Kulvi Outer Seraji Bible
लुआह 16
बिधाता दैनअ इज़राईली लै सरगा का खाणां लै
तेखअ लागी सारी इज़राईलीए सोभै टोली एलीम मुल्खा का आजू हांढदी। मिसर देशा का निखल़णें दुजै भिन्नें पंद्रुई धैल़ी पुजै तिंयां सीन नाओंए रेगीस्तानै ज़ुंण एलीम अर सीनाई नाओंए धारा मांझ़ा-मांझ़ी आसा।
सीन रेगीस्तानै पुजी लागै इज़राईले टोली मांझ़ै कई मोसा अर हारणा लै इहै बखर्दै, “एता का हणअ त भलअ कि बिधाता हाम्हां मिसर देशै पांदअ मारी। तिधी धरनीं बेशी शिखा ता थिई खाणां लै अर रोटी ता थिई रज्ज़ी खाणां लै। पर तंऐं आणै हाम्हैं सोभै इधी रेगीस्तानै भुखै मरदै!”
बिधाता बोलअ मोसा लै, “खाणां लै दैंऊं हुंह ऐबै तम्हां सोभी लै सरगा का पाणीं ज़िहअ बरशाऊई। तिन्नां लागणअ धैल़ आपणैं डेरै का बागै निखल़ी सिधअ तैहा धैल़ी जोगी खाणां लै कठा करनअ। इहअ करै जाणीं तिन्नें परख बी हई कि तिंयां मेरअ हुकम मना कि नांईं।”1
“पर छ़हुई धैल़ी शुकरै उडै झाल़ै तम्हैं हर हबतै दुगणअ अर तेता डाहै पठी खाणां लै सटेऊई।”
मोसा अर हारणै खोज़अ इज़राईली का, “आझ़ उडै लागणअ तम्हां का थोघ कि ज़ुंणी तम्हैं मिसर देशा का काढी आणै सह आसा बिधाता। दोत्ती शुझणअ तम्हां का बिधातो महान बला आल़अ धुप्पअ, किल्हैकि तम्हैं हेरै बिधाता शूणीं कि तम्हैं आसा तेऊ लै बखर्दै लागै दै! हाम्हैं किज़ै आसा? तम्हैं किल्है आसा हाम्हां लै बखर्दै लागै दै।”
आजू बोलअ मोसा इहअ, “तम्हां का लागणअ थोघ कि बैल़ी लै सका बिधाता तम्हां लै शिखा अर क्लारी लै सका ज़ेतरी तम्हां खाणीं तेतरी रोटी दैई! असली दी आसा तम्हैं बिधाता लै बखर्दै लागै दै। हाम्हैं निं किछ़ै आथी, पर बिधाता हेरअ शूणीं कि तम्हैं आसा बखर्दै लागै दै।”
मोसा फिरअ हारणा बाखा लै संघा बोलअ इहअ, “इज़राईली बोल सोभी टोला लै इहअ, ‘बिधाता सेटा करा झाल़अ, किल्हैकि तेऊ हेरै तम्हैं बखर्दै शूणीं।’”
तेखअ हुअ इहअ कि हारण त इज़राईली टोली का इना गल्ला खोज़दअ लागअ द, ज़ांऊं सोभी रेगीस्ताना बाखा भाल़अ, तिन्नां का शुझुअ बिधाता का लागदअ द धुप्पअ बादल़ा दी।
बिधाता बोलअ तेखअ मोसा लै, “मंऐं हेरअ शूणीं कि इज़राईली आसा बखर्दै लागै दै। ऐबै बोल इना लै इहअ, ‘बैल़ी दैणीं मुंह तम्हां लै कबल्ली शिखा अर क्लारी लै दैणीं ज़ेतरी तम्हैं खाई सका तेतरी रोटी।’ तेखअ लागणअ तिन्नां का थोघ कि हुंह आसा तिन्नों परमेशर बिधाता।”
