Kulvi Outer Seraji Bible
1 इतिहास 5
रूबेने आद-लुआद
रूबेन थिअ इज़राईलो ज़ेठअ शोहरू, पर तेऊ लाई आपणैं बाबे डाही दी बेटल़ी संघै सुत्ती छ़ोत अर इहअ करै पाअ तेऊ आपणअ ज़ेठै हणैंओ हक ज़ांऐं अर तेऊओ हक भेटअ युसुफा। एही ता थिअ यहूदा गोत्र सोभी का बलबान अर तेऊ किअ सोभी गोत्रा प्रैंदै राज़ पर ज़ेठै हणैंओ हक भेटअ युसुफा। इज़राईले ज़ेठै शोहरू रूबेने तै च़ार शोहरू: हणोक, पालू, हिस्रोन अर कर्मीं।
कर्मींए शोहरू जोएले आद-लुआद तै बाबा बाद शोहरू पोस्ती दर पोस्ती इहै: जोएल, शमयाह, गोग, शिमी, मिका, रायाह, बाल अर बेरा। अश्शूरी राज़ै तिगला-पेल़सरै निंयं बीराह कैद करी, सह थिअ रूबेन गोत्रो सैणअ।
रूबेन गोत्रे खिंबा दी थिऐ आपणीं-आपणीं टोली दी ईंयां सैणैं: जेइल, जकर्या, अजाजो शोहरू बेला ज़ुंण शेमो पोचअ अर जोएलो पल़पोचअ थिअ। अह टोली ती अरोर नगरी बस्सी दी ज़ुंण नेबो अर बाल-मिऊन मुल्खे उतरा बाखा आसा। तिन्नें ती गलाद मुल्खै डागै-चैणें खास्सी हेल़्ही अर ज़ैगा पल़ी थोल़ी, तैही किअ तिन्नैं पुर्बा बाखा रेगीस्तानै फरात दरैऊआ तैणीं कबज़अ।
ज़ेऊ ज़मानै इज़राईल देशै राज़अ शाऊल थिअ, रूबेन गोत्रा आल़ै छ़ेल़अ हागारी लोगा संघै जुध अर तिन्नें पाऐ तेऊ जुधा दी हागारी मारी अर तिन्नें ज़ैगा किअ गलाद मुल्खै पुर्बा बाखा कबज़अ।
गादे आद-लुआद
गाद गोत्रा आल़ै तै रूबेन गोत्रे उतरा बाखा बाशान मुल्खा पोर्ही सल्का नगरी पुर्बा बाखा तैणीं बस्सै दै। तिन्नें सोभी का बडी टोलीओ मूल़ थिअ जोएल, दुजी बडी टोलीओ मूल़ थिअ शापाम। इना बाद थिऐ जानाई अर शापात आपणीं-आपणीं टोलीए मूल़। ईंयां तै बाशान बस्सै दै। गाद गोत्रे होर भाई-बंध थिऐ इना साता टोली का: मिकाईल, मशूलाम, शेबा, जोराई, जाकन, ज़िआ अर एबेर टोली का। ईंयां थिऐ हूरीए शोहरू अबिहेले आद-लुआद। तेऊओ खिंब त इहअ: अबिहेलो बाब त हूरी, जारोह त दादू अर गलाद त पल़दादू। गलाद त मिकाईलो शोहरू जशिशैओ पोचअ जाहदो पल़पोचअ। जाहद त बूज़ो शोहरू। इने खिंबे मूल़ थिअ गूनीओ पोचअ अबदीएलो शोहरू आही। तिंयां थिऐ बाशान अर गलाद मुल्खे नगरी अर शारोन मुल्खे घैहणीं दुजी बाखा तैणीं बस्सै दै। इना सोभिओ इतिहास आसा तेऊ ज़मानै लिखअ द ज़धू यहूदा मुल्खै जताम अर इज़राईल मुल्खै जरोबाम राज़अ थिअ।
पुर्बा बाखा बस्सै दै गोत्रा संघै अरामी
रूबेन, गाद अर कनान देशै पुर्बा बाखा बस्सै दै मनिश्शे गोत्रा दी थिऐ पठी चरताल़ी हज़ार सात शौ शाठ जोधै सपाही। तिंयां थिऐ जुध बिद्ये ज़ाण-प्रबीण ज़ुंण ढाल़-तलबार अर कतीर-कबाणा करै जुध ज़ाणा तै करी। तिन्नैं किअ हागारी, जतूर, नपीश अर नोदाब ज़ाती संघै जुध। तिंयां डेओआ तै बिधाता का अरज़ करी जुधा लै कि सह तिन्नें मज़त करे अर बिधाता बी रहअ तिन्नां संघै अर तिन्नां लै दैनी हागारी अर तिन्नें साथी ज़ाती का ज़ीत। तिन्नें किअ इना ज़ातीए डागै-चैणें हेल़्ही दी कबज़अ। तिंयां थिऐ कोई पज़ाह हज़ार ऊँट, दूई लाख पज़ाह हज़ार भेडा-बाकरी, दूई हज़ार गाधै। एक लाख किऐ तिन्नें आदमी जुधा दी कैद। तेऊ जुधा लै मारै तै तिन्नैं खास्सै दुशमण, किल्हैकि तेऊ जुधा लै थिअ बिधाता तिन्नां संघै। तेखअ रहै तिंयां तिन्नें ज़ैगा अश्शूर देशे गलामी दी डेऊणैं का आजी तैणीं तिधी बस्सी।
पुर्बा बाखा बस्सै दै मनिश्शे आधै गोत्रे आद-लुआद
मनिश्शे गोत्रा मांझ़ै तै जरदण नदी आर पुर्बा बाखा बाशान पोर्ही बाल-हर्मोन, सनीर, हर्मोन धारा बस्सै दै। तिंयां हुऐ आजू खास्सै। तिन्नें टोलीए मूल़ तै ईंयां: एपेर, ईशी, एलीएल, अजरीएल, जेरमयाह, होदाबया अर जदीएल। ईंयां सोभै तै खास्सै शूरबीर अर आपणीं-आपणीं टोलीए मशूर सैणैं।
पुर्बा बाखा मनिश्शे गोत्र डेऊअ गलामी दी
पर जरदण नदी आर पुर्बा बाखा मनिश्शे आधै गोत्रा आल़ै निं आपणैं दादा-बाबे परमेशर बिधाता लै शुचै-पाक्कै रहै! तिंयां लागै तिन्नां ज़ातीए देअआ पूज़दै ज़ुंण परमेशरै तेऊ देशा का दूर काढै तै। बिधाता दैनअ तिन्नें देशा लै अश्शूर देशे राज़ै तिगला-पेल़सरा एछणैं अर कबज़अ करनै। तेऊ किऐ रूबेन, गाद अर पुर्बा बाखा बस्सै दै मनिश्शे गोत्रा आल़ै कैद संघा बसाऊऐ तिंयां तिधा का गोजान नदी नेल़ हालाह, हाबोर अर हारा नगरी।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.