Kulvi Outer Seraji Bible
लुआह 14
इज़राईली डेऊऐ लाल समुंदरा पार
इज़राईली तै एताम ज़ैगा पुजी आपणैं डेरै पाऐ दै, तिधी बोलअ तेखअ बिधाता मोसा का, “इज़राईली मणछा लै बोल, ‘तम्हैं फिरा इधा का पिछ़ू, संघा पाआ आपणैं डेरै तिधी समुंदरे बाढै ज़ुंण पिहीरोत नगरी सम्हनै बाल-सपोन नगरी नेल़ आसा। ऐहा ज़ैगा आसा एकी बाखा मिगदोल नगरी अर दुजी बाखा आसा लाल समुंदर।’
“इहअ शूणीं सोठणअ मिसर देशे माहा राज़ै इहअ, ‘इज़राईली डरै रेगीस्ताना बाती डेऊणैं का, तिंयां आसा एऊ देशा का डेऊणा लै फेर दैई होरी बाता लोल़ै लागै दै।’
“तेखअ करनअ मुंह मिसर देशे माहा राज़ैओ मन्न होर बी काठअ, तेखअ एछणअ तेऊ तम्हां पिछ़ू सैना लई। खिरी करनअ मुंह ऐबै मिसर देशो माहा राज़अ अर तेऊए सारी सैना खतम ज़िहअ करै सोभै लोग मेरअ अदर करे। मिसरी लोगा का बी लागणअ थोघ कि हुंह आसा असली दी बिधाता।”
इज़राईली बी किअ तिहअ ई ज़िहअ बिधाता बोलअ त।
ज़ांऊं मिसर देशे माहा राज़ै सेटा सारी गल्ला पुजी कि इज़राईली गऐ ऐबै मिसर देशा का डेऊई, तेऊ अर तेऊए कार-करिंदै लागै आप्पू मांझ़ै गल्ला करदै संघा फिरी तिन्नां एही सोर, “लै हाम्हैं अह किज़ै काम किअ! इज़राईली आसा म्हारै गलाम, हाम्हैं दैनअ तिन्नां गलामी का आज़ाद हई डेऊणैं!”
राज़ै ज़ुंडअ आपणैं जुधा करनैओ रथ अर तेऊए सैना बी तैर्हुई। मिसर देशे माहा राज़ै दैनअ मिसर देशे आपणैं सोभी का बधिया-बधिया छ़ह शौआ जुधे रथा होरी रथा संघै तिन्नें दलपति संघी इज़राईली पिछ़ू निंणैओ हुकम।
बिधाता किअ मिसर देशे माहा राज़ैओ मन्न काठअ, तैही आअ सह तिन्नां पिछ़ू।
इज़राईली तै नधड़क हई आजू ई लागै दै हांढदै। पर मिसर देशे माहा राज़ेए घोल़ै, रथ अर मिसर देशे सारी सैना पुजी तिन्नां पिछ़ू पिहीरोत नेल़ बाल-सपोन सम्हनै ज़िधी लाल समुंदरे बाढै इज़राईली डेरै तै पाऐ दै।
ज़ांऊं इज़राईली मिसर देशो माहा राज़अ आपणीं सैना संघी पिछ़ू एछदअ शुझुअ, तिन्नां पल़अ खास्सअ हैल़अ, तिंयां लागै ज़ोरै-ज़ोरै लैल़ा लाई बिधाता का मज़ती मांगदै।
तेखअ लागै मोसा लै बोल्दै, “मिसर देशै ज़ै हाम्हैं मरी बी डेऊंदै, तेथ ती हाम्हां दाबणा लै बतेर्ही घोरी आसा! तंऐं पजैल़ै मारना लै हाम्हैं इधी एऊ उज़र रेगीस्तानै! ऐबै भाल़ आप्पै, मिसर देशा का इधा लै आणी तंऐं हाम्हां लै किज़ै किअ! हाम्हैं हेरअ त ताल्है मिसर देशा का एछणैं का आजी बोली कि हाम्हां दै म्हारी हालता दी रहणैं, उज़र रेगीस्तानै मरनै का भली आसा हाम्हां लै मिसरी लोगे गलामी करनी भली।”
पर मोसा दैनअ इज़राईली लै इहअ ज़बाब, “तम्हैं निं लागा डरदै! तम्हैं रहा इधी खल़ै अर तम्हां का जाणअ आझ़ थारी आछी करै शुझुई कि बिधाता तम्हैं किहअ करै बच़ाऊऐ। ईंयां मिसरी ज़ुंण तम्हां हारदै-मारदै आऐ, ईंयां निं आझ़ा बाद तम्हां तंग करदै एछणैं।
“तम्हां निं किछ़ करने ज़रुरत आथी, बिधाता करनअ थारै बदल़ै आप्पै इना संघै जुध।”
बिधाता बोलअ तेखअ मोसा का, “तूह किल्है आसा मुखा ज़ोरै-ज़ोरै हाक्का लाई मज़ती मांगदअ लागअ द? इज़राईली मणछा लै बोलअ इधा का लागा आजू हांढदै।
