Kulvi Outer Seraji Bible
लुआह 37
किक्करे काठो बणाअं करारो मणशू
(लुआह 25:10-22)
तेखअ बणाअं बसलेलै किक्करे काठो ढाई हाथ लाम्मअ, डेढ हाथ बिरलअ अर डेढ हाथ उछ़टअ मणशू। संघा महल़अ सह मणशू बागा-भितरा का च़ोखै सुन्नैं करै, तेता फेर लाई सुन्नें काणस। तेते च़ऊ पाऊआ दी लाऐ सुन्नें कल़ोलै दूई-दूई दोहरी कुछी। तेखअ बणाईं तेता च़कणा लै किक्करे काठे लोहल़ी अर तिंयां बी महल़ी सुन्नैं करै, तेखअ लाई तिंयां लोहल़ी मणशूए दोहरी कुछी लागै दै तिन्नां कल़ोलै दी ताकि तेऊ मणशू तेता करै च़की सके।
तेखअ बणाअं मणशू प्रैंदा लै च़ोखै सुन्नैं करै महल़अ द डेढ हाथ बिरलअ अर ढाई हाथ लाम्मअ ढक्कण1, तेता लै बोला पापो प्राश्त करनैओ ढक्कण। संघा बणाऐं तेऊ प्राश्ते ढक्कणे दोहरै पुंझ़ै सुन्नअ गल़ाऊई-ढल़ाऊई करै दूई करूब नाओंए फैंखा आल़ै स्वर्ग दूत। तिन्नें मोहरै बणाऐं एकी-दुजै बाखा स्मुखै अर तिन्नें फैंख बणाऐं इहै फुआरुऐ दै कि तिन्नें फैंखा करै आसा सह पापे प्राश्त करनैओ ढक्कण ढोपअ द।
पबित्र रोटी डाहणां लै पलग
(लुआह 25:23-30)
तेखअ बणाअं बसलेलै किक्करे काठा करै दूई हाथ लाम्मअ, एक हाथ बिरलअ अर डेढ हाथ उछ़टअ पलग। संघा महल़अ सह सारअ पलग तेऊ च़ोखै सुन्नैं करै संघा लाई प्रैंदै फेर फिरदी च़ार आंगल़ बिरली सुन्नें काणस तेखअ लाअ तैहा काणसा फेर-फिरदअ सुन्नेंओ डोर। तेखअ बणाऐं तेऊ पलगा लै बी सुन्नें च़ार कल़ोलै संघा लाऐ पलगे दोहरी कुछी च़ऊ पाऊआ दी। तिंयां कल़ोलै लाऐ काणसा हेठै, संघा लाई तिन्नां कल़ोलै दी किक्करे काठा करै बणाईं दी लोहल़ी ताकि तेऊ पलगा तेता करै कान्हा च़की सके। तेऊ पलगा च़कणा लै किक्करे काठा करै बणाईं दी लोहल़ी महल़ी च़ोखै सुन्नैं करै। ज़ुंण समान पलगा प्रैंदै लोल़ी, सह बी बणाअं तेऊ सारअ च़ोखै सुन्नेंओ, मतलब डबरी, झ़ारी, धनैरअ, कल़छ़ै, प्रिहै।
सदीअ
(लुआह 25:31-40)
तेखअ बणाअं बसलेलै च़ोखै सुन्नैं करै सदीअ। सह सारअ सदीअ बणाअं तेते फूल अर डोडी संघी सुन्नें एकी फाल़ी गल़ाऊई-ढल़ाऊई करै कपींड। तेऊ सदीऐ दी बणाईं दोहरी बाखा चअन-चअन डिंढी। सदीऐ दी लागी दी तिन्नां सोभी छ़हा डिंढी दी लाऐ बदामे फूला ज़िहै चअन-चअन फूल तेते डोडी अर पाची संघी। सदीए मांझ़लै डिंढै दी बणाऐं च़ार फूल तेते डोडी अर पाची संघी। मांझ़लै डिंढै, ज़िधा का तिंयां छ़ह डिंढी आसा लागी दी, तिधी बी बणाईं दूई-दूई डिंढीए गोधै एक-एक डोडी। सदीअ, तेते डिंढी, फूल अर डोडी संघी बणाअं सह च़ोखै सुन्नें एकी ई फाल़ी गल़ाऊई-ढल़ाऊई करै कपींड। दिऊए बाती काटणें कात अर सदीऐ हेठे थाल़ बी बणाईं च़ोखै सुन्नैं करै। सदीअ अर तेते सोभै च़िज़ा बणी पैंईंती किलू च़ोखै सुन्नैं करै।
धूपा दैणें बेदी
(लुआह 30:1-5)
तेखअ बणाईं बसलेलै किक्करे काठा करै एक हाथ लाम्मी-बिरली च़कोर धूपा दैणें बेदी, सह बणाईं दूई हाथ उछ़टी अर तेऊ ई काठा का काढै तेते च़ऊ कूणैं दी बाछ़ू ज़िहै शींग। संघा महल़ी सह बेदी तेते शींगा संघी च़ोखै सुन्नैं करै अर च़ऊ फेर लाई तेथ च़ोखै सुन्नें काणस। काणसा हेठै लाऐ बेदीए दोहरै पाल्लै दी च़ोखै सुन्नें दूई कल़ोलै ताकि तेथ लोहल़ी पाई बेदी च़की सके। तेते लोहल़ी बी बणाईं किक्करे काठा करै संघा महल़ी तिंयां सुन्नैं करै।
अभिषेक करना लै तेल
(लुआह 30:22-38)
तेखअ बणाअं तेऊ खुशबूदार च़िज़ा राल़ी करै धूप अर अभिषेक करना लै पबित्र तेल।2
Source notes (2)
- Footnote ढक्कण आसन
- Cross-reference लुआ. 30:22-38
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.