तेखअ हुअ इहअ कि समुंदरे बाढा का आऐ होछ़ै-होछ़ै च़ेल्लू इज़राईलीए खिम्भे डेरै फेर सारै दी, संघा बेठअ तिन्नों छ़ुंढ तिधी। दुजै धैल़ै भाल़ी तिन्नैं आपणैं खिम्भे डेरै फेर सारै दी ओश पल़ी दी। ज़ांऊं ओश शुक्की, तेखअ शुझुऐ तिन्नां का शुन्नैं रेगीस्तानै तेऊ मुल्खै तै सारै दी पाल़े शाका ज़िहै भींन शल़ेफल़ै पल़ै दै। एही च़ीज़ निं लोगै तधा का आजी कधि भाल़ी ती। सोभै इज़राईली लागै आप्पू मांझ़ै एकी-दुजै का पुछ़दै, “अह किज़ै च़ीज़ आसा?” 2
मोसा दैनअ तेखअ तिन्नां लै एतो ज़बाब, “अह आसा सह खाणें च़ीज़ ज़ुंण बिधाता तम्हां लै खाणां लै दैनी। बिधाता आसा इहअ हुकम किअ द कि एता झाल़ै सोभै तेतरअ ज़ेतरी तम्हां ज़रुरत आसा, मतलब एकी मणछे बांडै लोल़ी एक पाथअ आअ, तेखअ ज़सरै डेरै दी ज़ेतरै मणछ आसा एते साबै करै तिन्नां लै कठा।”
ज़िहअ मोसा बोलअ, सोभी इज़राईली किअ तिहअ ई ज़सरै थोल़ै टबर थिऐ तिन्नैं झाल़अ थोल़अ अर खास्सै टबरा आल़ै झाल़अ खास्सअ। ज़ांऊं तिन्नैं सह खाण नापअ सह निखल़अ पूरअ। खास्सै टबरा आल़ै ज़ुंणी खास्सअ झाल़अ, तेऊ लै निं किछ़ खास्सअ निखल़अ अर थोल़ै टबरा आल़ै ज़ुंणी थोल़अ झाल़अ, तेऊ लै निं घट निखल़अ। किल्हैकि तिन्नैं झाल़अ त तेतरअ ई ज़ेतरी तिन्नां तैहा धैल़ी ज़रुरत थिई।3
मोसा बोलअ तेखअ तिन्नां लै, “एता का निं दोत्ता लै किछ़ै डाही।” तिन्नां मांझ़ै निं कई मोसे अह गल्ल मनी अर तिन्नैं डाहअ धख-धख खाण दोत्ती लै बच़ाऊई। ज़ांऊं तिन्नैं दुजै धैल़ै दोत्ती भाल़अ, तेथ तै किल़ै पल़ै दै अर शल़ैन्ह लागी दी। मोसा आई इहअ करनै पिछ़ू तिन्नां लै रोश्शै।
दोत्ती-दोत्थी झाल़ा तै धैल़ इज़राईली आपणैं खाणैं जोगी अर बाकी ज़ुंण धरनीं बच़ा त सह खाण गल़ा त सुरज़े धुप्पै करै पठी।
तेखअ हुअ इहअ कि हबते छ़ऊऐ धैल़ै झाल़अ सोभी ज़ण्हैं दुगणअ मतलब हर मणछे बांडै लोल़ी दूई लोहदी आई। सोभी टोलीए सैणैं खोज़अ एते बारै मोसा का।
मोसा बोलअ तिन्नां लै, “अह किअ तम्हैं राम्बल़अ, बिधाता बोलअ त इहअ ई, ‘काल्ला आसा मेरी बशैघे पबित्र धैल़ी। तम्हैं सोभै करा खाणां लै कठा, तेखअ च़ाऐ तेता सिज़दै डाहा, च़ाऐ बुआल़ी डाहा, पर थारै लोल़ी खाणां लै काल्ला संघी बच़अ।’”4
ज़िहअ मोसा बोलअ, सोभी इज़राईली डाहअ खाणां लै दुजै धैल़ै तैणीं बच़ाऊई, एभकी बारी नां तेथ शल़ैन्ह लागी अर नां किल़ै पल़ै।
