Kulvi Outer Seraji Bible
लुआह 39
प्रोहते झिकल़ै
(लुआह 28:1-14)
ज़िहअ बिधाता मोसा लै हुकम किअ त, तिन्नैं बणाऐं तेखअ हारणा लै पबित्र खिम्भा भितरी प्रोहते कामां करना लै निली, बैंज़णीं अर लाला रांगे ऊने बूणती पाई बाछे झिकल़ै।
माहा प्रोहते सदरी
(लुआह 28:2-7)
माहा प्रोहते सदरी बणाईं तेऊ बाछे झिकल़ै करै। तेता सज़ाऊंणा लै बणाईं सुन्नअ टिप्पी करै धागै ज़ेही भींन तारा संघा बूणी तिंयां निली, बैंज़णीं, लाला रांगे भींन ऊने धागै संघै सदरीए बूणती दी। सदरीए आगलै-पिछ़लै पाल्लै ज़ोल़णा लै लाई दोहरी कान्हा बूणी करै फिथी अर तेही ई बणाईं निली, बैंज़णीं अर लाला रांगे ऊने धागै जैंदरी सुन्नें भींन धागै ज़ेही तारा संघा बूणी कुछी बान्हणां लै बाछे गाची। सुन्नें दूई खानै बणाईं पाई तेथ काटी सुलैमानी किम्मती पात्थरे मणीं संघा छ़ापै तिन्नां दुही मणीं दी इज़राईले बारा शोहरूए नाअं तिन्नें पैईदा हणें साबै ज़ेठै का कान्हैं तैणीं छ़ह एकी दी अर छ़ह दुजी मणीं दी। संघा लाई तिंयां सुलैमानी किम्मती पात्थरे मणीं सदरीए कान्हा फिथी दी, ताकि बिधाता आपणैं इज़राईली मणछा कबल्लअ आद डाहे। ईंयां सोभै च़िज़ा बणाईं ज़ाथी तेही ई ज़िहअ बिधाता मोसा लै हुकम किअ त।
च़ौकी
(लुआह 28:15-30)
ज़ेही बाछे झिकल़ै करै निली, बैंज़णीं, लाल रांगा करै रांगी दी ऊना अर सुन्नें धागै बूणी करै सदरी बणाईं ती, तेखअ बणाईं माहा प्रोहता लै तिहै ई झिकल़ै करै नसाफ करने च़ौकी बी। सह बणाईं दोहरी बाखा एक बैथ लाम्मी अर एक बैथ बिरली। तेथ पाई तिन्नैं च़ार धारी, पैहली धारी दी लाऐ मानिक नाओं लाल किम्मती पात्थरो नघ, पुखराज़ नाओं हरअ किम्मती नघ, पेरोज़ नाओं पिंऊंल़ै किम्मती पात्थरो नघ। दुजी धारी दी लाऐ मरकत नाओं शेतअ किम्मती नघ, नीलमणीं अर हीरै, चिऊथी धारी दी लाई लशम नाओंए लाल-नरंगी रांगे किम्मती मणीं, शेतै-भौंरै रांगे सुलैमानी मणीं अर नीलम नाओं घणैं बैंज़णीं रंगो किम्मती नघ, च़ौथी धारी दी पेरोज़ नाओं निलै-हरै रंगो नघ, सुलैमानी किम्मती पात्थरो नघ अर यशब नाओं निलै रंगो नघ। तेखअ छ़ापै तिन्नां किम्मती पात्थरा दी इज़राईले बारा गोत्रे नाअं तिन्नें पैईदा हणें साबै बडै का होछ़ै तैणीं बाढै।
च़ौकी दी लाऐ तिन्नैं उपरा बाखा दोहरै कूणैं दी च़ोखै सुन्नें दूई सनांगणूं, संघा लाई तेता का सुन्नें शांघल़ अर उपर चैल़ी सह दोहरी कान्हा सदरी दी लागी दी फिथी दी पिड्डी। तेखअ बणाऐं तिन्नैं च़ौकी दी हेठै भितरी सदरी बाखा दोहरै कूणैं दी लाणा लै सुन्नें दूई सनांगणूं होर, संघा बणाऐं तिन्नैं दूई होर सनांगणूं अर तिंयां चैल़ै गाची प्रैंदै कान्हे फिथी दी लाऐ दै सनांगणूंए सिधा सदरी दी। तेखअ बान्हीं सह च़ौकी हेठै लागै दै सनांगणूं का दोहरी बाखा निली डोरी करै गाची प्रैंदै सदरी दी लागै दै तिन्नां सनांगणूं दी, ताकि सह च़ौकी एकी ज़ैगा पिड्डी रहे टेक्की। ईंयां गल्ला बणाईं तिन्नें तेही ई ज़िहअ बिधाता मोसा लै हुकम किअ त।
