Kulvi Outer Seraji Bible
1 इतिहास 16
तेखअ डाहअ बिधाते करारो मणशू तैहा ज़ैगा तेऊ खिम्भा भितरी ज़ुंण ज़ैगा राज़ै दाबेदै ती डाही दी बणाईं। संघा किऐ तिन्नैं बिधाता लै हूम अर मेल़-ज़ोल़े बल़ीदान। ज़ांऊं राज़अ दाबेद हूम अर बल़ीदान करी मुक्कअ, तेखअ दैनी तेऊ बिधाते नाओंऐं सारी परज़ा लै बर्गत। संघा बांडी तेऊ इज़राईली सोभी लोगा लै रोटी। तेऊ दैनी मर्ध-बेटल़ी संघी एक-एक रोटी भोज़न, एक-एक शिखे टांक अर एक-एक दाखे टिक्की।
तेखअ डाहै राज़ै दाबेदै लेबी मांझ़ै छ़ांटी करै करारे मणशूए च़ाकरी करदै। तिन्नों काम त तिधी साज़-बाज़ अर गिहा बोली इज़राईले परमेशर बिधाते ज़ै-ज़ैकार करनअ। तिन्नां सोभी प्रैंदै सैणअ डाहअ असाप, तेऊ संघै दुजअ डाहअ जकर्या। तिन्नां संघै होर तै जीए, शमीरामोत, जेहीएल, मतियाह, एलीआब, बेनियाह, ओबेद-एदोम अर जेइल बींना बाज़दै। असाप बाज़ा त छ़छ़ाल़ा दी राग। बेनियाह अर जहजीएल दूई प्रोहत रहा तै बिधाते करारे मणशू आजू कबल्लै नर्शिंगै बाज़दै लागी। अह त पैहली बारी ज़धू राज़ै दाबेदै असाप अर होरी लेबी लै बिधाते ज़ै-ज़ैकार अर शूकर करने ज़िम्मैंबारी सभाल़ी।
बिधातो शूकर करना लै राज़ै दाबेदो भज़न
(भज़न 105:1-15; 96:1-13; 106:1,47,48)
बिधातो करा शूकर अर सोभी का खोज़ा कि सह किहअ महान आसा,
देशा-देशे लोगा का खोज़ा कि तेऊ किज़ै-किज़ै आसा किअ द।
बिधाते ज़ै-ज़ैकार करना लै बोला गिहा!
तेऊ ज़ुंण महान नुआहरै काम किऐ, तेता खोज़ा सोभी का।
खुश हआ कि हाम्हैं आसा तेऊ बिधाते।
तेऊए सोभै भगत रहा नंद।
मज़त मांगा बिधाता का,
कबल्लै रहणअ तेऊए ज़ै-ज़ैकार करदै लागी।
याकबे लुआद तम्हैं ज़ुंण तेऊए च़ाकरी करा,
इज़राईले लुआद, ज़ुंण तेऊ छ़ांटै दै आसा,
तम्हैं करा तिन्नां च़मत्कारा आद ज़ुंण तेऊ रहैऊऐ,
तेता बी करा आद ज़ुंण तेऊ नसाफ किअ।
सह बिधाता ई आसा म्हारअ परमेशर,
तेऊओ नसाफ आसा सारै संसारा लै।
सह डाहा आपणीं करार सदा लै अटल़,
ज़ुंण तेऊ ज़बान दैनी, सह रहा हज़ारो पोस्ती तैणीं।
ज़ुंण करार तेऊ आबराम, इसहाका संघै किई अर
ज़ुंण ज़बान तेऊ याकबा लै दैनी सह आसा अटल़।
बिधाता दैनअ याकबे आद-लुआदा लै बधान,
इज़राईली संघै किई तेऊ अटल़ करार।
तेऊ बोलअ त इहअ, “मुंह दैणीं तम्हां लै कनान देशे ज़ैगा,
तैहा ज़ैगे मालक हणैं तम्हैं सदा लै।”
तधू तै तिंयां परमेशरे लोग धख ज़िहै मणछ,
अर कनान देशै तै तिंयां पाखलै।
तिंयां रहा तै देशै-देशै हांढदै लागी,
एकी मुल्खा का दुजै मुल्खै।
पर बिधाता निं तिन्नां कोही मणछा हंतणैं दैनअ,
तिन्नें फाज़त करना लै नैरा त बिधाता राज़ै इहअ बोली,
“मेरी छ़ांटी दी परज़ा निं छ़ुंहीं छ़ेल़ी आथी,
नां मेरै गूरा लै हान्नी करी।”
संसारे सोभै लोग बोला बिधाते गिह!
