Kulvi Outer Seraji Bible
1 इतिहास 9
सोभै इज़राईली तै तिन्नें खिंबे साबै इज़राईले राज़ेए इतिहासे कताबा दी लिखी डाहै दै।
बाबेल देशे गलामी का ज़ुंण बापस फिरै
यहूदा मुल्खे लोग तै बाबेल देशे गलामी दी डेऊऐ दै किल्हैकि तिंयां निं बिधाता लै शुचै-पाक्कै रहै आथी तै। ज़ुंण इज़राईली गलामी का फिरी बापस एछी आपणीं-आपणीं नगरी बस्सै, तिन्नां संघै आऐ प्रोहत, थोल़ै लेबी गोत्रे लोग अर बिधाते भबनै च़ाकरी करनै आल़ै। यहूदा, बिन्यामीन, एप्रैम अर मनिश्शे गोत्रा मांझ़ै डेऊऐ थोल़ै एरुशलेम नगरी लै।
यहूदा गोत्रा का आऐ पठी छ़ह शौ नबै ज़ण्हैं आपणैं टांडै-टबरा संघी एरुशलेम नगरी लै फिरी।
यहूदे शोहरू फिरिसे आद-लुआदा मांझ़ै, तिन्नों सैणअ त अमीहूदो शोहरू अर ओमरीओ पोचअ ऊताई। इम्री अर बैनी थिऐ तेऊए दाद-बाब।
यहूदे शोहरू शेलाहे आद-लुआद, तिन्नों सैणअ आसा सैणअ त तिन्नें टबरा मांझ़ै सोभी का बडअ असाया।
यहूदे शोहरू जेराहे आद-लुआद, तिन्नें टोलीओ सैणअ त जूएल।
बिन्यामीन गोत्रा का ज़ुंण बाबेल देशे गलामी का फिरी आऐ तिन्नां मांझ़ै बस्सै ईंयां एरुशलेम:
मशूलामो शोहरू सल्लू ज़ुंण होदाबयो पोचअ अर हसोनो पल़पोचअ थिअ।
जेरोहामो शोहरू इबनिजा,
ऊज्जीओ शोहरू मिकरीओ पोचअ एला,
शपताहो शोहरू रूएलो पोचअ अर इबनीजो पल़पोचअ मशूलाम।
ईंयां तै एऊ गोत्रा का इने भाई-बंधा संघी नौ शौ छफुंजा ज़ण्हैं आपणीं-आपणीं टोली अर खिंबे सैणैं ज़ुंण एरुशलेम नगरी बस्सै।
प्रोहत ज़ुंण एरुशलेम नगरी बस्सै
एरुशलेम नगरी ज़ुंण प्रोहत एरुशलेम नगरी बस्सै:
जदाया, जेहोयारीब, जाकीन,
हिलकियो शोहरू अजर्याह ज़ुंण एरुशलेम बिधाते भबनै कारदार ज़ुंण सोभिओ सैणअ हआ।
एऊए दाद-बाब थिऐ मशूलाम1, सदोक, मरयोत अर आहीतूब।
जेरोहामो शोहरू अदाया। एऊए दाद-बाब थिऐ पशहूर तेऊओ बाब मलकिजा,
तेऊओ बाब मासाई, तेऊओ बाब आदीएल, तेऊओ बाब जहजेरा, तेऊओ बाब त मशूलाम, तेऊओ मेशलमीत अर तेऊओ बाब थिअ इमेर।
प्रोहत ज़ुंण आपणैं-आपणैं खिंबे सैणैं थिऐ, तिंयां थिऐ पठी एक हज़ार सात शौ शाठ ज़ण्हैं। तिंयां ज़ाणा तै तिन्नां सोभी कामां करी कि बिधाते भबनै किहअ-किहअ लागा करनअ।
लेबी गोत्रा मांझ़ै होर ज़ुंण एरुशलेम बस्सै
एरुशलेम नगरी लेबी गोत्रा मांझ़ै ज़ुंण होर बस्सै तिंयां थिऐ:
मरारी टोली का हशूबो शोहरू, अज्रीकामो पोचअ अर हशाबियो पल़पोचअ शमयाह।
बकबाकर, हेरेश अर गालाल अर असापे खिंबा का मिको शोहरू अर ज़िक्रीओ पोचअ मतानियाह।
शमयाहो शोहरू, गालालो पोचअ अर जदूतूनो पोचअ ओबेदियो,
आसाहो शोहरू, एलकानो पोचअ बरेक्याह ज़ुंण नतपाह नगरीए मुल्खै गराऊंआं दै थिअ बस्सअ द।
बिधाते भबने पहरी ज़ुंण एरुशलेम नगरी बस्सै
बिधाते भबने पहरी ज़ुंण एरुशलेम नगरी आपणैं-आपणैं टांडै-टबरा संघी बस्सै तिंयां थिऐ: शलूम, अकूब, तलमोन अर आहीमान। शलूम थिअ इना सोभी प्रैंदै सैणअ। तिन्नें टोली का रहै पोस्ती दर-पोस्ती नगरीए पुर्बा बाखा प्रऊल़ीए पहरी ज़ेसी राज़अ बिधाते भबना लै एछा त। तिन्नें दाद-बाब हआ तै तैहा प्रऊल़ीए पहरी ज़िधी लेबीए डेरै हआ तै।
कोरो शोहरू, एबियासापो पोचअ शलूम अर तेऊ संघै तेऊए कोराह टोलीए भाई-बंधा लै थिई बिधाते खिम्भा बागै प्रऊल़ीए पहरै करने ज़िम्मैंबारी ज़िहै तिन्नें दाद-बाब बिधाते खिम्भ अर प्रऊल़ीए पहरी हआ तै। एकी ज़मानै हआ त एलीआजरो शोहरू पिनहास तिन्नों सैणअ। तेऊ संघै थिअ बिधाता।
