Kulvi Outer Seraji Bible
1 इतिहास 7
इस्साकारे आद-लुआद
इस्साकारे तै च़ार शोहरू: तोला, पूआ, जशूब अर शिम्रोन।
तोला का हुऐ आजू छ़ह शोहरू: ऊज्जी, रपाया, जरीएल, जहमी, ईबसाम अर शमूएल। ईंयां तै आपणीं-आपणीं टोलीए मूल़ अर ईंयां तै आपणैं ज़मानै मशूर जोधै। ज़धू राज़ै दाबेदे ज़मानै गणांई हुई, तधू तै ईंयां बाई हज़ार छ़ह शौ।
ऊज्जीओ थिअ एक शोहरू तेऊ नाअं त ईजराह। ईजराहे तै आजू च़ार शोहरू: मिकाईल, ओबेदियो, जोएल अर इशिया। ईंयां तै आपणैं-आपणैं खिंबे मूल़। इनै ती खास्सी बेटल़ी आणी दी अर शोहरू-माठै बी थिऐ इने खास्सै। तैही निखल़ै इने आद-लुआदा मांझ़ै सैना लै छत्ती हज़ार मर्ध।
इस्साकार गोत्रे सोभी टोली मांझ़ै निखल़ै आपणैं-आपणैं खिंबा का पठी स्तास्सी हज़ार मर्ध ज़ुंण सैना दी डेऊई जुध सका तै करी।
बिन्यामीन अर दान गोत्रे आद-लुआद
बिन्यामीने तै चअन शोहरू: बेला, बेकेर अर जदीएल।
बेला का हुऐ आजू पांज़ शोहरू: एसबोन, ऊज्जी, उज्जीएल, जरमोत अर ईरा। ईंयां तै सोभै आपणीं-आपणीं टोलीए मूल़ मणछ अर ईंयां तै सोभै शूरबीर जोधै। इने आद-लुआदा मांझ़ै निखल़ै बाई हज़ार चऊती मर्ध ज़ुंण सैना दी डेऊई जुध सका तै करी।
बेकेरे तै नौ शोहरू: ज़मीरा, जोआश, एलीआजर, एलोनाई, ओमरी, जरमोत, अबियाह, अनातोत अर अलमेथ। इने आद-लुआदा मांझ़ै निखल़ै आपणैं-आपणैं खिंबा का पठी बिह हज़ार दूई शौ मर्ध ज़ुंण सैना दी डेऊई जुध सका तै करी।
जदीएलो त बिल्हान नाओं एक शोहरू हुअ द। बिल्हाने तै आजू सात शोहरू: जेऊश, बिन्यामीन, एहूद, कनानाह, जतान, तरशीश अर आहीशहार। ईंयां तै आपणीं-आपणीं टोलीए मूल़ अर सोभै तै मशूर जोधै। इने आद-लुआदा मांझ़ै निखल़ै पठी सतारा हज़ार दूई शौ मर्ध ज़ुंण सैना दी डेऊई जुध सका तै करी। ईरा थिअ शुप्पी अर हुप्पीओ बाब।
दानो त एक शोहरू तेऊ नाअं त हूशीम।
नप्तालीए आद-लुआद
नप्तालीए थिऐ च़ार शोहरू: जसेल, गूणी, ज़जार अर शलूम। दान अर नप्ताली थिऐ याकबे बेटल़ी बिल्हा का हुऐ दै।
जरदण पछ़मा बाखा बस्सै दै मनिश्शे आद-लुआद
मनिश्शे ती अराम देशा का एक बेटल़ी डाही दी, तैहा का हुऐ तेऊए दूई शोहरू अजरीएल अर माकीर ज़ुंण गलादो बाब थिअ। माकीरै दैनी बिन्यामीन गोत्रे शुप्पी-हुप्पी लै लाल़ी लोल़ी ज़सरी बैहण माकाहा थिई। माकीरो दुजअ शोहरू त सलफोद अर तेऊए ती सिधी पांज़ शोहरी।
माकीरै त माकाहा संघै बैह किअ द अर तैहा का हुऐ तेऊए दूई होर शोहरू तिन्नां नाअं डाहअ तिन्नैं परेश अर सरेश। परेशे तै दूई शोहरू ऊलाम अर रकेम। ऊलामो त एक शोहरू तेऊओ नाअं त बदान। ईंयां सोभै गण्हिंआं मनिश्शे पोचै माकीरे शोहरू गलादे आद-लुआदा संघै।
