लुआह

लुआह

इज़राईलीओ मिसर देशा का कनान देशा लै निखल़णअ

भेत

लिखणैं आल़अ: मोसा

सन: 1446 का 1405 ईसा आजी

ऐहा कताबा नाअं “लुआह” आसा यूनानी बोली का निखल़अ द, एतो मतलब हआ बागै निखल़णअ। ऐहा कताबा दी लागा हाम्हां का थोघ कि बिधाता आपणैं लोग किहअ करै छ़ड़ैऊऐ मिसर देशे गलामी का, संघा काढै तिंयां मिसर देशा का बागै।

ऐहा कताबा दी लागा हाम्हां का थोघ कि बिधाता आसा पबित्र शुचअ परमेशर अर सह करा आपणैं बणाऐं दै संसारै राज़ अर तेते फाज़त अर ज़ुंण बिधाता करनअ च़ाहा, तेता निं कोहै रोक्‍की सकदअ।

ऐहा कताबा सका चिई बाखा बांडी। पैहलअ भाग (1-13) ज़िधी इज़राईली मणछ मिसर देशे माहा राज़ै गलाम बणाऐं। बिधाता शूणीं तिन्‍नें लेर-पकार अर तेखअ टांकअ तेऊ मोसा तिन्‍नां आज़ाद करना लै। मोसा थिअ इज़राईली ई मांझ़ै पर सह थिअ मिसर देशे राज़े देई गोद लई धाचअ द।

मोसा बोलअ मिसर देशे माहा राज़ै लै इहअ कि इज़राईली मणछा कर गलामी का आज़ाद पर राज़ै निं तेऊए गल्‍ल मनी। तेखअ बझ़ैल़ी बिधाता मोसा करै मिसर देशे लोगा लै “दस आफ़ता पाणै।” खिरी छ़ुटी राज़ै का छ़ाड़ संघा दैनअ तेऊ इज़राईली मणछा मिसर देशा का डेऊणैं।

कताबे दुजै भागा (14-18) दी लागा हाम्हां का इज़राईलीए सीनाई धारा पुजणैं अर तिधी हुई-बिति दी गल्‍ले बारै थोघ। मिसर देशे माहा राज़ै फिरी एही सोर कि इज़राईली निं गलामी का आज़ाद करनै अर सह आअ आपणीं सैना लई तिन्‍नां पिछ़ू कि तिन्‍नां ढाके। इज़राईली तै शुन्‍नैं रेगीस्तानै हांढदै लागै दै ज़िधी खाणां झुटणा लै किछ़ निं भेटदअ, पर बिधाता किअ तिन्‍नां लै तेतो बी इंतज़ाम।

खिरी पाऐ तिन्‍नैं सीनाई धारा फेर डेरै, (19-40) तिधी हुअ बिधाता मोसा लै प्रगट। बिधाता खोज़अ मोसा का पूज़ा, च़ाकरी, बल़ीदान अर ज़िन्दगी दी हर गल्‍ला लै बधान संघा दैनअ इहअ हुकम कि मुल्है बणाऐं पबित्र खिम्भ। तेखअ पबित्र खिम्भे सोभै च़िज़ा, ज़िहअ कि बेदी, धूप बेदी अर प्रोहते झिकल़ै किहै लोल़ी हुऐ तेतो रूप बी खोज़अ तिधी। पर इधी लागा हाम्हां का इहअ बी थोघ कि इज़राईली किई सुन्‍नेंओ बाछ़ू बणाईं तेते पूज़ा, इहअ करै पेठै तिंयां परमेशरो हुकम छ़ाडी कबाता।

“हुंह आसा थारअ परमेशर सह बिधाता ज़ुंणी तम्हैं मिसर देशे गलामी का आणै छ़ड़ैऊई। मुंह छ़ाडी निं कहा होरी आपणअ परमेशर मनी।”

(20:2,3)

कताबे बांड

इज़राईली पल़ै गलामी दी 1:1-22

मोसो ज़ल्म अर ज़ुआनी 2:1-25

बिधाता छ़ाडअ मोसा राज़ै लै बोल्दअ 3:1—6:30

मिसर देशे लोगा लै पल़ी आफ़त 7:1—10:29

खिरी पल़ी घोर आफ़त अर इज़राईली लै ऊवार्णैओ थैर 11:1—13:22

इज़राईली पुजै लाल समुंदरे बाढै 14:1—15:21

मोसा पजैल़ै इज़राईली मणछ सीनाई धारा 15:22—18:27

बिधाता दैनै मोसा लै दस हुकम अर होर बधान 19:1—24:18

पबित्र खिम्भ, करारो मणशू अर होर समान 25:1—27:21

प्रोहत, बल़ीदान अर बशैघे धैल़ी लै बधान 28:1—31:18

इज़राईली बणाअं सुन्‍नेंओ बाछ़ू 32:1-35

बिधाता किअ इज़राईली लै बाहिदअ संघै दैनै होर बधान 33:1—35:3

पबित्र खिम्भ अर प्रोहते झिकल़ै लै भैंट 35:4—36:7

पबित्र खिम्भे कारीगीरी 36:8—38:31

प्रोहते झिकल़ै 39:1-31

पबित्र खिम्भ स्तापणअ 39:32—40:38