ज़ुंण एश्तमो नगरी बस्सै।
शमौने तै च़ार शोहरू: अमनोन, रिना, बेन-हनान अर तिलोन।
ईशीए थिऐ दूई शोहरू जोहेत अर बेन-जोहेत।
शेलाहे आद-लुआद
यहूदो बी थिअ शेलाह नाओं एक शोहरू, शेलाहे तै दूई शोहरू लादा अर एर। एरै बसाऊई आपणैं शोहरू लिके नाओंऐं लिका नगरी, लादा बसाऊई आपणैं शोहरूए नाओंऐं मारेशा नगरी। बेथ-अशबे नगरी बस्सै दै लोग बी थिऐ शेलाहे खिंबा का, तैहा टोलीए लोग करा तै बाछे झिकल़ै बुणणेओ काम। जोकीम अर कोज़बा नगरी बस्सै दै, जोआश अर साराप ज़ुंणीं मोआबी बेटल़ी संघै बैह किअ त, तिंयां थिऐ बेतलेम नगरी बस्सै दै। इने नाओं थोघ लागा पैहलकै ज़मानें इतिहासा दी। ईंयां तै खमार अर ईंयां करा तै राज़ै लै काम अर ईंयां तै नताईम अर गदेरा नगरी बस्सै दै।
शमौने आद-लुआद
शमौने तै पांज़ शोहरू: नमूएल, ज़ामन, जारीब, जेराह अर शाऊल। शाऊलो शोहरू त शलूम, मिबसाम पोचअ अर मिशमा त शाऊलो पल़पोचअ। मिशमो शोहरू त हमूएल, जक्कूर त पोचअ अर शिमी थिअ मिशमो पल़पोचअ।
शिमीए ती आजू सोल़ा शोहरी अर छ़ह शोहरू पर तेऊए होरी भाईए निं खास्सै शोहरू-माठै आथी तै। तैही निं शमौन गोत्र यहूदा गोत्रा ज़िहअ खास्सअ बढअ।
दाबेदे इज़राईल देशे राज़ै बणनैं का आजी शमौन गोत्रे टोली ज़हा-ज़हा नगरी तै बस्सै दै तिंयां ती ईंयां: बेर्शेबा, मोलदा, हसर्शूआल़, बिल्हा, एसेम, तोलाद, बतूएल, होर्मा, सकाल़ग, बेथ-मकारबोत, हसरसूसीम, बेथ-बिरी अर शारेम नगरी। तिंयां थिऐ होर्ती बी पांज़ा ज़ैगा बस्सै दै तिंयां नगरी ती: एताम, ऐन, रमोन, तोकेन अर आशान नगरी अर इना नगरी फेर गराऊंऐं दखणा बाखा बाल नगरी तैणीं। ईंयां तै एथ बस्सै दै अर इने आद-लुआद बी थिई ईंयां एतरी।
शमौन गोत्रे टोलीए सैणैं थिऐ ईंयां: मशोबाब, जमोलक, अमास्यो शोहरू जोशा, जोएल, जोशिबीयो शोहरू जेहू ज़ुंण सरयाहो पोचअ अर असीएलो पल़पोचअ थिअ। एलोनाई, जाकोबा, जेहोहया, असाया, आदीएल, जसीमिएल, बेनियाह अर शिपीओ शोहरू जीजा ज़ुंण अलोनो पोचअ अर जदायो पल़पोचअ। जदाया थिअ शिम्रीओ शोहरू अर शमयाहो पोचअ।
ईंयां एतरै तै शमौन गोत्रा का आपणीं-आपणीं टोलीए मूल़ अर सैणैं। शमौन गोत्रे टोली रही बढदी लागी अर तिंयां डेऊए पछ़मा बाखा गदोर नगरी तैणीं। तैहा नगरी पुर्बा बाखा खागै रहै तिंयां आपणीं भेडा-बाकरीए हेल़्ही च़राऊंदै लागी। तेथ भेटी तिन्नां डागै-चैणैं लै खास्सै घाह-पाचा आल़ी ज़ैगा अर अह ज़ैगा बी थिई फेर-फिरदी खास्सी अर शांत। तिन्नां का आजी तै तैहा ज़ैगा हामे आद-लुआदा मांझ़ा का बस्सै दै।
ज़ेऊ ज़मानै यहूदा मुल्खै राज़ै हिजकियो राज़ थिअ, तेऊ ज़मानै डेऊऐ ईंयां आदमी इना नगरी लै ज़सरै नाअं उपर आसा लिखै दै। तिधी तै मुनी लोग बस्सै दै अर इनै किऐ तिन्नें डेरै पठी बरैबाद अर तिंयां लोग पाऐ इहै मारी कि तिन्नों निं नाअं-नशाण ई डाहअ अर आप्पू बस्सै तिन्नें ज़ैगा तिधी। किल्हैकि तेथ त तिन्नें भेडा-बाकरीए हेल़्ही च़ारना लै खास्सअ घाह-पाच। बादा का डेऊऐ शमौन गोत्रा का कोई पांज़ शौ मणछ एदोम देशा लै, तिन्नां प्रैंदै सैणैं थिऐ ईशीए शोहरू पलतीया, नारिया, रपाया अर उज्जीएल। तिन्नैं पाऐ तिधी बस्सै दै अमोलकी मारी अर आप्पू आसा आझ़ तैणीं बी तिधी बस्सै दै।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.