लुआह 5

मिसर देशे माहा राज़ै सेटा डेऊऐ मोसा अर हारण

1इज़राईली सैणैं का इना गल्‍ला खोज़ी डेऊऐ मोसा अर हारण मिसर देशे माहा राज़ै सेटा लै, संघा बोलअ तिन्‍नैं राज़ै लै इहअ, “बिधाता बोला इहअ, ‘मेरै लोगा दै इधा का शुन्‍नैं रेगीस्ताना लै डेऊणैं, ताकि तिंयां तिधी मेरै नाओंऐं थैर मनाओए।’”

2मिसर देशे माहा राज़ै बोलअ इहअ, “अह बिधाता कुंण आसा? अह कुंण हआ मुल्है हुकम करनै आल़अ कि इज़राईली दै डेऊणैं? हुंह निं इज़राईली इधा का डेऊणैं दैंदअ।”

3मोसा अर हारणै दैनअ मिसर देशे माहा राज़ै लै ज़बाब, “इब्रानी लोगो परमेशर बिधाता हुअ हाम्हां लै प्रगट। ताल्है किअ हाम्हैं ज़ीबाण कि हाम्हां दै इधा का चिई धैल़ै पैदल हांढी शुन्‍नैं रेगीस्ताना लै डेऊणैं ताकि तिधी पुजी हाम्हैं बिधाता लै बल़ीदान करी सके। इहअ निं हआ कि सह हाम्हां जैंदरी मारनै आल़ी बमारी या जुधा करै मारी पाए।”

4-5मिसर देशे माहा राज़ै बोलअ इहअ, “मोसा, हारण, तम्हैं किल्है लाऐ ईंयां लोग कामां-काज़ा का एही करी? भाल़ा केतरै खास्सै गलाम लाऐ तम्हैं कामां का बशैल़ी डाही। तम्हैं सोभै डेओआ, संघा लागा आपणैं कामां करदै ज़िहै करदै आसा लागै दै।”

6माहा राज़ै किअ तैहा ई धैल़ी गलामा का कामां कराऊंणै आल़ै मुनशी लै इहअ हुकम, 7“ऐबै निं इना इज़राईली गलामा लै ईंटा बणाणां लै भुखलअ तम्हैं दैई आणी। इना दैआ ऐबै आप्पै भुखलअ झाल़ी आणनैं। 8पर ज़ेतरी ईंटा ईंयां आझ़ तैणीं धैल़ बणाऊंदै आऐ, भुखलै आप्पी झाल़णैं का बाद बी बझ़ैल़ै इना का धैल़ तेतरी ई ईंटा बणाणैं। इना आसा कामां करना लै ज़ैंईं लागी दी, तैही बोला ईंयां इहअ, ‘हाम्हैं च़ाल्‍लै आपणैं परमेशरा लै बल़ीदान करदै डेऊई।’

9“इना इज़राईली का कराऊआ होर बी खास्सअ काम, ताकि इनो धैन नथोघी गल्‍ला दी नां डेओए।”

10तेखअ डेऊऐ तिंयां मुनशी इज़राईली कामां करनै आल़ै सेटा संघा बोलअ इहअ, “मिसर देशो माहा राज़अ बोला इहअ, ‘आझ़ा पोर्ही निं गारा जैंदरी मुछ़णा लै भुखलअ मुंह बाखा भेटणअ।

11“‘तम्हां ज़िधी बी भुखलअ भेटे, तम्हैं आणै तिधा का आप्पै झाल़ी, पर ईंटा बणाऐं तेतरी ई ज़ेतरी तम्हैं धैल़ बणाऊंदी आऐ।’”

12सोभै इज़राईली गलाम छिंघुऐ सारै मिसर देशै भुखलै लोल़ै। 13तिंयां मुनशी रहै तिन्‍नां का इहअ बोली होर बी खास्सअ काम कराऊंदै लागी, “ऐबै बी बणाआं धैल़ तेतरी ई ईंटा, ज़ेतरी तम्हैं राज़ै बाखा भुखलै भेटी करै बणाआं तै।”

14सिधअ इहअ निं, इज़राईली मांझ़ै ज़ुंण कामां करनै आल़ै प्रैंदै मेट थिऐ बणाऐं दै, तिन्‍नैं मुनशी लाऐ तिंयां इहअ पुछ़ी शोठै करै च़िक्‍की, “तम्हैं हिझ़ अर आझ़ गलामा का किल्है निं बझ़ैल़ी गणी करै तेतरी ई ईंटा बणाणैं ज़ेतरी तिंयां धैल़ बणाऊंदी आऐ?”

15ज़ुंण इज़राईली मांझ़ा का गलामा प्रैंदै मुनशी तै बणाऐं दै, खिरी डेऊऐ तिंयां मिसर देशे माहा राज़ै सेटा लै संघा लागै इहअ बोल्दै, “हाम्हां संघै किल्है लाअ तंऐं इहअ बभार करी? 16ऐबै निं हाम्हां लै कुंण गारी जैंदरी पाणा लै भुखलअ बी आणी दैंदअ अर तज़ी बी बोला हाम्हां लै कि धैल़ बणाआं तेतरी ईंटा ज़ेतरी धैल़ बणाऊंदी आऐ! कशूर आसा तेरै आपणैं लोगो अर मारी खांदै आसा धैल़ हाम्हैं लागै दै।”

17पर मिसर देशे माहा राज़ै दैनअ तिन्‍नां लै इहअ ज़बाब, “तम्हैं आसा नज़ाहणै, तम्हां हआ कामां लै ज़ैंईं लागी दी, तैही हआ तम्हैं नथोघी कांग लाई दी कि तम्हां दैआ थारै बिधाता लै बल़ीदान करदै डेऊणैं।

18“ऐबै डेओआ काम करा, भुखलअ बी आणा आप्पै झाल़ी, ईंटा बी लागणीं तम्हां तेतरी ई बणाणीं ज़ेतरी तम्हैं धैल़ बणाऊंदी आऐ।”

19राज़े इना गल्‍ला शूणीं गअ इज़राईली मुनशी का ज़ाण्हुंई कि ऐबै पल़ै तिंयां खास्सी खरी दी, ऐबै भुखलअ बी झाल़ा! ईंटा बी निं लोल़ी घटी!

20तिंयां निखल़ै मिसर देशे माहा राज़ै सेटा का बागै संघा डेऊऐ मोसा अर हारणा सेटा लै ज़ुंण बागै तिन्‍नां न्हैल़ै तै लागै दै।

21तिंयां लागै मोसा अर हारणा लै इहअ बोल्दै, “हाम्हैं बाहा एही कारी कि बिधाता दैऐ तम्हां दुही लै आप्पै सज़ा, किल्हैकि तम्हां पिछ़ू ज़िधूअ हाम्हां लै माहा राज़अ अर तेऊए कार-करिंदै, एऊ भान्‍नै आसा तिन्‍नैं हाम्हां मारना लै तलबारा च़की दी।”

मोसा खोज़ी बिधाता का खरी

22मोसा डेऊअ फिरी संघा लागअ बिधाता का खरी खोज़दअ, “हे बिधाता, मेरै मालक, तंऐं किल्है पाई आपणैं लोगा लै अह आफ़त? तंऐं कै एते तैणीं छ़ाडअ हुंह इधा लै?

23“ज़धा ओर्ही मंऐं तेरै नाओंऐं मिसर देशे माहा राज़ै सेटा गल्‍ला खोज़ी, तधा ओर्ही आणै तेऊ ईंयां लोग हारी-मारी अर तंऐं निं इना बच़ाऊंणा लै किज़ै धख बी किअ।”