गलादे ती एक बैहण बी, तैहा नाअं त हामोलकेत अर तेसे तै चअन शोहरू: इशोद, एबीएजेर अर मेहला। शमीदे थिऐ च़ार शोहरू: आहीआन, शकेम, लिखी अर आनीअम।
एप्रैमे आद-लुआद
एप्रैमे आद-लुआद ती बाबा का आजू शोहरू पोस्ती दर पोस्ती एही: एप्रैम, शतूलेह, बेरेद, ताहात, एलीदा, ताहात, जाबाद अर शतूलेह। एप्रैमे तै शतूलेहा बाद दूई होर शोहरू एजेर अर एलाद, तिंयां पाऐ तै गात नगरीए लोगै मारी किल्हैकि तिंयां डेऊऐ तै तिन्नें डागै-चैणें हेल़्ही लुटदै। तिन्नें बाब एप्रैमा पल़अ त तिन्नां मरनै पिछ़ू खास्सै धैल़ै तैणीं शोग अर तेऊए भाई-बंध आऐ तै तेऊ चिंजदै अर हैअ दैंदै। तेखअ डेऊअ सह आपणीं बेटल़ी सेटा भिई संघा हुई सह सुंदी अर तैहा का हुअ एक होर शोहरू तेऊ नाअं डाहअ तिन्नैं बरीया1, कि तिन्नां लै पल़ी ती आफ़त।
एप्रैमे ती एक शोहरी बी, तैहा नाअं त शीरा। तैहा च़िणैं तै उंधलै बेथ-हारोन, उझलै बेथ-हारोन अर ऊजेन-शीरा नगरी फेर-फिरदै गहल़।
एप्रैमो त रेपा नाओं एक होर शोहरू तेऊए आद-लुआद ती बाबा का आजू शोहरू पोस्ती-दर पोस्ती एही: रेसेप, तेलाह, ताहान, लादान, अमीहूद, एलीशामा, नून, ज़ैहसू।
एप्रैमे आद-लुआद तै बेतेल सारै मुल्खै, पुर्बा बाखा नारान अर गज़ेर नगरी तैणीं बस्सै दै। ईंयां तै एथ सोभी गराऊंऐं, शकेम अर आया नगरी अर तेथ संघी सोभी गराऊंऐं बस्सै दै।
मनिश्शे गोत्रे आद-लुआद बस्सी बेथ-शान, तनाक, मगिदो, दोर अर तेता ओरी-पोरी सोभी गराऊंऐं।
ईंयां एतरी आसा तिंयां ज़ैगा ज़िधी इज़राईले शोहरू युसुफे आद-लुआद बस्सी।
आशेरे आद-लुआद
आशेरे तै च़ार शोहरू एक शोहरी: इमना, इशबा, ईशबी अर बरीया। शोहरी नाअं त सेराह।
बरीये थिऐ दूई शोहरू हुऐ दै: हेबेर अर मोल्कीएल ज़ुंण बर्जातो बाब थिअ।
हेबेरे तै चअन शोहरू अर एक शोहरी हुई दी: जपलेत, शोमेर, होताम अर तिन्नें बैहण शूआ।
जपलेते बी थिऐ चअन शोहरू हुऐ दै: पासाक, बिमहाल अर अशबात।
जपलेते कान्हैं भाई शमेरे थिऐ च़ार शोहरू: आही, रोहगा, जेहूबा अर अराम।
हेबेरे शोहरू हेलेमे2 बी थिऐ च़ार शोहरू हुऐ दै: सोपाह, इमना, शेलेश अर अमाल।
सोपाहे शोहरू आसा तै: सूह, हरनेपर, शूआल़, बेरी, इमरा, बेसेर, होद, शामा, शिलशा, इतरान अर बेरा।
जतेरे शोहरू आसा तै: यपुन्नें, पिसपा अर अरा। ऊले शोहरू आसा तै: आराह, हनिएल अर रिसया।
ईंयां सोभै थिऐ आशेरे आजू आद-लुआद। तिंयां थिऐ आपणीं-आपणीं टोली अर खिंबे सैणैं, मूल़ अर मशूर जोधै। आशेरे गोत्रा का निखल़ै तै पठी छब्बी हज़ार मर्ध ज़ुंण सैना दी जुध सका तै करी।
Source notes (2)
- Footnote बरीया इब्रानी बोली दी मतलब आफ़त
- Footnote हेलेमे होताम
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.