लुआह 15

मोसा गूरे गिह

1तेखअ गांठी मोसा अर इज़राईली लाल समुंदरा पार डेऊई बिधाता लै गिह, तिन्‍नैं बोली एही गिह:

“मुंह बोल़णीं बिधाता लै गिह,

दुशमणा हारी करै रहैऊअ

तेऊ आपणअ माहा प्रतप्प,

तेऊ शोटै दुशमणे घोल़ै

अर तिन्‍नें शुंआर समुंदरे डुघै पाणीं दी।1

2परमेशर आसा मेरी तागत,

मुंह बोल़णीं तेऊ लै गिह,

किल्हैकि तेऊ किअ मेरअ उद्धार।

मुंह करनअ बिधातो भज़न अर तेऊए ज़ै-ज़ैकार।2

3तेऊओ नाअं आसा बिधाता,

सह आसा सोभी का बडअ जोधअ।

4मिसर देशे माहा राज़ेए रथ, घोल़ै

अर सारी सैना शोटी तेऊ समुंदरै,

ज़ुंण तेऊए सोभी का छ़ल़ैघ कार-करिंदै थिऐ,

तिंयां डबेऊऐ तेऊ लाल समुंदरे डुघै पाणीं जैंदरी।

5तिंयां डुबै पात्थरा ज़िहै डुघै पाणीं दी थाल्‍लै।

6हे बिधाता,

तंऐं किऐ आपणैं खाणैं हाथे

महान बला करै तिंयां खतम।

7ज़ुंण बरोध करा, तेऊ शोटा

तूह आपणैं प्रतप्पा करै धरनीं,

तेरी रोश्शे आगी करै हआ तिंयां

इहै खतम ज़िहअ भुखलअ दझ़ा।

8तेरी नाके ढुंण्हींए शाह करै हुअ

समुंदरो पाणीं ओर्ही-पोर्ही,

ज़ेही दुही बाखा पाक्‍की दुआल,

डुघै समुंदरे च़िक्‍करै हुई शुक्‍की ज़ैगा।

9दुशमण बोला त इहअ,

‘तिन्‍नां पिछ़ू डेऊई ढाकणैं मुंह तिंयां,

मुंह बांडणी तिन्‍नें सारी ज़ैदात लुटी करै

ज़िहअ मेरअ दिल च़ाहे

मुंह करनअ तिन्‍नां संघै तिहअ

मुंह करनै तिंयां आपणीं

तलबारा करै मारी खतम।’

10पर हे बिधाता,

ज़ांऊं तंऐं आपणैं महान शाहे बागरी छ़ाडी,

तिंयां घेप्पै समुंदरै पाणीं

अर तिंयां डुबै तेथ इहै

ज़ेही खास्सी गर्की टोल्ह डुबा।

11हे बिधाता,

देअ-देबी मांझ़ै

ताह बराबर कुंण आसा? एक बी निं!

ताह ज़िहअ माहा प्रतप्पी

अर पबित्र कुंण आसा? कोहै बी निं!

ताह ज़िहै महान च़मत्कारे काम

कुंण सका करी? कोहै बी निं!

