लुआह 21

गलामे बारै बधान

(बधान 15:12-18)

1इज़राईली मणछा लै ज़ुंण बधान मनणै बिधाता ज़रूरी खोज़ै, तिंयां आसा इहै:

2“ज़ै तम्हां मांझ़ै कुंण कहा इब्रानी गलामा मोल लए, छ़हा साला तैणीं सका सह मालक तेऊ का आपणीं च़ाकरी कराऊई। पर सातुई साला करै तेऊ गलामी का आज़ाद, अर तेते बदल़ै निं तेऊ का किछ़ै मोल मांगी।1

3“ज़धू तेऊ सह गलाम हणां लै मोलै लअ, ज़ै तधू सह मणछ कल्ही होए आणअ द, तै दैऐ तेऊ कल्ही डेऊणैं, ज़ै तधू सह बैह करी होए आअ द, तै छ़ाडै तेऊ संघै तेऊए बेटल़ी बी संघा।

4“ज़ै तेऊओ बैह तंऐं आप्पू सेटा आणी बादा का होए किअ द, तेखअ आजू तिन्‍नें शोहरू-माठै होए हुऐ दै, तै दैऐ तेऊ कल्ही डेऊणैं अर तेऊए बेटल़ी-माठै दी हणअ तेऊ मालको हक।

5“पर ज़ै सह गलाम आप्पै बोले कि सह करा आपणैं मालक, बेटल़ी अर आपणैं शोहरू-माठै संघै खास्सी झ़ूरी अर सह निं आज़ाद हई डेऊणअ च़ाहंदअ, 6तेखअ निंयैं तेऊओ मालक तेऊ परमेशरे पबित्र ज़ैगा, संघा बिन्हैं दुआरे डेहल़ै बशैल़ी सुतरू करै तेऊए कान। तेखअ हणअ सह सारी अमरा लै तेरअ गलाम।

7“ज़ै कुंण मणछ आपणीं शोहरी गलाम हणां लै बेच़े, तैहा लै निं मर्धा गलामा ज़ेही डेऊणे छ़ूट आथी। 8ज़ुंणी मालकै तैहा संघै बैह किअ ज़ै सह शोहरी तेऊ संघै रहणा लै खुश नांईं होए। तैहा सका तेसो बाब मोल दैई बापस निंईं2। इहअ विश्वास घात करनै का बाद निं तेसे मालका तैहा परदेसी लै बेच़णेंओ हक आथी।

9“ज़ै तैहा गलाम शोहरीओ बैह तेऊ मालकै आपणैं शोहरू संघै होए किअ द, तै लागा सह तेऊ आपणीं शोहरी ज़ेही मनणी। 10ज़ै तेऊ मालको सह शोहरू तैहा रहंदी दुजअ बैह बी करे, तैबी लागणअ तेऊ पैहली लाल़ीओ खाणैं, बान्हणैं अर बेटल़ी हणैंओ हक पूरअ3 करनअ। 11ज़ै तैहा लै इना चिई गल्‍लो हक नांईं भेटे, तै सका सह बेटल़ी आज़ाद हई अर तेता लै निं तैहा किछ़ ढब्बै मोल दैणें ज़रुरत आथी।

ज़ुल्म अर कूट-मार करने बारै बधान

12“ज़ै कुंण मणछ कहा इहअ च़िक्‍के कि तेऊए मौत होए, तेते सज़ा बी आसा मौत।4 13पर ज़ै कहा लै इहअ होए कि सह निं कहा मारनअ च़ाहंदअ त, पर तेऊए भलै मूंअ कुंण इहअ ज़हा लै बिधाता तिहअ हणैं दैनअ, सह ठुर्है आप्पू बच़णा लै तैहा ज़ैगा, ज़ुंण मुंह तेता लै डाहणीं।5 14ज़ै कुंण ज़ाणीं-भुझ़ी करै कहा मारी पाए, सह मणछ निं बच़ी सकदअ, च़ाऐ सह मेरी बेदी दी किल्है निं होए ढाखुअ द, तेऊ निंयैं तिधा का पोर्ही घिशी मारना लै। 15ज़ुंण आपणैं ईजा-बाबा च़िक्‍के-मारे, तेते सज़ा बी आसा मौत।

16“ज़ै कुंण मणछ कहा होरी मणछा च़ोरी पाए अर तेऊ कहा लै बेच़ी पाए या आप्पू सेटा गलाम बणाईं डाहे, तेते सज़ा बी आसा मौत।6 17ज़ै कुंण आपणैं ईजा-बाबा लै फिटक दैए, तेते सज़ा बी आसा मौत।7