“आपणीं शोठी कर समुंदरे पाणीं प्रैंदै आजू। समुंदरो पाणीं हणअ ओर्ही-पोर्ही दूई बाखा लै, तेखअ सका सोभै इज़राईली मणछ समुंदरा मांझ़ी पोर्ही शुक्की ज़ैगा बाती पार टपी।
“मुंह करनै मिसरीए मन्न होर बी हठू अर तिंयां पेशणैं तम्हां पिछ़ू समुंदरै। तेखअ मिसर देशे माहा राज़ेए रथ, घोल़ै अर सारी सैना लै ज़िहअ हणअ, तेता करै हणीं मेरी ज़ै-ज़ैकार। माहा राज़ै अर मिसर देशे लोगा का बी जाणअ तेखअ थोघ लागी कि हुंह आसा बिधाता।”
परमेशरो स्वर्ग दूत रहा त कबल्लअ इज़राईली मणछा आजू-आजू हांढदअ लागी, पर तेभा पोर्ही लागअ सह तिन्नां पिछ़ू-पिछ़ू हांढदअ। ज़ुंण बादल़ो थाम्ह बी इज़राईली आजू-आजू हआ त, सह बी हुअ इज़राईली मणछा पिछ़ू।
इहअ करै आअ सह बादल़ इज़राईली अर मिसर देशे सैना मांझ़ा-मांझ़ी। बादल़ा करै हआ त इज़राईली लै राची बी प्रैश्शअ अर मिसरी लै हआ त न्हैरअ अर राची निं मिसरी सैना इज़राईली ठिमकणा लै आजू हांढी सकदी ती।
मोसा किअ समुंदरे पाणीं प्रैंदै आपणअ हाथ आजू अर बिधाता छ़ाडी पुर्बा बाखा ढिश-बागर। बागरी रही सारी राची लागी, समुंदरो पाणीं हुअ ओर्ही-पोर्ही दूई बाखा लै अर धरनीं निखल़ी शुक्की ज़ैगा। इज़राईली मणछ लागै समुंदरै मांझ़ा-मांझ़ी शुक्की ज़ैगा बाती हांढदै अर तिन्नें दैहणै-बाऊंऐं थिई पाणींए दुआली बणी दी।1 मिसर देशे माहा राज़ेए रथ, अर घोल़ै दी शुंआर सारी सैना डेऊई इज़राईली पिछ़ू समुंदरा मांझ़ै।
राचकै च़ौथै पहरै भाल़अ बिधाता आगीए थाम्हा बाती मिसर देशे सैना बाखा अर तिन्नें मन्नैं पल़ी डअर अर झाख। तिन्नें रथे थरेट लागै पोर्ही निखल़दै अर तेता करै हुअ तिन्नां आजू हांढणअ कठण। तेखअ लागै मिसरी आप्पू मांझ़ै गल्ला करदै, “च़ाल्ला, इना इज़राईली दैआ रहणैं, हाम्हां हुअ पिछ़ू हटणअ! बिधाता आसा आप्पै इना बाखा हाम्हां मिसरी संघै जुधा करदअ लागअ द।”
तेखअ बोलअ बिधाता मोसा लै इहअ, “आपणअ हाथ कर समुंदरे पाणीं प्रैंदै आजू, समुंदरो पाणीं ढुल़णअ दुही बाखा का मिसरी रथा, घोल़ै अर सारी सैना प्रैंदै।”
ज़िहअ बिधाता बोलअ, मोसा किअ आपणअ हाथ समुंदरे पाणीं प्रैंदै आजू अर राची भैणै का आजी हुअ समुंदरो पाणीं बलैल्लअ। मिसर देशे सारी सैना लागी पिठ फरेऊई ठुहर्दै पर बिधाता डबेऊऐ तिंयां सोभ समुंदरै पाणीं मांझ़ै।
मिसर देशे माहा राज़ेए सारै रथ, घोल़ै अर तिन्नें शुंआर अर सारी सैना ज़ुंण इज़राईली पिछ़ू समुंदरै आऐ तै, तिंयां डुबै सोभ समुंदरे पाणीं जैंदरी अर तिन्नां मांझ़ै निं एक बी बच़अ। पर इज़राईली टपै सोभ समुंदरा मांझ़ा-मांझ़ी शुक्की ज़ैगा बाती पार, समुंदरे पाणींए ती तिन्नां दोहरी बाखा दैहणीं-बाऊंईं उझै बडी-बडी दुआली बणी दी।
ज़ांऊं तैहा धैल़ी इज़राईली मणछै समुंदरे बाढै मिसर देशे सैने ल्हासा भाल़ी, तेखअ ज़ाण्हुंअ तिन्नां का कि बिधाता बच़ाऊऐ तिंयां मिसरी का। ज़ेही महान शगती रहैऊई करै बिधाता मिसरी खतम किऐ, तेता भाल़ी किई इज़राईली बिधाते ज़ै-ज़ैकार अर तेऊए गूर मोसो बी किअ तिन्नैं विश्वास।
Source notes (1)
- Cross-reference 1 करि. 10:1-2; इब्रा. 11:29
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.