Kulvi Outer Seraji Bible
लुआह 10
आठुई आफ़त-रैट्टै
तेखअ बोलअ बिधाता मोसा लै इहअ, “मिसर देशे माहा राज़ै सेटा लै डेऊ, संघा भाल़, मंऐं किऐ राज़ै अर तेऊए कार-करिंदे मन्न होर बी काठै ताकि हुंह तिन्नां मांझ़ै च़मत्कार रहैऊं।
“अह किअ मंऐं एते तैणीं कि तम्हैं आजू आपणैं शोहरू अर पोचै का खोज़े कि मंऐं मिसर देशे लोगो आपणैं च़मत्कार रहैऊई किहअ सुहांग बणाअं। तेखअ लागणअ तम्हां सोभी का थोघ कि हुंह आसा बिधाता।”
मोसा अर हारण डेऊऐ मिसर देशे माहा राज़ै सेटा संघा बोलअ इहअ, “इब्रानी लोगो परमेशर बिधाता बोला इहअ, ‘ताह केभै तैणीं निं मेरी गल्ल शुणनी? मेरै लोगा दै डेऊणैं ताकि तिंयां मेरी च़ाकरी करी सके।
“‘ज़ै तूह आपणीं हठ नांईं छ़ाडे, मुंह छ़ाडणैं काल्ला तेरै सारै देशै एतरै रैट्टै, कि ताखा निं धरनीं सिऊंणी सहरना लै ज़ैगा बी शुझणीं। ज़ुंण पज़ैआ अर डाल़-बूट शरू का बच़ै तिंयां करनै तिन्नां रैट्टै खाई खतम।
“‘रैट्टै करै हणअ तेरअ मैहल भरी। तेरै कार-करिंदै अर सारै मिसर देशे लोगे घअर हणैं रैट्टै ई रैट्टै करै भरी। रैट्टै हणैं एतरै खास्सै कि थारै दाद-बाब ज़धू धरती दी ज़ल्मैं तधा ओर्ही आझ़ तैणीं निं एतरै रैट्टै कोही भाल़ै।’”
तेखअ फिरअ मोसा पिछ़ू संघा लागअ राज़ै सेटा का हांढदअ।
इना गल्ला शूणीं लागै मिसर देशे माहा राज़ेए कार-करिंदै तेऊ लै बोल्दै, “माहा राज़अ, अह ता फाही हुई! अह मणछ केभै तैणीं रहणअ हाम्हां लै आफ़त खल़ी करदअ लागी? तूह इना लोगा डेऊणैं किल्है निं दैंदअ कि तिंयां आपणैं परमेशर बिधाते च़ाकरी करे? ताखा कै शुझदअ निं आथी कि सारअ मिसर देश हुअ बरैबाद।”
तेखअ शादै मिसर देशे माहा राज़ै मोसा अर हारण बापस संघा बोलअ इहअ, “आछ़ा तै ठीक आ, तम्हैं लागा डेऊंदै संघा करा आपणैं परमेशर बिधाते च़ाकरी। पर तेता का आजी लआ मुखा खोज़ी कि कुंण-कुंण आसा च़ाल्लै दै डेऊई?”
मोसा दैनअ ज़बाब, “लान्हैं का प्रोढै तैणीं डेऊणैं सोभ। हाम्हां निंणै आपणैं शोहरू-शोहरी, भेडा-बाकरी, गाऊई-बल्द, गाधै-गाधी, ऊँटे हेल़्ही सोभै किल्हैकि हाम्हां मनाऊंणअ आपणैं बिधाता लै थैर।”
मिसर देशे माहा राज़ै बोलअ इहअ, “हुंह काढा तेऊ ई बिधाते सोह कि हुंह निं तम्हां थारै बेटल़ी-माठै निंणै दैंदअ, किल्हैकि मुखा आसा शुझदअ लागअ द कि एथ आसा थारी किज़ै बूरी च़ाल। नां, ऐहा गल्ला निं हुंह मंदअ, ज़ै सिधी अह गल्ल आसा कि तम्हां डेऊणअ बिधाता लै बल़ीदान करदै, तै डेओआ सिधै मर्ध ई मर्ध च़ाकरी करदै।”
इहअ बोली काढै मोसा अर हारण मिसर देशे माहा राज़ै सेटा का बागै।
बिधाता बोलअ तेखअ मोसा लै इहअ, “मिसर देशे ज़ैगा प्रैंदै कर आपणीं बाह आजू संघा दै ऐबै रैट्टै एछणैं। ज़ुंण नाज़ अर डाल़-बूट शरू का बच़ै, तिंयां करनै तिन्नां खाई खतम।”