18“ज़ै कहा दूई ज़ण्हैं आप्पू मांझ़ै झ़गल़अ होए अर पात्थर अर धमुक्‍कै करै इहअ बाहे कि सह मणछ पल़अ आध मूंअ हई च़ैन्‍नै बमार, 19तेखअ बादा का ज़ै सह च़ैन्‍नै पल़अ द मणछ बादा का शोठिए आसरै बागै-भितरी हांढणै जोगी राम्बल़अ हई जाए, तेखअ आसा सह तेऊ च़िक्‍कणै आल़अ नर्दोश। पर तेऊ च़ैन्‍नै पल़ै दै मणछे ज़ेतरी हान्‍नी हुई तेते सांठ अर तेऊए लाज़ा-पुआईए ज़िम्मैंबारी आसा तेऊ च़िक्‍कणै आल़ै मणछे।

20“ज़ै कुंण आपणैं गलामा च़िक्‍के अर तेऊए च़िक्‍कणै करै तेऊ गलामे मौत होए, तेते सज़ा बी आसा मौत। 21पर ज़ै सह गलाम च़िक्‍कणै बाद थोल़ै धैल़ै ज़िऊंदअ रहे अर तेखअ मरे, तै निं तेऊ लै सज़ा दैई। किल्हैकि तेऊ गअ पैहलै ई तेऊ गलामो घाटअ हई, तेऊए ढब्बै अर ज़ैदात थिअ सह गलाम।

22“ज़ै कुंण मर्ध सुंदी बेटल़ी इहअ च़िक्‍के कि आप्पू ता बच़ी सह राम्बल़ी पर तेसे ओदरै तेता करै बच्च़अ मरे, तेता लै डेओऐ तैहा बेटल़ीओ मर्ध पांच़ा सेटा अर तेऊ च़िक्‍कणै आल़ै लागणीं तेतरी सांठ भरनीं ज़ेतरी तिंयां पांच़ फैंसलअ करे। 23पर ज़ै तैहा बेटल़ी खास्सी हान्‍नी होए, तेखअ आसा सज़ा ज़िन्दगीए बदल़ै ज़िन्दगी, 24आछिए बदल़ै आछ, दांदे बदल़ै दांद, हाथे बदल़ै हाथ, खूरे बदल़ै खूर,8 25दहणे बदल़ै पाऐ दहई, खाढे बदल़ै खाढ, गुम्बरे बदल़ै गुम्बर।

26-27“ज़ै कुंण आपणैं गलामा लै एही बाहे कि आछ ई फुटे, या तेऊओ दांद चुटे, सह करै तेऊ आपणैं गलामा तेऊए आछी फुटणै या तेऊए दांदा चुटणें बदल़ै आज़ाद।

डागै-धणा काबू करने बारै बधान

28“ज़ै बल्द कहा मर्धा या बेटल़ी आपणैं शींगा करै नच़ानक होझ बाही मारी पाए, तेऊ बल्दा पाऐ पात्थरो ढो दैई मारी, तेऊए शिखा निं लोल़ी कोही खाई अर तेऊ बल्दे मालको निं तेथ किछ़ै कशूर आथी। 29ज़ै तेऊ बल्दा पैहलै का होझा बाहणेंओ भैस्स होए अर तेऊए मालकै बोली बी सह बल्द बान्हीं निं डाहअ। तै पाऐ तेऊ बल्दा संघै तेऊए मालका बी पात्थरो ढो दैई मारी।

30“ज़ै कुंण आपणीं ज़िन्दगी बच़ाऊंणी च़ाहे, तै भरै सह तेतरी सांठ ज़ेतरी तेऊ का मांगे। 31अह बधान आसा सोभी लै एक्‍कै ज़िहअ, च़ाऐ सह मारदअ बल्द कहा शोहरू मारे या कहा शोहरी। 32ज़ै सह बल्द कहा गलामा मारे, तेता लै दैऐ सह बल्दो मालक तेऊ गलामे मालका लै तिह च़ंदीए सिक्‍कै अर तेऊ बल्दा पाऐ पात्थरो ढो दैई मारी।

33“ज़ै कुंणी मणछै बडी खात्ती खण्हीं करै घुआल़ी होए डाही दी अर तेथ कसरअ बल्द या गाधअ तैहा खात्ती दी पल़ी मरे, 34तेते सांठ भरै ढब्बै दैई सह खात्ती बणाणैं आल़अ तेऊ डागे मालका लै, अर तेऊ मूंऐं दै डागे ज़िम्मैंबारी हणीं तेऊ खात्ती आल़ेए।

35“ज़ै कसरअ बल्द कहा होरीए बल्दा मारी पाए। तिंयां बांडै तेऊ ज़िऊंदै बल्दा बेच़ी तेते ढब्बै आप्पू मांझ़ै अर ज़ुंण बल्द मूंअ सह बी हणअ तिन्‍नां दुहीओ। 36ज़ै इहअ थोघ लागी जाए कि बल्दा त जुझणै अर होझा दैणैंओ पैहलै का भैस्स पल़अ द अर तेऊ बल्दे मालकै निं सह गल़ैऊंडी बान्हीं डाहअ, तै लाणअ तेऊ बल्दे बदल़ै बल्द दैणअ अर मूंअ द बल्द हणअ तेऊए ज़िम्मैं।”