Kulvi Outer Seraji Bible
1 इतिहास 14
एरुशलेम नगरी राज़ै दाबेदो मैहल
(2 शमूएल 5:11-16)
सूर नगरीए राज़ै हिरामै छ़ाडै आपणैं कार-करिंदै राज़ै दाबेदा सेटा लै। आप्पू संघै आणै तिन्नैं काठे अर पात्थरे कारीगीर अर राज़ै दाबेदो मैहल बणाणां लै केल़ुईए काठ। तेखअ हेरअ दाबेदै ज़ाणीं कि बिधाता किअ इज़राईली प्रैंदै तेऊओ राज़ पाक्कअ अर आपणीं परज़ा इज़राईलीए तैणीं बढेरअ बिधाता तेऊओ राज़।
हेब्रोन नगरी का एरुशलेम एछी डाही दाबेदै आप्पू लै होर बी बेटल़ी अर तेऊए हुऐ होर बी खास्सै शोहरू-शोहरी। एरुशलेम हुऐ तेऊए ईंयां शोहरू: शम्मू, शोबाब, नातान, सुलैमान, ईभार, एलीशू, एलपेलेत, नोगह, नपेग, ज़ापी, एलीशामा, बेल्यादा अर एलीपेलेत।
राज़ै दाबेदे पलिश्ती प्रैंदै ज़ीत
(2 शमूएल 5:17-25)
पलिश्ती का गअ थोघ लागी कि दाबेद बणअ सारै इज़राईला प्रैंदै राज़अ। तिन्नैं डाही आपणीं सैना दाबेदा ढाकणा लै छ़ाडी। ज़ांऊं दाबेदा का ऐहा गल्लो थोघ लागअ, सह निखल़अ तिन्नें मकाबलै करदअ। पलिश्ती आऐ रपाईम खागै संघा गिम्मी सह सारी ज़ैगा। दाबेदै पुछ़अ बिधाता, “हुंह पलिश्ती संघै मकाबलै लै डेऊं? ताह मुल्है तिन्नां का ज़ीत दैणीं?”
बिधाता दैनअ ज़बाब, “हाँ, डेऊ, मुंह हेरनअ तूह तिन्नां का ज़ताऊई!”
तेखअ डेऊअ दाबेद बाल-परज़ीम अर तिधी पाऐ तेऊ पलिश्ती मारी। दाबेदै बोलअ इहअ, “ज़िहअ पाणीं बडै रोक्कै चोल़ा, तिहै ई चोल़ै बिधाता मुंह करै मेरै दुशमण।” तैही डाहअ तेऊ तैहा ज़ैगा नाअं बाल-परज़ीम बच़ै दै पलिश्ती ठुर्है तिधा का अर तिन्नां का छ़ुटै तिन्नें देअआ-देबीए मैहरै तेथै अर दाबेदै दैनअ तेता लै हुकम कि इना सोभी पाआ आगी जैंदरी दहई।
तेखअ गऐ थोल़ै धैल़ै बाद पलिश्ती भिई रपाईम खागा लै एछी संघा गिम्मी सह ज़ैगा भिई। तेखअ डेऊअ दाबेद भिई बिधाता पुछ़दअ, “हुंह पलिश्ती संघै मकाबलै लै स्मोहरअ डेऊं?” बिधाता बोलअ तेऊ लै इहअ, “तिन्नें मकाबलै लै निं स्मोहरअ डेऊई, तूह मार तिन्नां लै घेरअ संघा रहअ बलसामे बूटा नेल़ तिन्नां लै ताखुई। ज़ांऊं तूह बलसामे बूटा जैंदरी सैना हांढणे छ़ेल़ शुणें, सह हणअ ताल्है नछ़ैण कि हुंह बिधाता आसा पलिश्ती संघै जुधा लै ताह आजू-आजू आप्पै लागअ त हांढदअ, तिधी पल़ै तम्हैं तिन्नां लै नभैऊशै चुटी!” ज़िहअ बिधाता हुकम किअ, दाबेदै किअ तिहअ ई अर पलिश्ती दरल़ाऊऐ तिन्नैं मारदी-मारदी गबोन नगरी पोर्ही गज़ेर नगरी तैणीं।
इहअ करै हुअ राज़अ दाबेद सारै दी मशूर अर बिधाता किअ इहअ कि सोभ देश लागै दाबेदा का डरदै।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.