मशेलमियो शोहरू जकर्या बी थिअ बिधाते मेल़-ज़ोल़े खिम्भे प्रऊल़ीओ पहरी।
प्रऊल़ी पहरी तै ईंयां पठी दूई शौ बारा ज़ण्हैं शुचै-पाक्कै मणछ छ़ांटै दै। इने नाअं तै इने टोली अर गराऊंए साबै लिखी डाहै दै ज़िधी-ज़िधी ईंयां थिऐ बस्सै दै। अह ज़िम्मैंबारी ती तिन्नां लै राज़ै दाबेद अर बिधाते गूर शमूएलै दैनी दी। ईंयां अर इने आजू आद-लुआद रहै पोस्ती दर पोस्ती बारी-बारी बिधाते भबने प्रऊल़ी पहरी। प्रऊल़ी थिई पुर्बा, पछ़मा, उतरा अर दखण च़ऊ दिशा बाखा अर हरेकी प्रऊल़ी दी हआ तै एक-एक प्रधान पहरी ज़ुंण कबल्लै तिधी रहा तै। तिन्नें भाई-बंध ज़ुंण गराऊंऐं रहा तै, तिन्नां लागा त साता-साता धैल़ी तैणीं तिन्नां संघै बारी-बारी प्रऊल़ीए पहरै लै एछणअ। तिंयां च़ार प्रधान पहरी तै लेबी मांझ़ा का शुचै-पाक्कै मणछ अर तिन्नां लै थिई होरी पहरीए अर बिधाते भबने भढारे पहरै करने ज़िम्मैंबारी सभाल़ी दी। तिंयां काटा तै बिधाते भबना फेर राच किल्हैकि राची पहरै करने अर दोत्ती प्रऊल़ी घुआल़णे ज़िम्मैंबारी थिई तिन्नें।
होरी लेबीए ज़िम्मैंबारी
होरी लेबी का थिई बिधाते भबनै पूज़ा-गाज़ा करने भांडे ज़िम्मैंबारी सभाल़ी दी। तिंयां काढा तै तेता गणी करै बागा लै अर तिहै ई डाहा तै गणी करै भढारै। तिन्नां मांझ़ै थिई कोई लै बिधाते भबनै पूज़ा लै लागणै आल़ी च़िज़े ज़िम्मैंबारी सभाल़ी दी ज़िहअ कि पिठअ, दाखो रस, जैतूनो तेल, धूप अर होर खुशबूदार मसालै बगैरा। पर खुशबूदार मसालै राल़णैंओ काम करा तै प्रोहत आप्पै।
एक त मतियाह नाओं लेबी, सह थिअ कोराह टोली का शलूमो ज़ेठअ शोहरू। सह थिअ भोज़ना बणाणें आल़ै प्रैंदै सैणअ डाहअ द। सह बी थिअ शुचअ-पाक्कअ मणछ। तिन्नें भाई-बंध कहाती टोली आल़ै लै थिई हर बशैघे धैल़ी लै रोट-लुच़ी बणाणें ज़िम्मैंबारी।
लेबी मांझ़ै ती कोई लै गिहा बोल्दै अर साज़-बाज़ बाज़णें ज़िम्मैंबारी सभाल़ी दी इने टोलीए सैणैं रहा तै बिधाते भबनै अर इना का निं होर काम कराऊंदै तै, किल्हैकि ईंयां रहा तै धैल़-राच एऊ ई कामां लागी।
ईंयां सोभै थिऐ लेबी गोत्रा का अर ईंयां आसा आपणीं-आपणीं पोस्ती दी आपणीं टोलीए सैणैं अर ईंयां तै एरुशलेम बस्सै दै।
राज़ै शाऊले दाद-बाब अर आजू आद-लुआद
(1 इतिहास 8:29-38)
जेइलै बसाऊई आपणैं शोहरूए नाओंऐं गबोन नगरी संघा बस्सअ तिधी। तेऊए लाल़ी नाअं थिअ माकाहा। तेऊओ ज़ेठअ शोहरू त अबदोन अर तेऊए होर शोहरू तै सूर, कीश, बाल, नेरी, नादाब, गदोर, आहीऊ, जकर्या अर मिकलोत ज़ुंण शमामो बाब थिअ। तिन्नें आद-लुआदा मांझ़ै बी तै कई एरुशलेम नगरी तिन्नें खिंबे होरी टोली संघै बस्सै दै।
नेरीओ शोहरू त कीश अर कीशे शोहरू राज़ै शाऊले तै च़ार शोहरू: जोनातान, मोलकीशूआ, अबीनादाब अर इशबशेत। जोनातान थिअ मोपीबशेतो बाब अर तेऊओ शोहरू त आजू मिका। मिके थिऐ च़ार शोहरू हुऐ दै: पिथोन, मोलक, ताहरी अर अहाज। अहाज त जाराहो बाब अर तेऊए तै आजू चअन शोहरू: एलीमेथ, अज़मबेथ अर ज़िम्री। ज़िम्रीओ शोहरू त मोसा मोसा का हुअ बिनी, बिनी का हुअ रपाया अर रपाया का हुअ एलासा अर एलासो शोहरू त अजेल।
अजेले तै छ़ह शोहरू: अज्रीकाम, बोकरू, इशमाईल, शराया, ओबेदियो अर हनान।
Source notes (1)
- Footnote मशूलाम मशूलाम त हिलकियो बाब
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.