दुजै धैल़ै बोलअ मोसा सोभी इज़राईली लै, “ज़ुंण खाण थारै हिझ़ा का आसा रहअ द, आझ़ खाऐ तेता ई, आझ़ आसा बिधाता लै बशैघ अर आझ़ निं तम्हां झाल़णां लै किछ़ै भेटणअ। हबतै दी छ़हा धैल़ी लागै तम्हैं खाणां लै धैल़ झाल़दै, पर सातुऐ धैल़ै आसा बशैघ तेभै निं तम्हां किछ़ै भेटणअ।”
तज़ी बी डेऊऐ कई लोग सातुऐ धैल़ै लोल़ै पर तिन्नां निं किछ़ भेटअ।
तेखअ बोलअ बिधाता मोसा लै, “तम्हां मणछा केभै तैणीं निं मेरै हुकम अर बधाना दी धैन दैणअ? आद करा, सह आसा हुंह बिधाता ज़ुंणी तम्हां लै बशैघे धैल़ी दैनी, तैही करा हुंह छ़ऊऐ धैल़ै कबल्लअ एतरअ खाण दैई कि सह थारै दुही धैल़ै लै होए। बशैघे धैल़ी ज़ुंण ज़िधी आसा सह रहै तिधी, आपणैं घअरा का बागै निं डेऊई।”
तधा बाद किअ सोभी लोगै सातुऐ धैल़ै बशैघ। इज़राईली डाहअ तैहा खाणें च़िज़ा नाअं खाण5। अह त भुगल़े दाणैं ज़िहअ अर मखीरा करै ल्हुशै दै पातल़ै बाबरू ज़िहअ।6
तेखअ बोलअ मोसा इज़राईली लै, “बिधाता किअ इहअ हुकम, ‘एक पाथअ7 भर खाण डाहा आगली पोस्ती लै डाही, किल्हैकि हुंह च़ाहा इहअ कि पोस्ती दर पोस्ती लोल़ी थारी आद-लुआदा का बी थोघ लागअ कि मिसर देशा का काढी उज़र रेगीस्तानै मंऐं तम्हां का किहअ खाण खैऊअ त।’”
तेखअ बोलअ मोसा हारणा लै, “एकी भांडै दी भर एक पाथअ भर खाण, संघा डाह तेऊ पबित्र ज़ैगा बिधाता सम्हनै आगली पोस्ती लै।” ज़िहअ बिधाता मोसा का हुकम किअ त, हारणै किअ तिहअ ई, अर तेऊ डाहअ एक पाथअ खाण करारे8 मणशू सेटा डाही।9
कनान देशे सिऊंआं पुजी बस्सणै का आजी रहै इज़राईली मणछ च़ाल़्ही साला तैणीं तेऊ खाण खांदै लागी। दसा बडै पाथैओ हआ त आधअ मण10।11
Source notes (11)
- Cross-reference जोह. 6:31
- Cross-reference 1 इति. 10:3
- Cross-reference 2 इति. 8:15
- Cross-reference लुआ. 20:8-11
- Footnote खाण मतलब खाणें च़ीज़, पर एता नाअं किज़ै आसा, सह निं थोघै
- Cross-reference गण. 11:7-8
- Footnote पाथअ इब्रानी दी “ओमेर” एक होछ़अ पाथअ हआ डेढ किलू, अर बडअ पाथअ हआ दूई किलू
- Footnote करारे अह आसा बिधाते तैहा गल्लो मणशू ज़ेथ तिंयां गल्ला आसा डाही दी ज़ेथ बिधाते करार आसा।
- Cross-reference मूल. 25:10-12
- Footnote आधअ मण इब्रानी बोली दी “एपा।” आधअ मण हआ बिह किलू
- Cross-reference ज़ैह. 5:12
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.