Kulvi Outer Seraji Bible
लुआह 36
बिधाता दैनी बसलेल, ओलाब अर तिन्नां होरी सोभी लै पबित्र खिम्भे कारीगीरी करने समझ़ कि तिंयां हुऐ इहै सज़ाण कि तेऊ कामां तिहअ ई करी ज़ाणें ज़िहअ बिधाता खोज़अ द आसा।
लोगै दैनी दिल खोल्ही भैंट
बिधाता लै पबित्र खिम्भे कामां करना लै बसलेल अर ओलाबा संघी ज़ुंण-ज़ुंण सज़ाण मणछ आजू निखल़ै तिंयां किऐ सोभ मोसा कठा, संघा पबित्र खिम्भे कामां लै ज़ुंण बी भैंट इज़राईली मणछै मोसा सेटा आणी ती, सह सभाल़ी मोसा तिन्नां का। तेखअ बी रहै लोग हर धैल़ै दोत्ती मोसा सेटा खुशी-खुशी भैंट आणदै लागी। तेखअ ज़ुंण पबित्र खिम्भे कामां करनै आल़ै थिऐ, तिंयां आऐ आपणैं काम-काज़ छ़ाडी मोसा सेटा लै, संघा लागै मोसा का इहअ बोल्दै, “ज़ेतरी हाम्हां बिधाते पबित्र खिम्भे कामां लै ज़रुरत थिई, लोगै हेरी तेता का खास्सी भैंट दैई।”
तेखअ दैनअ मोसा सोभी लोगा लै इहअ हुकम करी फैल़अ, “ऐबै हुअ बतेर्हअ, पबित्र खिम्भे कामां लै निं ऐबै भैंट आणने ज़रुरत आथी।” तेखअ निं लोगै होर भैंट आणी। किल्हैकि पबित्र खिम्भे सोभी कामां करना लै ज़ेतरी ज़रुरत थिई, कारीगीरा सेटा गअ त तेता का खास्सअ एछी।
पबित्र खिम्भा बणाणेंओ काम
(लुआह 26:1-14)
पबित्र खिम्भे काम करनै आल़ै ज़ाण-प्रबीण कारीगीर हुऐ कठा। संघा बणाईं तिन्नैं बाछे झिकल़ै करै दस लांघा, तेथ पाई तिन्नैं निली, बैंज़णीं अर लाला रांगे ऊना करै फैंखा आल़ै करूब नाओंए स्वर्ग दूते खेल़्तर पाई बूणती। सोभै लांघा बणाईं नापी करै बराबर, ठाई हाथ लाम्मी अर च़ार हाथ बिरली। तेखअ बणाईं तिन्नें पांज़-पांज़ लांघा कठा ज़ोल़ी करै बिरली-बिरली दूई च़ादरा।
तेखअ लाऐ तिन्नां दुही च़ादरा दी बिरली बाखा निलै झिकल़ै करै आर-पार बराबर नापी करै पज़ाह-पज़ाह झ़ुंफ। तेखअ ज़ोल़ै तिंयां झ़ुंफ सुन्नें पज़ाह कणिच़ू लाई पिड्डै।
तेखअ बणाऐं तिन्नैं बाकरीए शेली करै गैरा शल़ैप्पै नापी करै एक बराबर, तिंयां थिऐ तिह-तिह हाथ लाम्मै अर च़ार-च़ार हाथ बिरलै। तेखअ ज़ोल़ै छ़ह शल़ैप्पै कठा अर पांज़ शल़ैप्पै कठा, इहअ करै बणै तिंयां बडै-बडै दूई शल़ैप्पै। बिरली बाखा लाऐ तेथ पज़ाह आर-पार पुंझ़ै बराबर नापी करै पज़ाह झ़ुंफ, तेखअ लाऐ तेथ पज़ाह कांस्से कणिच़ू ताकि तेता झ़ुंफा करे तेथ पिड्डै बान्हीं एक करी सके। तेखअ बणाईं दूई बाघली च़ादरा, एक बाकरे खाला करै अर दुजी गाभूए खाला करै। तिंयां दुहै च़ादरा ती लाला रांगा करै रांगी दी।
खिम्भे भित्तीओ काम
(लुआह 26:15-30)
खिम्भे भित्ती बणाणां लै बणाऐं किक्करे काठे फल़्है। तिंयां फल़्है तै दस-दस हाथ लाम्मै अर डेढ हाथ बिरलै। धरना बाखा काढी तिन्नां फल़्है दी दूई-दूई च़ूल़ा संघा लाई तिन्नां दोहरी च़ूल़ा दी च़ंदीए दूई खुर्शी। इहअ करै लागै बिह फल़्है अर तेथ च़ाल़्ही खुर्शी दखण दिशा बाखा अर बिह फल़्है अर च़ाल़्ही खुर्शी लाई उतर दिशा बाखा। खिम्भे पिछ़ली भित्ती बणाणां लै बणाऐं पछ़मा बाखा छ़ह फल़्है, अर तेते दोहरै कूणैं लै बणाऐं दूई फल़्है होर, ईंयां दूई फल़्है तै हेठा अर प्रैंदा का कल़ोलै करै ज़ोल़ै दै। इहअ करै लागै पिछ़ली भित्ती लै पठी आठ फल़्है अर च़ंदीए सोल़ा खुर्शी।
तेखअ बणाऐं तिन्नैं किक्करे काठे चिई भित्तीए फल़्है मल़ैऊंणा लै पांज़-पांज़ शौर, ज़ुंण शौर तिन्नां फल़्है दी मांझ़ै लाअ, सह लाअ आजू का पिछ़ू तैणीं सारी भित्ती कलग्गअ। तेखअ महल़ै तिंयां फल़्है अर शौर सुन्नैं करै अर तिन्नां शौरा भरना लै लाऐ फल़्है दी सुन्नें कल़ोलै।
खिम्भा भितरो पल्दअ
(लुआह 26:31-37)
तेखअ बणाअं तिन्नैं बाछे झिकल़ै करै पबित्र खिम्भा भितरो पल्दअ, संघा पाई तेथ निली, बैंज़णीं अर लाला रांगे ऊना करै करूब नाओंए फैंखा आल़ै स्वर्ग दूते बूणती। संघा बणाऐं तिन्नैं किक्करे काठे च़ार थाम्ह तेखअ महल़ै तिंयां सुन्नैं करै। संघा लाई तेथ सुन्नें किल्ली अर तिंयां थाम्ह किऐ च़ंदीए खुर्शी प्रैंदै खल़ै।
तेखअ बणाअं तिन्नैं खिम्भे प्रऊल़ी लै बाछे झिकल़ै करै पल्दअ, संघा पाई तेथ निली, बैंज़णीं अर लाला रांगे ऊन काती करै बूणती। तिन्नैं बणाऐं पांज़ थाम्ह बी अर तिंयां महल़ै तिन्नैं सुन्नैं करै, तेते किल्ली अर ज़ोल़ महल़ै पठी सुन्नैं करै संघा किऐ कांस्से खुर्शी प्रैंदै खल़ै। खिरी लाऐ पल्दै छ़ड़ाऊंणा लै कणिच़ू अर कल़ोलू।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.