Kulvi Outer Seraji Bible
लुआह 40
पबित्र खिम्भा खल़ै करने साईत
तेखअ बोलअ बिधाता मोसा लै इहअ, “तूह करै मेरै मेल़-ज़ोल़े खिम्भा साज़ै च़ैत्रै नऊंऐं संबते धैल़ी खल़अ। तेखअ डाहै करारो मणशू बधान लिखी दी शिला संघी खिम्भे मांझ़लै पल्दे नील़ै। तेखअ आणै पबित्र खिम्भा भितरा लै पलग संघा डाहै तेथ प्रैंदै तिन्नां सोभी समाना सज़ाऊई ज़ुंण तेता लै आसा बणाऐं दै। सदीअ भितरा लै आणी ज़ाल़ै तेथ प्रैंदै दीऐ। करारे मणशू सम्हनै डाहै धूपा ज़ाल़णे बेदी, संघा लाऐ पबित्र खिम्भे प्रऊल़ीए पल्दै। मेल़-ज़ोल़े खिम्भे प्रऊल़ी आजू डाहै हूम बल़ी करने बेदी। संघा डाहै कांस्सैओ बडअ कल़ाह मेल़-ज़ोल़े खिम्भे प्रऊल़ी आजू अर हूम बेदी पिछ़ू मांझ़ै अर तेता डाहै पाणीं करै भरी।
“तेखअ करै ताटी फेर-फिरदै बिणग खल़ै अर ताटी भितरी एछणें प्रऊल़ी दी लाऐ पल्दै। अभिषेक करनैओ तेल मल़ी करै खिम्भ अर तेते सोभी समानो अभिषेक, इहअ करै हणैं तिंयां सोभै पबित्र। हूम बल़ी करने बेदीओ बी करै तेते सोभी समाना संघी अभिषेक ताकि सह पबित्र होए। बडै कल़ाह करै तेते बठैल़णू संघी अभिषेक करी पबित्र।
“तेखअ आणै हारण अर तेऊए शोहरू मेल़-ज़ोल़े खिम्भे प्रऊल़ी आजू, संघा न्हैऊऐ तिन्नां तिधी। तेखअ बन्हैऊंऐं हारणा लै माहा प्रोहते पबित्र झिकल़ै, संघा करै तेऊ जैतूने तेला करै अभिषेक करी पबित्र, ताकि सह मेरअ प्रोहतो काम सभाल़ी सके। हारणे सोभी शोहरू का बी बन्हैऊंऐं प्रोहते च़ोल़ै, तेखअ ज़िहअ तंऐं हारणो अभिषेक किअ, तिहअ ई करै तिन्नों बी अभिषेक, सह हणअ ऐहा गल्लो नछ़ैण कि ईंयां अर इने आद-लुआद हणीं पोस्ती दर पोस्ती मेरै प्रोहत।”
मेल़ ज़ोल़ो खिम्भ स्तापणअ
ज़िहअ बिधाता मोसा लै बोलअ, तेऊ किअ तिहअ ई। दुजी साला साज़ै च़ैत्रै किअ तेऊ खिम्भ खल़अ। खिम्भे थाम्ह किऐ खुर्शी प्रैंदै खल़ै संघा बणाईं फल़्है खल़ै करी भीत अर तेथ प्रैंदै लाऐ शौर, तेता प्रैंदै पाऐ तिंयां बडै-बडै शल़ैप्पै अर तेथ प्रैंदै पाई गाभू अर बाकरीए खाला करै बणाईं दी च़ादरा। बधान लिखी दी तिंयां दूई शिला डाही करारे मणशू भितरी अर मणशू दी लोहल़ी लाई करै डाहअ तेथ प्रैंदै पापो प्राश्त करनैओ ढक्कण। तेखअ आणअ करारो मणशू पबित्र खिम्भा भितरा लै संघा डाहअ खास पबित्र ज़ैगा लागै दै पल्दै पिछ़ू तेते नील़ै। ईंयां गल्ला किई तिन्नैं तेही ई ज़िहअ बिधाता मोसा लै हुकम किअ त।