मोसा किई आपणीं हांढणे शोठी आजू, बिधाता छ़ाडी तैहा धैल़ी अर तैहा राची मिसर देशा लै पुर्बा बाखा बागरी। दुजै धैल़ै दोत्ती आऐ तैहा बागरी संघै खास्सै रैट्टै।
सारै मिसर देशै भर्हुऐ रैट्टै ई रैट्टै। तिंयां थिऐ एतरै कि तधा का पैहलै निं मिसर देशै तिहै रैट्टै आऐ तै अर नां आजू कधू इहअ च़ाल्लअ हई त।1
धरनीं हुअ रैट्टै करै काल़अ ई काल़अ, तिन्नैं रैट्टै खाई सारी पज़ैआ ज़ुंण शरू का बच़ी ती। धरनीं अर डाल़ै-बूटै निं सारै मिसर देशै एक हरअ पाच बी बच़अ।
तेखअ शादै मिसर देशे माहा राज़ै छ़ेक्कै-छ़ेक्कै मोसा अर हारण संघा बोलअ तिन्नां लै, “मंऐं किअ तम्हां अर थारै परमेशर बिधाता लै पाप, ऐबै छ़ाडा तम्हैं मुल्है एकी बारी माफी संघा करा बिधाता का एही अरज़ कि ऐहा मारनै आल़ी सज़ा करा मुखा दूर।”
मोसा डेऊअ मिसर देशे माहा राज़ै सेटा का बागै संघा किई तेऊ बिधाता का अरज़।
तेखअ लाई बिधाता पछ़मा बाखा ढिश-बागरी संघा फर्ल़ाऊऐ तिंयां रैट्टै लाल समुंदरा लै, तेखअ निं मिसर देशै एक बी रैट्टअ रहअ।
पर बिधाता किअ मिसर देशे माहा राज़ैओ मन्न होर बी काठअ अर तेऊ निं तज़ी बी इज़राईली मिसर देशा का डेऊणैं दैणअ।
नहुई आफ़त-न्हैरअ
तेखअ बोलअ बिधाता मोसा लै इहअ, आपणअ हाथ कर उझै सरगा बाखा लै, सारै मिसर देशै लोल़ी इहअ नटिप्प न्हैरअ हुअ कि लोगा का ज़ाण्हिंए।
मोसा किअ आपणअ हाथ उझै सरगा बाखा लै, तेभा पोर्ही रहअ चिई धैल़ै तैणीं सारै मिसर देशै नटिप्प न्हैरअ हई।2 सह न्हैरअ त इहअ कि मिसर देशे लोगे निस्सै एकी दुजे मुंह बी शुझुई अर नां कुंण आपणैं घअरा का ओर्ही-पोर्ही डेऊऐ। पर ज़हा ज़ैगा इज़राईली रहा तै, तिधी थिअ राम्बल़अ प्रैश्शअ।
मिसर देशे माहा राज़ै शादअ मोसा अर हारण संघा बोलअ तिन्नां लै इहअ, “डेओआ, तम्हैं करा आपणैं बिधाते च़ाकरी, बेटल़ी माठै बी लागा तम्हैं आप्पू संघै निंदै। पर आपणीं भेडा-बाकरी, गाऊई-बल्द, गाधै-गाधी, ऊँटे हेल़्ही डाहा इधी।”
मोसा बोलअ, “इहअ निं हई सकदअ, हाम्हां लागणै आप्पू संघै डागै-चैणैं निंणै ताकि हाम्हैं बिधाता लै हूम बल़ी अर मेल़-ज़ोल़े बल़ी करी सके। किल्हैकि हाम्हां का निं थोघै कि तिधी पुजदी-पुजदी बिधाते च़ाकरी लै हाम्हां किहअ ज़िहअ बल़ीदान पल़े करनअ। तैही निं हाम्हैं आपणैं डागै-चैणैं इधी डाही सकदै।”
एभकी बारी बी किअ बिधाता मिसर देशे माहा राज़ैओ मन्न होर बी काठअ। तेखअ बोलअ मिसर देशे माहा राज़ै मोसा लै, “मेरी आछी सम्हनै का डेऊ दूर, ज़हा धैल़ी तूह मुंह सम्हनै भिई एछे, तूह पाणअ मुंह मारी।”
मोसा बोलअ, “ठीक आ, ऐबै निं हुंह ताह सेटा लै भिई एछदअ।”
Source notes (2)
- Cross-reference प्रका. 9:2,3
- Cross-reference भज. 105:28; प्रका. 16:10
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.