Kulvi Outer Seraji Bible
लुआह 38
हूम बल़ी करने बेदी
(लुआह 27:1-8)
बसलेलै बणाईं किक्करे काठा करै हूम बल़ी करने बेदी। सह बणाईं पांज़ हाथ लाम्मी अर पांज़ हाथ बिरली च़कोर अर चअन हाथ बणाईं सह उछ़टी। तेते च़ऊ कूणैं दी काढै तेते ई काठा का बाछ़ू ज़िहै शींग संघा महल़ी सह सारी बेदी कांस्सै करै। बेदीए तात्तै छ़ारा काढणें भांडै, पल़ैंज़ै, छ़ल़ा, गेठी अर बेदीए सारै समान बणाऐं कांस्से। बेदीए आधा-आधी बणाईं फेर-फिरदी कांस्से एक ज़ाल़ीदार झ़ालर। तैहा झ़ालरा हेठा लै बणाऐं बेदीए दोहरी बाखा च़ऊ कूणैं लाणा लै कांस्से च़ार कल़ोलै ताकि तेथ लोहल़ी लाई बेदी च़की सके। तेखअ बणाईं बेदी च़कणा लै किक्करे काठा करै दूई लोहल़ी अर तिंयां बी महल़ी कांस्सै करै। संघा भरी तिंयां लोहल़ी बेदीए दोहरी बाखा पाल्लै दी लागै दै तिन्नां कल़ोलै दी। सह बेदी बणाईं बाझ़ी ढक्कणे मणशू ज़ेही खोखली।
कांस्सैओ कल़ाह
(लुआह 30:18-21)
बसलेलै बणाअं एक कांस्सैओ बडअ कल़ाह अर तेता बशैल़णा लै बणाअं कांस्सैओ बठैल़णू। सह कल़ाह बणाअं तिन्नां बेटल़ीए भैंट किऐ दै आर्शूए खास कांस्सै करै ज़ुंण मेल़-ज़ोल़े खिम्भे प्रऊल़ी दी च़ाकरी करा ती।
पबित्र खिम्भा फेरे ताटी
(लुआह 27:9-19)
पबित्र खिम्भा फेर बणाईं बसलेलै ताटी, तेऊ बणाईं सह उतर अर दखण दिशा बाखा शौ-शौ हाथ लाम्मी अर पुर्बा अर पछ़मा बाखा बणाईं पबित्र खिम्भा आजू पिछ़ू पज़ाह-पज़ाह हाथ लाम्मी। संघा लाऐ उतर अर दखण दिशा दी पबित्र खिम्भे ताटीए डोरै बिह-बिह कांस्से खुर्शी प्रैंदै बिह-बिह थाम्ह। खिम्भा पिछ़ू पछ़मा बाखा लाऐ कांस्से खुर्शी प्रैंदै दस थाम्ह। तेखअ लाऐ तेऊ तेथ चिई बाखा च़ंदीए कणिच़ू अर आगल़ी करै ज़ोल़ी लाऐ तेथ बाछे पल्दै, खिम्भे दैहणीं-बाऊंईं बाखा शौ-शौ हाथ अर पिछ़ू बाखा लाऐ पज़ाह हाथ लाम्मै।
पुर्बा दिशा दी, पबित्र खिम्भे मोहरै बाखा लाऐ तेऊ ताटी भितरी एछणें बाता कांस्से खुर्शी प्रैंदै चअन थाम्ह एकी बाखा अर चअन थाम्ह दुजी बाखा, संघा लाऐ तेथ तेऊ दोहरी बाखा पंद्रा-पंद्रा हाथ बिरलै पल्दै।
ताटी भितरी डेऊणे प्रऊल़ी लै बणाअं बसलेलै बिह हाथ लाम्मअ पल्दअ, संघा छ़ड़ाऊअ सह कांस्से खुर्शी प्रैंदै खल़ै कांस्से च़ऊ थाम्हा दी च़ंदीए कणिच़ू करै च़ंदीए आगल़ी दी। सह पल्दअ बी थिअ ताटी फेर बिणगा दी लागै दै होरी पल्दै बराबर पांज़ हाथ उछ़टअ अर निली, बैंज़णीं अर लाला रांगे ऊना करै बूणती पाऐ दै बाछे झिकल़ैओ। पबित्र खिम्भे ताटी लागी दी फेर फिरदी सोभै खुंढी ती कांस्से।
पबित्र खिम्भा दी लाई दी खास च़िज़ा
यहूदा गोत्रा का हूरो पोचअ अर ऊरीओ शोहरू बसलेल अर दान गोत्रा का आहीसामको शोहरू ओलाब, तिंयां थिऐ दुहै ज़ण्हैं पबित्र खिम्भे कारीगीर, तिन्नैं किअ सह काम तिहअ ई ज़िहअ बिधाता हुकम किअ त। ओलाब थिअ काठा, पात्थरा दी खेल़्तर अर बाछे झिकल़ै दी निली, बैंज़णीं अर लाला रांगे ऊना करै बूणती पाणै आल़अ ज़बरदस्त कारीगीर।
पबित्र खिम्भा बणाणां लै कुंण धातू केतरी लागी, तेतो साब-कताब डाहणें ज़िम्मैंबारी ती मोसा माहा प्रोहत हारणे शोहरू ईतामारा का सभाल़ी दी।
तेऊ ज़मानैं पबित्र ज़ैगा ज़ुंण नाप तोल करनैओ च़लण थिअ, तेऊ साबै लागअ पबित्र खिम्भे कामां दी कोई एक हज़ार किलू सुन्नअ। ज़ेतरै टोलै गणी करै च़ंदी भैंट किई, सह निखल़ी पबित्र ज़ैगे च़लणें साबै तोली करै चअन हज़ार च़ार शौ तेत्ती किलू।1 तिन्नां ढब्बै2 दैणा लै ज़ेतरै मणछ गणै तै, तिंयां थिऐ छ़ह लाख चअन हज़ार पांज़ शौ पज़ाह मर्ध ज़ुंण बिहा साला का उझे अमरे थिऐ।3
मांझ़लै पल्दे थाम्हे दूई खुर्शी संघी लागी पबित्र खिम्भा दी शौ खुर्शी, एकी खुर्शी दी लागी चऊती किलू च़ंदी। तेता का ज़ुंण तिह किलू च़ंदी बच़ी, तेता करै बणाईं आगल़ी, कणिच़ू अर थाम्ह बी महल़ै प्रैंदा का तेता करै। लोगै ज़ुंण कांस्सअ दैनअ, सह निखल़अ तोली करै दूई हज़ार च़ार शौ पच्ची किलू। तेता करै बणाऐं मेल़-ज़ोल़े खिम्भे प्रऊल़ी दी लागणै आल़ी थाम्हे खुर्शी, कांस्से बेदी, तेते ज़ाल़ीदार झ़ालर अर बेदीओ सारअ समान, पबित्र खिम्भे ताटी फेर लागी दी थाम्हे खुर्शी, ताटी भितरी एछणें प्रऊल़ी दी लागी दी थाम्हे खुर्शी अर खिम्भा फेरे खुंढी।
Source notes (3)
- Cross-reference लुआ. 30:11-16
- Footnote ढब्बै आधअ शकेल 5.7 गराम
- Cross-reference मोत्त. 17:24
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.