होरी प्रोहते झिकल़ै
(लुआह 28:31-43)
तेखअ बणाईं निली रांगे ऊना करै एक सदरी अर तेथ बणाअं गअल़, तेऊ गअल़ा फेर पाई ज़ाल़ीदार बूणती ताकि सह धेल़्हिए निं। गल़े ज़ाल़ीदार घेरै हेठै लाऐ तिन्नैं निलै, बैंज़णीं अर लाला रांगे झिकल़े नारदाणैं ज़िहै फूल सारै घेरै दी, संघा लाऐ तिन्नां सोभी फूला जैंदरी एक-एक च़ोखै सुन्नें शल़्हुम्हणूं। अह च़ोल़अ बणाअं हारणा लै ताकि सह तेता बान्हीं पबित्र खिम्भा भितरी प्रोहतो काम करे, अर सह बणाअं तिहअ ई ज़िहअ बिधाता मोसा लै हुकम किअ त।
हारण अर तेऊए शोहरू लै बणाऐं सारै झिकल़ै बाछे झिकल़ै दी निली, बैंज़णीं अर लाला रांगे ऊने धागै करै बूणती पाई। मतलब च़ोल़ै, साफै, टोपी, ज़ांघिऐ अर गाची बणाईं राछ़ा दी बूणी करै तेही ई, ज़िहअ बिधाता मोसा लै हुकम किअ त।
तेखअ बणाअं च़ोखै सुन्नेंओ एक बिंदू तेथ छ़ापअ टिप्पी करै इहअ, “बिधाता लै पबित्र।” सह बान्हअ निली डोरी करै हारणे साफै दी अर सह बिंदू लागअ मांझ़ा-मांझ़ी साफै दी आजू बाखा माथै प्रैंदै। ईंयां सोभै च़िज़ा बणाईं तिन्नैं तेही ई ज़िहअ बिधाता मोसा लै हुकम किअ त।
पबित्र खिम्भ छ़ेक्कअ बणाईं
(लुआह 35:10-19)
इहअ करै किअ इज़राईली मेल़-ज़ोल़े खिम्भा बणाणेंओ काम पूरअ ज़िहअ-ज़िहअ बणाणां लै बिधाता मोसा का हुकम किअ त। तेखअ आणअ तिन्नैं मेल़-ज़ोल़ो खिम्भ अर तेतो सारअ समान मोसा सेटा लै, मतलब तेते कणिच़ू, फल़्है, शौर, थाम्ह, खुर्शी, लाला रांगा करै रांगी दी गाभूए खाला करै बणाईं दी खिम्भा प्रैंदे च़ादर अर बाकरे खाला करै बणाईं दी दुजी च़ादर, खिम्भा भितरी खल़वाल़ो पल्दअ, करारो मणशू अर तेते लोहल़ी, पापो प्राश्त करनैओ ढक्कण, पलग, भोज़न अर तेता प्रैंदो सारअ समान, प्रैश्शै करना लै च़ोखै सुन्नेंओ सदीअ, तेतो सारअ समान अर तेल, सुन्नैं करै महल़ी दी धूप बेदी, अभिषेक करनैओ तेल अर खुशबूदार धूप, पबित्र खिम्भे प्रऊल़ी लै बणाअं द पल्दअ, हूम बल़ी करना लै कांस्सै करै महल़ी दी बेदी, तेते ज़ाल़ीदार झ़ालर, तैहा बेदी च़कणें लोहल़ी अर बेदीओ सारअ समान, खिम्भा आजू लै बडअ कांस्सैओ कल़ाह अर तेतो बठैल़णू, थाम्ह अर तेते खुर्शी संघी ताटी फेर लाणा लै पल्दै, खुंढी अर मेल़-ज़ोल़े खिम्भे कामैं एछणैं आल़अ सारअ समान अर खिरी आणै हारण अर तेऊए शोहरू लै पबित्र खिम्भा दी प्रोहते कामां करना लै बूणती पाऐ दै झिकल़ै। ज़ांऊं मोसा सारै कामें ज़ाच़-भाल़ किई, तेऊ भाल़अ कि इज़राईली किअ सारअ काम ठीक तिहअ ई ज़िहअ बिधाता हुकम किअ त, तेखअ दैनी तेऊ तिन्नां लै शाबाश दैई बर्गत।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.