तेऊ हेरै हाम्हैं बच़ाऊई, एऊ खुशीए समादा खोज़ा धैल़ सोभी का।
होरी देशा का बी खोज़ा ऐहा गल्ला कि बिधातो प्रतप्प किहअ आसा अर
इहअ कि तेऊए काम किहै महान आसा।
बिधाता आसा इहअ महान कि तेऊए स्तोती लागा करनी ई।
सह आसा परमेशर एक्कै अर हाम्हां लागा तेऊओ सोभी देअआ का खास्सअ अदर करनअ।
होरी देशे देअ-देबी आसा सिधी मुहुर्ती,
पर सह आसा बिधाता ई ज़ुंणी सारअ भ्रमंड आसा बणाअं द।
तेऊ फेर आसा अदर अर प्रतप्प,
तेऊए पबित्र ज़ैगा आसा बल अर शोभा करै भरी।
पृथूई दी करा सोभी देशे लोग तेऊए ज़ै-ज़ैकार,
ऐहा गल्ला मना सोभै कि बिधाता आसा महान अर सोभी का बलबान।
पृथूईए सोभ लोग करा बिधाते ज़ै-ज़ैकार, एता जोगी आसा सह ई।
सोभ एछा भैंट लई तेऊए दुआरै।
ज़ेभै सह पबित्र प्रगट होए तेऊ महान अर पबित्र बिधाता सेटा टेक्का माथअ,
तेऊए डरै लोल़ी पृथूई दी सोभै झ़ील़ै-काम्बै!
पृथूई आसा बिधाता एकी ज़ैगा टकैल़ी डाही दी, सह निं च़ुक्कदी आथी,
पृथूई अर सरग हुऐ खुश!
देशा-देशे लोगा का खोज़ा इहअ, “बिधाता आसा माहा राज़अ!
समुंदर अर तेते सोभी च़िज़ा लाई क्रुंगा,
ज़ैगा-ज़िम्मीं अर तेते सोभ गल्ला लागी नंद अर
बण-बूट लागै ज़ै-ज़ैकार करदै
ज़ांऊं बिधाता आप्पै धरती दी राज़ करदअ एछणअ।
बिधातो करा शूकर किल्हैकि सह आसा भलअ
सह झ़ूरा हाम्हां लै सदा।
तेऊ सेटा करा एही अरज़,
‘हे म्हारै परमेशर बिधाता, हाम्हां बच़ाऊ,
हाम्हां पजैल़ देशा-देशा का झाल़ी करै बापस,
ताकि हाम्हैं तेरअ शूकर करी सके अर
तेरै पबित्र नाओंए ज़ै-ज़ैकार करी सके।’
इज़राईले परमेशर बिधाते करा ज़ै-ज़ैकार!
तेऊए करा आझ़ा पोर्ही सदा ज़ै-ज़ैकार!
सोभै बोला, ‘एवमस्तू!’ बिधाते लोल़ी सदा ज़ै-ज़ैकार हुई।”
एरुशलेम अर गबोन बिधाते पूज़ा-गाज़ा
राज़ै दाबेदै सभाल़ी असाप अर होरी लेबी का तैहा ज़ैगे ज़िम्मैंबारी ज़िधी बिधाते करारो मणशू थिअ डाहअ द। तिन्नों काम त हर धैल़ै बिधी-बधाने साबै पूज़ा-गाज़ा करनी। जदूतूनो शोहरू ओबेद-एदोम अर तेऊए टोली का ठाहठ आदमी तै तिन्नां संघै च़ाकरी करनै आल़ै। होसाह अर ओबेद-एदोमा का थिई दुआरे पहरै करने ज़िम्मैंबारी सभाल़ी दी।
सदोक प्रोहत अर तेऊ संघै होरी प्रोहते ज़िम्मैंबारी थिई बिधाते पबित्र ज़ैगा गबोन पूज़ा-गाज़ा करने ज़िम्मैंबारी। हर धैल़ै दोत्ती अर उडै लागा त तेऊ साबै बेदी दी हूम बल़ीदान करनअ ज़िहअ बिधाता इज़राईली लै बधान थिअ दैनअ द। तिन्नां संघै हआ तै तिधी हमान, जदूतून अर होर खास-खास छ़ांटै दै बिधाते अटल़ झ़ूरीए गिहा बोली ज़ै-ज़ैकार करदै लागै दै। नर्शिंगै, छ़छ़ाल़ा अर होरी साज़-बाज़े ज़िम्मैंबारी बी थिई हमान अर जदूतूना का। तिंयां अर तिन्नें साथी करा तै तेता तेभै बाज़ी ज़ेभै खिम्भा भितरी बिधाते पूज़ा-गाज़ा हआ ती। दुआरे पहरै करने ज़िम्मैंबारी बी थिई जदूतून टोलीए।
तेखअ डेऊऐ सोभ आपणैं-आपणैं घअरा लै अर राज़अ दाबेद बी डेऊअ आपणैं घअरा लै फिरी कि सह आपणैं टबरा लै बर्गत दैए।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.