Kulvi Outer Seraji Bible
लुआह 7
तेखअ बोलअ बिधाता मोसा लै, “तेरअ भाई हारण हणअ ताह बाखा बोल़णैं आल़अ। तेऊ खोज़णअ मिसर देशे माहा राज़ै का तेरअ समाद, ज़िहअ एक गूर मेरअ समाद लोगा का खोज़ा।
“ज़ुंण गल्ला मंऐं ताखा खोज़ी तिन्नां खोज़ सोभी हारणा का, हारणा करनअ मिसर देशे माहा राज़ै लै हुकम कि मेरै इज़राईली मणछा दै एऊ देशा का डेऊणैं।
“पर मुंह करनअ मिसर देशे माहा राज़ैओ मन्न होर बी काठअ अर तेऊ निं थारी गल्ला शुणनी, तेथ च़ाऐ हुंह ज़ेतरी बी घोर डरैऊंणै आल़ी गल्ला करे। तेखअ दैणीं मुंह खिरी मिसर देशे लोगा लै एही घोर सज़ा कि तेता बाद दैणअ मिसर देशे माहा राज़ै मेरी इज़राईली परज़ा डेऊणैं।1
“ज़ांऊं मुंह आपणअ बल रहैऊई करै आपणैं इज़राईली मणछ काढी निंणै, तेखअ लागणअ मिसर देशे लोगा का थोघ कि हुंह आसा बिधाता।”
ज़िहअ बिधाता बोलअ, मोसा अर हारणै किअ तिहअ ई। संघा डेऊऐ तिंयां दुहै ज़ण्हैं मिसर देशे माहा राज़ै सेटा गल्ला करदै। तधू थिअ मोसा अश्शी साले अमरो अर हारण थिअ तरैस्सी सालो।
हारणे शोठी बणी दानअ
बिधाता बोलअ मोसा लै, “ज़ेभै मिसर देशो माहा राज़अ ताल्है अर हारणा लै च़मत्कार रहैऊंणा लै बोले, तेभै बोलै हारणा लै कि आपणीं बाता हांढणे शोठी शोटै धरनीं राज़ै सम्हनै, सह शोठी बणनी दानअ।”
मोसा अर हारण डेऊऐ मिसर देशे माहा राज़ै अर तेऊए कार-करिंदै सेटा, संघा किअ तिन्नैं तिहअ ई ज़िहअ बिधाता बोलअ त, हारणै शोटी आपणीं शोठी तिन्नां सम्हनै धरनीं अर सह बणी एक बडी दानअ।
तेखअ शादै मिसर देशे माहा राज़ै आपणैं पंडत अर ज़ादू करनै आल़ै, तिन्नैं बी किअ आपणीं बिधी-सिधी करै तिहअ ई। तिन्नैं बी शोटी आपणीं-आपणीं शोठी धरनीं अर तिंयां बणी बडी-बडी दानुईं। पर हारणे शोठी करै बणी दी दानुईं पाई तिंयां होर दानुईं घुटी।
पर मिसर देशो माहा राज़अ हुअ होर बी काठअ, ज़िहअ बिधाता पैहलै ई त डाहअ द बोली अर तेऊ निं मोसा अर हारणे गल्ला शूणीं।
मिसर देशे लोगा लै पल़ी दस घोर खरी
बिधाता बोलअ मोसा लै इहअ, “मिसर देशो माहा राज़अ हुअ खास्सअ काठअ, सह निं मेरै लोगा छ़ाडणअ च़ाहंदअ।
“तम्हैं डेओआ दोत्ती तैहा शोठी संघा निंईं मिसर देशे माहा राज़ै सेटा लै ज़ेते बडी दानअ बणी ती। तेखअ रहै नील नदीए बाढै राज़ै तम्हां सेटा एछदै न्हैल़ै लागी।
“तेखअ बोलै तेऊ लै इहअ, ‘इब्रानी लोगे परमेशर बिधाता छ़ाडअ हुंह ताल्है इहअ हुकम करदअ कि तेऊए परज़ा छ़ाड एऊ देशा का पोर्ही, ताकि तिंयां शुन्नैं रेगीस्तानै डेऊई तेऊए च़ाकरी करी सके। पर अज़ी तैणीं निं तंऐं तेऊए गल्ला मनी।
“‘तैही बोला बिधाता इहअ, “मंऐं लाअ ताखा ऐबै इहअ रहैऊई कि ताखा थोघ लागे कि हुंह आसा बिधाता।” मुंह बाहणीं आपणीं शोठी करै नील नदीए पाणीं दी अर सारअ पाणीं बणनअ लोहू।2
“‘म्हाछ़ली मरनी सोभ अर नील नदीए पाणीं का लागणीं एही बास्स-शल़ैन्ह कि मिसर देशे लोग निं तेऊ पाणीं झुटी सकदै।’”
तेखअ बोलअ बिधाता मोसा लै इहअ, “मोसा, हारणा लै बोल कि आपणीं शोठी करै पाणीं प्रैंदै। ज़ेभै सह इहअ करे, मिसर देशे गाडा, कुल्हा, सअर, बाऐ-कोफरी अर हर भांडै दी पाणींओ टिप्पू बी बणनअ लोहू।” 3
पैहली आफ़त-सारै देशे पाणींओ बणअ लोहू
मोसा अर हारणै किअ तिहअ ई ज़िहअ बिधाता तिन्नां लै हुकम किअ त। हारणै किई आपणीं शोठी नील नदीए पाणीं प्रैंदै आजू, मिसर देशे माहा राज़ै अर तेऊए कार करिंदे नदरी बणअ नील नदीओ सारअ पाणीं लोहू।
नील नदी दी ज़ेतरी म्हाछ़ली थिई तिंयां मूंईं सोभ। पाणीं का लागी बास्स-शल़ैन्ह अर मिसर देशे निं कोह लोग पाणीं झुटी सकै। सारै मिसर देशै त लोहू ई लोहू।4
पर मिसर देशे ज़ादू करनै आल़ै बी किअ आपणीं बिधी-सिधी करै तिहअ ई च़मत्कार। मिसर देशो माहा राज़अ हुअ होर बी काठअ, ज़िहअ बिधाता पैहलै ई त डाहअ द बोली अर तेऊ निं मोसा अर हारणे गल्ला शूणीं।
मिसर देशो माहा राज़अ डेऊअ आपणैं मैहला लै फिरी अर तेऊ निं ऐहा गल्ला लै धैन बी दैनअ। मिसर देशे लोग लागै नील नदीए बाढै कुहै खण्हदै किल्हैकि नील नदीओ पाणीं निं झुटणैं जोगी रहअ त।
दुजी आफ़त-मिंडके बरसात
बिधाता ज़ुंण नील नदीओ पाणीं लोहू बणाअं त, तेता गई ती सात धैल़ी-बिति।
Source notes (4)
- Cross-reference शधा. 7:36
- Cross-reference प्रका. 16:4
- Cross-reference प्रका. 8:8; 11:6
- Cross-reference प्रका. 16:3
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.