Kulvi Outer Seraji Bible
1 इतिहास 29
बिधाते भबना बणाणां लै भैंट
तेखअ बोलअ राज़ै दाबेदै सारी सभा लै, “आपणैं भबना बणाणां लै छ़ांटअ बिधाता मेरअ शोहरू सुलैमान, पर अह आसा अज़ी कज़ाण लान्हअ। अह काम करनअ निं सान आथी किल्हैकि अह निं मणछो आम घअर आथी लाअ द बणाईं अह आसा परमेशर बिधाता लै भबन। तैही आसा मंऐं बिधाते भबना बणाणां ज़ेतरअ हुंह करी सका त तेतरअ समान झाल़ी डाहअ द। सुन्नें च़िज़ा बणाणां लै सुन्नअ, च़ंदीए च़िज़ा बणाणां लै च़ंदी, कांस्से च़िज़ा बणाणां लै कांस्सअ, ज़िधी लोहअ लागणअ तेता लै आसा लोहअ डाहअ द आणी। किम्मती मणीं, अर संगमरमरे पात्थर बी आसा आणी डाहै दै। होर बी आसा डाही दी मंऐं खास्सी च़िज़ा झाल़ी। आपणीं ज़ैदाता मांझ़ै बी दैनअ मंऐं सुन्नअ-च़ंदी बिधाते भबना बणाणां लै किल्हैकि मेरअ दिल आसा बिधाते भबना बणाणां लै लागअ द। मंऐं दैनअ आपणअ कोई गैरा शौ कुंटल़ च़ोखअ सुन्नअ अर कोई दूई हज़ार छ़ह शौ कुंटल़ च़ोखी च़ंदी बिधाते भबने भित्ती महल़णा लै। ज़िधी कारीगीरा सुन्नअ लाणअ तेता लै सुन्नअ अर ज़िधी तिन्नां च़ंदीए कारीगीरी करनी तेता लै डाही मंऐं च़ंदी दैई। ऐबै बोला हुंह आझ़ तम्हां लै, ‘इहअ कुंण आसा ज़ुंण मुंह ज़ेही बिधाता लै खुल्है हाथै भैंट दैणीं च़ाहा?’”
तेखअ दैनै सोभी गोत्रा प्रैंदै दरोगै, इज़राईली सोभी टोलीए सैणैं, राज़ै अर राज़े शोहरूए ज़ैदात सभाल़णैं आल़ै दरोगै, सोभी ज़ैगा का राज़े पांच़, सैना दी खास-खास जोधै, दलपति अर सैनापति सोभी ज़ण्हैं ज़ेतरअ तिंयां दैई सका तै तत्त-दिला का बिधाता लै भैंट। बिधाते भबना च़िणना लै दैनअ तिन्नैं सोभी कोई एक हज़ार आठ शौ अश्शी कुंटल़ सुन्नअ, दस हज़ार सुन्नें सिक्कै, चअन हज़ार सात शौ पज़ाह कुंटल़ च़ंदी, छ़ह हज़ार सात शौ पज़ाह कुंटल़ कांस्सअ अर सैईंती हज़ार पांज़ शौ कुंटल़ लोहअ। एता का लाऊआ दैनै तिन्नैं खास किम्मती पात्थर, तिंयां डाहै तिन्नैं बिधाते भढारा बणाणां लै गर्शोनी टोलीए जेहीएला का सभाल़ी। राज़अ दाबेद अर तिधी सारी परज़ा हुऐ खास्सै खुशी कि बिधाते भबना बणाणां लै दैनी तिन्नैं सोभी कार-करिंदै खुल्है दिलै भैंट।
राज़ै दाबेदै किअ बिधातो शूकर
तेखअ किई राज़ै दाबेदै सारी परज़ा नदरी एही गिह बोली बिधाते ज़ै-ज़ैकार, “बिधाता, मुंह करनीं तेरी सदा ज़ै-ज़ैकार! तूह आसा सह परमेशर ज़हा मेरअ दाद-बाब इज़राईल मना त। हे बिधाता, तेरअ बल आसा महान अर तेरअ झ़ामण शुझिआ सारै भ्रमंडै। माहा राज़अ आसा तूह ई अर सोभी प्रैंदै आसा तेरअ ई राज़। तूह करा आपणैं बल अर ज़ोरा करै राज़। मणछा सेठ, बलबान अर मशूर करा तूह ई। ऐबै हे परमेशर बिधाता, हाम्हैं करा तेरअ शूकर अर हाम्हां करनीं तेरै महान नाओंए ज़ै-ज़ैकार।
“अज़ी बी निं मंऐं अर मेरी परज़ा ताल्है असली दी किछ़ बी दैनअ किल्हैकि ईंयां सोभ गल्ला आसा हाम्हां लै तंऐं ई दैनी दी। हाम्हैं दैनअ ताल्है सह ज़ुंण तेरअ ई थिअ। बिधाता, ताखा आसा थोघ हाम्हैं आसा ऐहा पृथूई दी थोल़ै धैल़े प्राहुंणैं अर परदेसी, ज़िहै म्हारै दाद-बाब थिऐ। म्हारी अमर आसा छ़ैल्ली ज़ेही ज़ुंण हेरा-हेरी उडा।