मेल़-ज़ोल़े खिम्भा भितरी मांझ़लै पल्दै बागै बशैल़अ उतर दिशा बाखा पलग, तेता प्रैंदै डाहअ भोज़न सज़ाऊई, ज़िहअ बिधाता बोलअ त तिहअ ई। तेखअ डाहअ मेल़-ज़ोल़े खिम्भा भितरी दखणा बाखा भित्तीए नील़ै सदीअ, तेखअ ज़ाल़ै तेथ प्रैंदै बिधाता सम्हनै दीऐ। सुन्नैं करै महल़ी दी धूप बेदी बशैल़ी मेल़-ज़ोल़े खिम्भा भितरी मांझ़लै पल्दै सम्हनै, तेखअ ज़ाल़अ तेथ प्रैंदै खुशबूदार धूप। ईंयां सोभै च़िज़ा किई तिन्नैं तेही ई ज़िहअ बिधाता मोसा का हुकम किअ त।
तेखअ लाऐ तिन्नैं पबित्र खिम्भे प्रऊल़ीए पल्दै। तेखअ डाही तिन्नैं बिधाते मेल़-ज़ोल़े खिम्भा आजू हूम बल़ी करने बेदी, संघा किअ तिधी एक पशू बल़ीदान अर नाज़ा करै बी किअ हूम। तेखअ डाहअ सह बडअ कल़ाह मेल़-ज़ोल़े खिम्भे प्रऊल़ी आजू अर हूम बल़ी करने बेदी पिछ़ू पाणीं करै भरी। तेखअ धोऐ तिधी मोसा, हारण अर तेऊए शोहरू हाथ खूर। तधा बाद ज़ेभै-ज़ेभै तिंयां मेल़-ज़ोल़े खिम्भा भितरा लै डेओआ तै, तेभै लआ तै तिंयां तेऊ कल़ाहे पाणीं करै आपणैं हाथ-खूर धोई, ज़िहअ बिधाता तिन्नां लै मोसा का हुकम थिअ किअ द। तेखअ बझ़ैल़ै मोसा पबित्र खिम्भे ताटी फेर बिणग खल़ै करनै, संघा लाऐ तेथ फेर-फिरदै पल्दै अर खिरी लाऐ ताटी भितरी एछणें प्रऊल़ी दी पल्दै।
पबित्र खिम्भा दी बिधातो धुप्पअ
ज़ांऊं मेल़-ज़ोल़ो खिम्भ खल़अ करी तेतो सारअ काम हई मुक्कअ, हेरा-हेरी घोर्हुऐ तेथ प्रैंदै घणैं बादल़ अर पबित्र खिम्भा का लागअ बिधाता का धुप्पै ज़िहअ झ़ामण।1 बादल़ रहअ मेल़-ज़ोल़े खिम्भा प्रैंदै घोर्हुई अर खिम्भा का लागअ इहअ धुप्पै ज़िहअ झ़ामण अर बिज़ल़ीए च़पराल़ै कि मोसा निं खिम्भा भितरा लै डेऊई सकअ। तधा पोर्ही हुअ इहअ कि ज़ेभै सह बादल़ पबित्र खिम्भा फेरा का उझै डेओआ त, तेखअ लागा तै इज़राईली खिम्भ खोल्ही तैहा ज़ैगा का आजू हांढदै। ज़ै बादल़ पबित्र खिम्भा फेर घोर्हुई रहअ, तै रहा तै तिंयां तेभै तैणीं तिधी डेरअ पाई न्हैल़ै लागी ज़ेभै तैणीं सह बादल़ उझै निं डेऊअ। इज़राईली ज़िधा लै बी हांढदै लागा तै बिधाता रहा त तिन्नां संघै। हर धैल़ै एछा त पबित्र खिम्भा फेर बिधातो बादल़ अर राची शुझिआ त इहअ कि बिधाता का आसा बादल़ा जैंदरी आग लागी दी।
Source notes (1)
- Cross-reference 1 राज़. 8:10,11; ईशा. 6:4; एज. 43:4,5; प्रका. 15:8
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.