ताखा लागा सोभी डरनअ

अर सोभी लागा तेरी ज़ै-ज़ैकार करनी।

12ज़ांऊं तंऐं आपणैं

दैहणै हाथा करै शारअ किअ,

धरती पाऐ दुशमण घुटी।

13ज़ुंण लोग तंऐं बच़ाऊऐ,

तंऐं नढैऊऐ तिंयां झींण अर झ़ूरी करी आप्पै।

आपणैं बला करै रहैऊई तंऐं

तिन्‍नां का पबित्र ज़ैगे बात।

14देशा-देशे लोगा छ़ुटणीं,

इना गल्‍ला शूणीं काम्मणीं,

पलिश्ती लोगा पल़णअ

खास्सअ हैल़अ-फिकर।

15एदोम देशे सैणैं लागणीं डअर,

मोआब देशे जोधै झ़िल़णैं-काम्बणै।

अर कनान देशे लोगो चुटणअ हैअ।

16तिन्‍नां पल़णअ हैल़अ-फिकर,

हे बिधाता, तेरी बाहो बल भाल़ी रहणीं

तिन्‍नां तेभै तैणीं मणशाण गांठ बाझ़ी

ज़ेभै तैणीं तेरै लोग

तिन्‍नें मुंहां बाती डेऊई निं जाए,

ज़ुंण तंऐं गलामी का आज़ाद करी आणै।

17हे बिधाता, मेरै मालक,

ताह दैणअ आपणैं लोगा

तैहा धारा बस्सणै

ज़ुंण तंऐं आप्पू लै आसा छ़ांटी दी।

ज़हा ज़ैगा ताह आपणअ घअर

अर भबन बणाणअं।

18ए म्हारै बिधाता, तेरअ राज़ रहणअ जुगै-जुगै।”

मिर्यामे गिह

19ज़ांऊं बिधाता मिसर देशे माहा राज़ेए सारै रथ, घोल़ै अर सोभी शुंआरा संघी सारी सैना समुंदरै डबेऊऐ, अर इज़राईली टपै समुंदरै मांझ़ा-मांझ़ी शुक्‍की ज़ैगा बाती राज्ज़ी-राम्बल़ै पार।

20हारणे बैहण मिर्याम थिई बिधाते गूर। तैहा च़की आपणैं हाथै डफली अर होर बेटल़ी बी लागी हाथै डफली च़की तैहा संघै नाच़दी।

21मिर्यामै बोली तिन्‍नां संघै एही गिह:

“बिधाते करा गिह बोली ज़ै-ज़ैकार,

तेऊ रहैऊअ दुशमणा हारी करै माहा प्रतप्प,

तेऊ शोटै घोल़ै अर तिन्‍नें शुंआर समुंदरै।”

कल़ुअ पाणीं किअ मिठअ

22इना सोभी गल्‍ला हणैं बाद लागै इज़राईली लाल समुंदरा सेटा का हांढदै। मोसा निंयैं तिंयां सूर नाओंए रेगीस्ताना बाती चिई धैल़ै तैणीं पर तिन्‍नां निं बाता पाणींए सोबल़ किधी भेटी।

23खिरी पुजै तिंयां मारा नाओंए ज़ैगा, तिधी भेटअ तिन्‍नां पाणीं पर सह थिअ एतरअ कल़ुअ कि तिंयां निं तेता झुटी सकै, तैही आसा तैहा ज़ैगा नाअं मारा3 पल़अ द।

24इज़राईली मणछ लागै इहअ बोली मोसा लै बखर्दै, “मोसा, ऐबै खोज़ बै तूह ई, हाम्हां किज़ै झुटणअ?”

25तेखअ लागअ मोसा बिधाता सेटा मज़ती मांगदअ, बिधाता खोज़ी मोसा का एक बुटी, संघा बोलअ मोसा लै कि ऐहा बुटीए एक काठी चोल़ी पा तूह पाणीं जैंदरी। मोसा किअ तिहअ ई अर पाणीं हुअ झुटणा लै बधिया।

इधी परखै बिधाता आपणैं लोग अर ऐहा ई मारा नाओंए ज़ैगा दैनअ बिधाता तिन्‍नां लै ज़िन्दगी ज़िऊंणेंओ बधान बी।

26बिधाता बोलअ तिन्‍नां लै इहअ बी, “हुंह आसा थारअ परमेशर बिधाता, हुंह करा तम्हां हारी-बमारी का राम्बल़ै। ज़ै तम्हैं ज़िहअ हुंह बोले तिहअ ई करे अर मेरअ बधान अर हुकम आद डाहे, तै निं हुंह तिन्‍नां बमारी तम्हां सेटा एछणैं दैंदअ ज़ुंण मंऐं मिसर देशे लोगा लै छ़ाडी।”

27एता बाद आऐ इज़राईली एलीम4 नाओंए ज़ैगा, ज़िधी पाणींए बारा सोबल़ा अर सात खज़ूरे बूट आसा। संघा पाऐ तिन्‍नैं तिधी डेरै।