“म्हारै परमेशर बिधाता, हाम्हैं झाल़ी अह ज़ैदात तेरै भबना बणाणां लै ताकि तेरै पबित्र नाओं अदर होए। पर ईंयां सोभै च़िज़ा आसा हाम्हां लै तंऐं ई दैनी दी अर ईंयां आसा तेरी ई। मेरै परमेशर, मुखा आसा थोघ कि तूह परखा सोभिओ मन्न, तूह हआ तेऊ लै खुश ज़ुंण शुचअ-पाक्कअ रहा। मंऐं दैनी ईंयां च़िज़ा ताल्है तत्त-दिला का अर मंऐं भाल़अ कि ऐहा सभा मांझ़ै दैनी ताल्है सोभी मानदारी दी खुशी-खुशी भैंट।
“म्हारै दाद-बाब आबराम, इसहाक इज़राईले परमेशर बिधाता, तूह करै इहअ कि हाम्हैं लोल़ी सदा इहै ई खुल्है दिलै दैणैं आल़ै हुऐ अर इहै ई लोल़ी हाम्हैं ताल्है शुचै-पाक्कै रहै। मेरै शोहरू सुलैमाने मन्नैं पाऐ तूह एही कि सह तेरै बधाने सोभी हुकम अर तेते शिक्षा मने अर तेऊए लोल़ी तेरअ भबन बणाहुंअ ज़ेता लै मंऐं एतरी च़िज़ो इंतज़ाम आसा डाहअ द करी।”
तेखअ किअ राज़ै दाबेदै सारी सभा लै हुकम, “ऐबै करा तम्हैं सोभै आपणैं परमेशर बिधातो शूकर।” सभा दी बेठी दी सारी परज़ा किअ आपणैं दादा-बाबे परमेशर बिधातो शूकर। राज़ै अर सारी परज़ा टेक्कअ धरनीं उटै पल़ी बिधाते अदर करना लै माथअ।
सुलैमानो किअ भिई अभिषेक
दुजै धैल़ै किऐ इज़राईली बिधाता लै पशू मेल़-ज़ोल़े बल़ीदान संघा बांडअ आप्पू मांझ़ै शकन। एता का लाऊआ किऐ तिन्नैं एक हज़ार बल्द, एक हज़ार रिठ अर एक हज़ार होछ़ै गाभू बल़ीदान अर तिंयां सोभ किऐ तिन्नैं बेदी दी पठी हूम अर दाखे रसे अर्घै बी दैनै। तैहा धैल़ी तै सोभै खास्सै खुशी हुऐ दै तिन्नैं लाई तिधी बिधाता सेटा खाणां-पिणां लै धामा।
तेखअ किअ तिधी भिई बिधाते नाओंऐं राज़ै सुलैमानो अर सदोको अभिषेक कि सुलैमान आसा ऐबै दाबेदा ज़ैगा राज़अ अर सदोक आसा प्रोहत। इहअ करै बणअ सुलैमान आपणैं बाब राज़ै दाबेदे ज़ैगा राज़अ ज़ुंण राज़ बिधाता त दैनअ द अर सुलैमान हुअ राज़ करना लै सफल अर सारअ इज़राईल देश त तेऊ आपणैं बशै डाहअ द। सोभी कार-करिंदै, शूरबीर अर दाबेदे होरी सोभी शोहरू बी दैनी ज़बान कि तिंयां रहणैं राज़ै सुलैमानो साथ दैणा लै शुचै-पाक्कै। बिधाता बणाअं सुलैमान एक महान राज़अ, सोभ देश हआ तै रहैन कि राज़अ सुलैमान किहअ मशूर हुअ। इज़राईला दी निं इहअ मशूर राज़अ कोहै हुअ।
राज़ै दाबेदे मौत
ईशैईए शोहरू राज़ै दाबेदै किअ सारै इज़राईला प्रैंदै च़ाल़्ही साला तैणीं राज़। साता साला ती तेऊए राज़धानी हेब्रोन नगरी अर तेत्ती साला किअ तेऊ राज़धानी एरुशलेम नगरी का इज़राईला प्रैंदै राज़। राज़अ दाबेद ज़िऊअ खास्सी अमरा अर सह मूंअ खास्सी प्रोढी अमरा। आपणअ शोहरू सुलैमान त तेऊए ज़िऊंदी ज़िता तेऊ बाद इज़राईला प्रैंदै राज़अ बेठी गअ द। शुरू का खिरी तैणीं आसा राज़ै दाबेदे इतिहास शमूएल, नातान अर गाद गूरै लिखी डाहअ द। तेऊ लिखै दै इतिहासा पहल़ी करै लागा हाम्हां का थोघ कि दाबेद किहअ बलबान थिअ, तेऊ लै किज़ै-किज़ै हुअ अर तेऊए राज़ा दी इज़राईल देशै अर ओरी-पोरीए होरी देशै किहअ हाल थिअ।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.